Maogma an mga Nagpupuka!

“Uya! ako madatong siring sa parahabon. Maogma an saro na nagpupuka asin iniingatan an saiyang pan-ibabaw na mga gubing.”​—KAPAHAYAGAN 16:15.

 1. Mantang harani na an aldaw ni Jehova, ano an malalaoman niato?

HARANI na an dakulang aldaw ni Jehova, asin iyan nangangahulogan nin ralaban! Sa bisyon, naheling ni apostol Juan an garo talapang na “mga tataramon na ipinasabong nin mga demonyo” na nagduduman sa gabos na “hade,” o namamahala, sa daga. Tanganing gibohon an ano? Tara, “tanganing tiriponon sinda sa ralaban kan dakulang aldaw nin Dios na Makakamhan sa gabos”! Idinugang ni Juan: “Sinda tiniripon ninda sa lugar na sa Hebreo inaapod Har-Magedon.”​—Kapahayagan 16:​13-16.

 2. Siisay si Gog nin Magog, asin ano an mangyayari kun salakayon nia an banwaan ni Jehova?

² Sa dai na mahahaloy, pahihiroon ni Jehova an politikal na elemento kan palakaw na ini na laglagon an Dakulang Babilonya, an pankinaban na imperyo nin falsong relihion. (Kapahayagan 17:​1-5, 15-​17) Dangan si Gog nin Magog, si Satanas na Diablo na ibinaba digdi sa palibot kan daga, oorganisaron an saiyang mga kadaklan asin todo-todong sasalakayon an matoninong, garo baga daing depensang banwaan ni Jehova. (Ezequiel 38:​1-​12) Alagad ta mahiro an Dios tanganing sukorohan an saiyang banwaan. Iyan an masenyalar kan biglang pag-abot kan “dakula asin makangingirhat na aldaw ni Jehova.”​—Joel 2:31; Ezequiel 38:​18-​20.

 3. Paano nindo ilaladawan an mga pangyayari na ihinula sa Ezequiel 38:​21-23?

³ Iyo, susukorohan ni Jehova an saiyang banwaan asin lalaglagon an pinakaultimong gira kan palakaw ni Satanas kun makaabot na kita sa situwasyon kan kinaban na inaapod Har–​Magedon, o Armagedon. Basaha an makahulang mga tataramon kan Ezequiel 38:​21-​23, asin imahinara an eksena. Ginagamit ni Jehova an saiyang kapangyarihan tanganing papangyarihon an nakalalantop na baha, nakalalaglag nin biyo na mga gapong graniso, minakurit na kalayo, nakagagadan na peste. An takot nangingibabaw sa bilog na kinaban mantang an mga kadaklan ni Gog riniribaraw, na nagraralabanlaban. An siisay man na natatada pang kaiwal kan Dios na Makakamhan sa gabos gagadanon mantang ginagamit ni Jehova an mga paaging lihis sa natural tanganing iligtas an saiyang mga lingkod. Kun matapos na an ihinulang “dakulang kahorasaan,” mayo na lamang nin matatada sa maraot na palakaw ni Satanas. (Mateo 24:21) Minsan siring, dawa sa saindang paghigagdan, maaaraman kan mga maraot kun siisay an responsable sa saindang kalamidad. An mapanggana niatong Dios mismo nagsasabi: “Kaipuhan na makaaram sinda na ako si Jehova.” An ekstraordinaryong mga pangyayaring ini mangyayari sa satong aldaw, durante kan presensia ni Jesus.

Madatong Siring sa Parahabon

 4. Sa anong paagi na si Jesus madatong tanganing laglagon an maraot na palakaw nin mga bagay na ini?

⁴ An pinamuraway na Kagurangnan na Jesu-Cristo nagsabi: “Uya! ako madatong siring sa parahabon.” An pagdatong na siring sa parahabon magigin bigla, sa panahon na dai linalaoman, kun torog an kadaklan na tawo. Kun si Jesus dumatong siring sa parahabon tanganing laglagon an maraot na palakaw na ini, ililigtas nia idtong mga talagang nagpupuka. Sinabihan nia si Juan: “Maogma an saro na nagpupuka asin iniingatan an saiyang pan-ibabaw na mga gubing, tanganing dai sia maglakaw na huba asin maheling kan mga tawo an saiyang kasopganan.” (Kapahayagan 16:15) Ano an kahulogan kan mga tataramon na idto? Asin paano kita makapagpupuka sa espirituwal?

