Nagtukdo Manungod sa Diborsiyo Asin Pagkamuot sa mga Aki

Hali sa Galilea, nagbalyo si Jesus asin an mga disipulo sa Salog nin Jordan asin nagpatimog para umagi sa Perea. Kan huring pagduman ni Jesus sa Perea, sinabi niya sa mga Fariseo an pamantayan nin Diyos dapit sa diborsiyo. (Lucas 16:18) Ibinangon ninda ngunyan an temang iyan para purbaran siya.

Isinurat ni Moises na an sarong agom na babayi puwedeng idiborsiyo kun may madiskubre sa saiya na sarong “bagay na makasusupog.” (Deuteronomio 24:1) Magkakalain an pagmansay dapit sa kun ano talaga an mga basehan sa pagdiborsiyo. May mga naniniwala na dawa an saradit na bagay kaiba sa siring na mga basehan. Kaya naghapot an mga Fariseo: “May deretso daw an sarong lalaki na idiborsiyo an saiyang agom base sa ano man na klase nin mga dahilan?”—Mateo 19:3.

Imbes na makiayon sa opinyon nin mga tawo, sinambit ni Jesus an areglo nin Diyos sa pag-aguman. “Dai nindo nabasa na an saro na naglalang sa sainda sa kapinunan ginibo sindang lalaki asin babayi? Dai man nindo nabasa na sinabi niya: ‘Huli kaini babayaan nin lalaki an saiyang ama asin an saiyang ina saka magdadanay siyang kaibanan kan saiyang agom, asin an duwa magigin sarong laman’? Kaya sinda bako nang duwa, kundi sarong laman. Kun siring, an pinagsaro nin Diyos dai pagsuwayon nin siisay man na tawo.” (Mateo 19:4-6) Kan establisaron nin Diyos an pag-aguman paagi ki Adan asin Eva, dai siyang itinaong probisyon para tapuson iyan.

May ibinangon na isyu an mga Fariseo: “Kun siring, taano ta ipinagbuot ni Moises na magtao an lalaki nin sertipiko nin pagsuwayan tanganing idiborsiyo an saiyang agom?” (Mateo 19:7) An simbag ni Jesus: “Dahil sa katagasan kan saindong puso, tinugutan kamo ni Moises na idiborsiyo an saindong mga agom na babayi, pero bakong arog kaiyan an kamugtakan sa kapinunan.” (Mateo 19:8) An “kapinunan” na iyan bako kan panahon ni Moises kundi kan establisaron nin Diyos an pag-aguman sa Eden.

Dangan sinabi ni Jesus an sarong mahalagang katotoohan: “Sinasabi ko sa saindo na an siisay man na dumiborsiyo sa saiyang agom na babayi, apuwera sana kun dahil sa nagibo kaini na seksuwal na imoralidad [sa Griego, por·neiʹa], asin mag-agom nin iba nakakagibo nin pagsambay.” (Mateo 19:9) Kun siring, an seksuwal na imoralidad sana an suno sa Kasuratan na basehan para sa pagdiborsiyo.

Huli kaini, nagsabi an mga disipulo: “Kun iyan an sitwasyon nin lalaki sa agom niya, mas marahay pang dai mag-agom.” (Mateo 19:10) Malinaw na kun an saro nagpaplanong mag-agom, dapat niyang tandaan nanggad na iyan permanente!

Kun mapadapit sa pagigin daing agom, ipinaliwanag ni Jesus na may mga dai nag-aagom huling namundag na may depekto, na huli kaiyan daing kakayahan na magkaigwa nin seksuwal na relasyon. An iba dai nag-aagom huli ta an hawak ninda rinaot nin mga tawo, kaya dai sinda nin kakayahan na magkaigwa nin seksuwal na relasyon. Pero, an nagkapira pinupugulan an pagmawot nindang magkaigwa nin seksuwal na relasyon. Ginigibo ninda ini para mas lubos na makakonsentrar sa mga bagay na pang-Kahadian. “An makakatao nin lugar para [sa pagigin daing agom] magtao nin lugar para diyan,” an pangagda ni Jesus sa mga nagdadangog.—Mateo 19:12.

Dinara ngunyan kan mga tawo ki Jesus an saindang sadit na mga aki. Pero, sinaway sinda kan mga disipulo, ta tibaad habo nindang maisturbo kaini si Jesus. Pagkahiling kaini, naanggot si Jesus asin sinabihan sinda: “Pabayai nindong magdulok sa sako an mga aki; dai nindo sinda pagpugulan, huli ta para sa mga arog ninda an Kahadian nin Diyos. Sinisigurado ko sa saindo, an siisay man na dai minaako sa Kahadian nin Diyos nin siring sa sadit na aki dai nanggad makakalaog diyan.”—Marcos 10:14, 15; Lucas 18:15.

Marahayon nanggad na leksiyon! Tanganing maako ta an Kahadian nin Diyos, dapat kitang magin mahuyo asin madaling tukduan siring sa sadit na mga aki. Ipinahiling ngunyan ni Jesus an pagkamuot sa sadit na mga aki paagi sa pagkugos asin pagbendisyon sa sainda. Asin igwa siya kan siring na pagkamuot sa gabos na “minaako sa Kahadian nin Diyos nin siring sa sadit na aki.”—Lucas 18:17.