“Padumán Kamo Asin Gumibo Kamo nin mga Disipulo sa mga Tawo kan Gabos na Nasyon”

1, 2. Anong mga hapot an minalataw huli sa mga tataramon ni Jesus sa Mateo 24:14?

BAGA man mag-uyon an mga tawo o magkontra sindang marhay sa sato, dikit sana an madehar na bilang sarong grupo midbid na marhay an Mga Saksi ni Jehova sa saindang gibuhon na paghuhulit. Tibaad ngani may nakakaulay ka sa saindong teritoryo na dai minauyon sa satong mga tinutubod pero iginagalang kita huli sa satong ginigibong paghuhulit. Arog kan aram niyato, ihinula ni Jesus na ihuhulit sa bilog na daga an maugmang bareta kan Kahadian. (Mat. 24:14) Pero taano ta masasabi niyato na an satong paghuhulit iyo an kautuban kan hula ni Jesus? Nagigin pangahas daw kita sa pagsabing kita an nagsasagibo kan ihinulang gibuhon na ini?

² Dakul na relihiyosong grupo an nagsasabing ihinuhulit ninda an Ebanghelyo, o an maugmang bareta. Pero sa parati, an saindang mga ginigibo limitado sana sa pag-istorya kan saindang personal na mga testimonya, pagtao nin mga sermon sa simbahan, o mga programa na ibinobrodkast sa media—sa telebisyon man o sa Internet. Sinasabi man kan iba na saro nang porma nin paghuhulit an mga ginigibo nindang pagtabang sa mga nangangaipo o pagpabulong asin pagpaadal sa mga dukha. Pero, an mga ini daw an klase nin paghuhulit na ipinagbuot ni Jesus sa saiyang mga disipulo?

 3. Uyon sa Mateo 28:19, 20, ano an apat na bagay na dapat gibuhon kan mga parasunod ni Jesus?

³ Mayo daw nin gigibuhon an mga disipulo ni Jesus, na maghahalat na sanang magdulok sa sainda an mga tawo? Dai nanggad! Pagkabuhay liwat ni Jesus, sinabi niya sa saiyang ginatos na disipulo: “Kun siring, padumán kamo asin gumibo kamo nin mga disipulo sa mga tawo kan gabos na nasyon, na binabawtismuhan sinda . . . , na tinutukduan sinda na utubon an gabos na bagay na ipinagbuot ko sa saindo.” (Mat. 28:19, 20, NW) Kaya, apat na bagay an ipinagbubuot niya sa sato. Sinabi niya na dapat kitang gumibo nin mga disipulo, bawtismuhan sinda, asin tukduan sinda. Pero, narisa nindo kun ano an inot niyang ipinapagibo sa sato? An sabi ni Jesus: “Padumán kamo”! Mapadapit sa pagbuot na ini, sarong iskolar sa Bibliya an nagsabi: “An ‘padumán kamo’ iyo an ipinapagibo sa lambang may pagtubod, baga man iyan pagbalyo sa tinampo o pagbalyo sa dagat.”—Mat. 10:7; Luc. 10:3.

 4. Ano an kalabot sa pagigin ‘mga parasira nin tawo’?

⁴ An sinasambit daw ni Jesus indibidwal na paghihinguwa kan saiyang mga parasunod o sarong organisadong kampanya nin paghuhulit kan maugmang bareta? Huling dai kakayanon nin sarong tawo na dumanan an “gabos na nasyon,” kaipuhan sa gibuhon na ini an sarong organisadong paghihinguwa nin dakul. Iyan an buot sabihon ni Jesus kan agdahon niya an saiyang mga disipulo na magin ‘mga parasira nin tawo.’ (Basahon an Mateo 4:18-22.) An klase nin paninira na ipinapagibo niya digdi bakong arog nin solong parasira na namamanwit, na nakatukaw sana asin naghahalat na may sira na tumukob sa paon. Imbes, paninira ini na minagamit nin hikot—sarong mapagalon na trabaho na nangangaipo nin organisadong pagtatarabangan nin dakul na parasira.—Luc. 5:1-11.