 5. Ano an areglo sa paglilingkod sa templo kaidtong si Jesus yaon digdi sa daga?

⁵ Sa pankagabsan, an sarong guardia dai huhubaan kun sia mapatorog mantang nasa trabaho. Alagad iyan nangyari sa templo sa Jerusalem kan si Jesus yaon digdi sa daga asin naglilingkod sa templo sa Jerusalem an grupo-grupong mga saserdote asin Levita. Kaidtong ika-11 siglo B.C.E. na inareglar ni Hadeng David an ginatos na saserdote sa Israel asin an rinibo nindang katabang na Levita sa sarong organisasyon na kompuesto nin 24 grupo. (1 Cronica 24:​1-18) An kada grupo nin labing sangribo na sinanay na trabahador may turno sa pag-asikaso sa mga kabtang nin paglilingkod sa templo kisuerra duwang beses kada taon na tigsarong semana. Pero sa Kapiestahan nin mga Payag-Payag, an 24 grupo gabos yaon tanganing magtrabaho. Kaipuhan man an dagdag na tabang kun mga kapiestahan nin Paskua.

 6. Ano an tibaad nasasambitan ni Jesus kan sia magsabi, “Maogma an saro na nagpupuka asin iniingatan an saiyang pan-ibabaw na mga gubing”?

⁶ Kan si Jesus magsabi, “Maogma an saro na nagpupuka asin iniingatan an saiyang pan-ibabaw na mga gubing,” tibaad nasasambitan nia an prosedimiento na sinusunod kaidto na may labot sa pagguguardia sa templo. An Judiong Mishnah nagsasabi: “An mga saserdote nagbabantay sa tolong lugar sa Templo: sa Kuarto ni Abtinas, sa Kuarto kan Laad, asin sa Kuarto kan Dapog; asin an mga levita sa beinte-unong lugar: lima sa limang tata kan Bukid kan Templo, apat sa apat na kanto kaiyan sa laog, lima sa lima kan mga tata kan Patyo kan Templo, apat sa apat na kanto kaiyan sa luwas, asin saro sa Kuarto nin mga Dolot, asin saro sa Kuarto kan Lipod, asin saro sa likod kan namumugtakan kan Trono nin Pagkaherak [sa luwas kan lanob sa likod kan Kabanalbanale]. An opisyal kan Bukid kan Templo linilibot an lambang bantay na may naglalaad na mga karaba sa enotan nia, asin kun may siisay man na bantay na dai tumindog asin magsabi sa saiya, ‘O opisyal kan Bukid kan Templo, mapasaimo an katoninongan!’ asin risa na sia natotorog, ini saiyang papakolon kan saiyang sogkod, asin may katanosan sia na soloon an gubing kaini.”​—The Mishnah, Middoth (“Mga Sokol”), 1, parapo 1-2, trinadusir ni Herbert Danby.

 7. Taano ta kaipuhan na magpuka an mga saserdote asin Levita na guardia sa templo?

⁷ An dakol na Levita asin saserdote na kabilang sa grupong naglilingkod nagpupuka nin bilog na banggi tanganing magguardia asin dai palaogon an siisay man na marompot sa mga patyo kan templo. Mantang linilibot kan “opisyal kan Bukid kan Templo,” o “kapitan kan templo,” an gabos na 24 puesto durante kan mga pagbantay sa banggi, an kada bantay kaipuhan na magpuka sa saiyang puesto kun habo niang madakop na nagpapabaya.​—Gibo 4:1.

