Masakripisyo Ka Daw Para sa Kahadian?

 1. Anong mga sakripisyo an ginigibo nin dakul, asin taano?

AN MGA tawo gikan sa buot na nagsasakripisyo para sa mga bagay na mahalaga sa sainda. Itinatao nin mga magurang an saindang panahon, kuwarta, asin kusog sa kapakinabangan kan mga aki ninda. An mga hoben na atleta na nagmamawot na irepresentar sa Olympics an saindang nasyon dakul na oras na nagpapraktis asin nagsasanay nin sigido aroaldaw, mantang an mga kaedad ninda nagkakawat saka nag-uurugma. Nagsakripisyo man si Jesus para sa mga bagay na mahalaga sa saiya. Dai siya nagmawot nin mga luho, ni nagkaigwa man nin mga aki. Imbes, nagkonsentrar siya sa pagpalakop kan intereses kan Kahadian. (Mat. 4:17; Luc. 9:58) Dakul man an isinakripisyo kan mga parasunod niya para suportaran an Kahadian nin Diyos. An pagpalakop kan Kahadian na iyan an pinakaimportante sa sainda, asin nagsakripisyo sinda para lubos na makikabtang sagkod sa mapupuwede sa pagsuportar sa Kahadian. (Mat. 4:18-22; 19:27) Kaya puwede tang ihapot sa satong sadiri, ‘Ano an mahalaga sa buhay ko?’

 2. (a) Anong mga sakripisyo an kaipuhan gibuhon kan gabos na tunay na Kristiyano? (b) Anong dagdag pang sakripisyo an ginigibo nin iba?

² May mga sakripisyo na kaipuhan gibuhon kan gabos na tunay na Kristiyano asin mahalagang marhay sa satong pagpatalubo saka pagpadanay nin marahay na relasyon ki Jehova. Kaiba sa siring na mga sakripisyo an pagtao nin panahon asin kusog sa pamimibi, pagbasa kan Bibliya, pampamilyang pagsamba, pag-atender sa mga pagtiripon, asin ministeryo sa langtad.a (Jos. 1:8; Mat. 28:19, 20; Heb. 10:24, 25) Bilang resulta kan satong paghihinguwa asin bendisyon ni Jehova, marikas na nag-uuswag an paghuhulit, asin dakul an padagos na nagduduman sa “bukid kan harong ni Jehova.” (Isa. 2:2) Tanganing suportaran an mga gibuhon na pang-Kahadian, dakul an nagsasakripisyo para maglingkod sa Bethel, magtabang sa pagtugdok nin mga Kingdom Hall asin Assembly Hall, mag-organisar nin mga kumbensiyon, o magtao nin ayuda sa mga naapektaran nin natural na mga kalamidad. An dagdag na gibuhon na ini bakong kahagadan para magkamit nin buhay pero mahalagang marhay sa pagsuportar sa intereses kan Kahadian.

 3. (a) Paano kita nakikinabang kun kita nagsasakripisyo para sa Kahadian? (b) Anong mga hapot an maninigo tang pag-isipan?

³ Urog nanggad na kaipuhan ngunyan kisa kasuarin man an aktibong pagsuportar sa Kahadian. Nakakagaya-gaya na mahiling na dakul an gikan sa buot na nagsasakripisyo para ki Jehova. (Basahon an Salmo 54:6.) An siring na pagkabukas-palad nagtatao sa sato nin dakulang kagaya-gayahan mantang hinahalat ta an pag-abot kan Kahadian nin Diyos. (Deut. 16:15; Gui. 20:35) Pero, maninigo ta gabos na siyasaton na marhay an satong sadiri. May mga paagi daw na madadagdagan ta pa an pagsakripisyo para sa Kahadian? Paano ta ginagamit an satong panahon, kuwarta, kusog, asin abilidad? Anong mga pag-iingat an dapat tang pag-isipan? Repasuhon ta an sarong halimbawa na puwede tang arugon sa paggibo nin siring na gikan sa buot na sakripisyo o atang, na matao sa sato nin urog na kagaya-gayahan.

 4. Paano nakinabang an mga Israelita sa pag-atang?

⁴ Sa suanoy na Israel, an pagdulot nin atang iyo an basehan para sa kapatawadan nin mga kasalan. Kaipuhan an pag-atang para makamtan kan banwaan an pag-uyon ni Jehova. An iba digdi kahagadan; an iba gikan sa buot. (Lev. 23:37, 38) An bilog na mga dulot na tututungon puwedeng gikan sa buot na atang, o regalo, ki Jehova. An marahayon na halimbawa nin mga dulot iyo an may koneksiyon sa inagurasyon kan templo kan panahon ni Solomon.—2 Cron. 7:4-6.