 5. Anong apat na hapot an kaipuhan na masimbag, asin taano?

⁵ Tanganing maaraman kun siisay sa ngunyan an naghuhulit kan maugmang bareta bilang kautuban kan hula ni Jesus, kaipuhan tang masimbag an apat na hapot na ini:

• Ano an dapat na mensahe kan paghuhulit?

• Ano an dapat na motibo niyato sa paggibo kaini?

• Anong pamamaagi an dapat gamiton?

• Gurano kahiwas asin kalawig an paghuhulit na ini?

An simbag sa mga hapot na ini matabang sa sato, bako sanang para maaraman kun siisay an naggigibo kan nagliligtas-buhay na gibuhon na ini, kundi para man magin mas determinado kitang padagos na magmaigot sa paggibo kaini.—1 Tim. 4:16.

 6. Taano ta makakapagtiwala ka na an Mga Saksi ni Jehova an naghuhulit kan mensahe na ipinapahulit ni Jesus?

⁶ Basahon an Lucas 4:43.^[1] Ihinulit ni Jesus an “maugmang bareta kan Kahadian,” asin linalauman niya na arog man kaiyan an gigibuhon kan saiyang mga disipulo. Siisay na grupo an naghuhulit kan mensaheng iyan sa “gabos na nasyon”? Malinaw an simbag—Mga Saksi ni Jehova sana. Inaako dawa kan ibang mga nagkokontra sa sato an katotoohan na ini. Halimbawa, sarong misyonerong padi an nagsabi kaidto sa sarong Saksi na nag-istar siya sa dakul na nasyon asin hinapot niya an mga Saksi sa kada nasyon na iyan kun anong mensahe an ihinuhulit ninda. Ano an saindang simbag? An sabi kan padi: “Mangmang talaga sinda gabos. Parareho sana an simbag ninda: ‘An maugmang bareta kan Kahadian.’” Pero bakong “mangmang” an mga Saksi ni Jehova, imbes nagtataram sinda na may pagkasararo, na dapat sanang mahiling sa sainda bilang tunay na mga Kristiyano. (1 Cor. 1:10) Asin ipinapahayag ninda an kaparehong mensahe na yaon sa An Torrengbantayan Nagpapahayag kan Kahadian ni Jehova. An magasin na ini makukua sa 254 lengguwahe asin pinoprodusir sa average na haros 59 milyon na kopya kada isyu, kaya ini an magasin na may pinakamahiwas na sirkulasyon sa kinaban.

 7. Taano ta masasabi niyato na dai ihinuhulit kan mga lider nin Kakristiyanuhan an tamang mensahe?

⁷ An mga lider nin Kakristiyanuhan dai naghuhulit kan Kahadian nin Diyos. Kun mataram man sinda dapit kaiyan, sinasabi kan dakul sa sainda na iyan sarong pagmati o kamugtakan sa puso nin sarong Kristiyano. (Luc. 17:21) Dai ninda tinatabangan an mga tawo na masabutan na an Kahadian nin Diyos sarong gobyerno sa langit na an Tagapamahala iyo si Jesus, na iyan an solusyon sa gabos na problema nin mga tawo, asin na sa dai na mahahaloy, hahalion kaiyan an gabos na karatan sa daga. (Kap. 19:11-21) Imbes, sa Pasko asin Pasko nin Pagkabuhay (Easter) ninda mas gustong girumdumon si Jesus. Garo baga dai ninda aram kun ano an gigibuhon ni Jesus bilang bagong Tagapamahala kan daga. Huling dai ninda nasasabutan an mensahe na dapat kutanang ihinuhulit ninda, bakong makangangalas na dai man ninda nasasabutan an dapat na magin motibo sa paghuhulit na ini.

