Taano ta Dapat Magtiripon?

BIGLA na sana, binayaan si Christine kan saiyang agom—pagkatapos nin 20 taon bilang mag-agom. Si Christine solo na sanang nagpadakula nin pitong aking lalaki asin sarong aking babae. Laen-laen an edad ninda poon 7 sagkod 18 anyos. “Ngonyan kaipuhan na ako na an gumibo kan gabos na mahalagang desisyon nin solo sana,” an sabi nia. “Nagagabatan ako huli sa paninimbagan na ini asin nangangaipo nanggad ako nin suporta saka paggiya.” Saen nia nakua an kaipuhan na tabang?

“An Kristianong mga pagtiripon an nagligtas sa sako asin sa sakong pamilya,” an sabi ni Christine. “Sa mga pagtiripon, nag-ako kami nin suporta hale sa samong mga katood asin paggiya gikan sa Tataramon nin Dios. An regular na pag-atender sa mga pagtiripon nakatabang sa samo sa gabos na mahalagang aspekto kan samong buhay pampamilya.”

Sa “delikadong mga panahon [na ini] na masakit pakibagayan,” gabos kita napapaatubang sa manlaenlaen na kasakitan. (2 Timoteo 3:1) Arog ni Christine, tibaad minamansay nindo an mga pagtiripon nin Mga Saksi ni Jehova bilang nagliligtas sa espirituwal na paagi, sarong mahalagang marhay na kabtang kan saindong pagsamba ki Jehova. Posibleng marhay na an limang pagtiripon kan kongregasyon na nakaiskedyul kada semana nakakapukaw sa saindong pagkamoot sa Dios, nakakapakosog sa saindong paglaom sa ngapit, asin nagtatao sa saindo nin paggiya na basado sa Biblia kun paano aatubangon an kasakitan.

Minsan siring, may mga nadedepisilan na umatender nin regular sa mga pagtiripon. Pagal-pagal na sinda sa katapusan kan aldaw, asin an pag-isip-isip na mabulos nin angay na gubing asin mabiahe pasiring sa pagtiripon tibaad garo baga nakakapanluya sa boot. An nagkapira nakakaeksperyensia na an saindang iskedyul sa trabaho regular na nakakaolang sa pag-atender ninda sa pagtiripon. Tanganing makaatender sa gabos na pagtiripon, kaipuhan nindang umako nin mas hababang sueldo o tibaad mameligro na mawaran sinda kan saindang trabaho. An nagkapira tibaad magpalta sa mga pagtiripon huli ta naghohona sinda na an sarong klase nin aling-alingan mas nakakaginhawa kisa pakikiasosyar sa kongregasyon.

Kaya, ano an mapuersang mga dahelan na umatender sa Kristianong mga pagtiripon? Paano nindo magigibong personalmenteng nakakaginhawa an siring na mga okasyon? Tanganing makatabang na simbagon an mga hapot na ini, siyasaton niato an mamomoton na pangagda ni Jesus na nakarekord sa Mateo 11:28-30. Sia nagsabi: “Madia kamo sa sako, kamo gabos na nagpapagal asin nagagabatan, asin papaginhawahon ko kamo. Pasana nindo an sakong sakal asin makanood kamo sa sako, huli ta ako mahoyo asin may kababaan an puso, asin makakakua kamo nin kaginhawahan para sa saindong kalag. Huli ta an sakong sakal maboot asin an sakong pasan magian.”

“Madia Kamo sa Sako”

Si Jesus nagsabi: “Madia kamo sa sako.” An sarong paagi na himateon an pangagdang iyan iyo an pag-atender nin regular sa mga pagtiripon. May marahay na dahelan na magin presente, huli ta sa saro pang pangyayari si Jesus nagsabi: “Kun saen may duwa o tolo na nagkakatiripon sa ngaran ko, yaon ako sa tanga ninda.”—Mateo 18:20.

Kan enot na siglo, personalmenteng inimbitaran ni Jesus an manlaenlaen na tawo na sumunod sa saiya. Sa siring, itinao nia sa sainda an oportunidad na dayupot na makiasosyar sa saiya. Tolos-tolos na inako iyan nin nagkapira. (Mateo 4:18-22) An iba tinogotan an mga bagay na arog baga nin materyal na intereses na makaolang sa sainda sa pag-ako kan pangagdang iyan. (Marcos 10:21, 22; Lucas 9:57-62) Sa mga nagsunod sa saiya, arog kaini an pampakosog liwat sa boot na sinabi ni Jesus: “Bako kamo an nagpili sa sako, kundi ako an nagpili saindo.”—Juan 15:16.

