Sarong Tunay na Kristianong Pagtubod—Sarong Katunayan

SI Jesu-Cristo nagpatindog nin saro sanang iglesia, o kongregasyon. An kongregasyon na iyan sarong espirituwal na hawak, sarong espirituwal na pamilya. An boot niatong sabihon kaini iyo na iyan sarong pagtipon sa mga tawo na pinili kan banal na espiritu nin Dios​—na an gabos rinerekonoser nin Dios na “mga aki” nia.​—Roma 8:​16, 17; Galacia 3:26.

Itinokdo ni Jesus na saro sanang dalan an ginamit nin Dios sa paggiya sa mga tawo pasiring sa katotoohan asin sa buhay. Tanganing iilustrar an mahalagang katotoohan na iyan, ikinomparar ni Jesus sa sarong tinampo an dalan pasiring sa buhay na daing katapusan. Sabi nia: “Maglaog kamo sa tatang hayakpit, huli ta halakbang asin mahiwas an dalan na pasiring sa kalaglagan, asin dakol an mga nagraralaog dian; mantang hayakpit an tata asin piot an dalan na pasiring sa buhay, asin diit an mga nakakukua kaiyan.”​—Mateo 7:​13, 14; Juan 14:6; Gibo 4:​11, 12.

Nagkakasararong Kongregasyon

Maninigong dai niato pag-isipon na an kongregasyon kan enot na siglo “sarong pambilog na kinaban, lakop sa uniberso, organisadong sosyedad arog kan boot niatong sabihon ngonyan na mga aldaw kun pinag-oolayan niato an manongod sa iglesia katolika,” an sabi kan The New Dictionary of Theology. Taano ta dai? “Huli sa simpleng dahelan,” an sabi kaiyan, “na an siring na organisado asin lakop sa unibersong sosyedad dai nag-eksister.”

Mayo ni saro na tamang makakokontra sa katunayan na an enot na Kristianong kongregasyon dai lamang nakakapareho sa inorganisar na mga sistema sa iglesia na naheheling niato ngonyan. Alagad organisado iyan. An indibiduwal na mga kongregasyon dai nagpunsionar na suway sa lambang saro. Rinekonoser ninda gabos an autoridad nin sarong namamahalang grupo sa Jerusalem. An grupong iyan​—na kompuesto kan mga apostol asin kamagurangan na lalaki kan kongregasyon sa Jerusalem​—nakatabang tanganing maingatan an pagkasararo kan kongregasyon bilang “sarong hawak” ni Cristo.​—Efeso 4:​4, 11-16; Gibo 15:22-31; 16:​4, 5.

Ano an nangyari sa sarong tunay na kongregasyon na iyan? Iyan daw nagin an poderosong Iglesia Katolika? Iyan daw luway-luway na nagin mga denominasyon asin nagkasuruhaysuhay na sistema nin iglesiang Protestante na naheheling niato ngonyan? O may iba pa daw na nangyari?

“Trigo” Asin “mga Doot”

Tanganing makua an simbag, maingat niatong estudyaran kun ano an sinabi mismo ni Jesu-Cristo na mangyayari. Tibaad masorpresa kamong maaraman na inasahan ni Jesus na mawawara sa pagheling an saiyang kongregasyon asin na itotogot niang magpadagos an siring na mamondong kamugtakan sa laog nin dakol na siglo.

Ipinapareho an saiyang kongregasyon sa “kahadean kan kalangitan,” sia nagsabi: “An kahadean kan kalangitan nakakaagid sa sarong tawo na nagsabwag nin marahay na banhi sa saiyang oma. Mantang natotorog an mga tawo, nagdatong an saiyang kaiwal asin nagsabwag nin mga doot sa tanga kan trigo, asin naghale. Kan an dahon sumupang na asin magbunga, tuminunga man an mga doot. Kaya an mga oripon kan kagharong nagdaratong asin nagsarabi sa saiya, ‘Kagurangnan, bako daw na marahay na banhi an isinabwag mo sa saimong oma? Kun siring, paano iyan nagkaigwa nin mga doot?’ Sia nagsabi sa sainda, ‘Sarong kaiwal, sarong lalaki, an guminibo kaini.’ Sinda nagsarabi sa saiya, ‘Ano boot mo na kami pumaduman asin tiponon mi an mga iyan?’ Sia nagsabi, ‘Dai; ta tibaad, sa pagtipon kan mga doot, magabot nindong kaiba ninda an trigo. Pabayai nindong tumubo sindang magkaibanan sagkod sa pag-ani; asin sa tig-anihan sasabihan ko an mga paraani, Tiponon nguna nindo an mga doot asin goygoyon nindo tanganing soloon, dangan tiponon nindo an trigo sa sakong tambobong.’”​—Mateo 13:24-30.

