Arogon an Pagkaherak ni Jehova

“Padagos kamong magin maheherakon, kun paanong an saindong Ama maheherakon.”—LUCAS 6:36.

 1. Paano ipinaheling kan mga Fariseo na sinda mayong pagkaherak?

MINSAN ngani linalang na kaladawan nin Dios, sa parate dai naaarog nin mga tawo an saiyang pagkaherak. (Genesis 1:​27) Halimbawa, estudyare an mga Fariseo. Bilang grupo, dai ninda mahimong maggayagaya kan may pagkaherak na pinaomayan ni Jesus an alang na kamot nin sarong tawo sa aldaw nin Sabbath. Imbes, sinda nagkonsulta sa lambang saro tumang ki Jesus “tangani na sia magadan ninda.” (Mateo 12:​9-14) Sa saro pang pangyayari, pinaomayan ni Jesus an sarong tawo na buta poon kan mamundag. Sa giraray, “an nagkapira sa mga Fariseo” dai nakaheling nin dahelan na maggayagaya sa pakikidamay ni Jesus. Imbes, nagreklamo sinda: “Bako ining tawo gikan sa Dios, huli ta dai nia inootob an Sabbath.”​—Juan 9:​1-7, 16.

2, 3. Ano an boot sabihon ni Jesus sa mga tataramon na, “Magmaan sa lebadura kan mga Fariseo”?

² An pagkadaing simpatiya kan mga Fariseo krimen tumang sa katawohan asin kasalan tumang sa Dios. (Juan 9:​39-​41) May marahay na dahelan, pinatanidan ni Jesus an saiyang mga disipulo, “Magmaan sa lebadura” kan grupong ini na naniniwala sa pamamahala nin piling minoriya asin kan iba pang relihionista, arog baga kan mga Saduceo. (Mateo 16:6) An lebadura ginagamit sa Biblia na magrepresentar sa kasalan o karatan. Kaya an sinasabi ni Jesus an katokdoan kan “mga eskriba asin Fariseo” puedeng makaraot sa dalisay na pagsamba. Paano? Sa bagay na iyan nagtokdo sa mga tawo na mansayon an Ley nin Dios kun manongod sana sa saindang arbitraryong mga reglamento asin ritual, mantang dai iniintindi “an mas magabat na mga bagay,” kaiba an pagkaherak. (Mateo 23:23) An ritualistikong klaseng ini nin relihion ginibong dai matios na pagabat an pagsamba sa Dios.

³ Sa ikaduwang kabtang kan saiyang parabola kan gastador, ibinuyagyag ni Jesus an maraot na kaisipan kan Judiong mga namomoon sa relihion. Sa parabola an ama, na nagrerepresentar ki Jehova, gustong-gusto na patawadon an saiyang aking nagsosolsol. Alagad an matuang tugang kan solterito, na nagrerepresentar sa “mga Fariseo asin mga eskriba,” biyong laen an saboot manongod sa bagay.​—Lucas 15:2.

An Grabeng Kaanggotan nin Sarong Tugang

4, 5. Sa anong sentido na “nawara” an tugang kan gastador?

⁴ “Ngonyan an saiyang matuang aki yaon sa oma; asin kan sia dumatong asin harani na sa harong nadangog nia an konsierto nin musika asin baraylehan. Kaya inapod nia sa saiya an saro sa mga surugoon asin ihinapot kun ano an kahulogan kan mga bagay na ini. Sia nagsabi sa saiya, ‘Nagdatong an saimong tugang, asin binuno kan saimong ama an pinatabang torilyo, huli ta sia inako nia liwat na nasa marahay na salud.’ Alagad sia naanggot nin grabe asin habong lumaog.”​—Lucas 15:​25-28.

⁵ Malinaw nanggad, an gastador bako sanang iyo an may problema sa parabola ni Jesus. “An duwang aki na ilinadawan digdi pareho nawara,” sabi nin sarong reperensia, “an saro huli sa pagkabakong matanos na nakaraot sa saiya, an saro man huli sa pagpakangmatanos na nakabuta sa saiya.” Mangnoha na an tugang kan gastador bako sanang habong maggayagaya kundi “naanggot [man] nin grabe.” An pinakagamot na termino sa Griego para sa “grabeng kaanggotan” nagsusuherir, bakong gayo nin pagputok nin kaanggotan, kundi nin nagpapadagos na kamugtakan nin isip. Minalataw na an tugang kan gastador may nakatanom sa boot na nagkalaman nang paghinanakit, kaya para sa saiya bakong maninigo na selebraron an pagbalik nin saro na kaidto pa nungka kutana na naghale sa harong.

