An Paraisong Ibinalik Nagpapamuraway sa Dios

“Papamurawayon ko an namumugtakan kan sakuyang mga bitis.”—ISAIAS 60:13.

1, 2. (a) Paagi sa saiyang propetang si Isaias, ano an ihinula nin Dios manongod sa daga? (b) Sa pagheling sa sangribong taon pasiring sa ngapit, ano an satuyang naheheling?

LINALANG ni Jehova an daga bilang an planeta sa irarom kan saiyang mga bitis, bilang an saiyang piguratibong tongtongan. Paagi sa sai7ang propetang si Isaias, ihinula nin Dios na saiyang ‘papamurawayon an namumugtakan kan saiyang mga bitis.’ (Isaias 60:13) Sa tabang kan ipinasabong na Biblia, makaheheling kita, na garo baga paagi nin sarong makosog na teleskopyo, sa sarong ribong taon pasiring sa ngapit nin tawo. Kanigoan kanakaoogma an satong naheheling! An bilog na daga nagsisinag sa daing kakulangan na kagayonan na gibo kan pinakadakulang Hardinero sa bilog na uniberso. An Paraiso ikinabalik na sa bilog na daga sa katawohan!

² Iyo, nasa isip kan banal na Kaharohalangkawe na nagpoon kan pag-eksister nin tawo sa paraiso an pinakadakulang kaogmahan nin tawo. Anong mamomoton na Kaglalang nanggad para sa katawohan, na saiya bakong kasobrahan nin pagtataram na sabihon, “an Dios pagkamoot”! (1 Juan 4:8, 16) Sa ibinalik na Paraiso, an maygurang na mga lalaki asin babae na may daing kakulangan na pagkasangkap mag-oorontok na iriba bilang mamomoton na magturugang. (Isaias 9:6) Pinahiro nin pagkamoot, sinda nasa sangkap na pagpasakop sa mamuraway na Kaglalang kan langit asin daga, si Jehova Dios.

3, 4. (a) Sa anong paagi an langit asin an daga magkakaagid sa lambang saro? (b) Ano an reaksion kan mga anghel kun ibinalik na an Paraiso sa daga?

³ Rinibong taon na an nakaagi, sa sarong banal na ipinasabong na pagladawan kan saiyang rona, nagtaram an Dios kaining makangangalas na mga tataramon sa saiyang piniling banwaan: “An kalangitan iyo an sakuyang trono, asin an daga iyo an tongtongan kan sakong bitis.” (Isaias 66:1) An lubos na kamurawayan kan saiyang “tongtongan,” an Paraisong daga, maninigo na angay na ikaagid sa kamurawayan kan saiyang trono sa dai naheheling na kaitaasan.

⁴ Sa panahon nin paglalang sa daga, idtong mga naglilingkod sa trono nin Dios sa langitnon na rona kinonsiderar an daganon na eksena sa ibaba. Siertong nakamate nanggad sinda nin labi-labing kaogmahan mantang naheling kan saindang mga mata an mamuraway na kaliwanagan kaini! Paano sinda makapopogol sa biglang pagkanta? (Ikomparar an Sofonias 3:17, Revised Standard Version; Salmo 100:2, The Jerusalem Bible.) Pinasabngan kan napaoyonan asin maogmang Kaglalang an saiyang daganon na parasurat tanganing ipaheling an sarong tamang ladawan kan langitnon na eksena, sa pagsasabing: “An mga bitoon sa makaaaga magayagayang iribang nagkururahaw, asin an mga aki nin Dios nagpoon na magkururahaw sa dakulang kaogmahan.” (Job 38:7) Orog nanggad na magkukururahaw sa kagayagayahan an anghel na mga aki nin Dios, sa kamurawayan nin Dios, kun ikinabalik na an Paraiso!

 5. Ano an maninigong magin pagmate niato manongod sa pagkaotob kan orihinal na katuyohan nin Dios manongod sa daga?

⁵ Nakapupukaw nanggad nin puso para sa sato na siertohon liwat paagi kan ipinasabong na Banal na Kasuratan na an makangangalas na pagkaotob kan paraisong daga iyo an katuyohan ni Jehova Dios poon sa mismong kapinonan. Ining nagtatao nin kagayagayahan, nagpapamuraway na kulminasyon kan katuyohan nin Dios para sa dagang ini an tama sanang bagay na laoman sa sarong Dios na nagdadanay sa kamurawayan asin dai nasusudya sa pagpaheling kan saiyang kadakulaan. An gabos na kaomawan para sa saiya!—Salmo 150:1, 2; Isaias 45:18; Kapahayagan 21:3-5.