 8. Ano an salang motibo sa paghuhulit?

⁸ Ano an dapat na magin motibo sa paghuhulit? Dapat na iyan bako para makakolekta nin kuwarta asin makapagtugdok nin magagarbong edipisyo. Sinabi ni Jesus sa saiyang mga disipulo: “Inako nindong daing bayad, itao man nindong daing bayad.” (Mat. 10:8) Dai dapat inegosyo an Tataramon nin Diyos. (2 Cor. 2:17) An mga naghuhulit kan mensahe dai dapat naghahagad nin bayad sa ginigibo nindang paghuhulit. (Basahon an Guibo 20:33-35.) Sa ibong kan malinaw na instruksiyon na ini, kadaklan sa mga relihiyon nakapokus sa pagkolekta nin kuwarta o sa paghihinguwang dai mawaran nin pondo. Kaipuhan nindang suwelduhan an saindang mga klero, saka an kadakul-dakul na iba pang empleyado. Sa parati, minayaman na marhay an mga lider nin Kakristiyanuhan.—Kap. 17:4, 5.

 9. Paano ipinapahiling kan Mga Saksi ni Jehova na naghuhulit sinda na may tamang motibo?

⁹ Nangongolekta man daw nin kuwarta an Mga Saksi ni Jehova? Dai. An saindang gibuhon sinusuportaran nin boluntaryong mga donasyon. (2 Cor. 9:7) Mayong ginigibong pangongolekta nin kuwarta sa saindang mga Kingdom Hall o kumbensiyon. Pero, kan nakaaging taon sana, 1.93 bilyon na oras an ginamit kan Mga Saksi ni Jehova sa paghuhulit kan maugmang bareta asin sa pagkondukta nin daing bayad na pag-adal sa Bibliya sa labing siyam na milyon na tinutukduan sa Bibliya kada bulan. An makangangalas pa digdi, apuwera sa mayo sindang suweldo, maugma pa nindang ginagamit an saindang sadiring kuwarta para sa gibuhon na ini. Mapadapit sa gibuhon kan Mga Saksi ni Jehova, sarong researcher an nagsabi: “An panginot na katuyuhan iyo na maghulit saka magtukdo. . . . Mayo nin klero kaya nakakabawas na marhay sa gastos.” Kaya, ano man nanggad an dapat na motibo niyato sa paghuhulit? An simpleng simbag iyo na gikan sa buot niyatong ginigibo ini huling namumutan ta si Jehova asin an satong kapwa. Asin an pagigin gikan sa buot na ini kautuban kan hula na nasa Salmo 110:3. (Basahon.)

10. Anong pamamaagi nin paghuhulit an ginamit ni Jesus asin kan saiyang mga disipulo?

¹⁰ Anong pamamaagi nin paghuhulit kan maugmang bareta an ginamit ni Jesus asin kan saiyang mga disipulo? Dinumanan ninda an mga tawo sain man sinda puwedeng manumpungan—sa pampublikong mga lugar asin sa mga harong ninda. Kaiba sa paghuhulit ninda an paghanap sa mga maninigo paagi sa pagharong-harong. (Mat. 10:11; Luc. 8:1; Gui. 5:42; 20:20) Sarong sistematikong pamamaagi ini para manumpungan an gabos na klase nin tawo.

11, 12. Kun dapit sa paghuhulit kan maugmang bareta, ano an masasabi mo sa paghihinguwa kan Kakristiyanuhan kun ikukumparar sa banwaan ni Jehova?