 6. Siisay an irinerepresentar kan tugang kan gastador, asin taano?

⁶ An tugang kan gastador nagrerepresentar na gayo sa mga ikinaanggot an pakikidamay asin pag-asikaso ni Jesus sa mga parakasala. An mga nagpapakangmatanos na ini dai napahiro kan pagkaherak ni Jesus; ni ipinabanaag man ninda an kagayagayahan sa langit na ibinubunga kun pinatatawad an sarong parakasala. Imbes, an pagkaherak ni Jesus nakapukaw kan saindang grabeng kaanggotan, asin sinda nagpoon na ‘mag-isip nin maraot’ sa saindang puso. (Mateo 9:​2-4) Sarong beses grabe an kaanggotan nin nagkapirang Fariseo kaya ipinaapod ninda an sarong tawo na pinaomayan ni Jesus dangan “pinalayas” sia sa sinagoga​—na minalataw na hinale sia sa pagkamiembro! (Juan 9:​22, 34) Arog kan tugang kan gastador, na “habong lumaog,” an Judiong mga namomoon sa relihion huminabo kan sinda magkaoportunidad na “makigayagaya sa mga tawong naggagayagaya.” (Roma 12:15) Orog pang ibinuyagyag ni Jesus an saindang maraot na pangangatanosan mantang ipinagpapadagos nia an saiyang parabola.

May Depektong Pangangatanosan

7, 8. (a) Sa anong paagi na dai nasabotan kan tugang kan gastador an kahulogan nin pagigin aki? (b) Paano na an matuang aki bakong arog kan saiyang ama?

⁷ “Dangan an saiyang ama luminuwas asin nagpoon na magngayongayo sa saiya. Bilang simbag sinabi nia sa saiyang ama, ‘Uya kadakol nang taon na ako nagpaoripon sa saimo asin minsan sarong beses dai lamang ako nakalapas sa saimong togon, pero minsan sarong beses dai mo lamang ako tinawan nin ogbon na kanding tangani na makapag-ogma ako kaiba kan sakong mga katood. Alagad pakaabot-abot kan aki mong ini na uminubos kan saimong kabuhayan sa mga patotot, binuno mo an pinatabang torilyo para sa saiya.’”​—Lucas 15:​28-30.

⁸ Sa mga tataramon na ini, lininaw kan tugang kan gastador na dai nia nasabotan an tunay na kahulogan nin pagigin aki. Pinaglingkodan nia an saiyang ama kapareho kan paglilingkod nin sarong empleyado sa saiyang among. Arog kan sabi nia sa saiyang ama: “Ako nagpaoripon sa saimo.” Totoo, an pinakamatuang aking ini nungka na naghale sa harong o naglapas sa togon kan saiyang ama. Alagad motibado daw nin pagkamoot an saiyang pagkuyog? Sia daw nakamate nin tunay na kagayagayahan sa paglilingkod sa saiyang ama, o imbes sia daw luway-luway na nagin kontento nang marhay sa sadiri, na naniniwala na sia maboot na aki huli sana ta ginigibo nia an saiyang mga obligasyon “sa oma”? Kun sia talagang aking deboto, taano ta dai nia ikinapabanaag an isip kan saiyang ama? Kan tawan nin oportunidad na magpaheling nin pagkaherak sa saiyang tugang, taano ta mayo nin lugar an pakikidamay sa saiyang puso?​—Ikomparar an Salmo 50:​20-​22.