 8. Ano an piguratibong pan-ibabaw na mga gubing kan Kristiano?

⁸ An linahidan na mga Kristiano asin an saindang mga kapwa lingkod kaipuhan na magpuka sa espirituwal asin papagdanayon na sulot an saindang piguratibong pan-ibabaw na mga gubing. An mga ini panluwas na mga ebidensia kan pagkanombra sa sato sa ministeryo sa espirituwal na templo ni Jehova. Bilang pagmidbid digdi, yaon sa sato an banal na espiritu, o puersa aktiba, nin Dios tanganing tabangan kita na magibo an satong mga obligasyon asin maotob an satong mga pribilehio bilang mga parabalangibog kan Kahadean. An pagkatorog sa satong puesto bilang mga ministro nin Dios magsasapeligro sa sato na madakop ni Jesu-Cristo, an Kapitan kan dakulang espirituwal na templo. Kun kita torog sa espirituwal sa panahon na iyan, sa piguratibong paagi kita huhubaan asin sosoloon an satong simbolikong mga gubing. Kaya paano daw kita makapagpupuka sa espirituwal?

Kun Paano Kita Makapagpupuka

 9. Taano ta mahalagang marhay an pag-adal sa Biblia sa tabang nin Kristianong mga publikasyon?

⁹ An maigot na pag-adal kan Kasuratan sa tabang kan Kristianong mga publikasyon pampabagsik sa pagigin puka sa espirituwal. An siring na pag-adal sasangkapan kita para sa ministeryo, tatabangan kita na maatubang an mga krisis, asin gigiyahan kita sa dalan pasiring sa daing sagkod na kaogmahan. (Talinhaga 8:​34, 35; Santiago 1:​5-8) Maninigo na detalyado asin progresibo an satong pag-adal. (Hebreo 5:​14​–​​6:3) An marahay na kakanon na regular na kinakakan makatatabang na kita magdanay na puka asin listo. Masusumpo kaiyan an abnormal na pagtungka na tibaad senyal nin malnutrisyon. Mayo kita nin dahelan na magkulang sa sustansia asin magtungka sa espirituwal, huli ta an Dios nagtatao nin abundang probisyon para sa espirituwal na kakanon paagi sa linahidan na “fiel asin madonong na oripon.” (Mateo 24:​45-​47) An regular na pagkakan nin espirituwal na kakanon paagi sa personal asin pampamilyang pag-adal sarong paagi na magpuka asin “magin marahay an salud sa pagtubod.”​—Tito 1:13.

10. Paano an Kristianong mga pagtiripon, asamblea, asin kombension nakatatabang sa sato na magpuka sa espirituwal?

¹⁰ An Kristianong mga pagtiripon, asamblea, asin kombension nakatatabang na kita magdanay na puka sa espirituwal. An mga iyan nagtatao nin pagparigon sa boot asin mga oportunidad na ‘mandagka an lambang saro sa pagkamoot asin sa marahay na mga gibo.’ Nangorogna kita na maninigong magtiripon nin regular mantang ‘naheheling niato na an aldaw harani na.’ An aldaw na iyan talagang harani na ngonyan. Iyan “aldaw ni Jehova,” na sa panahon na iyan ibibindikar nia an saiyang soberaniya. Kun an aldaw na iyan talagang mahalaga sa sato​—asin maninigo—​‘dai niato pababayaan an satong pagtorotiripon.’​—Hebreo 10:​24, 25; 2 Pedro 3:10.

11. Taano ta masasabi na an Kristianong ministeryo mahalagang marhay sa pagigin puka sa espirituwal?

¹¹ An bilog na pusong pakikikabtang sa Kristianong ministeryo mahalagang marhay sa pagigin puka sa espirituwal. Pinapagdadanay kitang listo nin regular asin maigot na pakikikabtang sa paghuhulit kan maogmang bareta. An satong ministeryo nagtatao sa sato nin dakol na oportunidad na kaolayon an mga tawo manongod sa Tataramon nin Dios, sa saiyang Kahadean, asin sa saiyang mga katuyohan. Nakakokontento na magpatotoo sa harong-harong, gumibo nin mga pagdalaw liwat, asin magkondukta nin mga pag-adal sa Biblia sa mga publikasyon na arog kan Kaaraman na Minagiya Pasiring sa Buhay na Daing Katapusan. An kamagurangan sa suanoy na Efeso makapagpapatotoo na tinokdoan sinda ni Pablo “sa publiko asin sa pagharongharong.” (Gibo 20:​20, 21) Siempre, an nagkapirang fiel na Saksi ni Jehova may magagabat na problema sa salud na medyo nakaoolang sa saindang ministeryo, alagad nakahahanap sinda nin mga paagi na sabihan an iba manongod ki Jehova saka sa saiyang pagkahade asin nakakukua nin dakulang kagayagayahan sa paggibo kaiyan.​—Salmo 145:​10-​14.

