Pinahiwas Niya an Saiyang Ministeryo sa Galilea

Sibot-sibot an nagin aldaw ni Jesus sa Capernaum kaiba an saiyang apat na disipulo. Kinabanggihan, dinarara sa saiya kan mga tawo sa Capernaum an mga may hilang tanganing paumayan. Dikit sana an panahon ni Jesus para makapagsolo-solo.

Ngunyan, kan amay na aga miyentras na madiklom pa, nagbuhat si Jesus asin nagluwas na siya sana. Naghanap siya nin sarong tagong lugar kun sain puwedeng makapamibi nin solo sa saiyang Ama. Pero dai nahaloy an pagsolo-solo ni Jesus. Kan narisa ninda na mayo siya, pigparahanap siya ni “Simon saka kan kairiba kaini.” Puwedeng si Pedro an nanginginot sa paghanap huling bisita niya si Jesus sa harong ninda.—Marcos 1:36; Lucas 4:38.

Kan mahiling ninda si Jesus, nagsabi si Pedro: “Hinahanap ka kan gabos.” (Marcos 1:37) Natural sana na gusto kan mga tawo sa Capernaum na dai maghali si Jesus. Napahalagahan talaga ninda an mga ginibo niya, kaya “pinakiulayan ninda siya na dai maghali sa sainda.” (Lucas 4:42) Pero, an panginot daw na dahilan kan pagdigdi ni Jesus sa daga iyo na gumibo nin siring na milagrosong mga pagpaumay? Asin sa lugar sana daw na ini niya gigibuhon an saiyang ministeryo? Ano an sabi niya manungod digdi?

Nagsimbag si Jesus sa mga disipulo: “Magduman kita sa ibang lugar, sa haraning mga banwa, tanganing makapaghulit man ako duman, huli ta dahil kaini kaya ako nagdatong.” Sa katunayan, sinabihan pa ngani ni Jesus an mga tawo na habong magpahali sa saiya: “Dapat na ipahayag ko man sa ibang mga siyudad an maugmang bareta kan Kahadian nin Diyos, huli ta dahil kaini kaya ako isinugo.”—Marcos 1:38; Lucas 4:43.

Iyo, an sarong panginot na dahilan kun taano ta nagdigdi si Jesus sa daga iyo na ihulit an manungod sa Kahadian nin Diyos. Papakangbanalon kan Kahadian na iyan an pangaran kan saiyang Ama asin permanenteng sosolusyunan an gabos na pagsakit nin tawo. Nagtao si Jesus nin patotoo na isinugo siya nin Diyos paagi sa paggibo nin milagrosong mga pagpaumay. Sa kaagid na paagi, dakul na siglo bago kaini, naggibo man si Moises nin mga milagro para patunayan na isinugo siya nin Diyos.—Exodo 4:1-9, 30, 31.

Kaya naghali si Jesus sa Capernaum para maghulit sa iba pang siyudad, asin uminiba sa saiya an apat na disipulo—si Pedro saka an tugang kaining si Andres, asin si Juan saka an tugang kaining si Santiago. Kan nakaaging semana, inimbitaran sinda ni Jesus na magin an inot na kairiba niya sa gibuhon.

Nagin mapanggana nanggad an paghuhulit ni Jesus sa Galilea kaiba an apat na disipulo! Sa katunayan, an bareta manungod sa saiya nakaabot sa hararayong lugar. “An bareta manungod sa saiya naglakop sa bilog na Siria,” sa rehiyon kan sampulong siyudad na inaapod Decapolis, asin sa ibong kan Salog nin Jordan. (Mateo 4:24, 25) Dakulon na tawo hali sa mga lugar na iyan, pati na sa Judea, an nagsurunod ki Jesus asin sa mga disipulo niya. Dakul an nagdara sa saiya nin mga tawo na gustong maumayan. Dai niya sinudya an saindang linalauman—pinaumayan niya an mga may hilang asin pinalayas an maraot na mga espiritu sa mga sinaniban nin demonyo.