 9. Ipaliwanag kun paano an Judiong mga namomoon sa relihion kapareho kan matuang aki.

⁹ An Judiong mga namomoon sa relihion kapareho kan matuang aking ini. Sinda naniwala na maimbod sinda sa Dios huli ta sinda talagang nagsususog sa sarong kodigo nin mga ley. Totoo, mahalagang marhay an pagkuyog. (1 Samuel 15:22) Alagad an saindang sobrang pagdodoon sa gibo ginibo an pagsamba sa Dios na makilibrong pinagkatodan, panluwas sanang pag-eksibir nin debosyon na mayo nin tunay na espirituwalidad. Bangkag sa mga tradisyon an saindang isip. Daing pagkamoot an saindang puso. Tara, an pagheling ninda sa ordinaryong mga tawo garo an daga na tinotongtongan ninda, na may pagmenus pa ngani na inaapod sinda na “mga tawong isinumpa.” (Juan 7:49) An totoo, paano mahanga an Dios sa gibo nin siring na mga namomoon mantang an puso ninda harayoon sa saiya?​—Mateo 15:​7, 8.

10. (a) Taano an mga tataramon na, “An boot ko pagkaherak, bakong atang” ta angay na hatol? (b) Gurano kaseryosong bagay an kadaihan nin pagkaherak?

¹⁰ Sinabihan ni Jesus an mga Fariseo na “paduman kamo asin aramon an kahulogan kaini, ‘An boot ko pagkaherak, bakong atang.’” (Mateo 9:13; Oseas 6:6) Malibog an saindang mga ipinaoorog, ta kun mayo nin pagkaherak magigin daing kamanungdanan an gabos nindang atang. Ini tunay na seryosong bagay, huli ta sinasabi kan Biblia na an “mayong pagkaherak” kabilang sa mga minamansay nin Dios na “maninigo sa kagadanan.” (Roma 1:​31, 32) Kun siring, bakong makangangalas na sinabi ni Jesus na bilang grupo an mga namomoon sa relihion nakatalaga sa pagkalaglag na daing katapusan. Malinaw na an saindang pagigin mayong pagkaherak nakakontribwir nin dakula sa angay na pag-ako ninda kan paghokom na ini. (Mateo 23:33) Alagad tibaad matatabangan an mga indibiduwal sa grupong ini. Sa konklusyon kan saiyang parabola, hiningoa ni Jesus na pakarhayon liwat an kaisipan kan mga Judiong iyan paagi sa mga tataramon kan ama sa saiyang matuang aki. Helingon niato kun paano.

An Pagkaherak nin Sarong Ama

11, 12. Paano hiningoa kan ama sa parabola ni Jesus na makipangatanosan sa saiyang pinakamatuang aki, asin ano an tibaad makahulogan sa paggamit kan ama sa fraseng “tugang mo”?

¹¹ “Dangan sia nagsabi sa saiya, ‘Aki ko, danay ka nang nasa kaibahan ko, asin an gabos na bagay na sakuya saimo; alagad kaipuhan nanggad kitang mag-ogma asin maggayagaya, huli ta an tugang mong ini gadan na asin nabuhay, patin sia nawara asin nakua.’”​—Lucas 15:​31, 32.

¹² Mangnoha na ginamit kan ama an fraseng “tugang mo.” Taano? Bueno, girumdoma na kasubago, sa pakikipag-olay sa saiyang ama, inapod kan matua an gastador na “aki mo”​—bakong “tugang ko.” Garo baga dai nia rinerekonoser an pagigin magkapamilya nia asin kan saiyang tugang. Kaya ngonyan garo man sana sinasabi kan ama sa matua niang aki: ‘Sia bako sanang aki ko. Sia tugang mo, kadugo mo. Nasa saimo an gabos na dahelan na maggayagaya huli sa saiyang pagbabalik!’ Maninigo na nagin malinaw kutana sa Judiong mga namomoon an mensahe ni Jesus. An mga parakasala na saindang minemenus sa katotoohan “mga tugang” ninda. Tunay nanggad, “mayo nin tawong matanos sa daga na padagos na naggigibo nin marahay asin dai nagkakasala.” (Eclesiastes 7:20) Kun siring, an prominenteng mga Judio igwa kan gabos na dahelan na maggayagaya kun nagsosolsol an mga parakasala.