 5. Ano an probisyon ni Jehova para sa mga limitado an kakayahan sa pinansiyal?

⁵ Huling mamumuton si Jehova, nasasabutan niya na dai kaya nin lambang saro na magtao nin magkapararehong halaga, kaya an saiyang kahagadan nakadepende sa kun ano sana an kakayahan nin saro. Sinasabi sa ley ni Jehova na kaipuhan na pabuluson an dugo nin hayop, na magigin ‘anino kan marahay na mga [bagay] na madatong’ paagi sa saiyang Aki, si Jesus. (Heb. 10:1-4) Minsan siring, bakong istrikto si Jehova sa pagpautob kan ley na iyan. Halimbawa, aakuon nin Diyos an dulot na agbaan o salampati kun dai kaya nin saro na magdulot nin karnero o baka. Paagi kaiyan, pati mga pobre magaya-gayang makakapag-atang ki Jehova. (Lev. 1:3, 10, 14; 5:7) Minsan ngani magkakalain na hayop an pig-aatang, may duwang bagay na kahagadan sa kada saro na nagdudulot nin gikan sa buot na atang.

 6. Ano an kahagadan sa lambang nagdudulot nin atang, asin gurano kahalaga an pagsunod diyan?

⁶ Inot, kaipuhan na itao nin saro an pinakamarahay na klase. Sinabihan ni Jehova an nasyon na para ‘akuon’ an ano man na idudulot, dapat na daing depekto iyan. (Lev. 22:18-20) Kun may depekto an hayop, dai iyan aakuon ni Jehova. Ikaduwa, dapat na an nag-aatang malinig asin daing ramog. Kun siya maati, kaipuhan niyang mag-atang nin dulot manungod sa kasalan o dulot para sa pagkakasala tanganing maibalik an saiyang marahay na kamugtakan sa atubangan ni Jehova bago mag-atang nin gikan sa buot na dulot. (Lev. 5:5, 6, 15) Seryosong bagay ini. Sinabi ni Jehova na kun an sarong maati magkakan nin atang para sa pakikikabtang, na diyan kaiba an gikan sa buot na mga dulot, gagadanon siya. (Lev. 7:20, 21) Sa ibong na kampi, kun an nag-atang may marahay na kamugtakan sa atubangan ni Jehova asin daing depekto an dulot, siya maggagaya-gaya na may pagkakontento.—Basahon an 1 Cronica 29:9.

7, 8. (a) Anong klaseng kagaya-gayahan an namamatian nin dakul huli sa pagsakripisyo para sa Kahadian? (b) Anong mga bagay na igwa kita an puwede tang gamiton?

⁷ Ngunyan, dakul man an gikan sa buot na nagpapagal sa paglilingkod ki Jehova, asin ikinakaugma niya ini. Nakakakontento an paglilingkod para sa satong mga tugang. Sarong brother na nagtatabang sa pagtugdok nin mga Kingdom Hall asin pagtaong ayuda sa mga naapektaran nin natural na mga kalamidad an nagsabi na dipisil ipaliwanag an pagkakontento niya sa mga paaging ini nin paglilingkod. Sabi niya, “Sulit an gabos na pagtrabaho saka paghihinguwa pag nahihiling ko an kaugmahan asin pag-apresyar kan mga tugang na nagtitiripon na sa saindang bagong Kingdom Hall o kun sinda tinatawan nin ayuda pagkatapos nin natural na kalamidad.”

⁸ An organisasyon ni Jehova sa presenteng panahon pirming naghahanap nin mga oportunidad para suportaran an gibuhon niya. Kan 1904, nagsurat si Brother C. T. Russell: “Dapat na ibilang kan lambang saro an saiyang sadiri na ninombrahan kan Kagurangnan na magin pinagkatiwalaan kan saiya mismong panahon, impluwensiya, kuwarta, asin iba pa, saka an kada saro dapat na maghinguwang gamiton an mga talentong ini sagkod sa pinakamakakaya niya, sa ikakamuraway kan Kagurangnan.” Minsan ngani nag-aako kita nin dakul na bendisyon, may mga bagay kitang itinatao para ki Jehova. (2 Sam. 24:21-24) Puwede ta daw na urog pang gamiton an mga bagay na igwa kita?

 9. Kun dapit sa satong paggamit nin panahon, anong prinsipyo sa instruksiyon ni Jesus na nasa Lucas 10:2-4 an puwede tang iaplikar?