Pagkagadan asin pagkabuhay nia liwat, si Cristo bako nang presente sa pisikal kaiba kan saiyang mga disipulo. Alagad sia kaiba pa man giraray ninda sa sentido na giniyahan nia an saindang aktibidad asin inobserbaran nia an reaksion ninda sa saiyang hatol. Halimbawa, mga 70 taon pagkabuhay nia liwat, si Jesus nagtao nin hatol asin pagparigon sa boot sa pitong kongregasyon sa Asia Minor. An saiyang mga komento nagpaheling nin lubos na kaaraman sa mga kakosogan asin kaluyahan kan mga indibiduwal sa mga kongregasyon na idto.—Kapahayagan 2:1–3:22.

Si Jesus interesadong marhay sa lambang saro sa saiyang mga disipulo sagkod ngonyan. Sia nanunuga: “Uya! Ako kaiba nindo sa gabos na aldaw sagkod sa pagtatapos kan sistema nin mga bagay.” (Mateo 28:20) Nabubuhay na kita ngonyan sa panahon kan katapusan, asin kun siring kaipuhan niatong humiro kaoyon kan pangagda ni Jesus na sumunod sa saiya. Kabilang sa iba pang bagay, an paggibo kaiyan nagkakaipo na umatender kita nin regular sa mga pagtiripon. Gusto ni Jesus na maghinanyog kita sa saiya asin magin “natokdoan paagi sa saiya” paagi sa basado sa Biblia na mga pag-adal asin pahayag na regular na itinatampok sa mga pagtiripon. (Efeso 4:20, 21) Naghihimate daw kamo sa pangagda ni Jesus: “Madia kamo sa sako”?

‘Kamo na Nagpapagal Asin Nagagabatan’

An sarong mahalagang marhay na dahelan sa pag-atender sa Kristianong mga pagtiripon iyo an pag-ako nin pagparigon sa boot. (Hebreo 10:24, 25) Dakol sa sato an “nagpapagal asin nagagabatan” nanggad sa manlaenlaen na paagi. Tibaad nagagabatan kamo huli sa personal na mga kapurisawan, na arog baga nin mga problema sa salud. Sa Kristianong mga pagtiripon, ikakaogma nindo an pagparinigonan nin boot. (Roma 1:11, 12) Halimbawa, makakadangog kamo nin mga komento na nakakaparigon sa espirituwal, ipapagirumdom sa saindo an saindong paglaom na basado sa Biblia, asin maoobserbaran nindo an pagtubod nin iba na nagtatagal nin kasakitan. Gabos ini makakatabang sa saindo na atubangon asin pagdanayon na timbang an pagmansay nindo sa mga problema.

Isip-isipa an mga komento nin sarong Kristiana na nalilimitaran nin sarong pabalikbalik na helang. “Huli sa sakong helang kaipuhan kong magdanay nin pirang panahon sa ospital,” an paliwanag nia. “An pagduman sa mga pagtiripon pagkatapos na maospital puedeng medyo masakit, alagad iyan an lugar para sa sako. An mainit na pakikiiba asin pagkamoot kan mga tugang nakakadagdag sa sakong kagayagayahan, saka an pagtotokdo asin paggiya na itinatao ni Jehova patin ni Jesus nagtatao nin kahulogan sa sakong buhay.”

“An Sakong Sakal Maboot Asin an Sakong Pasan Magian”

Mangnoha na sa mga bersikulong sinisiyasat niato, si Jesus nagsabi: “Makanood kamo sa sako.” Paagi sa pakanood ki Jesus, kita nagigin saiyang mga disipulo, asin pinapasan niato an saiyang sakal kun kita magdusay sa Dios asin magpabautismo. (Mateo 28:19, 20) An regular na pakikikabtang sa mga pagtiripon mahalagang marhay sa satong pagdadanay na disipulo ni Jesus. Taano? Huli ta sa Kristianong mga pagtiripon kita tinotokdoan manongod ki Jesus, sa saiyang mga katokdoan asin pamamaagi.

Ano an pasan na gusto ni Cristo na pasanon niato? Iyan kapareho kan pasan nia mismo—an pribilehio nin paggibo kan kabotan nin Dios. (Juan 4:34; 15:8) Kaipuhan an paghihingoa tanganing kuyogon an mga togon nin Dios, alagad bako man magabaton an pasan na ini. Tibaad garo magabat iyan kun poprobaran niato na kita sana an magpasan kaiyan. Minsan siring, kun aarangon niato an espiritu nin Dios asin kakakanon an espirituwal na kakanon na iinaatubang sa mga pagtiripon, aakoon niato an tao nin Dios na “puersa na labi sa ordinaryo.” (2 Corinto 4:7) Paagi sa pag-andam para sa mga pagtiripon asin pakikikabtang sa mga iyan, paorog nang paorog na minakosog an pagkamoot niato ki Jehova. Asin kun kita minomotibar nin pagkamoot, an mga togon nin Dios “dai nakakapagabat.”—1 Juan 5:3.