13. An biglang pagkatapos kan parabola ni Jesus nagwalat sa sato nin anong nakapapepensar na hapot?

¹³  Pagkatapos kan pagngayongayo kan ama, biglang natapos an parabola. Garo baga inaagda ni Jesus an mga naghihinanyog sa saiya na sinda na an tumapos sa estorya. Ano man an simbag kan matuang aki, an lambang naghihinanyog napaatubang sa hapot na, ‘Makikikabtang ka daw sa kagayagayahan na naeeksperyensiahan sa langit kun nagsosolsol an sarong parakasala?’ An mga Kristiano ngonyan may oportunidad man na ipaheling an saindang simbag sa hapot na iyan. Paano?

Pag-arog Ngonyan sa Pagkaherak nin Dios

14. (a) Paano niato ikaaaplikar an hatol ni Pablo na yaon sa Efeso 5:1 pag-abot sa pagkaherak? (b) Anong salang pakasabot may labot sa pagkaherak nin Dios an kaipuhan na maanan niato?

¹⁴ Sinadol ni Pablo an mga taga Efeso: “Magin kamong mga paraarog sa Dios, bilang namomotan na mga aki.” (Efeso 5:1) Huli kaini, bilang mga Kristiano maninigo na apresyaron niato an pagkaherak nin Dios, itadom iyan nin hararom sa satong puso, dangan ipaheling an kualidad na ini sa satong relasyon sa iba. Minsan siring, maninigo an sarong patanid. An pagkaherak nin Dios dai maninigong mamisinterpretar na pag-ina sa gabat nin kasalan. Halimbawa, may nagkapira na tibaad indiperenteng mangatanosan, ‘Kun ako magkasala, sa gabos na panahon puede akong mamibi sa Dios para sa kapatawadan, asin sia magigin maheherakon.’ An siring na aktitud magigin an inapod kan kagsurat sa Biblia na si Judas na ‘paggibo sa dai na kutana maninigong kabootan kan satong Dios na magin sarahotan para sa malaswang gawe-gawe.’ (Judas 4) Minsan ngani maheherakon si Jehova, “dai nanggad sia magpapalibre sa padusa” sa pagtratar sa mga paragibo nin sala na habong magsolsol.​—Exodo 34:7; ikomparar an Josue 24:19; 1 Juan 5:​16.

15. (a) Taano an kamagurangan partikularmente ta kaipuhan na magpadanay nin timbang na punto de vista sa pagkaherak? (b) Mantang dai tinotogotan an tuyong paggibo nin sala, ano an maninigong hingoahon na gibohon kan kamagurangan, asin taano?

¹⁵ Sa ibong na lado, kaipuhan na arog man kita kaiyan kaingat sa pagmaan sa ibong naman​—an tendensia na magin dai mababago asin mapaghusgar sa mga nagpapaheling nin tunay na pagsolsol asin diosnon na kamondoan sa saindang mga kasalan. (2 Corinto 7:​11) Mantang ipinagkatiwala sa kamagurangan an pag-asikaso sa mga karnero ni Jehova, mahalagang marhay na papagdanayon ninda an timbang na punto de vista sa bagay na ini, nangorogna kun nagkakapot nin hudisyal na mga bagay. An Kristianong kongregasyon dapat na papagdanayon na malinig, asin tama sa Kasuratan na ‘haleon an maraot na tawo’ paagi sa pagtitiwalag. (1 Corinto 5:​11-13) Kadungan kaiyan, marahay na magpaheling nin pagkaherak kun may malinaw na basehan para dian. Kaya mantang dai tinotogotan nin kamagurangan an tuyong paggibo nin sala, pinagmamaigotan nindang hanapon an mamomoton asin maheherakon na dalan na itinotogot nin hustisya. Pirmeng nasa isip ninda an prinsipyo sa Biblia: “An dai nagsasagibo nin pagkaherak hohokoman na dai nin pagkaherak. An pagkaherak mapangganang nag-oogma tumang sa paghokom.”​—Santiago 2:13; Talinhaga 19:17; Mateo 5:7.

16. (a) Ginagamit an Biblia, ipaheling kun paano totoong minamawot ni Jehova na bumalik sa saiya an mga napapasala. (b) Paano niato ikapaheheling na ikinaoogma man niato an pagbalik nin nagsosolsol na mga parakasala?