⁹ An satong panahon. Dakul na panahon asin paghihinguwa an kaipuhan sa pagtradusir saka pag-imprenta kan mga literatura ta, pagtugdok nin mga lugar para sa pagsamba, pag-organisar nin mga kumbensiyon, pagtabang sa pagtao nin ayuda kun may kalamidad, pati sa dakul na iba pang kinakaipuhan na gibuhon. May 24 oras sana kita sa sarong aldaw. Nagtao si Jesus nin prinsipyo na makakatabang. Kan isugo ni Jesus sa langtad an saiyang mga disipulo, sinabihan niya sinda na dai ‘magtara-tara sa siisay man sa dalan.’ (Luc. 10:2-4) Taano ta matao siya nin siring na instruksiyon? An sarong iskolar sa Bibliya nagsabi: “An pagtaong galang kan mga taga Sirangan bako sanang kadikit na pagduko, o pag-abrasa, arog kan ginigibo ta, kundi paagi sa dakul na pagkugos, asin biyong pagduko kaiba kan hawak, saka paglaob pa ngani sa daga. Gabos ini nangangaipo nin dakul na oras.” Dai man dinadagka ni Jesus an mga parasunod niya na magin daing modo. Imbes, tinatabangan niya sindang masabutan na limitado an saindang panahon kaya kaipuhan nindang aprobetsaran iyan para maasikaso an mas mahahalagang bagay. (Efe. 5:16) Puwede ta daw na iaplikar an prinsipyong ini para magkaigwa kita nin mas dakul na panahon na tumabang sa gibuhon para sa Kahadian?

10, 11. (a) Ano an nagkapirang paagi na ginagamit an mga donasyon ta sa pambilog na kinaban na gibuhon? (b) Anong prinsipyo sa 1 Corinto 16:1, 2 an makakatabang sa sato?

¹⁰ An satong kuwarta. Dakulang pondo an kaipuhan para suportaran an gibuhon na pang-Kahadian. Kada taon, manampulong milyon na dolyar an ginagastos para sa mga nagbibiyaheng paraataman, espesyal payunir, asin misyonero. Puon 1999, labing 24,500 na Kingdom Hall an ikinatugdok na sa kadagaan na limitado an kakayahan sa pinansiyal. Pero, haros 6,400 pang Kingdom Hall an kaipuhan. Kada bulan, nag-iimprenta nin mga 100 milyones na kopya kan An Torrengbantayan asin Awake! Gabos ini suportado kan boluntad na mga donasyon nindo.

¹¹ Nagtao si apostol Pablo nin prinsipyo na puwede tang sunudon mapadapit sa pagtao nin donasyon. (Basahon an 1 Corinto 16:1, 2.) Paagi sa pasabong ni Jehova, dinagka niya an mga tugang sa Corinto na dai na maghalat sagkod sa katapusan kan semana para mahiling kun gurano an natada pa nindang kuwarta, imbes, magtagama na sa pagpuon pa sana kan semana sigun sa kakayahan ninda. Arog kan inot na siglo, an mga tugang sa panahon ta patiinot na nagpaplano para bukas-palad na magtao sigun sa kamugtakan ninda. (Luc. 21:1-4; Gui. 4:32-35) Pinapahalagahan ni Jehova an siring na pagkamatinao.

12, 13. Ano an posibleng mga dahilan na an iba nag-aalangan kun dapit sa pagtao kan kusog asin abilidad ninda, pero paano sinda tatabangan ni Jehova?

¹² An satong kusog asin abilidad. Sinusuportaran kita ni Jehova sa satong paghihinguwa na gamiton an kusog asin abilidad para sa Kahadian. Nanunuga siya na tatabangan kita kun kita mapagal. (Isa. 40:29-31) An pagmati ta daw kulang an satong abilidad para tumabang sa gibuhon? Nangangatanusan daw kita na may ibang mas kuwalipikado? Girumdumon, kayang pauswagon ni Jehova an natural na abilidad nin siisay man, arog kan ginibo niya ki Bezalel asin Oholiab.—Ex. 31:1-6; hilingon an ritrato sa kapinunan kan artikulong ini.

¹³ Dinadagka kita ni Jehova na gibuhon an pinakamakakaya ta asin dai mag-alangan. (Tal. 3:27) Durante kan pagtugdok liwat kan templo, sinabi ni Jehova sa mga Judio sa Jerusalem na hurop-hurupon kun ano an ginigibo ninda may koneksiyon sa pagtugdok. (Hag. 1:2-5) Nadisturbo asin nawara an konsentrasyon ninda. Marahay na pag-isipan ta kun baga an satong mga priyoridad kauyon kan mga priyoridad ni Jehova. Puwede ta daw na isentro an satong puso sa ‘satong mga dalan’ para urog na makikabtang sa gibuhon na pang-Kahadian sa huring mga aldaw na ini?

