Hula ni Isaias—Liwanag Para sa Bilog na Katawohan II

Kapitulo Beinte-Dos: Nagsusupang an Katanosan sa Sion

Isaias 61:1-11

1, 2. Anong pagbabago an madali nang mangyari sa Israel, asin siisay an mapangyari kaini?

IBALANGIBOG an katalingkasan! Nagdesisyon si Jehova na patalingkason an saiyang banwaan asin ibalik sinda sa daga kan saindang mga apoon. Siring sa sarong banhi na minasupang pagkatapos nin maluyang oran, an tunay na pagsamba malataw giraray. Kun dumatong na an aldaw na iyan, an pagkadesesperar masasalidahan nin magayagayang pag-omaw, asin an mga payo na dati natatakopan nin abo nin pagmondo makokoronahan nin pag-oyon nin Dios.

² Siisay an mapangyari kan makangangalas na pagkaliwat na ini? Si Jehova sana an makagigibo nin siring na bagay. (Salmo 9:​19, 20; Isaias 40:25) Si propeta Sofonias makahulang nagboot: “Kumagsing ka na may kagayagayahan, O aking babae kan Sion! Magkurahaw ka sa kaogmahan, O Israel! Maggayagaya ka asin magrukyaw sa bilog na puso, O aking babae kan Jerusalem! Hinale ni Jehova an mga paghokom sa saimo.” (Sofonias 3:​14, 15) Magigin magayagayang panahon nanggad iyan! Kan tiponon na ni Jehova an ibinalik na natatada hale sa Babilonya kan 537 B.C.E., garo ini sarong pangarap na nagkatotoo.​—Salmo 126:1.

 3. Anong mga kaotoban igwa an makahulang mga tataramon kan Isaias kapitulo 61?

³ An pagbabalik na ini ihinula sa Isaias kapitulo 61. Minsan siring, minsan ngani malinaw na naotob an hulang iyan kan 537 B.C.E., iyan maootob nin mas detalyado sa huri. An mas detalyadong kaotoban may labot ki Jesus asin sa saiyang mga parasunod kan enot na siglo asin sa banwaan ni Jehova sa presenteng mga panahon. Kun siring, makahulogan nanggad an ipinasabong na mga tataramon na ini!

“Taon nin Marahay na Boot”

 4. Siisay an isinugo na magsabi kan maogmang bareta sa enot na kaotoban kan Isaias 61:​1, asin siisay an sa ikaduwa?

⁴ Si Isaias nagsurat: “An espiritu kan Soberanong Kagurangnan na Jehova yaon sa sako, huli ta linahidan ako ni Jehova na magsabi kan maogmang bareta sa mga mahoyo. Isinugo nia ako sa pagpaomay sa mga nasasakitan an puso, sa pagbalangibog nin katalingkasan sa mga nabihag asin sa pagpabuklat sa mga mata kan mga bilanggo.” (Isaias 61:1) Siisay an isinugo na magsabi kan maogmang bareta? Posibleng marhay na kan enot si Isaias, na pinasabngan nin Dios na isurat an maogmang bareta para sa mga bihag sa Babilonya. Minsan siring, itinokdo ni Jesus an pinakamahalagang kaotoban kan iaplikar nia sa saiyang sadiri an mga tataramon ni Isaias. (Lucas 4:16-21) Iyo, isinugo si Jesus tanganing magsabi kan maogmang bareta sa mga mahoyo, asin sa katuyohan na ini sia linahidan nin banal na espiritu kan sia bautismohan.​—Mateo 3:​16, 17.

 5. Sairisay an haloy nang naghuhulit kan maogmang bareta sa laog nin mga 2,000 na taon?

⁵ Dugang pa, tinokdoan ni Jesus an saiyang mga parasunod na magin mga ebanghelisador, o parahulit kan maogmang bareta. Kan Pentecostes 33 C.E., mga 120 sa mga ini an linahidan nin banal na espiritu asin nagin espirituwal na mga aki nin Dios. (Gibo 2:1-4, 14-42; Roma 8:14-16) Isinugo man sinda na magsabi kan maogmang bareta sa mga mahoyo asin nasasakitan an puso. An 120 idto an enot sa 144,000 na linahidan sa paaging ini. An natatada sa grupong ini aktibo pa sa daga ngonyan. Huli kaini, sa laog nin mga 2,000 na taon, an linahidan na mga parasunod ni Jesus haloy nang nagpapatotoo “manongod sa pagsolsol sa Dios asin pagtubod sa satong Kagurangnan na si Jesus.”​—Gibo 20:21.

