Taano ta Dai Nag-aayuno an mga Disipulo ni Jesus?

Dai nahaloy pagkatapos na makiselebrar si Jesus kan Paskuwa kan 30 C.E., iprineso na si Juan Bautista. Gusto ni Juan na magin mga parasunod ni Jesus an mga disipulo niya, pero an iba sa sainda dai ginibo iyan kan suminunod na mga bulan puon kan mapreso si Juan.

Ngunyan, kan paparani na an Paskuwa kan 31 C.E., nagdurulok ki Jesus an nagkapira sa mga disipulo ni Juan asin naghapot: “Taano ta nag-aayuno kami saka an mga Fariseo pero an mga disipulo mo dai?” (Mateo 9:14) Nag-aayuno an mga Fariseo bilang ritwal sa relihiyon. Paghaloy-haloy, naggamit pa ngani si Jesus nin ilustrasyon kun sain sarong nagpapakangmatanos na Fariseo an namibi: “O Diyos, nagpapasalamat ako sa saimo na bako akong arog nin iba diyan . . . Duwang beses akong nag-aayuno kada semana.” (Lucas 18:11, 12) An mga disipulo ni Juan puwedeng nag-aayuno man bilang kaugalian o tibaad huling nagmumundo sinda na nakapreso siya. Nagngangaralas man sinda kun taano ta dai nag-aayuno an mga disipulo ni Jesus, na tibaad iniisip na dapat makiiba man an mga ini sa pagmundo sa nangyari ki Juan.

Nagsimbag si Jesus gamit an sarong halimbawa: “An mga amigo kan nobyo mayong dahilan na magmundo sagkod na kaiba ninda an nobyo, bako daw? Pero maabot an panahon na kukuanon sa sainda an nobyo, dangan mag-aayuno sinda.”—Mateo 9:15.

Inapod mismo ni Juan si Jesus bilang nobyo. (Juan 3:28, 29) Huli kaiyan, mantang yaon pa si Jesus, dai nag-aayuno an mga disipulo niya. Pag-abot nin panahon, pag nagadan si Jesus, magmumundo an mga disipulo niya asin mawawaran nin ganang magkakan. Pero, mababago nanggad iyan pag binuhay siya liwat! Sa panahon na iyan, dai na sindang dahilan na mag-ayuno pa huli sa pagmundo.

Sunod, itinao ni Jesus an duwang ilustrasyon na ini: “Dai nin siisay man an minagamit nin bagong telang pantapal tanganing itahi sa lumang pang-ibabaw na bado, huli ta bubutungon kan bagong tela an bado asin nagigin mas grabe an gisi. An mga tawo dai man minabugtak nin bagong arak sa lumang mga lalagan na anit. Kun gigibuhon ninda iyan, mabubusi an mga lalagan na anit asin mauula an arak saka mararaot an mga lalagan. Imbes, an mga tawo minabugtak nin bagong arak sa bagong mga lalagan na anit.” (Mateo 9:16, 17) Ano an punto niya?

Tinatabangan ni Jesus an mga disipulo ni Juan na masabutan na dai dapat asahan nin siisay man na an mga parasunod ni Jesus masunod sa lumang mga kaugalian nin Judaismo, siring kan ritwal na pag-ayuno. Dai siya nagdigdi para tapalan asin palawigon, sabi ngani, an sarong luma saka matapo nang paagi nin pagsamba, sarong bilog na sistema nin pagsamba na hahalion na. An pagsambang ipinapalakop ni Jesus bakong kauyon kan Judaismo kaidto pati na kan mga tradisyon kaiyan. Dai, dai niya hinihinguwang tapalan nin bagong tela an lumang bado o bugtakan nin bagong arak an matagas asin lumang lalagan na anit.