¹¹ Paano inuutob kan mga relihiyon kan Kakristiyanuhan an paghuhulit na ini? Sa parati, kontento na an mga miyembro kan simbahan na ipabaya sa sinusuwelduhan na klero an ano man na paghuhulit. Pero, imbes na magin “mga parasira nin tawo,” an mga klero nin Kakristiyanuhan garo mas nakapokus sana sa pagbantay sa mga “sira” na dati nang igwa sinda. Totoo, may mga panahon na nagkapirang klerigo an tibaad maghinguwang dagkahon an mga miyembro ninda na mag-ebanghelyo. Halimbawa, sa kapinunan kan taon 2001, sinabi ni Pope John Paul II sa sarong surat: “Sa pag-agi nin mga taon, pauruutro kong ipinapangapudan an bagong pag-eebanghelyo. Nangangapudan giraray ako ngunyan . . . Dapat papaglaadon giraray niyato sa satong sadiri an kumbiksiyon na arog kan ki Pablo na nagsabi: ‘Hirak man sa sako kun dai ako maghulit kan Ebanghelyo.’” Sinabi pa kan papa na an misyon na ini “dai dapat ipabaya sana sa sarong grupo nin ‘mga espesyalista,’ kundi responsabilidad ini kan gabos na miyembro kan Banwaan nin Diyos.” Pero dikit sana an nagkuyog sa pangapudan na ini.

¹² Kumusta man an Mga Saksi ni Jehova? Sinda sana an naghuhulit na namamahala na si Jesus bilang Hadi puon kan 1914. Arog kan ipinagbuot ni Jesus, priyoridad nindang marhay an paghuhulit. (Mar. 13:10) An librong Pillars of Faith—American Congregations and Their Partners nagsabi: “Para sa Mga Saksi ni Jehova, mas mahalaga an paghuhulit kisa sa ano man na iba pang bagay.” Mapadapit sa sinabi nin sarong Saksi, sinabi pa kan awtor: “Pag sinda nakakanumpong nin mga nagugutom, nagmumundo, asin naghihilang, naghihinguwa sindang tumabang, . . . pero nungka nindang linilingawan na an panginot na gibuhon ninda iyo an pagpaabot nin espirituwal na mensahe dapit sa maabot na katapusan kan kinaban asin sa kun ano an kaipuhan para makaligtas.” Padagos na ipinapaabot kan Mga Saksi ni Jehova an mensaheng iyan, na inaarog an pamamaagi na ginamit ni Jesus asin kan saiyang mga disipulo.

13. Gurano dapat kahiwas an paghuhulit?

¹³ Sinabi ni Jesus kun gurano kahiwas an paghuhulit kan maugmang bareta—“sa bilog na kinaban.” (Mat. 24:14, NW) Ipinagbuot niya na gumibo nin mga disipulo “sa mga tawo kan gabos na nasyon.” (Mat. 28:19, 20, NW) An buot sabihon, saro ining pambilog na kinaban na paghuhulit.

14, 15. Ano an nagpapatunay na inuutob kan Mga Saksi ni Jehova an hula ni Jesus dapit sa hiwas kan paghuhulit? (Hilingon an mga ritrato sa kapinunan kan artikulo.)

¹⁴ Tanganing masabutan kun paano inuutob kan Mga Saksi ni Jehova an hula ni Jesus kun dapit sa hiwas kan paghuhulit, hilingon ta an nagkapirang impormasyon. Sa Estados Unidos, mga 600,000 an miyembro kan klero sa manlain-lain na denominasyon, mantang mga 1,200,000 an Saksi ni Jehova. Sa bilog na kinaban, igwa nin labing 400,000 na Katolikong padi. Ngunyan, hilinga an bilang kan mga Saksi na nakikikabtang sa paghuhulit kan Kahadian. Sa bilog na kinaban, mga walong milyon na boluntaryong ministro an naghuhulit sa 240 kadagaan. Makangangalas nanggad an naisasagibong ini asin gabos para sa ikakaumaw saka ikakamuraway ni Jehova!—Sal. 34:1; 51:15.