12, 13. Sa anong mga dahelan na maninigo niatong likayan an pagpalabilabi sa kakanon asin inomon?

¹² An paglikay sa pagpalabilabi makatatabang sa sato na magpuka sa espirituwal. Kan nagtataram manongod sa saiyang presensia, sinadol ni Jesus an saiyang mga apostol: “Atenderan an saindong sadiri na an saindong mga puso dai mapagabatan nin sobrang pagkakan asin makosog na pag-inom patin mga kahaditan sa buhay, asin sa panale an aldaw na iyan mag-abot sa saindo na siring sa sarong siod. Huli ta madatong iyan sa gabos na nag-eerok sa ibabaw kan bilog na daga.” (Lucas 21:​7, 34, 35) An pagkaonason asin pagbuburat bakong oyon sa mga prinsipyo kan Biblia. (Deuteronomio 21:​18-​21) An Talinhaga 23:​20, 21 nagsasabi: “Dai ka makiiba sa mga makosog na parainom nin arak, sa mga paslong parakakan nin karne. Huli ta an paraburat asin paslo magigin dukha, asin an pagtungka magubing sa saro nin mga trapo.”​—Talinhaga 28:7.

¹³ Minsan siring, dawa kun an sobrang pagkakan asin makosog na pag-inom dai pa nakaabot sa puntong iyan, an mga iyan puedeng gibohon an sarong tawo na tungka, hugakon asin pabaya pa ngani sa paggibo kan kabotan nin Dios. Naturalmente, magkakaigwa nin mga kahaditan may labot sa buhay pampamilya, salud, asin iba pa. Pero, kita maoogma kun eenoton niato sa buhay an intereses kan Kahadean asin makasasarig na susustentohan kita kan satong langitnon na Ama. (Mateo 6:​25-34) Ta kun dai, “an aldaw na iyan” maabot sa sato na siring sa “sarong siod,” tibaad siring sa dai risang atbong na bigla na sana kitang dadakopon o siring sa litag na may paon, arog kan nakaaakit sa dangan nakadadakop nin mga hayop na daing pag-aram-aram. Ini dai mangyayari kun kita magpupuka, na biyong nakaaaram na kita nabubuhay sa “panahon kan katapusan.”​—Daniel 12:4.

14. Taano ta maninigo kitang odok na mamibi?

¹⁴ An odok na pamibi saro pang tabang sa pagigin puka sa espirituwal. Sa saiyang dakulang hula, isinadol pa ni Jesus: “Magpuka kamo, kun siring, na sa gabos na panahon nagngangayongayo na magin kamong mapanggana sa pagdulag sa gabos na ining bagay na nakatalagang mangyari, asin sa pagtindog sa atubangan kan Aki nin tawo.” (Lucas 21:36) Iyo, ipamibi niato na logod kita magdanay sa lado ni Jehova asin aprobado kun si Jesus, an Aki nin tawo, dumatong na sa paglaglag sa maraot na palakaw nin mga bagay na ini. Para sa ikararahay niato asin sa ikararahay nin mga kapagtubod na ipinamimibi niato, kaipuhan na kita ‘magdanay na puka sa pamimibi.’​—Colosas 4:​2; Efeso 6:​18-​20.

