An Pagkamuot Asin Pasasalamat ki Jehova Makakapahiro sa Saimo na Magpabawtismo

1-2. Arog kan ipinaparisa sa Gibo 8:27-31, 35-38, ano an nakapahiro sa lalaking taga Etiopia na opisyal nin palasyo na magpabawtismo?

GUSTO mo daw na magpabawtismo bilang disipulo ni Cristo? An pagkamuot asin pasasalamat an nakapahiro sa dakul na gibuhon iyan. Pag-isipan an halimbawa nin sarong opisyal na naglingkod sa reyna kan Etiopia.

² Naghiro tulos an lalaking taga Etiopia kauyon kan nanudan niya sa Kasuratan. (Basahon an Gibo 8:27-31, 35-38.) Ano an nakapahiro saiya? Malinaw na pinapahalagahan niya an Tataramon nin Diyos huling mantang nakasakay sa sarong karwahe, nagbabasa siya nin pirang bersikulo sa libro nin Isaias. Asin kan makipag-ulay sa saiya si Felipe, nakamati siya nin pasasalamat sa ginibo ni Jesus para sa saiya. Pero taano ta nagpa-Jerusalem an opisyal? Huling namumutan na niya si Jehova. Paano ta iyan naaraman? Hali pa sana siya sa Jerusalem ta nagsamba siya ki Jehova. Minalataw na binayaan kan lalaking ini an kinagimatan niyang relihiyon asin nag-iba sa solamenteng nasyon na dusay sa tunay na Diyos. An pagkamuot na ini ki Jehova iyo man an nagpahiro sa saiya na gibuhon an saro pang mahalagang marhay na lakdang, an pagpabawtismo para magin disipulo ni Cristo.—Mat. 28:19.

 3. Ano an puwedeng makaulang sa saro na magpabawtismo? (Hilingon an kahon na “Ano an Nasa Puso Mo?”)

³ An pagkamuot ki Jehova puwedeng makapahiro saimo na magpabawtismo. Pero an pagkamuot puwede man na makaulang sa saimo na gibuhon iyan. Paano? Pag-isipan an pirang halimbawa. Tibaad namumutan mong marhay an saimong mga kapamilya asin amigo na bakong kapagtubod, kaya tibaad mahadit ka na maaanggot sinda saimo kun magpabawtismo ka. (Mat. 10:37) O tibaad may kinakahiligan kang marhay na mga gibo na aram mong ikinakaungis nin Diyos, asin tibaad nasasakitan kang ipundo iyan. (Sal. 97:10) O tibaad puon kan aki ka pa nagseselebrar ka na nin mga kapiyestahan o nagsusunod sa mga kaugalian na konektado sa palsong relihiyon. Tibaad igwa kang magagayon na eksperyensiya sa mga selebrasyon na iyan. Huli kaiyan, posibleng nasasakitan kang magpundo sa pagsagibo kan mga kaugalian na nakakapamundo ki Jehova. (1 Cor. 10:20, 21) Kaya an hapot na kaipuhan mong simbagon, “Ano o siisay an pinakanamumutan mo?”

 4. Ano an panginot na dahilan na makakapahiro sa saimo na magpabawtismo?

⁴ Dakul kang mahalagang bagay na namumutan asin ipinagpapasalamat. Halimbawa, posibleng pinapahalagahan mo nang marhay an Bibliya maski kan dai ka pa nakikipag-adal sa mga Saksi ni Jehova. Asin posibleng dati mo nang namumutan si Jesus. Ngunyan na namidbid mo na an mga Saksi ni Jehova, tibaad gustong-gusto mong makiiba-iba sa sainda. Pero an pagkamuot sa mga bagay na iyan bako man mismong iyo an makakapahiro sa saimo na idusay an saimong sadiri ki Jehova asin magpabawtismo. An panginot na dahilan na makakapahiro sa saimo na magpabawtismo iyo an pagkamuot mo mismo sa Diyos na Jehova. Kun namumutan mo si Jehova nin urog kisa sa gabos na iba pang bagay, dai mo tutugutan an ano man o an siisay man na makaulang sa saimo na paglingkudan siya. An pagkamuot ki Jehova makakadagka sa saimo na magpabawtismo asin makakatabang sa saimo na magdanay na maimbod ki Jehova pagkatapos mong mabawtismuhan.