¹⁵ Bilang Mga Saksi ni Jehova, sagkod na mapupuwede, gusto niyatong maipaabot sa pinakadakul na tawo an maugmang bareta bago umabot an katapusan. Iyan an dahilan kun taano ta napapalain kita kun dapit sa ginigibo tang pagtradusir asin pagpublikar nin basado sa Bibliyang mga babasahon. Minilyon na libro, magasin, tract, asin imbitasyon sa kumbensiyon saka Memoryal an naidistribwir na daing bayad. Nakaprodusir kita nin manlain-lain na publikasyon sa labi nang 700 na lengguwahe. Nakapagpublikar na kita nin labing 200 na milyon na kopya kan New World Translation of the Holy Scriptures sa labing 130 lengguwahe. Kan nakaaging taon sana, nakaprodusir kita nin mga 4.5 bilyon na kopya nin lain-lain na babasahon na basado sa Bibliya. Makakakua nin impormasyon sa satong opisyal na website sa labi nang 750 lengguwahe. May ibang grupo pa daw nin mga ministro na naggigibo nin arog kaini?

16. Taano ta masasabi niyato na yaon sa Mga Saksi ni Jehova an espiritu nin Diyos?

¹⁶ Gurano kalawig an ihinulang paghuhulit na ini? Sinabi ni Jesus na an pambilog na kinaban na gibuhon na ini magpapadagos sagkod sa panahon kan huring mga aldaw, “dangan maabot an katapusan.” (Mat. 24:14, NW) Igwa pa daw nin ibang relihiyon na padagos na naghuhulit kan maugmang bareta sa huring mga aldaw na ini? May mga nakakaulay kita sa ministeryo na tibaad nagsasabi: “Kamo an naghuhulit pero yaon sa samo an banal na espiritu.” Pero bako daw na an katunayan na nakakatagal kita sa gibuhon na ini ebidensiya na yaon sa sato an espiritu nin Diyos? (Gui. 1:8; 1 Ped. 4:14) Sa pana-panahon, may mga relihiyosong grupo na pinupurbaran na arugon an regular na ginigibo kan Mga Saksi ni Jehova, pero parating dai iyan nagigin mapanggana. An iba nakikikabtang sa inaapod nindang gibuhon na pagmimisyonero sa laog nin limitadong panahon, pagkatapos minabalik giraray sa normal nindang buhay. An iba tibaad pinupurbaran pa nganing magharong-harong, pero ano an ihinuhulit ninda? Malinaw na ipinapahiling kan simbag sa hapot na iyan na dai ninda isinasagibo an gibuhon na pinunan ni Cristo.

17, 18. (a) Taano ta sigurado kita na an Mga Saksi ni Jehova an naghuhulit ngunyan kan maugmang bareta kan Kahadian? (b) Paano niyato padagos na nagigibo an paghuhulit na ini?

¹⁷ Kaya, siisay talaga an naghuhulit ngunyan kan maugmang bareta kan Kahadian? Masasabi nanggad niyato nin may dakulang kumpiyansa: “Mga Saksi ni Jehova!” Taano ta lubos kitang kumbinsido diyan? Huling ihinuhulit niyato an tamang mensahe, an maugmang bareta kan Kahadian. Ginagamit man niyato an tamang pamamaagi huling dinudumanan ta an mga tawo. Ginigibo niyato an satong paghuhulit na may tamang motibo—pagkamuot, bakong pinansiyal na pakinabang. An paghuhulit niyato an may pinakamahiwas na sakop na nakakaabot sa mga tawo kan gabos na nasyon asin lengguwahe. Asin padagos kitang maghuhulit taon-taon, sagkod na umabot an katapusan.

¹⁸ Makangangalas nanggad na mahiling an nagigibo kan banwaan nin Diyos sa panahon na ini na kinabubuhayan niyato. Pero paano niyato nagigibo ini? Sinisimbag iyan ni apostol Pablo sa saiyang surat sa mga taga Filipos: “An Diyos, kauyon kan saiyang kagustuhan, iyo an nagpapakusog sa saindo, na tinatawan kamo kan pagmawot saka kan kakayahan na gumibo.” (Fil. 2:13, NW) Lugod na padagos na itao sa sato kan satong mamumuton na Ama sa langit an kinakaipuhan niyatong kusog mantang ginigibo ta an pinakamakakaya niyato asin lubos na inuutob an satong ministeryo.​—2 Tim. 4:5.