Naliwat an Itsura—Patanaw kan Kamurawayan Niya

Kan nagtutukdo si Jesus sa mga tawo sa rehiyon nin Cesarea Filipos, na mga 25 kilometros an rayo sa Bukid nin Hermon, may sinabi siyang nakakabiglang paisi sa mga apostol: “Sinisigurado ko sa saindo na an nagkapira sa mga yaon digding nakatindog dai nanggad magagadan sagkod na dai nguna ninda mahiling na minadatong sa saiyang Kahadian an Aki nin tawo.”—Mateo 16:28.

Siguradong inisip-isip kan mga disipulo kun ano an buot sabihon ni Jesus. Pakalihis nin mga sarong semana, iiniba niya an tulo sa mga apostol—si Pedro, Santiago, asin Juan—sa sarong halangkawon na bulod. Posibleng banggi na kaidto, huling nagtutungka na an tulong lalaki. Mantang namimibi si Jesus, naliwat an itsura niya sa atubangan ninda. Nahiling kan mga apostol an lalawgon niya na nagliwanag na siring sa aldaw asin an saiyang bado nagkinang na siring sa liwanag, na nagkikinang sa kaputian.

Dangan, may nagpahiling na duwang persona, na minidbid bilang “si Moises saka si Elias.” Nagpuon sindang magtaram ki Jesus manungod ‘sa paghali niya, na mangyayari sa Jerusalem.’ (Lucas 9:30, 31) An paghali niya malinaw na nanunungod sa saiyang kagadanan asin sa kasunod na pagkabuhay liwat, na sinambit niya kasuarin pa sana. (Mateo 16:21) An pag-uulay na ini patunay na kabaliktaran kan gustong mangyari ni Pedro, an makasusupog na kagadanan ni Jesus bakong sarong bagay na dapat likayan.

Kan biyo nang napagmata an tulong apostol, naghiling asin naghinanyog sinda na may pagngalas. Saro ining bisyon, pero garo baga totoong-totoo ini kaya si Pedro nagpuon na makikabtang sa eksena, na nagsasabi: “Rabbi, marahay na yaon kami digdi. Kaya tugutan mo kaming magpatindog nin tulong tolda, saro para sa saimo, saro para ki Moises, asin saro para ki Elias.” (Marcos 9:5) Gusto daw ni Pedro na magpatindog nin mga tolda huling gusto niyang magpadagos pa an bisyon?

Miyentras na nagtataram pa si Pedro, sarong maliwanag na panganuron an naglindong sa sainda asin sarong boses hali sa panganuron an nagsabi: “Ini an sakuyang Aki, an namumutan, na sakong inuuyunan. Maghinanyog kamo sa saiya.” Pagkadangog kan boses nin Diyos, suminubsob an nagkatarakot na mga apostol, pero sinabihan sinda ni Jesus: “Buhat kamo. Dai kamo matakot.” (Mateo 17:5-7) Pagtangad kan tulong apostol, mayo sindang ibang nahiling kundi si Jesus sana. Natapos na an bisyon. Kan aldaw na asin pababa sinda hali sa bulod, tinugon niya sinda: “Dai nindo pagsabihon an bisyon sa kiisay man sagkod na an Aki nin tawo dai pa naibabangon hali sa mga gadan.”—Mateo 17:9.

Huli sa pagpahiling ni Elias sa bisyon, may ibinangon na hapot an mga apostol. “Taano,” an hapot ninda, “ta pigsasabi kan mga eskriba na dapat na mag-abot nguna si Elias?” Nagsimbag si Jesus: “Nag-abot na si Elias, asin dai ninda siya namidbid.” (Mateo 17:10-12) An sinasabi ni Jesus iyo si Juan Bautista, na nag-utob nin papel na kaagid kan ki Elias. Inandam ni Elias an dalan para ki Eliseo, asin siring man an ginibo ni Juan para ki Cristo.

Nakakapakusog nanggad an bisyon na ini para ki Jesus asin sa mga apostol! Patanaw iyan kan kamurawayan ni Cristo sa Kahadian. Kaya nahiling kan mga disipulo ‘na nagdatong sa saiyang Kahadian an Aki nin tawo,’ arog kan ipinanuga ni Jesus. (Mateo 16:28) Mantang nasa bulod, sinda “mga saksing nakahiling sa saiyang kamurawayan.” Dawa ngani gusto kan mga Fariseo nin sarong tanda na magpapatunay na si Jesus iyo an pinili nin Diyos na magin Hadi, dai niya sinda tinawan kaiyan. Pero an dayupot na mga disipulo ni Jesus tinugutan na mahiling an pagkaliwat kan itsura niya, na nagtaong garantiya kan kautuban kan mga hula manungod sa Kahadian. Kaya, naisurat ni Pedro kan huri: “An propetikong tataramon urog pa niyamong nasiyerto.”—2 Pedro 1:16-19.