 5. Anong mga hapot an tutukaron ta?

⁵ Sinabi ni Jesus na dapat niyatong kamutan si Jehova sa bilog tang puso, kalag, isip, asin kusog. (Mar. 12:30) Paano ka magkakaigwa nin arog kaiyan kararom na pagkamuot asin paggalang ki Jehova? An paghurop-hurop sa pagkamuot sa sato ni Jehova makakapahiro sa sato na kamutan man siya. (1 Juan 4:19) Pag igwa ka na kan pinakamahalagang pagkamuot na iyan, anong iba pang mga pagmati saka mga gibo an natural sanang magigin resulta kaiyan?b

 6. Uyon sa Roma 1:20, ano an sarong paagi para makanuod kita manungod ki Jehova?

⁶ Makanuod manungod ki Jehova paagi sa mga linalang niya. (Basahon an Roma 1:20; Kap. 4:11) Hurop-hurupon an kadunungan na hiling-hiling sa pagkadisenyo sa mga tinanom asin mga hayop. Aramon an pirang bagay mapadapit sa makangangalas na pagkagibo sa saimong hawak. (Sal. 139:14) Asin pag-isipan an manungod sa makusugon na enerhiyang ibinugtak ni Jehova sa satong saldang. Tapos iyan palan saro lang sa binilyon na mga bituon.c (Isa. 40:26) Mantang ginigibo mo iyan, mararom an saimong paggalang ki Jehova. Minsan siring, an pakaaram na madunong asin makapangyarihan si Jehova parte sana kan pundasyon kan relasyon mo sa saiya. Tanganing magkaigwa nin makusog na pagkamuot ki Jehova, kaipuhan mong makanuod nin urog pa mapadapit sa saiya.

 7. Tanganing magrarom an pagkamuot mo ki Jehova, sa ano ka kaipuhan na magin kumbinsido?

⁷ Kaipuhan mong magin kumbinsido na nagmamalasakit sa saimo si Jehova bilang indibidwal. Nadidipisilan ka daw na maniwala na an Kaglalang kan langit asin daga naririparo ka asin na nagmamalasakit siya sa saimo? Kun iyo, tandaan na si Jehova “bako man . . . harayo sa lambang saro sa sato.” (Gibo 17:26-28) “Sinisiyasat ni Jehova an gabos na puso,” asin nanunuga siya saimo na, arog kan sinabi ni David ki Solomon, “kun hahanapon mo siya, itutugot niyang manumpungan mo siya.” (1 Cron. 28:9, NWT) Sa katunayan, an dahilan kaya nag-aadal ka ngunyan nin Bibliya iyo na, arog kan pagkasabi ni Jehova, “irinani taka sa sako.” (Jer. 31:3, NWT) Mantang nagdadakul an naaaraman mo manungod sa gabos na ginibo ni Jehova para sa saimo, urog man na mararom an pagkamuot mo sa saiya.

 8. Paano mo maipapahiling an pasasalamat mo sa pagkamuot ni Jehova?

⁸ An sarong paagi na maipapahiling mo an pasasalamat mo sa pagkamuot ni Jehova iyo an pakikipag-ulay sa saiya sa pamibi. Mararom an pagkamuot mo sa Diyos mantang sinasabi mo sa saiya an mga ikinakahadit mo asin pinapasalamatan mo siya sa gabos niyang ginigibo para sa saimo. Asin an relasyon mo ki Jehova magkukusog mantang nahihiling mo kun paano niya sinisimbag an saimong mga pamibi. (Sal. 116:1) Magigin kumbinsido ka na nasasabutan ka niya. Pero para magin dayupot ki Jehova, kaipuhan mong masabutan an saiyang kaisipan. Asin kaipuhan mong maaraman kun ano an hinahagad niya sa saimo. An solamenteng paagi na makukua mo an kaaraman na iyan iyo an pag-adal sa saiyang Tataramon, an Bibliya.

 9. Paano mo maipapahiling na pinapahalagahan mo an Bibliya?

⁹ Pahalagahan an Tataramon nin Diyos, an Bibliya. Sa Bibliya sana mahihiling an katotoohan manungod ki Jehova asin an katuyuhan niya para saimo. Maipapahiling mo na pinapahalagahan mo an Bibliya paagi sa pagbasa kaiyan aroaldaw, pagpreparar para sa lambang sesyon nin pag-Bible study saimo, dangan pag-aplikar kan mga nanunudan mo. (Sal. 119:97, 99; Juan 17:17) Igwa ka daw nin iskedyul para sa personal na pagbasa sa Bibliya? Sinusunod mo daw an iskedyul na iyan, na sinisiguradong binabasa an Bibliya kada aldaw?