Mauubos Na an Panahon

15. Ano an nagigibo kan satong paglilingkod bilang mga parahulit nin katanosan?

¹⁵ Mantang hinahalat niato an dakulang aldaw ni Jehova, daing duda na mawot niatong gibohon an gabos niatong makakaya sa paglilingkod sa saiya. Kun kita odok na mamimibi sa saiya manongod digdi, tibaad mabukasan sa sato an “sarong dakulang tata na pasiring sa gibohon.” (1 Corinto 16:​8, 9) Sa itinalaan na panahon nin Dios, maghohokom si Jesus asin ibubulag an matanos na “mga karnero” na maninigo sa buhay na daing katapusan sa maraot na “mga kanding” na maninigo sa daing sagkod na kalaglagan. (Juan 5:22) Bako kita an nagbubulag kan mga karnero sa mga kanding. Alagad an paglilingkod niato ngonyan bilang mga parahulit nin katanosan nagtatao sa mga tawo kan oportunidad na pilion an buhay nin paglilingkod sa Dios asin sa siring magkaigwa kan paglaom na ikabulag pasiring sa buhay kun si Jesus “magdatong na sa saiyang kamurawayan.” An kahalipotan kan panahon na natatada para sa palakaw nin mga bagay na ini nagpapaorog kan pangangaipo nin bilog na pusong aktibidad mantang hinahanap niato an mga “may tamang tendensia sa buhay na daing katapusan.”​—Mateo 25:​31-46; Gibo 13:48.

16. Taano ta maninigo kitang magin maigot na mga parabalangibog kan Kahadean?

¹⁶ Naubos an panahon para sa kinaban kaidtong aldaw ni Noe, asin sa dai na mahahaloy iyan mauubos para sa palakaw nin mga bagay na ini. Kun siring, magin kitang maigot na mga parabalangibog kan Kahadean. Nagigin mapanggana an satong paghuhulit, ta kada taon ginatos na ribo an nababautismohan bilang simbolo kan saindang pagdusay sa Dios. Sinda nagigin kabtang kan maogmang organisasyon ni Jehova​—“an saiyang banwaan asin an mga karnero kan saiyang pasabsaban.” (Salmo 100:3) Kanigoan na kagayagayahan na makikabtang sa paghuhulit kan Kahadean na nagtatao nin paglaom sa kadakol bago an “dakula asin makangingirhat na aldaw ni Jehova”!

17, 18. (a) Mantang kita naghuhulit, anong reaksion an maninigo niatong laoman sa nagkapira? (b) Ano an seguradong maabot sa mga paraolog-olog?

¹⁷ Kapareho ni Noe, yaon sa sato an pagsuportar asin pagprotehir nin Dios. Iyo, an mga tawo, an nagmateryalisar na mga anghel, asin an mga Nefilim seguradong pinagtuya an mensahe ni Noe, alagad ta dai iyan nakapaontok sa saiya. Ngonyan, nagtutuya an nagkapira kun itinotokdo niato an dakulaon na ebidensia na kita nabubuhay sa “huring mga aldaw.” (2 Timoteo 3:​1-5) An siring na pag-olog-olog kaotoban kan hula sa Biblia mapadapit sa presensia ni Cristo, huli ta si Pedro nagsurat: “Sa huring mga aldaw an mga paraolog-olog madatong na may pag-olog-olog, na maglalakaw sono sa saindang mga horot asin magsasarabi: ‘Haen man ining ipinanugang presensia nia? Tara, poon kan aldaw na an satong mga kag-anak magtorog sa kagadanan, an gabos na bagay pareho man sana poon kan kapinonan nin paglalang.’”​—2 Pedro 1:​16; 3:​3, 4.

¹⁸ An mga paraolog-olog na yaon ngonyan tibaad mag-isip: ‘Mayo man nin nababago poon kan paglalang. Nagpapadagos an buhay, na an mga tawo nagkakakan, nag-iinom, nag-aagom, asin nagpapamilya. Dawa presente si Jesus, dai sia mahokom sa kaaldawan ko.’ Sala sindang marhay! Kun mientras tanto dai sinda magadan huli sa ibang dahelan, an makangingirhat na aldaw ni Jehova siertong aabotan sinda, kun paanong an kapahapahamak na pagkalaglag sa Baha tuminapos sa maraot na kapag-arakian kan aldaw ni Noe.​—Mateo 24:34.

Magpuka Nanggad Kita!