An mga tawo sa pangkagabsan napapaatubang sa mga kadepisilan arog baga nin paghanap-buhay, pag-atubang sa mga problema sa salud, asin pagresolber sa personal na mga problema. Minsan siring, tanganing makaya iyan, dai kita nananarig sa kadonongan sana nin tawo. An mga pagtiripon kan kongregasyon nakakatabang sa sato na “dai na . . . magparahadit,” huli ta itinatao ni Jehova an mga pangangaipo niato asin tinatabangan kita na makaya an mga problema. (Mateo 6:25-33) Tunay nanggad, an Kristianong mga pagtiripon kapahayagan nin pagkamoot nin Dios sa sato.

“Ako Mahoyo Asin May Kababaan an Puso”

Kaugalean ni Jesus na dumalaw sa sinagoga, kun saen tinotokar an Tataramon nin Dios. Sa saro kan siring na pangyayari, kinua nia an balumbon ni Isaias asin binasa: “An espiritu ni Jehova yaon sa sako, huli ta linahidan nia ako na magpahayag kan maogmang bareta sa mga dukha, isinugo nia ako na maghulit nin pagkabutas sa mga bihag asin nin pagpauli kan pagheling sa mga buta, na magbutas sa mga inapi, na maghulit kan taon nin pag-ako ni Jehova.” (Lucas 4:16, 18, 19) Nakakapalukso nanggad nin puso na madangog si Jesus na inaplikar an mga tataramon na idto paagi sa pagsabi: “Ngonyan an kasuratan na ini na saindo pa sanang nadadangog naotob na”!—Lucas 4:21.

Si Jesus, an mahoyong “poon na pastor,” nagdidirehir sa espirituwal na pag-asikaso sa saiyang mga parasunod sagkod ngonyan. (1 Pedro 5:1-4) Sa saiyang pagdirehir, “an maimbod asin mapagmansay na oripon” nagnombra nin kalalakihan bilang mga pastor sa mga kongregasyon nin Mga Saksi ni Jehova sa bilog na kinaban. (Mateo 24:45-47; Tito 1:5-9) An kalalakihan na ini ‘nagpapastor sa kongregasyon nin Dios’ nin may kahoyoan asin nagtatao nin marahay na halimbawa paagi sa regular na pag-atender sa mga pagtiripon. Ikakapaheling nindo an saindong pag-apresyar sa “balaog na mga lalaki” na ini paagi sa pagigin presente sa mga pagtiripon, kun saen mapaparigon nindo an boot nin iba paagi sa saindong presensia asin pakikikabtang.—Gibo 15:30-33; 20:28; Efeso 4:8, 11, 12.

“Makakakua Kamo nin Kaginhawahan Para sa Saindong Kalag”

Kun nag-aatender sa Kristianong mga pagtiripon, paano kamo makakasegurado na an mga okasyon na ini talagang nakakaginhawa? An sarong paagi iyo na iaplikar an hatol ni Jesus: “Tawan nindo nin atension kun paano kamo naghihinanyog.” (Lucas 8:18) An mga tawong may makosog na pagmawot na makanood naghinanyog nin maingat ki Jesus. Sinda nakiolay sa saiya na ipaliwanag an saiyang mga ilustrasyon asin, bilang resulta, binalosan nin mas hararom na pakasabot.—Mateo 13:10-16.

Puede nindong arogon an siring na mga gutom sa espirituwal paagi sa odok na paghinanyog sa mga pahayag sa satong mga pagtiripon. (Mateo 5:3, 6) Tanganing makatabang na papagdanayon na nakakonsentrar an saindong isip, maghingoang sundan an pagkasunodsunod kan ideya asin argumento kan ispiker. Hapoton nindo an saindong sadiri nin siring kaini: ‘Paano ko ikakaaplikar an impormasyon na ini sa sakong buhay? Sa anong paagi ko iyan magagamit tanganing tabangan an iba? Paano ko puedeng iilustrar an puntong ini?’ Saro pa, hanapon an mga teksto na ginagamit kan ispiker tanganing suportaran an saiyang mayor na mga punto. Mientras na tinatawan nindo nin atension kun paano kamo naghihinanyog, nagigin orog man na nakakaginhawa an mga pagtiripon.

Pagkatapos kan pagtiripon, ipakipag-olay nindo sa iba an programa. Magkonsentrar sa pinag-adalan asin kun paano iyan ikakaaplikar. An nakakaparigon na mga pag-orolay ginigibong nakakapaginhawang marhay an mga pagtiripon.

Daing duda na igwa kita nin marahay na mga dahelan na magtiripon. Pagkatapos repasohon an mga pakinabang na tinokar pa sana, taano ta dai hapoton an saindong sadiri, ‘Paano ako naghihimate sa pangagda ni Jesus: “Madia kamo sa sako”?’

[Mga Ritrato sa pahina 11]

Nakakaolang daw an ibang mga aktibidad sa pag-atender nindo sa mga pagtiripon?