An mga Binuhay Liwat Nagtarabang sa Pagbabalik kan Paraiso

 6. Pakatapos kan Armagedon, paano papanoon nin tawo an daga?

⁶ Minsan ngani sadit sana sa bilang an mga nakaligtas sa Armagedon, bako sanang paagi sa pag-aki ninda na an daga lubos na mapapano nin tawo. Si Jehova man ‘pamumurawayon an namumugtakan kan saiyang mga bitis’ paagi sa pagbuhay liwat kaidtong mga nasa lolobngan nin girumdoman asin nakikinabang sa atang na pantubos ni Cristo. An mga ini man magkakaigwa nin pribilehiyo na makikabtang sa magayagayang gibohon nin pagbago kan satong daganon na globo na magin sarong nangongorog na magayon na paraiso.—Gibo 24:15.

 7. Anong mga tataramon ni Jesus an gigirumdomon kan mga nakaligtas sa Armagedon?

⁷ Padagos na isasaisip kan mga nakaligtas sa Armagedon an nagpapahiro sa kalag na mga tataramon kan Kagurangnan na Jesu-Cristo kan okasyon na napahiro siang sabihon: “Dai kamo magngalas kaini, huli ta an oras maabot na an gabos na nasa lolobngan nin girumdoman makadadangog kan saiyang tingog asin maruluwas.” (Juan 5:28, 29) Magigin dakulang oras nanggad iyan kun an mga tawong gadan sa saindang lolobngan nin girumdoman makadangog kan tingog kan Aki nin Dios na nagsasabi kan kaagid na mga tataramon na sinambit ki Lazaro, na an bangkay nasa lolobngan sa Betania: “Lazaro, lumuwas ka!”—Juan 11:43.

 8, 9. Sairisay an posibleng maeenot na buhayon liwat pasiring sa binagong buhay sa daga, na nagtatao nin anong kagayagayahan sa mga nakaligtas sa Armagedon?

⁸ Sairisay daw an posibleng maeenot na buhayon liwat sa panibagong buhay sa daga sa pagsakop kan Sangribong Taon na Pamamahala ni Jesu-Cristo asin bilang simbag sa saiyang pagboot? Magigin rasonable sanang iyan an “ibang karnero” na nagkagaradan durante kan huring mga aldaw bago an katapusan kan sistemang ini nin mga bagay. Sinda an makaeeksperyensia kan mas amay na pagkabuhay liwat. (Juan 10:16) Sinda an posibleng may kadikit sanang kasakitan sa pagbagay kan saindang mga sadiri sa bagong kinaban.—Ikomparar an Mateo 25:34; Juan 6:53, 54.

⁹ Magayagaya nanggad para sa mga nakaligtas sa Armagedon kun maheling ninda na binuhay liwat idtong mga kabilang sa “ibang karnero” na nagkagaradan durante kan kapag-arakian bago an “dakulang kahorasaan”! (Mateo 24:21) May malinaw na kakayahan nin pagmidbid, mamimidbid sinda kan mga nakaligtas sa Armagedon, aakoon sinda, asin kairiba sindang magpapadagos na ibalik an saindang sararong paglilingkod sa Kaharohalangkaweng Dios!

10. Paagi sa pagkaligtas sa Armagedon, ano an saindong maheheling?

¹⁰ Paagi sa pagigin saro sa mga nakaligtas sa Armagedon, puwede nindong maheling an pagbuhay liwat sa kaenot-enote kan saindong sadiring daganon na mga paryentes. Paanong an emosyonal na epekto kaini sa saindo magigin laen kan sa mga magurang na nakaheling sa Kagurangnan na si Jesus na ibinalik liwat na buhay an saindang 12 anyos an edad na aking babae sa saindang nahihidaw na mga takyag? “Sinda nakamate nin labi-labing kaogmahan.” (Marcos 5:42) A, iyo nanggad, an dai ikataram na kagayagayahan magigin saindo sa pagkabuhay liwat kan mga gadan hale sa Hades asin sa dagat. (Kapahayagan 20:13) O magigin mamurawayon nanggad an kinaagahan iyan, sarong kinaagahan na sa dai na mahahaloy uya na!