 6. Sairisay an naginhawahan kan madangog an maogmang bareta na ihinulit kan suanoy na mga panahon, asin kumusta man ngonyan?

⁶ An ipinasabong na mensahe ni Isaias nagtao nin kaginhawahan sa nagsosolsol na mga Judio sa Babilonya. Kan kaaldawan ni Jesus asin kan saiyang mga disipulo, nagtao iyan nin kaginhawahan sa mga Judio na nasasakitan an puso huli sa karatan sa Israel asin nanluluya na huli sa pagkabihag sa falsong relihiosong mga tradisyon kan Judaismo kan enot na siglo. (Mateo 15:3-6) Ngonyan minilyon na nasiod kan paganong mga kostumbre kan Kakristianohan asin mga tradisyon na naglalapastangan sa Dios an “nag-aaragagha asin nag-aaragrangay” huli sa makauuyam nin makuring mga bagay na ginigibo sa relihiosong sistema na iyan. (Ezequiel 9:4) An mga naghihimate sa maogmang bareta napatatalingkas sa kaherakherak na kamugtakan na iyan. (Mateo 9:35-38) An saindang mga mata nin pakasabot lubos na nabubukasan kun manodan ninda na sambahon si Jehova “sa espiritu asin katotoohan.”​—Juan 4:24.

7, 8. (a) Ano an duwang “taon nin marahay na boot”? (b) Ano an mga “aldaw nin pamalos” ni Jehova?

⁷ May iskedyul para sa paghuhulit kan maogmang bareta. Si Jesus asin an saiyang mga parasunod isinugo: “[Ibalangibog an] taon nin marahay na boot ni Jehova asin kan aldaw nin pamalos kan satong Dios; [rangahon an] gabos na nagtatangis.” (Isaias 61:2) Halawig na panahon an sarong taon, alagad iyan may kapinonan asin katapusan. An “taon nin marahay na boot” ni Jehova iyo an peryodo na durante kaiyan tinatawan nia nin oportunidad an mga mahoyo na maghimate sa saiyang pagbalangibog nin katalingkasan.

⁸ Kan enot na siglo, an taon nin marahay na boot para sa mga Judio nagpoon kan 29 C.E. kan ponan ni Jesus an saiyang ministeryo sa daga. Sinabihan nia an mga Judio: “Magsorolsol kamo, huli ta an kahadean kan kalangitan harani na.” (Mateo 4:17) Nagpadagos an taon nin marahay na boot na iyan sagkod “kan aldaw nin pamalos” ni Jehova, na uminabot sa kulminasyon kan 70 C.E. kan pabayaan ni Jehova na laglagon kan mga hukbong Romano an Jerusalem asin an templo kaiyan. (Mateo 24:3-22) Nabubuhay kita ngonyan sa saro pang taon nin marahay na boot, na nagpoon kan maestablisar an Kahadean nin Dios sa kalangitan kan 1914. An taon nin marahay na boot na ini matatapos sa saro pang mas lakop na aldaw nin pamalos kun laglagon na ni Jehova an enterong sistemang ini nin mga bagay kan kinaban sa “dakulang kahorasaan.”​—Mateo 24:21.

 9. Sairisay ngonyan an nakikinabang sa taon nin marahay na boot ni Jehova?

⁹ Siisay an nakikinabang ngonyan sa taon nin marahay na boot nin Dios? Idtong mga nag-aako kan mensahe, nagpapaheling nin kahoyoan, asin maigot na nagsusuportar sa pagbalangibog kan Kahadean nin Dios sa “gabos na nasyon.” (Marcos 13:10) Nanonompongan kan mga siring na nagtatao nin tunay na karangahan an maogmang bareta. Minsan siring, idtong mga hinahaboan an mensahe, nagsasayumang aprobetsaran an taon nin marahay na boot ni Jehova, madali nang umatubang sa katunayan kan saiyang aldaw nin pamalos.​—2 Tesalonica 1:6-9.