14, 15. (a) Paano kita nadadagka kan halimbawa kan mga tugang ta na limitado an kakayahan sa pinansiyal? (b) Ano an maninigo tang gibuhon?

¹⁴ Dakul an nag-iistar sa mga lugar na grabe an kasakitan o kadukhaan. Naghihinguwa an organisasyon ta na ‘mahipnuan’ an kakulangan kan mga tugang niyato na nag-iistar sa siring na mga nasyon. (2 Cor. 8:14, An Banal na Biblia) Alagad, dawa an mga tugang na limitado an kakayahan sa pinansiyal nagpapahalaga sa pribilehiyong magtao. Ikinakaugma ni Jehova kun an mga dukha sa materyal napapahiro na maugmang magtao.—2 Cor. 9:7.

¹⁵ Sa sarong pobrehon na nasyon sa Aprika, may mga tugang na itinatagama an sadit na kabtang kan tanuman ninda asin itinatao an kabaklan kan produkto diyan para suportaran an gibuhon na pang-Kahadian. Sa iyo man sanang nasyon, nakaiskedyul na itugdok an sarong Kingdom Hall na kaipuhan na marhay. Gustong tumabang an mga tugang sa lugar na iyan. Minsan siring, itutugdok iyan sa panahon kan pagtanom ninda. Huling determinado pa man giraray na tumabang, nagtatrabaho sinda sa Kingdom Hall pag aldaw asin minaduman sa uma pag banggi para matapos an pagtanom ninda. Marahay nanggad na halimbawa nin pagsakripisyo! Ipinapagirumdom kaini sa sato an mga tugang sa Macedonia kan inot na siglo. Grabe an “kadukhaan” ninda, alagad nakimahirak sinda na magkapribilehiyong tabangan sa pinansiyal an mga tugang. (2 Cor. 8:1-4) Lugod na an lambang saro sa sato magtao man nin ‘bagay sa [o kasukol kan] biyaya ni Jehova na itinatao sa sato.’—Basahon an Deuteronomio 16:17.

16. Paano ta masisiyerto na aakuon ni Jehova an satong pagsakripisyo?

¹⁶ Minsan siring, kaipuhan an pag-iingat. Arog kan suanoy na mga Israelita, dapat na siyertuhon tang aakuon nin Diyos an satong gikan sa buot na atang o pagsakripisyo. Kaipuhan tang magdanay na timbang para maasikaso an panginot niyatong mga responsabilidad sa pamilya asin sa pagsamba ki Jehova. An pagtao niyato sa iba nin panahon asin mga bagay na igwa kita maninigong dai magin dahilan na mapabayaan ta na an espirituwal o materyal na pangangaipo kan satong pamilya. Ta pag nangyari iyan, garo man sana kita nagtatao nin kun ano an mayo sa sato. (Basahon an 2 Corinto 8:12.) Dugang pa, dapat tang papagdanayon an sato mismong espirituwalidad. (1 Cor. 9:26, 27) Pero, makakasiyerto kita na kun namumuhay kita suno sa mga pamantayan sa Bibliya, an pagsakripisyo ta magtatao sa sato nin dakulang kagaya-gayahan saka satispaksiyon, asin iyan nangurugnang ‘aakuon’ ni Jehova.

17, 18. Ano an dapat tang ipahiling sa gabos na nagsasakripisyo para sa Kahadian, asin ano an maninigo ta gabos na pag-isipan?

¹⁷ Dakul sa satong mga tugang an garo man sana ‘ibinububo an saindang sadiri na siring sa dulot na inumon’ paagi sa pagsuportar ninda sa kinakaipuhan na mga aktibidad na pang-Kahadian. (Fil. 2:17, NW) Lubos tang inaapresyar an mga nagpapahiling nin siring na pagkamatinao. Dapat man na komendaran an agom asin mga aki kan mga brother na nanginginot sa aktibidad na pang-Kahadian huli sa pagigin bukas-palad asin mapagsakripisyo ninda.

¹⁸ Dakulang pagpapagal an kaipuhan para suportaran an intereses kan Kahadian. Lugod na mapagngayo-ngayo ta gabos na pag-isipan kun paano kita magkakaigwa nin dakulang kabtang diyan sagkod sa mapupuwede. Makakasiyerto ka na dakul an itataong balos sa saimo ngunyan asin mas dakul pa ngani sa bagong “kinaban na madatong.”—Mar. 10:28-30.