10. Ano an saro sa mga dahilan kaya espesyal na marhay an Bibliya?

¹⁰ An saro sa mga dahilan kaya espesyal na marhay an Bibliya iyo na igwa iyan nin mga impormasyon manungod ki Jesus na hali sa mga indibidwal na nakahiling mismo sa saiya. Iyan sana an may tamang impormasyon na nagpapaliwanag kun ano an ginibo ni Jesus para sa saimo. Mantang naaaraman mo an mga sinabi asin ginibo ni Jesus, mapapahiro ka kaiyan na mawuton na magin amigo siya.

11. Ano an makakatabang sa saimo na mamutan si Jehova?

¹¹ Kamutan si Jesus, tanganing tumalubo an pagkamuot mo ki Jehova. Taano? Huling lubos na ipinapahiling ni Jesus an mga kuwalidad kan saiyang Ama. (Juan 14:9) Kaya mantang urog kang nakakanuod manungod ki Jesus, urog mo man na masasabutan asin mapapahalagahan si Jehova. Pag-isipan an pagmalasakit na ipinahiling ni Jesus sa mga tawong minemenos kan iba arog kan mga pobre, may hilang, saka mga daing kalaban-laban. Isipon man an praktikal na mga sadol na itinatao niya asin kun paano nagigin mas maugma an saimong buhay pag nagdadangog ka sa saiya.—Mat. 5:1-11; 7:24-27.

12. Mantang nakakanuod ka manungod ki Jesus, puwede ka kaiyan na mapahiro na gibuhon an ano?

¹² An pagkamuot mo ki Jesus urog na magkukusog mantang hinuhurop-hurop mo an manungod sa sakripisyong ginibo niya para mapatawad an satuyang mga kasalan. (Mat. 20:28) Pag nasasabutan mong andam si Jesus na magadan para saimo, puwede kang mapahiro kaiyan na magsulsol asin maghagad nin tawad ki Jehova. (Gibo 3:19, 20; 1 Juan 1:9) Asin mantang nag-uurog an pagkamuot mo ki Jesus asin ki Jehova, natural sanang gugustuhon mong maparani sa mga indibidwal na namumutan man sinda.

13. Ano an itinao ni Jehova sa saimo?

¹³ Makanuod na kamutan an pamilya ni Jehova. Tibaad dai masabutan kan mga kapamilya asin amigo mong bakong kapagtubod kun taano ta gusto mong idusay an saimong sadiri ki Jehova. Tibaad kontrahon ka pa ngani ninda. Tatabangan ka ni Jehova paagi sa pagtao sa saimo nin espirituwal na pamilya. Kun magdadanay kang dayupot sa espirituwal na pamilyang iyan, mamamatian mo an pagkamuot asin suporta na kaipuhan mo. (Mar. 10:29, 30; Heb. 10:24, 25) Pag-abot nin panahon, tibaad magin lingkod man ni Jehova an saimong mga kapamilya asin mamuhay na man sinda kauyon kan saiyang mga pamantayan.—1 Ped. 2:12.

14. Siring kan sinasabi sa 1 Juan 5:3, ano an narealisar mo manungod sa mga pamantayan ni Jehova?

¹⁴ Makanuod na pahalagahan asin isabuhay an mga pamantayan ni Jehova. Bago mo namidbid si Jehova, tibaad igwa ka nin sadiring mga pamantayan, pero ngunyan narealisar mo na mas marahay an mga pamantayan ni Jehova. (Sal. 1:1-3; basahon an 1 Juan 5:3.) Isipon an manungod sa sadol kan Bibliya para sa mga agom na lalaki, mga agom na babayi, mga magurang, asin mga aki. (Efe. 5:22–6:4) Mantang inaaplikar mo an sadol na iyan, nagin mas marahay daw an relasyon nindo bilang pamilya? Mantang sinusunod mo an mga paggiya ni Jehova mapadapit sa madunong na pagpili nin mga amigo, marahay daw an nagin epekto kaiyan sa saimong ugali? Nagin mas maugma ka daw? (Tal. 13:20; 1 Cor. 15:33) Posibleng marhay na iyo an simbag mo sa mga hapot na iyan.