Espirituwal na Bunga na Nagpapamuraway sa Dios

10. Paano naapektaran an mga Judiong nagpuli hale sa Babilonya kan dakulang bagay na ginibo ni Jehova para sa sainda?

¹⁰ Nakaaaram an mga Judiong nagpuli hale sa Babilonya na si Jehova may ginibong dakulang bagay para sa sainda. An saindang pagmondo bilang mga bihag naribayan nin labi-labing kagayagayahan asin pag-omaw huli ta talingkas na sinda sa katapustapusi. Sa siring, inootob ni Isaias an makahulang sugo sa saiya, an boot sabihon, “tanganing talaanan an mga nagtatangis sa Sion, sa pagtao sa sainda nin korona na karibay kan abo, nin lana nin labi-labing kagayagayahan na karibay kan pagtangis, nin gubing nin kaomawan na karibay kan espiritu nin panluluya nin boot; asin aapodon sindang darakulang kahoy nin katanosan, na pananom ni Jehova, tanganing sia mapagayon.”​—Isaias 61:3.

11. Siisay kan enot na siglo an may marahay na dahelan na omawon si Jehova huli sa saiyang dakulang ginibo?

¹¹ Kan enot na siglo, an mga Judio na nag-ako kan pakabutas sa kaoripnan sa falsong relihion nag-omaw man sa Dios huli sa saiyang dakulang bagay na ginibo para sa sainda. An saindang espiritu nin panluluya nin boot nasalidahan nin “gubing nin kaomawan” kan sinda ilinigtas hale sa sarong nasyon na gadan sa espirituwal. An siring na pagbago enot na naeksperyensiahan kan mga disipulo ni Jesus kan an saindang pagmondo huli sa saiyang kagadanan nagin paggayagaya huli sa paglahid sa sainda nin banal na espiritu kan saindang binuhay liwat na Kagurangnan. Dai nahaloy pakatapos kaini, an sarong kaagid na pagbabago naeksperyensiahan kan 3,000 na mahoyong indibiduwal na naghimate sa paghuhulit kan bagong linahidan na mga Kristianong idto asin nagpabautismo kan Pentecostes 33 C.E. (Gibo 2:41) Marahayon nanggad na magin kompiado na inaako niato an bendisyon ni Jehova! Imbes na ‘magtangis sa Sion,’ sinda nag-ako nin banal na espiritu asin pinaginhawa kan “lana nin labi-labing kagayagayahan,” na simbolo kan labi-labing kagayagayahan kan mga igong binendisyonan ni Jehova.​—Hebreo 1:9.

12, 13. (a) Sairisay an “darakulang kahoy nin katanosan” sa tahaw kan nagpuruling mga Judio kan 537 B.C.E.? (b) Sairisay an nagin “darakulang kahoy nin katanosan” poon kan Pentecostes 33 C.E.?

¹² Binebendisyonan ni Jehova an saiyang banwaan nin “darakulang kahoy nin katanosan.” Sairisay an darakulang kahoy na ini? Kan mga taon pakalihis nin 537 B.C.E., sinda an mga indibiduwal na nag-adal asin naghorophorop sa Tataramon nin Dios asin kinultibar an matanos na mga pamantayan ni Jehova. (Salmo 1:1-3; Isaias 44:2-4; Jeremias 17:​7, 8) An mga lalaking arog ki Esdras, Haggeo, Zacarias, asin an Halangkaw na Saserdoteng si Josue nagin pambihirang “darakulang kahoy”​—marigon para sa katotoohan asin tumang sa espiri­tuwal na kaatian sa nasyon.

¹³ Poon kan Pentecostes 33 C.E., nagtanom an Dios nin kaagid na “darakulang kahoy nin katanosan”​—makosog an boot na linahidan na mga Kristiano​—sa espirituwal na kamugtakan kan saiyang bagong nasyon, an “Israel nin Dios.” (Galacia 6:16) Sa nag-aging mga siglo, an mga “kahoy” na ini nakaabot sa bilang na 144,000, na nagpapaluwas nin matanos na bunga tanganing pagayonon, o tawan nin kamurawayan, si Jehova Dios. (Kapahayagan 14:3) An mga natatada sa halangkaw asin magayon na mga “kahoy” na ini tuminubang kan mga taon nin 1919, kan ibalik ni Jehova sa kabagsikan an mga natatada sa Israel nin Dios hale sa saindang temporaryong pagkabakong aktibo. Paagi sa pagtao sa sainda nin abundang suplay nin espirituwal na tubig, si Jehova nakagibo nin garo kadlagan nin matanos, namumungang mga kahoy.​—Isaias 27:6.