“Mga Prinsipe sa Bilog na Daga”

11, 12. (a) Ano an idinodoon kan Salmo 45:16? (b) Hale kairisay manombra an Hade, si Jesu-Cristo, nin “mga prinsipe sa bilog na daga”?

¹¹ Paagi sa paggamit kan saiyang kapangyarihan na buhayon liwat an mga tawong gadan na sa sainda itinao nia an saiyang sangkap na buhay tawo bilang sarong atang na pantubos, ootobon ni Jesus an Salmo 45:16. An salmong ini makahulang sinambit ki Jesus bilang an ibinugtak na Hade: “Sa kasalihid kan saimong [daganon na] mga apoon magkakaigwa kan saimong mga aki, na saimong nonombrahan bilang mga prinsipe sa bilog na daga.” An salmong ini nagdodoon na si Jesu-Cristo an magigin langitnon na ama kan mga aki digdi sa daga asin na ibubugtak nia an mga aking lalaki sa tahaw ninda bilang “mga prinsipe sa bilog na daga.” Bilang an “aki ni David” asin bilang an panganay na aki kan Judiong birhen na si Maria, nagkaigwa si Jesus nin daganon na mga tawong apoon pabalik sa enot na ama, si Adan.—Lucas 3:23-38.

¹² An Salmo 45:16 nagsasabi daw na idtong mga dating apoon ni Jesus sa laman magigin saiyang mga aki paagi kan saiyang pagbuhay liwat sa sainda hale sa mga gadan? Iyo. An Salmo 45:16 daw nagsasabi man na huli ta naggikan sia sa sainda, magpapaheling si Jesus nin espesyal na makahadeng pabor asin sinda sana an nonombrahan na magin “mga prinsipe sa bilog na daga” sa Paraisong kamugtakan kaini? Dai. An kaotoban kan hula sa siring na paagi magtotogot sa limitadong bilang sana nin “mga prinsipe” sa bilog na daga. Puwera pa sa katotoohan na iyan, bakong gabos kaining saiyang mga apoon nangongorog tanganing magin angay sa espesyal na kabantogan sa daga durante kan saiyang Pamamahala sa Milenyo. An Hade, si Jesu-Cristo, magkakaigwa nin dai mabilang na labi pa kisa sa saiyang daganon na mga apoon na nonombrahan bilang “mga prinsipe”—mga kuwalipikado hale sa mga nakaligtas sa Armagedon, sa binuhay liwat na “ibang karnero,” kairiba an bago an Kristianong mga lalaki nin pagtubod. Hale sa gabos na ini, makakanombra sia nin kuwalipikadong mga nababagay tanganing magkapot nin katongdan na mga prinsipe bilang saiyang daganon na mga representante.

13, 14. Siisay na mga binuhay liwat an pribilehiyo kan mga nakaligtas sa Armagedon na maheling kan sainda mismong mga mata?

¹³ Isipon an mga siring na nakalinya para sa pagkabuhay liwat sa pagsakop kan Mesiyanikong Kahadean. Uya! Magtutubod daw kita sa satong mga mata? Yaon si Abel, an enot na tawong martir, asin si Enoc, na padagos na naglakaw kaiba kan tunay na Dios. Yaon man si Noe, an paratogdok kan dahong. Yaon man si Abraham, Isaac, asin si Jacob, mga apoon kan nasyon nin Israel. Yaon si Moises (kan tribo nin mga saserdote ni Levi) asin si David na sa saiya ginibo an daing sagkod na tipan para sa Kahadean. Asin yaon si Isaias, Jeremias, Ezequiel, Daniel, asin gabos na iba pang nagsurat kan Biblia na Hebreong mga propeta sagkod sa pinakahuri sa sainda, si Malaquias, asin siyempre pa, si Juan Bautista asin siring man si Jose, an ama-amaan ni Jesus.

¹⁴ Sa sarong okasyon sinabi ni Jesus sa mga Judio na sinda “maheheling si Abraham asin si Isaac asin si Jacob asin an gabos na mga propeta sa kahadean nin Dios, alagad [sinda man sana] iaapon sa luwas.” (Lucas 13:28) An “dakulang kadaklan” nin daganon na mga nakaligtas sa “ralaban kan dakulang aldaw nin Dios na Makakamhan sa gabos” tatawan nin pribilehiyo na literal na maheling an binuhay liwat na si “Abraham asin si Isaac asin si Jacob patin an gabos na mga propeta” na ibinalik digdi sa Paraisong daga asin sa may pamamahalang paglilingkod sa pagsakop kan Kahadean nin Dios paagi kan “Daing sagkod na Ama,” si Jesu-Cristo.—Kapahayagan 7:9, 14; 16:14; Isaias 9:6.

