KABTANG KUWATRO
Pagkakonsiyensiya—“Linigan Mo Ako sa Sakong Kasalan”
“Nagin mas marahay an buhay kan pamilya mi huli sa bago kong trabaho, pero iyan man an dahilan nin pagkasangkot ko sa kuwestiyonableng mga aktibidad. Nagpuon akong magselebrar nin mga kapiyestahan, magpartisipar sa mga aktibidad sa pulitika, asin magsimba pa ngani. Nagin inaktibo akong Saksi ni Jehova sa laog nin 40 taon. Mantang minaagi an panahon, mas naiisip kong dai na ako mapapatawad ni Jehova. Garo dai ko mapatawad an sadiri ko, ta aram ko na an katotoohan bago ako mapasala nin dalan.”—Martha.
AN PAGKAKONSIYENSIYA puwedeng magin magabaton na pasan. “An sakong mga kasalan lampas na sa sakuyang payo,” an sabi kaidto ni Hading David. “Siring sa magabat na pasan, an mga iyan magabaton na para sako.” (Salmo 38:4, NW) An nagkapirang Kristiyano pinangibabawan nin grabeng kamunduan, na iniisip na dai na talaga sinda mapapatawad ni Jehova. (2 Corinto 2:7) Tama daw na magkongklusyon kita nin arog kaiyan? Dawa pa nakagibo ka nin magabat na kasalan, biyo daw na liningawan ka na ni Jehova asin dai na talaga mapapatawad? Bako nanggad arog kaiyan si Jehova!
“Maghusay Kita”
Dai tinatalikdan ni Jehova an mga nagsusulsol na nagkasala. An totoo, hinahanap niya sinda! Sa parabula kan gastador na aki, ipinaghalimbawa ni Jesus si Jehova sa sarong mamumuton na ama na may aki na naghali sa harong asin namuhay nin maraot. Kan huri, nagdesisyon an aki na bumalik. ‘Kan siya harayo pa, nahiling siya kan saiyang ama. Asin siya nahirak sa saiya asin duminalagan asin kinugos siya pati huminadok sa saiya.’ (Lucas 15:11-20) Gusto mo daw na bumalik na ki Jehova pero pagmati mo garo ‘harayuon’ ka sa saiya? Arog kan ama sa ilustrasyon ni Jesus, namumutan asin nagmamalasakit saimo si Jehova. Gustong-gusto na niyang bumalik ka.
Pero paano kun sa pagmati mo grabe karaot o dakulon na an kasalan mo para patawadon pa ni Jehova? Pakaisipon tabi an pangagda ni niya sa Isaias 1:18 (NW): “‘Madya kamo ngunyan asin maghusay kita,’ an sabi ni Jehova. ‘Minsan ngani an saindong mga kasalan garo eskarlata, iyan papapution na garo niyebe.’” Iyo, puwedeng patawadon ni Jehova dawa an mga kasalan na siring sa dai na mahahaling kulor eskarlata sa puting bado.
Habo ni Jehova na padagos kang pasakitan kan konsiyensiya mo. Kaya paano mo mamamatian an kaginhawahan na resulta kan pagpapatawad nin Diyos asin pagkaigwa nin malinig na konsiyensiya? Pag-isipan an duwang paagi na ginibo ni Hading David. Inot, sinabi niya: “Itinuga ko sa saimo an sakuyang kasalan.” (Salmo 32:5, NW) Tandaan na inagda ka na ni Jehova na rumani sa saiya paagi sa pamibi tanganing ‘husayon’ an mga bagay-bagay. Maghimati sa pangagdang iyan. Ituga ki Jehova an mga kasalan mo, asin sabihon saiya an mga nasa buot mo. Base sa personal na eksperyensiya, may kumpiyansang namibi si David: “Linigan mo ako sa sakong kasalan. . . . An pusong nalugadan asin runot, O Diyos, dai mo duduhagion.”—Salmo 51:2, 17, NW.
Ikaduwa, inako ni David an tabang nin Diyos paagi sa representante kaining si propeta Natan. (2 Samuel 12:13) Ngunyan, may ninombrahan si Jehova na mga elder na sinanay tanganing tabangan an nagsusulsol na mga nagkasala na maibalik an saindang relasyon sa Diyos. Pag nagdulok ka sa mga elder, gagamiton ninda an Kasuratan asin mamimibi nin udok sa puso tanganing maginhawahan ka, mabawasan o mahali an negatibong mga sabuot, asin maibalik an saimong espirituwalidad.—Santiago 5:14-16.
Gusto ni Jehova na magin malinig an saimong konsiyensiya para magianan ka
‘Maugma Idtong an Paglapas Pinatawad’
Totoo, tibaad dipisilon para sa saimo an pagtuga nin kasalan sa Diyos na Jehova asin an pagdulok sa mga elder. Namatian man iyan ni David. Nag-agi an panahon na ‘dai naggirong’ si David kun dapit sa kasalan niya. (Salmo 32:3) Pero pagkatapos kaiyan, napahalagahan niya an mga pakinabang nin pagtuga kan kasalan asin pagtanos kaiyan.
Nagin maugma giraray si David, asin saro iyan sa pinakamarahay na nakamtan niyang pakinabang. Nagsurat siya: ‘Maugma idtong an paglapas pinatawad, asin an kasalan pinara.’ (Salmo 32:1) Namibi man siya ki Jehova: ‘Kagurangnan, bukahon mo an sakuyang mga ngabil, tanganing an sakuyang nguso magbalangibog kan saimong kaumawan.’ (Salmo 51:15) Huling dai na nakokonsiyensiya kundi nagpapasalamat sa pagpapatawad nin Diyos, napahiro si David na sabihon sa iba an dapit ki Jehova.
Gusto ni Jehova na magin malinig an saimong konsiyensiya para magianan ka. Asin gusto niya na sabihon mo sa iba an manungod sa saiya asin an mga katuyuhan niya, bako na nakokonsiyensiya kundi sinsero asin talagang maugma. (Salmo 65:1-4) Tandaan an pangagda ni Jehova ‘na paraon an saimong mga kasalan, tanganing an mga panahon nin kaginhawahan mag-abot’ hali mismo sa saiya.—Guibo 3:19.
Arog kaiyan an naeksperyensiyahan ni Martha. Nag-istorya siya: “Pirmi akong pinapadarahan nin Watchtower saka Awake! kan aki kong lalaki. Dikit-dikit akong nagin harani giraray ki Jehova. Sa pagbabalik, an pagtuga kan gabos na kasalan an pinakamasakit gibuhon. Pero kan huri, namibi ako sa Diyos asin nakiulay saiya na patawadon ako. Dai ako makapaniwala na 40 taon palan an nag-agi bago ako nakabalik ki Jehova. Ako mismo sarong pruweba na dawa dakul na taon an mag-agi, puwede pa man giraray magbalik sa Diyos asin mag-ako kan pagkamuot niya.””