14, 15. Anong mga proyekto an ginibo kan mga binutasan na mga nagsasamba ki Jehova poon kan (a) 537 B.C.E.? (b) 33 C.E.? (c) 1919?

¹⁴ Itinatampok an gibohon kan mga “kahoy” na ini, sinabi pa ni Isaias: “Itotogdok ninda liwat an haloy nang raot na mga lugar; papatindogon ninda an mga lugar na dating gaba, asin gigibohon nindang bago an raot na mga siudad, an mga lugar na gaba sa laog nin dakol na kapag-arakian.” (Isaias 61:4) Huli sa dekreto ni Hadeng Ciro nin Persia, itinogdok liwat kan fiel na mga Judio na nagpuli haleng Babilonya an Jerusalem asin an templo kaiyan, na binayaan sa raot na kamugtakan sa halawig na panahon. An mga proyekto nin pagbabalik sa dati maheheling man sa mga taon pagkatapos kan 33 C.E. asin 1919.

¹⁵ Kan 33 C.E., biyong namondo an mga disipulo ni Jesus kan sia arestaron, bistahon, asin gadanon. (Mateo 26:31) Minsan siring, nagbago an saindang pananaw kan sia magpaheling sa sainda pagkabuhay nia liwat. Asin kan ibubo sa sainda an banal na espiritu, sinda nagin sibot sa paghuhulit kan maogmang bareta, “sa Jerusalem asin sa bilog na Judea asin Samaria patin sagkod sa kaporoporohi kan daga.” (Gibo 1:8) Sa siring pinonan nindang ibalik an tunay na pagsamba. Sa kaagid na paagi, poon kan 1919 pinangyari ni Jesu-Cristo na itogdok liwat kan natatada kan saiyang linahidan na mga tugang an “mga lugar na gaba sa laog nin dakol na kapag-arakian.” Sa laog nin dakol na siglo dai itinao kan klero nin Kakristianohan an kaaraman dapit ki Jehova, na rinibayan iyan nin gibo nin tawong mga tradisyon asin mga doktrina na bakong sono sa Kasuratan. Hinale kan linahidan na mga Kristiano sa saindang mga kongregasyon an mga gibo na may digta kan falsong relihion tanganing magpadagos an pagbabalik kan tunay na pagsamba. Asin pinonan ninda an magigin pinakadakulang kampanya nin pagpapatotoo na dai pa noarin man nangyari sa kinaban.​—Marcos 13:10.

16. Sairisay an haloy nang nagtatabang sa linahidan na mga Kristiano sa saindang gibohon na pagbabalik sa dati, asin anong mga gibohon an ipinaniwala sa sainda?

¹⁶ Ini sarong dakulaon na sugo. Paano magigibo kan pipira sanang natatada kan Israel nin Dios an siring na gibohon? Pinasabngan ni Jehova si Isaias na ipahayag: “An mga estranghero matirindog nanggad asin magpapastor sa mga aripompon nindo, asin an mga taga ibang daga magigin saindong mga paraoma asin saindong mga paraataman sa ubasan.” (Isaias 61:5) An piguratibong mga estranghero asin taga ibang daga iyo an “sarong dakulang kadaklan” nin “ibang karnero” ni Jesus.a (Kapahayagan 7:9; Juan 10:​11, 16) Sinda bakong linahidan kan banal na espiritu sa katuyohan na umako nin langitnon na mana. Imbes, sinda may paglaom na buhay na daing katapusan sa sarong paraisong daga. (Kapahayagan 21:​3, 4) Pero, namomotan ninda si Jehova asin pinaniwalaan nin espirituwal na mga katongdan na pagpastor, pag-oma, asin pag-ataman sa ubasan. An siring na mga aktibidad bakong menos na mga gibohon. Sa irarom kan paggiya kan mga natatada kan Israel nin Dios, an mga trabahador na ini nagtatabang sa pagpastor, pangangataman, asin pag-ani nin mga tawo.​—Lucas 10:2; Gibo 20:28; 1 Pedro 5:2; Kapahayagan 14:​15, 16.

17. (a) Ano an iaapod sa mga miembro kan Israel nin Dios? (b) Ano an solamenteng atang na kaipuhan para sa kapatawadan nin mga kasalan?