15. Anong daing kaagid na pribilehiyo an naghahalat sa mga nakaligtas sa Armagedon?

¹⁵ Magigin nakapagpapahiro nanggad sa kalag para sa saindo na nakaligtas sa katapusan kaining presenteng maraot na kinaban na makipagribayan nin opinyon ki Noe asin sa saiyang pamilya, “an walong kalag,” na nakaligtas sa katapusan kan enot na kinaban sa panglobong Delubyo kan 2370 B.C.E.! Mayo nin iba pa sa bilog na panahon na daing sagkod an magkakaigwa nin mga eksperyensia na siring kan sa saindo asin sa siring maglingkod bilang sarong Saksi ni Jehova Dios sa nangongorog, dai na maootrong paaging ini.—1 Pedro 3:20; Marcos 13:19; 2 Pedro 3:5-7.

Nagirumdoman an Sarong May Simpatiyang Paragibo nin Maraot

16, 17. (a) Sa panahon na girumdomon ni Jesus an may simpatiyang paragibo nin maraot, magkakaigwa nin anong pribilehiyo an mga nakaligtas sa Armagedon asin an iba pang buhay na sa panahon na idto? (b) Ano an linalaoman manongod sa binuhay liwat na paragibo nin maraot?

¹⁶ Mayong duwa-duwa, sa panahon na iyan an pagbabalik kan Paraiso sa daga nagpapadagos na. An paragibo nin maraot na nakapako sa Kalbaryo kataed ni Jesus asin sia na nagsabi bilang pagmidbid kan karatula na yaon sa saiyang pamayohan, “Jesus, girumdoma man ako kun ika yaon na sa saimong kahadean,” bubuhayon liwat pasiring sa daganon na buhay sa ibinalik na Paraiso. (Lucas 23:42) Magigin pribilehiyo kan mga nakaligtas sa Armagedon asin nin iba pang nabubuhay sa panahon na idto na akoon sia liwat hale sa mga gadan. Totokdoan sia ninda nin lubos manongod sa namamahala na ngonyan na Hade, si Jesu-Cristo, na sa saiya nagpaheling sia nin hararom na simpatiya kan Nisan 14 kan taon 33 C.E.

¹⁷ Dai sia malilingawan kan Kagurangnan na si Jesus-Cristo durante kan Saiyang pamamahala sa laog nin sangribong taon. Mayong duwa-duwa na an may simpatiya, binuhay liwat na paragibo nin maraot magpapaheling kan saiyang pagpapahalaga sa namamahalang Hade, si Jesu-Cristo, na sa saiya utang nia an saiyang pagkabuhay liwat, paagi sa pagpapatunay kan saiyang kaimbodan sa Unibersal na Soberano, si Jehova Dios. Dangan ibibilang siang angay na mabuhay sa Paraiso kan bagong kinaban sagkod lamang kairiba kan kadaklan kan ibinalik, makinuyog na katawohan.

An Buhay sa Panglobo, Ibinalik  na Hardin nin Eden

18. Ano an magigin buhay sa ibinalik na Paraiso?

¹⁸ Sa ibinalik na Paraiso, an lambang saro amigo nin gabos. An bogkos nin pambilog na dagang relasyon nin pamilya namamatean sa kairaroman nin kalag nin lambang saro. An gabos nakasasabot sa lambang saro. Nagtataram sinda nin sarong lenguahe sa kinaban. Posibleng ini an orihinal na lenguahe kan katawohan, na itinaram kan lambang saro sa daga sa laog kan enot na 1,800 na taon nin pag-eksister nin tawo—poon kan paglalang ki Adan kan 4026 B.C.E. sagkod sa panahon ni Peleg (2269 sagkod 2030 B.C.E.), huli ta “kan saiyang mga aldaw an daga [an boot sabihon, mga tawo sa daga] nagkabaranga.” (Genesis 10:25; 11:1) An lambang saro nagkakamit nin pribilehiyo na mabuhay, asin an lambang aldaw pinoponan sa pagpapasalamat para sa idinagdag na aldaw nin buhay. An mga kamatean sa hawak dai nag-oorog sa pag-agi nin panahon. Nagkokosog an pisikal na mga puwersa, asin an mga hawak dai nanluluya.—Ikomparar an Job 33:25.