Ipinaliwanag ni Jesus na sia an “nagsabwag.” An “marahay na banhi” naglaladawan sa saiyang tunay na mga disipulo. An saiyang “kaiwal” iyo si Satanas na Diablo. “An mga doot” iyo an palsipikadong mga Kristiano na nakalaog sa enot na Kristianong kongregasyon. Sinabi nia na pababayaan niang tumubong magkaibanan an “trigo” asin “an mga doot” sagkod sa “pag-ani,” na maabot sa “sarong pagtatapos nin sarong sistema nin mga bagay.” (Mateo 13:37-43) Ano daw an kahulogan kaini gabos?

Naraot an Kristianong Kongregasyon

Dai nahaloy pagkagadan kan mga apostol, an apostatang mga paratokdo hale sa laog kan kongregasyon nagpoon na kontrolon iyan. Nagtaram sinda nin “biribid na mga bagay tanganing maguyod ninda sa sainda an mga disipulo.” (Gibo 20:​29, 30) Bilang resulta, dakol na Kristiano an ‘suminuhay sa pagtubod.’ Sinda ‘kuminiling sa falsong mga estorya.’​—1 Timoteo 4:1-3; 2 Timoteo 4:​3, 4.

Pag-abot kan ikaapat na siglo C.E., sabi kan The New Dictionary of Theology, “an Kristianismong Katoliko nagin an opisyal . . . na relihion kan Imperyo nin Roma.” “Pinagsalak an sosyedad kan iglesia asin sibil”​—pagsasaro nin Iglesia asin Estado na kontrang marhay sa mga paniniwala kan enot na mga Kristiano. (Juan 17:16; Santiago 4:4) Nagsasabi an iyo man sanang reperensia na pag-abot nin panahon, an bilog na estruktura asin kahulogan kan iglesia, saka an dakol sa pundamental na mga paniniwala kaiyan, biglang binago “sa irarom kan impluwensia nin nali asin salang marhay na kombinasyon kan D[aan] na T[ipan] asin neoplatonikong mga arogan.” Siring kan ihinula ni Jesu-Cristo, an tunay niang mga disipulo nawara sa pagheling mantang an palsipikadong mga Kristiano duminakol.

Aram kan mga nagdadangog ki Jesus kun gurano kadepisil na mamidbid an kalaenan kan tunay na trigo sa mga doot, arog kan nakakahilo asin mabarahibong darnel, na sa panahon nin pagtubo an itsura kaparehong marhay kan trigo. Kaya iiniilustrar ni Jesus na sa laog nin kadikit na panahon, magigin depisil na mamidbid an kalaenan kan tunay na mga Kristiano sa palsipikadong klase. Dai man ini nangangahulogan na nawara na an Kristianong kongregasyon, huli ta si Jesus nanuga na padagos niang gigiyahan an saiyang espirituwal na mga tugang “sagkod sa pagtatapos kan sistema nin mga bagay.” (Mateo 28:20) Sinabi ni Jesus na an trigo padagos na matubo. Dawa siring, sa nag-aging mga panahon, daing duda na ginibo kan tunay na mga Kristiano​—bilang mga indibiduwal o grupo​—an saindang pinakamakakaya na susogon an mga katokdoan ni Cristo. Alagad bako na sindang kompuesto nin sarong malinaw na namimidbid asin naheheling na grupo, o organisasyon. Bako nanggad sindang kapareho kan naheheling na apostatang sistema nin relihion na sa bilog na kasaysayan mayong itinao kundi kasusupgan asin kalapastanganan sa ngaran ni Jesu-Cristo.​—2 Pedro 2:​1, 2.