¹⁷ Kumusta man an Israel nin Dios? Sinasabi sa sainda ni Jehova, paagi ki Isaias: “Kun dapit sa saindo, aapodon kamong mga saserdote ni Jehova; sasabihon kamong mga ministro kan satong Dios. Kakakanon nindo an mga kayamanan kan mga nasyon, asin sa saindang kamurawayan kamo magtataram na may kagayagayahan dapit sa saindo man sana.” (Isaias 61:6) Sa suanoy na Israel, itinao ni Jehova an Levitang kabilogan na grupo nin mga saserdote tanganing magdolot nin mga atang para sa mga saserdote mismo asin para sa saindang mga kapwa Israelita. Minsan siring, kan 33 C.E., dai na ginamit ni Jehova an Levitang kabilogan na grupo nin mga saserdote asin pinonan an sarong mas marahay na areglo. Inako nia an sangkap na buhay ni Jesus bilang atang para sa mga kasalan kan katawohan. Poon kaidto, dai na kinaipuhan an iba pang atang. An atang ni Jesus balido sa gabos na panahon.​—Juan 14:6; Colosas 2:​13, 14; Hebreo 9:11-14, 24.

18. Anong klaseng kabilogan na grupo nin mga saserdote an Israel nin Dios, asin ano an sugo sa sainda?

¹⁸ Kun siring, paanong an mga miembro kan Israel nin Dios “mga saserdote ni Jehova”? Kan suratan an kapwa linahidan na mga Kristiano, si apostol Pedro nagsabi: “Kamo ‘rasang pinili, sarong makahadeng kabilogan na grupo nin mga saserdote, banal na nasyon, banwaan para sa espesyal na pagkasadiri, tanganing ipahayag nindo nin mahiwas an mga kamurawayan’ kan saro na nag-apod sa saindo hale sa kadikloman pasiring sa saiyang makangangalas na liwanag.” (1 Pedro 2:9) Huli kaini, bilang sarong grupo, an linahidan na mga Kristiano sarong kabilogan na grupo nin mga saserdote na may espesipikong sugo: sabihon sa mga nasyon an manongod sa kamurawayan ni Jehova. Sinda magigin mga saksi nia. (Isaias 43:10-12) Durante kan huring mga aldaw, fiel na inootob kan linahidan na mga Kristiano an mahalagang marhay na sugong ini. Bilang resulta, minilyon na ngonyan an nakikikabtang sa sainda sa pagpapatotoo manongod sa Kahadean ni Jehova.

19. Anong paglilingkod an pribilehiong gibohon kan linahidan na mga Kristiano?

¹⁹ Dugang pa, an mga miembro kan Israel nin Dios may esperansang maglingkod bilang mga saserdote sa saro pang paagi. Pagkagadan ninda, sinda bubuhayon liwat sa inmortal na espiritung buhay sa langit. Duman sinda maglilingkod bako sanang bilang mga namamahala kaiba ni Jesus sa saiyang Kahadean kundi bilang mga saserdote man nin Dios. (Kapahayagan 5:10; 20:6) Bilang siring, sinda magkakapribilehio na gamiton an mga pakinabang kan atang na pantubos ni Jesus sa fiel na katawohan sa daga. Sa bisyon ni apostol Juan na nakasurat sa Kapahayagan kapitulo 22, sinda ilinaladawan giraray bilang “mga kahoy.” An enterong 144,000 na “mga kahoy” naheheling sa langit, na nagbubunga nin “kagduwang gusi nin bunga, na nagbubunga bulan-bulan. Asin an mga dahon kan mga kahoy para sa pagpaomay sa mga nasyon.” (Kapahayagan 22:​1, 2) Kanigoan kamakangangalas na paglilingkod iyan bilang saserdote!

Kasupganan Asin Kaduhagian, Dangan Paggayagaya

20. Sa ibong nin pagtumang, anong bendisyon an hinahalat kan makahadeng kabilogan na grupo nin mga saserdote?

²⁰ Poon kan 1914 kan magpoon an taon nin marahay na boot ni Jehova, an makahadeng kabilogan na grupo nin mga saserdote pirme na sanang napapaatubang sa pagtumang kan klero nin Kakristianohan. (Kapahayagan 12:17) Minsan siring, an gabos na paghihingoa na papondohon an paghuhulit kan maogmang bareta sa katapustapusi naprakaso. Ihinula ini sa Isaias, na nagsasabi: “Kasalihid kan saindong kasupganan magkakaigwa nin dobleng kabtang, asin kasalihid kan kaduhagian sinda magayagayang magkukururahaw dapit sa saindang kahirasan. Nin huli kaiyan sa saindang daga makakasadiri sinda nin dobleng kabtang. Mapapasainda nanggad an paggayagaya sagkod sa panahon na daing talaan.”​—Isaias 61:7.