15. Ano an puwede mong gibuhon kun kaipuhan mo nin tabang sa pag-aplikar kan mga prinsipyo sa Bibliya?

¹⁵ Tibaad madipisilan ka kun minsan na maaraman kun paano iaaplikar an mga prinsipyo sa Bibliya na nanunudan mo. Iyan an dahilan kaya ginagamit ni Jehova an saiyang organisasyon para tawan ka nin basado sa Bibliyang mga materyal na makakatabang sa saimo na madeterminaran kun arin an tama asin an sala. (Heb. 5:13, 14) Pag binasa asin pinag-adalan mo an mga materyal na ini, mahihiling mo kun gurano iyan kapraktikal asin kaespesipiko, asin posibleng marhay na gugustuhon mong magin parte kan organisasyon ni Jehova.

16. Paano inoorganisar ni Jehova an saiyang mga lingkod ngunyan?

¹⁶ Kamutan asin suportaran an organisasyon ni Jehova. An mga lingkod ni Jehova inoorganisar niya bilang mga kongregasyon, asin an saiyang Aki, si Jesus, an namamayo kaiyan gabos. (Efe. 1:22; 5:23) Nagnombra si Jesus nin sarong sadit na grupo nin linahidan na mga lalaki para manginot sa pag-organisar kan gibuhon na gusto niyang magibo sa satong panahon. An grupong iyan inapod ni Jesus na “maimbod asin mapagmansay na uripon.” Seryoso nindang ginigibo an saindang responsabilidad na pakakanon asin protektaran ka sa espirituwal. (Mat. 24:45-47) An saro sa mga paagi na tinatabangan ka kan maimbod na uripon iyo an pagsigurado na may kuwalipikadong mga elder na ninombrahan para pasturan ka. (Isa. 32:1, 2; Heb. 13:17; 1 Ped. 5:2, 3) Andam an mga elder na gibuhon an saindang pinakamakakaya para sa saimo, tanganing rangahon ka, asin tabangan kang urog na magin mas dayupot ki Jehova. Pero an saro sa pinakamahalagang mga bagay na puwede nindang gibuhon para saimo iyo an tabangan kang tukduan an iba manungod ki Jehova.—Efe. 4:11-13.

17. Sigun sa Roma 10:10, 13, 14, taano ta ipinapakipag-ulay niyato sa iba an manungod ki Jehova?

¹⁷ Tabangan an iba na kamutan si Jehova. Sinabi ni Jesus sa saiyang mga parasunod na tukduan an iba manungod ki Jehova. (Mat. 28:19, 20) Tibaad nagsusunod ka sa pagbuot na iyan dahil ta namamatian mong obligasyon iyan. Pero mantang urog na nagkukusog an pagkamuot mo ki Jehova, mamamati mo an namatian ni apostol Pedro asin Juan, na nagsabi: “Dai kami puwedeng magpundo sa pagtaram manungod sa mga bagay na samuyang nahiling asin nadangog.” (Gibo 4:20) An saro sa pinakanakakapaugma sa sato iyo an matabangan an iba na makanuod na kamutan si Jehova. Imahinara an labi-labing kagaya-gayahan na namatian kan ebanghelisador na si Felipe kan matabangan niya an lalaking taga Etiopia na manudan an katotoohan na nasa Kasuratan asin magpabawtismo ini! Pag inaarog mo si Felipe asin sinusunod an pagbuot ni Jesus na maghulit, ipinapahiling mo na gusto mong magin saro sa mga Saksi ni Jehova. (Basahon an Roma 10:10, 13, 14.) Sa puntong iyan, posibleng marhay na maihapot mo an ihinapot kan lalaking taga Etiopia: “Ano an nakakaulang sa sako para mabawtismuhan?”—Gibo 8:36.

18. Ano an pag-uulayan ta sa sunod na artikulo?

¹⁸ An pagpabawtismo an pinakamahalagang desisyon na gigibuhon mo sa saimong buhay. Huling seryosong bagay nanggad iyan, kaipuhan mong pag-isipan na marhay kun ano an kalabot diyan. Ano an dapat mong maaraman manungod sa pagpabawtismo? Ano an kaipuhan mong gibuhon bago saka pagkatapos magpabawtismo? Sisimbagon sa sunod na artikulo an mga hapot na iyan.