‘Nahayag an Tawo nin Katampalasanan’

May ihinula pa si apostol Pablo na magigin tanda kan palsipikadong sistemang ini nin relihion. Isinurat nia: “Dai kamo magpadaya sa kiisay man sa ano man na paagi, huli ta [an aldaw ni Jehova] dai maabot kun dai nguna mangyari an apostasiya asin mahayag an tawo nin katampalasanan.” (2 Tesalonica 2:2-4) An “tawo nin katampalasanan” na ini daing iba kundi an grupong klero na ilinangkaw an sadiri sa posisyon nin pamamahala sa “Kristianong” kongregasyon.a

An apostasiya nagpoon kan kaaldawan ni apostol Pablo. Ruminikas an pag-oswag kaiyan kan nagadan an mga apostol asin nawara an nakapopogol na impluwensia ninda. Tatandaan iyan, sabi ni Pablo, kan “paghiro ni Satanas paagi sa lambang makapangyarihan na gibo asin putik na mga tanda asin mga ngangalasan asin paagi sa lambang bikong pandadaya.” (2 Tesalonica 2:6-12) Eksakto nanggad na ilinaladawan kaiyan an mga aktibidad kan kadakol na namomoon sa relihion sa bilog na kasaysayan!

Bilang pagsuportar sa saindang paghingako na an Romanong Katolisismo an solamenteng tunay na iglesia, an Katolikong mga namomoon nagsasabi na an saindang mga obispo “minana an saindang pagkaapostol sa orihinal na mga apostol paagi sa pagsalihid na poon pa kan kapinonan.” An totoo, an paghihingakong ini nin pagigin kasalihid kan mga apostol mayo nin basehan sa kasaysayan o sa Kasuratan. Mayo nin masasarigan na prueba na an sistema nin iglesia na naglataw pagkagadan kan mga apostol ni Jesus giniyahan kasuarin man kan banal na espiritu nin Dios.​—Roma 8:9; Galacia 5:19-21.

Asin kumusta man an iba pang iglesia na marikas na nagralataw kasunod kan Reporma daa? Sinunod daw ninda an arogan kan enot na Kristianong kongregasyon? Ibinalik daw ninda an kadalisayan kan orihinal na Kristianong kongregasyon? Totoo na kasunod kan Reporma, an Biblia madali nang makua kan dakol na ordinaryong tawo sa sadiri nindang lenguahe. Pero, ipinaheheling kan kasaysayan na padagos na itinokdo kan mga iglesiang ini an salang mga doktrina.b​—Mateo 15:7-9.

Minsan siring, mangnohon ini. Talagang ihinula ni Jesu-Cristo na an solamenteng tunay na kongregasyon nia ibabalik liwat durante kan inaapod niang sarong pagtatapos nin sarong sistema nin mga bagay. (Mateo 13:​30, 39) An kaotoban kan mga hula sa Biblia nagpapaheling na kita nabubuhay na sa panahon na iyan. (Mateo 24:3-35) Mantang iyan totoo, an lambang saro sa sato kaipuhan na maghapot, ‘Haen an solamenteng tunay na iglesiang iyan?’ Dapat na iyan paorog nang paorog na nagigin mas madaling mamidbid.

Tibaad nagsasaboot kamo na nanompongan na nindo an iglesia, o kongregasyon, na iyan. Mahalaga na seguradohon nindo. Taano? Huling arog kan enot na siglo, igwa nin saro sanang tunay na iglesia. Nagtao na daw kamo nin panahon tanganing siertohon na an saindong iglesia maingat na nagsusunod sa arogan na ipinaheling kan enot na siglong Kristianong kongregasyon asin na iyan maimbod na nagsususog sa mga katokdoan ni Jesu-Cristo? Taano ta dai ini siyasaton ngonyan? An mga Saksi ni Jehova maoogmang tabangan kamo na gibohon mismo iyan.​—Gibo 17:11.

[Mga Nota sa Ibaba]

[Mga Ritrato sa pahina 5]

Ano an itinotokdo sa sato kan ilustrasyon ni Jesus kan trigo asin mga doot manongod sa tunay na kongregasyon?

[Mga Ritrato sa pahina 7]

Ipinababanaag daw kan saindong iglesia an arogan na ipinaheling kan enot na siglong mga Kristiano kun dapit sa paghuhulit asin pag-adal?