Pinakalma ni Jesus an Subasko sa Dagat

Nagin sibot asin mapagal an bilog na maghapon ni Jesus. Kan banggi na, sinabi niya sa mga disipulo: “Magbalyo kita sa ibong na baybayon,” sa ibong na tampi kan dagat hali sa Capernaum.—Marcos 4:35.

Yaon sa sirangan na baybayon kan Dagat kan Galilea an rehiyon kan mga Geraseno. Inaapod man iyan na Decapolis. Baga man an mga siyudad kan Decapolis sarong sentro kan kulturang Griego, dakul man na Judio an nakaistar diyan.

May mga nakahiling ki Jesus kan maghali siya sa Capernaum huling may iba pang mga sakayan na nakapuon na maglayag kasabay ninda. (Marcos 4:36) Bako man talagang harayo an ibong na tampi. An Dagat kan Galilea garo sarong dakulang danaw na tubig-tabang, na mga 21 kilometros an laba asin mga 12 kilometros an pinakahalakbang na parte. Pero bako iyan hababaw.

Dawa ngani perpektong tawo si Jesus, natural sana na mapagal siya huli sa pagigin sibot sa gibuhon. Kaya kan maglayag na sinda, naghigda siya sa hurihan na parte kan sakayan, nag-ulunan, asin napaturog.

An nagkapira sa mga apostol mahuhusay maglayag, pero dai magigin pasil an pagbiyaheng ini. May nakapalibot na mga bulod, asin sa parati medyo mainit an ibabaw kan Dagat kan Galilea. Kun minsan, an mas malipot na duros sa mga bulod marikas na minapaibaba sa mainit na tubig sa ibabaw kan dagat kaya biglang nagkakaigwa nin makusugon na alipuros. Iyan na an nangyayari. Dai nahaloy sinasalpok na kan mga alon an sakayan. Nagpuon iyan na “mapano nin tubig saka mameligro.” (Lucas 8:23) Pero, turog pa man giraray si Jesus!

Nataranta an mga paralayag sa pagmaniobra kan sakayan, na ginagamit an saindang eksperyensiya sa mga subaskong inagihan na ninda kaidto. Pero iba ngunyan. Huli sa takot na tibaad magkagaradan sinda, pinukaw ninda si Jesus asin nagsabi: “Kagurangnan, iligtas mo kami, magagadan na kami!” (Mateo 8:25) Natatakot an mga disipulo na malunod sinda!

Kan mapagmata si Jesus, sinabi niya sa mga apostol: “Ano ta takuton kamo? Kakadikit kan saindong pagtubod.” (Mateo 8:26) Dangan pinagbutan ni Jesus an duros asin an dagat: “Pundo! Magtuninong ka!” (Marcos 4:39) Puminundo an makusugon na duros asin kuminalma an dagat. (Sa salaysay ni Marcos asin Lucas manungod sa pangyayaring ini, inot nindang idinuon an milagrosong pagpakalma ni Jesus sa subasko, dangan sinambit ninda an kawaran nin pagtubod kan mga disipulo.)

Imahinara na sana an epekto kaini sa mga disipulo! Nahiling pa sana ninda na biyong kuminalma an makusugon na subasko. Nakamati sinda nin grabeng takot. Nagsarabi sinda sa lambang saro: “Siisay man nanggad ini? Maski an duros asin an dagat nagsusunod sa saiya.” Asin ligtas sindang nakabalyo sa ibong na tampi kan dagat. (Marcos 4:41–5:1) Posibleng an ibang mga sakayan na naglayag nakabalik sa sulnupan na baybayon.

Nakakapakusog nanggad na maaraman na an Aki nin Diyos may kapangyarihan na kontrulon an kamugtakan nin panahon! Kun itao na niya sa daga an saiyang bilog na atensiyon durante kan saiyang pamamahala sa Kahadian, an gabos na tawo mamumuhay nin tiwasay, huling dai na magkakaigwa nin nakakatakot na natural na mga kalamidad!