LEKSIYON 03
Makakapagtiwala Ka Daw sa Sinasabi kan Bibliya?
An Bibliya igwa nin dakul na pangako asin mga giya. Posibleng interesado ka sa sinasabi kaiyan, pero siyempre gusto mong makasigurado. Dapat ka daw magtiwala sa mga pangako saka paggiya kan arog kaiyan kalumang libro? Kapaki-pakinabang pa daw talaga ngunyan an sinasabi kan Bibliya saka makakapagtiwala daw kita sa sinasabi kaiyan manungod sa maabot? Milyon-milyon an kumbinsido diyan. Magayon kun aaramon mo man kun taano.
1. Totoo daw an sinasabi kan Bibliya o uruistorya sana?
Sinasabi kan Bibliya na an laog kaiyan “tamang mga tataramon nin katotoohan.” (Eclesiastes 12:10) Nagsasaysay iyan nin totoong mga pangyayari saka totoong mga tawo. (Basahon an Lucas 1:3; 3:1, 2.) Kinumpirmar kan dakul na historyador asin arkeologo na tama an mga petsa, tawo, lugar, saka pangyayari na sinambit sa Bibliya.
2. Taano ta makakapagtiwala kita sa Bibliya dawa lumang libro na iyan?
May mga impormasyon na nainot nang sinambit sa Bibliya bago pa iyan madiskubre. Halimbawa, may mga sinambit iyan manungod sa siyensiya. Kadaklan diyan dai pinapaniwalaan kan mga tawo kan panahon na isurat iyan. Pero kinukumpirmar kan modernong siyensiya na tama an sinasabi kan Bibliya. “Pirming masasarigan an mga iyan, ngunyan asin sagkod pa man.”—Salmo 111:8.
3. Taano ta makakapagtiwala kita sa sinasabi kan Bibliya manungod sa mangyayari sa maabot?
May mga propesiyaa sa Bibliya na sinasabi “an mga bagay na dai pa nagigibo.” (Isaias 46:10) Eksaktong nagkaurutob an dakul na makasaysayan na mga pangyayari na ihinula kaiyan. Detalyado man na sinabi kaiyan an mga kamugtakan sa kinaban na nangyayari na sa ngunyan. Sa leksiyon na ini, pag-uulayan ta an pirang propesiya sa Bibliya. Kahanga-hanga an pagigin eksakto kaiyan!
ARAMON PA
Aramon kun paanong an modernong siyensiya uyon sa sinasabi kan Bibliya, asin siyasaton an pira sa kahanga-hangang mga propesiya sa Bibliya.
4. Uyon an siyensiya sa sinasabi kan Bibliya
Kan suanoy na mga panahon, naniniwala an kadaklan na an planetang Daga nakapatong sa sarong bagay. I-play an VIDEO.
Pag-isipan an sinasabi sa libro nin Job mga 3,500 na taon na an nakaagi. Basahon an Job 26:7, dangan pag-ulayan an hapot na ini:
Taano ta makangangalas an sinabi sa tekstong iyan na “ibinibitin an daga sa mayo”?
Mga 200 na taon pa sana an nakaagi kan malinaw na nasabutan an siklo nin tubig. Pero mangnuhon an sinabi kan Bibliya rinibong taon na an nakaagi. Basahon an Job 36:27, 28, dangan pag-ulayan an mga hapot na ini:
Taano ta kahanga-hanga an simpleng paliwanag na ini manungod sa siklo nin tubig?
Napakusog daw kan mga tekstong binasa mo an pagtitiwala mo sa Bibliya?
5. Ihinula kan Bibliya an importanteng mga pangyayari
Basahon an Isaias 44:27–45:2, dangan pag-ulayan an hapot na ini:
Anong mga detalye an ihinula kan Bibliya manungod sa Babilonya 200 na taon bago an pagbagsak kaiyan?
Pinapatunayan kan kasaysayan na sinakop ni Hading Ciro kan Persia asin kan saiyang hukbo an siyudad kan Babilonya kan 539 B.C.E.b Pinalikaw ninda an tubig kan salog na nagpoprotektar sa siyudad. Napabayaan na bukas an mga trangkahan kaya nakalaog sinda sa siyudad asin nasakop iyan na mayong nangyaring ralaban. Ngunyan, pakalihis nin labing 2,500 na taon, an Babilonya enterong garaba pa man giraray. Siyasaton an ihinula kan Bibliya manungod diyan.
Basahon an Isaias 13:19, 20, dangan pag-ulayan an hapot na ini:
Paano nautob an propesiyang ini?
An garabang siyudad nin Babilonya na mahihiling ngunyan sa Iraq
6. Ihinula kan Bibliya an manungod sa mga nangyayari ngunyan
Inaapod sa Bibliya an panahon na kinabubuhayan ta na “huring mga aldaw.” (2 Timoteo 3:1) Hilingon an ihinula kan Bibliya manungod diyan.
Basahon an Mateo 24:6, 7, dangan pag-ulayan an hapot na ini:
Ano an sinasabi kan Bibliya manungod sa mga mangyayari sa huring mga aldaw?
Basahon an 2 Timoteo 3:1-5, dangan pag-ulayan an mga hapot na ini:
Ano an sinasabi kan Bibliya manungod sa magigin ugali kan dakul na tawo sa huring mga aldaw?
Arin sa mga ugaling iyan an nahihiling mo ngunyan?
MAY MGA NAGSASABI: “Mga uruistorya man sana saka alamat an laog kan Bibliya.”
Para saimo, ano an pinakanakakakumbinsir na patunay na mapagtitiwalaan an Bibliya?
SUMARYO
Ipinapahiling kan kasaysayan, siyensiya, asin mga propesiya na makakapagtiwala ka sa Bibliya.
Rebyu
Totoo daw an sinasabi kan Bibliya o mga uruistorya sana?
Ano an pirang halimbawa na nagpapahiling na uyon an siyensiya sa sinasabi kan Bibliya?
Sa hiling mo, makakapagtiwala daw talaga kita sa mga propesiya kan Bibliya? Taano ta nasabi mo iyan?
HILINGON MAN
May sala daw na impormasyon sa Bibliya pag nagsasambit iyan manungod sa siyensiya?
“Magkauyon Daw an Siyensiya Asin an Bibliya?” (Artikulo sa jw.org/bcl)
Ano an mangyayari sa “huring mga aldaw”?
“6 na Propesiya sa Bibliya na Nahihiling Mong Nauutob Na” (An Torrengbantayan, Mayo 1, 2011)
Aramon kun paano nagkatotoo an mga propesiya kan Bibliya manungod sa Imperyo nin Grecia.
Aramon kun paano nabago an opinyon nin sarong lalaki manungod sa Bibliya kan mabasa niya an mga propesiya kaiyan.
a Kaiba sa mga propesiya an mga mensahe nin Diyos manungod sa mga mangyayari sa maabot na panahon.
b An B.C.E. nangangahulugan na “Before the Common Era,” asin an C.E. nangangahulugan na “Common Era.”