21. Paano nagkamit nin dobleng kabtang nin mga bendisyon an linahidan na mga Kristiano?

²¹ Durante kan Guerra Mundial I, an linahidan na natatada nag-agi nin kasupganan asin kaduhagian sa kamot kan nasyonalistikong Kakristianohan. An mga miembro nin klero kabilang sa mga falsong nagsahot nin sedisyon sa walong fiel na tugang na lalaki hale sa opisina prinsipal sa Brooklyn. An mga tugang na lalaking ini bakong makatanosan na ibinilanggo nin siyam na bulan. Sa katapustapusi, kan tigsoli nin 1919, sinda pinatalingkas, asin kan huri ipinahayag na daing saysay an gabos na sahot tumang sa sainda. Sa siring nagin baliktad an resulta kan pakana na papondohon an paghuhulit. Imbes na pabayaan na mag-agi nin nagdadanay na kasupganan an mga nagsasamba sa saiya, pinatalingkas sinda ni Jehova asin ibinalik sinda sa saindang espirituwal na kamugtakan, an “saindang daga.” Duman nag-ako sinda nin dobleng kabtang nin mga bendisyon. Nahipnoan nin igo kan pagkamit kan bendisyon ni Jehova an gabos na inagihan ninda. Tunay nanggad na may dahelan sindang magkurahaw sa kagayagayahan!

22, 23. Paano inarog kan linahidan na mga Kristiano si Jehova, asin paano nia sinda binalosan?

²² An sunod na sinabi ni Jehova nagtatao nin saro pang dahelan tanganing maggayagaya an mga Kristiano ngonyan: “Ako, si Jehova, namomoot sa hustisya, naoongis sa paghabon kaibanan na an pagkabakong matanos. Asin itatao ko an saindang mga bayad na may kaimbodan, asin magibo ako sa sainda nin tipan na daing talaan an pagdadanay.” (Isaias 61:8) Paagi sa saindang pag-adal kan Biblia, nanodan kan linahidan na natatada na kamotan an hustisya asin ikaongis an karatan. (Talinhaga 6:12-19; 11:20) Nanodan nindang “[pulpogon] an saindang mga espada na magin tarom nin arado,” na nagdadanay na neutral sa mga guerra asin grabeng kariribokan sa politika kan katawohan. (Isaias 2:4) Binayaan man ninda an mga gibo na naglalapastangan sa Dios, arog baga kan pagbalobagi, pagsambay, paghabon, asin pagbuburat.​—Galacia 5:19-21.

²³ Huling an linahidan na mga Kristiano may pagkamoot sa hustisya na kapareho kan saindang Kaglalang, itinao sa sainda ni Jehova an “saindang mga bayad na may kaimbodan.” Saro sa siring na “bayad” an tipan na daing talaan an pagdadanay​—an bagong tipan​—na ipinaisi ni Jesus sa saiyang mga parasunod kan banggi antes kan saiyang kagadanan. An tipan na ini an nagin basehan na sinda nagin espirituwal na nasyon, espesyal na banwaan nin Dios. (Jeremias 31:31-34; Lucas 22:20) Sa irarom kaiyan, iaaplikar ni Jehova an gabos na pakinabang kan atang na pantubos ni Jesus, kaiba an kapatawadan sa mga kasalan para sa mga linahidan sagkod sa gabos na iba pang fiel hale sa katawohan.

Paggayagaya sa mga Bendisyon ni Jehova

24. Sairisay hale sa mga nasyon “an banhi” na binendisyonan, asin paano sinda nagin “banhi”?

²⁴ Minidbid nin nagkapira sa tahaw nin mga nasyon an bendisyon ni Jehova sa saiyang banwaan. Ihinula ini kan panuga ni Jehova: “An saindang banhi mamimidbid minsan sa tahaw nin mga nasyon, asin an saindang mga gikan sa tahaw nin mga banwaan. An gabos na makaheling sa sainda makakamidbid sa sainda, na sinda an banhi na binendisyonan ni Jehova.” (Isaias 61:9) An mga miembro kan Israel nin Dios, an linahidan na mga Kristiano, nagin aktibo sa tahaw nin mga nasyon durante kan taon nin marahay na boot ni Jehova. Ngonyan minilyon na an kabilangan kan mga naghimate sa saindang ministeryo. Paagi sa dayupot na pakikiiba sa Israel nin Dios sa gibohon, an mga hale sa mga nasyon may pribilehiong magin “an banhi na binendisyonan ni Jehova.” An saindang maogmang kamugtakan naheheling kan bilog na katawohan.