¹⁶  Liniliwanag kan parabola kan gastador na mawot ni Jehova na bumalik sa saiya an mga napapasala. Sa katunayan, itinatao nia sa sainda an pangagda sagkod na patunayan ninda na sinda dai nang paglaom na magsolsol. (Ezequiel 33:11; Malaquias 3:7; Roma 2:​4, 5; 2 Pedro 3:9) Arog kan ama kan gastador, tinatrato ni Jehova na may dignidad an mga minabalik, na inaako giraray sinda bilang tunay na mga miembro kan pamilya. Inaarog daw nindo si Jehova sa bagay na ini? Kun an sarong kapagtubod, na natiwalag sa laog nin kadikit na panahon, ibinalik, ano an reaksion nindo? Dati na niatong aram na may “kagayagayahan sa langit.” (Lucas 15:7) Alagad igwa daw nin kagayagayahan digdi sa daga, sa saindong kongregasyon, sa saindong puso pa ngani? O, arog kan matuang aki sa parabola, igwa daw nin paghinanakit, na garo baga dai angay na akoon nin maogma an saro na kaidto pa dai kutana naghale sa aripompon nin Dios?

17. (a) Ano an nagin situwasyon sa Corinto kan enot na siglo, asin ano an isinadol ni Pablo sa mga nasa kongregasyon na gibohon sa bagay na iyan? (b) Taano ta praktikal an konseho ni Pablo, asin paano niato iyan ikaaaplikar ngonyan? (Helingon man an kahon sa too.)

¹⁷ Tanganing matabangan kita na siyasaton an satong sadiri sa bagay na ini, estudyare an nangyari kaidtong mga taon 55 C.E. sa Corinto. Duman, an sarong tawo na pinahale sa kongregasyon sa katapustapusi lininig an saiyang pamumuhay. Ano an dapat na gibohon kan mga tugang? Maninigo daw na pagdudahan ninda an saiyang pagsolsol asin padagos siang rayoan? Al kontraryo, sinadol ni Pablo an mga taga Corinto: “Maninigo sia nindong maboot na patawadon asin rangahon, tanganing an siring na tawo dai madaog kan saiyang pagigin labi-labi kamamondo. Kun siring pinakasasadol ko kamo na patunayan nindo an saindong pagkamoot sa saiya.” (2 Corinto 2:​7, 8) Sa parate, an nagsosolsol na mga paragibo nin sala partikularmenteng madaling tamaan nin pagkasopog asin pagkadesesperar. Huli kaini, an mga ini kaipuhan na pakosogon an boot na sinda namomotan kan saindang mga kapagtubod asin ni Jehova. (Jeremias 31:3; Roma 1:​12) Ini mahalagang marhay. Taano?

18, 19. (a) Paano ipinaheling kan mga taga Corinto sa kapinonan na sinda sobra kamapagpasunod? (b) Paano an mayong pagkaherak na aktitud puedeng magresulta kutana na “masaroan ni Satanas” an mga taga Corinto?

¹⁸ Sa pagpakasadol sa mga taga Corinto na magin mapagpatawad, an saro sa mga dahelan na itinao ni Pablo “tanganing dai kita masaroan ni Satanas, huli ta bako kitang ignorante kan saiyang mga pakana.” (2 Corinto 2:11) Ano an boot niang sabihon? Bueno, sa kapinonan kinaipuhan na sagweon ni Pablo an kongregasyon sa Corinto huli sa pagigin sobra kamapagpasunod. Tinogotan ninda an tawong ini na ipagpadagos an saiyang pagkakasala na dai napadudusahan. Sa paggibo kaiyan, an kongregasyon​—partikularmente an kamagurangan kaiyan—​nakatabang pa ki Satanas, ta gugustohon niang marhay na maraot an dangog kan kongregasyon.​—1 Corinto 5:​1-5.