19. Ano an maninigong magin punto de vista niato manongod sa satong mga aktibidad na paggibo nin disipulo?

¹⁹ Kun kita nagdusay ki Jehova, logod na dai kita noarin man mapatorog huli sa salang pangangatanosan. Ini panahon na magpuka, gumibo nin pagtubod sa hula nin Dios, asin otobon an sugo sa sato na “gumibo kamo nin mga disipulo sa mga tawo kan gabos na nasyon.” (Mateo 28:​19, 20) Mantang an palakaw na ini napapaatubang sa ultimong katapusan kaiyan, mayo na kita nin magigin pribilehio na mas dakula kisa sa paglilingkod ki Jehova Dios sa irarom kan pangengenot ni Jesu-Cristo asin pakikikabtang sa pambilog na kinaban na paghuhulit kan “maogmang baretang ini kan kahadean” bago dumatong an katapusan.​—Mateo 24:14; Marcos 13:10.

20. Anong halimbawa an itinao ni Caleb asin Josue, asin ano an ipinaririsa para sa sato kan saindang iginawe?

²⁰ An iba sa banwaan ni Jehova dakol nang dekada na naglilingkod sa saiya, tibaad sa bilog na buhay. Asin dawa kun bago pa sana niatong maogmang inako an tunay na pagsamba, kita logod magin arog kan Israelitang si Caleb, na “lubos na nagsunod ki Jehova.” (Deuteronomio 1:​34-​36) Sia asin si Josue andam nang lumaog sa Dagang Panuga dai nahaloy pagkakalda kan Israel sa kaoripnan sa Egipto. Minsan siring, an nasa edad nang mga Israelita sa pankagabsan kulang nin pagtubod asin kinaipuhan na mag-40 taon sa kaawagan, na duman sinda nagadan. Si Caleb asin Josue nagtagal nin mga kasakitan kaiba ninda sa bilog na panahon na idto, alagad sa kahurihurihi an duwang tawong idto naglaog sa dagang panuga. (Bilang 14:​30-​34; Josue 14:​6-​15) Kun kita ‘lubos na masunod ki Jehova’ asin magpupuka sa espirituwal, makakamtan niato an kagayagayahan na lumaog sa ipinanugang bagong kinaban nin Dios.

21. Ano an maeeksperyensiahan niato kun kita magpupuka sa espirituwal?

²¹ Malinaw na pinatutunayan nin ebidensia na kita nabubuhay sa panahon kan katapusan asin na harani na an dakulang aldaw ni Jehova. Bako ini an panahon na magtungka asin magin pabaya sa paggibo kan kabotan nin Dios. Bebendisyonan sana kita kun kita magpupuka sa espirituwal asin iingatan an satong mga gubing na midbidan bilang Kristianong mga ministro asin lingkod ni Jehova. Magin determinasyon logod niato na ‘magpuka, manindogan na marigon sa pagtubod, magpakalalaki, magin makosog.’ (1 Corinto 16:13) Bilang mga lingkod ni Jehova, an lambang saro logod sa sato magin marigon asin mapuso. Kun siring makakabilang kita kan mga andam kun an dakulang aldaw ni Jehova umabot na, na fiel na naglilingkod kaiba kan mga maogma na nagpupuka.

Ano an Isisimbag Nindo?

◻ Paano nindo tatawan nin kahulogan an satong piguratibong pan-ibabaw na mga gubing, asin paano niato iyan maiingatan?

◻ Ano an nagkapirang paagi na makapagpuka sa espirituwal?

◻ Taano ta maninigo niatong laoman an mga paraolog-olog, asin ano an maninigong magin punto de vista niato manongod sa sainda?

◻ Ano an maninigong magin punto de vista niato manongod sa satong paggibo nin disipulo sa huring mga aldaw na ini?

[Blurb sa pahina 16]

An mga Kristiano igwa kan banal na espiritu nin Dios na matabang sa sainda na magpuka asin otobon an saindang mga obligasyon

[Retrato sa pahina 15]

Determinado daw kamo na magpuka sa espirituwal asin papagdanayon na sulot an saindong piguratibong pan-ibabaw na mga gubing?