25, 26. Paano inaarog kan gabos na Kristiano an mga saboot na ipinahayag sa Isaias 61:10?

²⁵ An gabos na Kristiano, mga linahidan sagkod ibang karnero, nag-aantisipar na omawon si Jehova nin daing sagkod. Bilog na puso sindang minaoyon ki propeta Isaias, na pinasabngan na nagsabi: “Siertong gayo na ako magpapakagayagaya ki Jehova. An sakong kalag maggagayagaya sa sakong Dios. Huli ta ginubingan nia ako kan mga gubing nin kaligtasan; pinatos nia ako kan daing takyag na pan-ibabaw na gubing nin katanosan, arog kan nobyo na, sa makasaserdoteng paagi, nagsusulot nin korona, asin arog kan nobya na sinasamnohan an saiyang sadiri kan saiyang mga bahandi.”​—Isaias 61:10.

²⁶ Nagugubingan “kan daing takyag na pan-ibabaw na gubing nin katanosan,” determinado an linahidan na mga Kristiano na magdanay na dalisay asin malinig sa pagheling ni Jehova. (2 Corinto 11:​1, 2) Mantang sinda ipinahayag na matanos ni Jehova sa katuyohan na magmana nin langitnon na buhay, dai na sinda mabalik giraray sa gabang kamugtakan kan Dakulang Babilonya, na dian sinda pinatalingkas na. (Roma 5:9; 8:30) An gubing nin kaligtasan daing kaagid sa halaga para sa sainda. An kairiba nindang ibang karnero determinado man na sunodon an halangkaw na mga pamantayan ni Jehova Dios sa dalisay na pagsamba. Huling “hinugasan ninda an saindang mga gubing asin pinaputi iyan sa dugo kan Kordero,” sinda ipinahayag na matanos asin makaliligtas sa “dakulang kahorasaan.” (Kapahayagan 7:14; Santiago 2:​23, 25) Sagkod na umabot iyan, inaarog ninda an saindang linahidan na kairiba sa paglikay na madigtaan kan Dakulang Babilonya.

27. (a) Durante kan Milenyal na Paghade, anong mahalagang mangnohon na “pagsupang” an mangyayari? (b) Paanong an katanosan nagsusupang na sa tahaw nin katawohan?

²⁷ Ngonyan naoogmang marhay an mga nagsasamba ki Jehova na sinda nasa espirituwal na paraiso. Sa dai na mahahaloy makakamtan man ninda an Paraiso sa pisikal na sentido. Bilog na puso niatong inaantisipar an panahon na iyan, na malinaw na marhay na ilinadawan sa pantapos na mga tataramon sa Isaias kapitulo 61: “Kun paanong an daga mismo nagpapaluwas kan supang kaiyan, asin kun paanong an tatamnan mismo nagpapasupang sa mga bagay na isinabwag dian, sa siring man na paagi an Soberanong Kagurangnan na Jehova magpapangyari kan pagsupang nin katanosan asin nin kaomawan sa atubangan kan gabos na nasyon.” (Isaias 61:11) Durante kan Milenyal na Paghade ni Cristo, maeeksperyensiahan kan daga an “pagsupang nin katanosan.” An mga tawo makurahaw na may kapangganahan, asin an katanosan malakop sagkod sa kaporoporohi kan daga. (Isaias 26:9) Minsan siring, dai niato kaipuhan na halaton an mamuraway na aldaw na iyan tangani na mag-omaw sa atubangan kan gabos na nasyon. An katanosan nagsusupang na sa tahaw kan minilyon na nagtatao nin kamurawayan sa Dios nin langit asin nagpapahayag kan maogmang bareta manongod sa saiyang Kahadean. Dawa ngonyan an satong pagtubod asin an satong paglaom nagtatao sa sato kan gabos na dahelan na maggayagaya nin labi-labi sa mga bendisyon kan satong Dios.

[Nota sa Ibaba]