¹⁹ Ngonyan kun sinda maduman sa ibong asin masayumang patawadon an nagsosolsol, masasaroan sinda ni Satanas sa ibang paagi. Paano? Sa bagay na puede niang aprobetsaran an saindang pagigin maringis asin mayong pagkaherak. Kun an nagsosolsol na parakasala “madaog kan saiyang pagigin labi-labi kamamondo”​—o arog kan pagkatradusir dian kan Today’s English Version, magin “mamondoon kaya biyo nang sumuko”—​kanigoan kagabat kan magigin paninimbagan kan kamagurangan ki Jehova! (Ikomparar an Ezequiel 34:6; Santiago 3:1) May marahay na dahelan, pakapatanidi kan saiyang mga parasunod na dai pagpasingkogon an “saro kan mga sadangoton na ini,” si Jesus nagsabi: “Atenderan an saindong sadiri. Kun an saimong tugang magkasala sawayon mo sia, asin kun sia magsolsol patawadon mo sia.”a​—Lucas 17:​1-4.

20. Sa anong paagi na may kagayagayahan sa langit sagkod digdi sa daga kun nagsosolsol an sarong parakasala?

²⁰ An rinibo na nagbabalik sa dalisay na pagsamba taon-taon nagpapasalamat sa pagkaherak na ipinaheling sa sainda ni Jehova. “Mayo akong nagigirumdoman na panahon sa buhay ko na may ikinaogma akong marhay na arog ngonyan,” sabi nin sarong tugang na Kristiana manongod sa saiyang pakabalik. Siempre, an saiyang kagayagayahan nag-aaniningal sa tahaw kan mga anghel. Kita man logod makiiba sa “kagayagayahan sa langit” na nangyayari kun nagsosolsol an sarong parakasala. (Lucas 15:7) Sa paggibo kaiyan, aarogon niato an pagkaherak ni Jehova.

[Nota sa Ibaba]

Bilang Pagrepaso

◻ Sa anong paagi na an tugang kan gastador kapareho kan Judiong mga namomoon sa relihion?

◻ Sa anong paagi na dai nasabotan kan tugang kan gastador an tunay na kahulogan nin pagigin aki?

◻ Sa pagpabanaag kan pagkaherak nin Dios, anong duwang aktitud na sobra nang marhay an kaipuhan na likayan niato?

◻ Paano niato maaarog ngonyan an pagkaherak nin Dios?

[Kahon sa pahina 17]

“PATUNAYAN NINDO AN SAINDONG PAGKAMOOT SA SAIYA”

Mapadapit sa pinahaleng paragibo nin sala na nagpaheling nin pagsolsol, sinabihan ni Pablo an kongregasyon sa Corinto: “Pinakasasadol ko kamo na patunayan nindo an saindong pagkamoot sa saiya.” (2 Corinto 2:8) An termino sa Griego na trinadusir na “patunayan” sarong legal na termino na nangangahulogan na “gibohon na balido.” Iyo, an mga nagsosolsol na ibinalik kaipuhan na makamate na sinda namomotan asin na sinda maogma giraray na inaako bilang miembro kan kongregasyon.

Minsan siring, dapat na girumdomon niato na an kadaklan sa kongregasyon dai nakaaaram kan partikular na mga pangyayari na nagbunga kan pagpahale sa saro o sa saiyang pakabalik. Dugang pa, tibaad may nagkapira na personal na naapektaran o nakolgan​—tibaad panhaloyan pa ngani—​kan salang ginibo kan nagsosolsol. Kun siring, huling mapagrisa sa iba sa siring na mga bagay, kun may paisi nin pakabalik, natural sana na dai nguna kita magpahayag nin maogmang pag-ako sagkod na iyan magigibo na nin personal.

Nakapakokosog nanggad sa pagtubod para sa mga ibinalik na maaraman na sinda maogmang inaako giraray bilang miembro kan Kristianong kongregasyon! Maparirigon niato an boot kan mga nagsosolsol na iyan paagi sa pakikipag-olay sa sainda asin pakikiiba sa sainda sa Kingdom Hall, sa ministeryo, asin sa iba pang angay na okasyon. Sa pagpatunay, o paggibong balido, kan satong pagkamoot sa mga namomotan na ini sa siring na paagi, dai man niato iniinaan an pagkaseryoso kan mga kasalan na ginibo ninda. Imbes, kaiba kan langitnon na mga hukbo, ipinaggagayagaya niato an bagay na saindang isinikwal an makasalan na dalan asin nagbalik sinda ki Jehova.​—Lucas 15:7.

[Retrato sa pahina 15]

An matuang aki habong maggayagaya sa pagbalik kan saiyang tugang