19. Ano an maoobserbaran manongod sa dating may mga diperensia sa hawak?

¹⁹ Asin uya! An dating pilay naglalakaw, iyo, naglulukso huli sa kagayagayahan. An nawarang mga takyag asin mga tabay milagrosong ibinalik. An dating buta nakaheheling, an bongog nakahihinanyog, an pula nagtataram asin nagkakanta sa dakulang kagayagayahan. (Ikomparar an Isaias 35:5, 6.) An bakong magayon helingon sa porma asin pigura nin tawo nawawara na. An kagayonan nin pagkalalaki may katimbang na panbabaeng kagayonan. (Genesis 2:18) An pagkasangkap nin tawo nagpapamuraway ki Jehova Dios, an Kaglalang kan sangkap na hawak nin tawo.

20. Ano an maoobserbaran manongod sa puwersa nin naturalesa, mga kakanon, mga linalang na hayop, asin kun paano ginagamit an daga?

²⁰ An bilog na daga nagigin sarong panglobong magayon na lugar. Mayo nin ano man na bareta hale saen man na parte kan daga manongod sa tig-init o nin pag-oran na nagdadara nin nakararaot na pagbaha o nin nakadadanyar na buhawi, makokosog na doros, bagyo, asin mga aliwoswos. (Ikomparar an Marcos 4:37-41.) An gabos na puwersa nin naturalesa dadarahon sa sangkap na pagkatimbang tanganing gibohon an bilog na daga na sarong magayagayang lugar na ontokan. Mayo nin kakulangan nin pagkakan saen man, huli ta an daga magtatao nin lubos kan bunga kaini. (Salmo 72:16) An katoninongan asin seguridad nakamtan na sa bilog na daga kapuwa sa tawo asin sa hayop, siring kan sinasabi ni Jehova: “Dai sinda magibo nin maraot o manraraot sa bilog na sakuyang banal na bukid.” (Isaias 11:9; helingon man an bersikulo 6-8.) Sa paaging ini gigibohon an daga na sarong magayagayang lugar tanganing pag-ontokan asin ipagpadagos an pagsamba asin paglilingkod ki Jehova Dios, an Kaglalang asin Kagsadiri kan daga. Mantang ini rogaring nia huli sa katanosan nin paglalang, naaangay na gamiton ini sa paagi na nagpapaoyon sa saiya asin na nagpapamuraway sa saiya.—Ikomparar an Isaias 35:1, 2, 6, 7.

21. Paano mamansayon kan kinaldang katawohan an lambang bagay sa daga, asin anong musika an madadangog?

²¹ Nakarerepresko nanggad na bago—iyan an kamugtakan kan lambang bagay sa daga para sa kinaldang mga tawo na nungka nakalaog sa Paraisong hardin nin Eden kun saen nagpoon an buhay nin tawo sa magayon na pagkasangkap! (Kapahayagan 21:5) Magayagaya nanggad na musika, paagi sa instrumento asin sa ngoso, an madadangog—na an gabos na ini nag-oomaw ki Jehova!—1 Cronica 23:4, 5; Salmo 150:3-6.

22. Ano an magiging pagmate sa pag-erok sa Paraiso kan bagong kinaban?

²² Makangangalas nanggad na mabuhay sa sarong daga kun saen an buhay nin tawo nag-ooswag nin lubos asin kun saen an gabos na tangga pasiring sa kagadanan huli sa orihinal na kasalan ni Adan hinale na! (Ikomparar an Juan 10:10.) Iyo, ini magigin sarong daga kun saen an lambang inoyonan na linalang na tawo nagpapaheling kan ladawan asin pagkaagid ki Jehova Dios siring kan pagkalalang sa enot na tawong si Adan! (Genesis 1:26, 27) An daga bako nang sarong makanos na tanawon para sa mga serafin, sa mga kerubin, asin sa mamuraway na mga anghel sa kalangitan. Kun saindang idudungaw an saindang magagayon na lalauogon sa daga, na nagheheling sa ibaba na nasasamnohan nin kagayonan nin paraiso, magpapahayag sinda nin pag-omaw asin nin pagpasalamat sa Saro na an lalauogon sarong pribilehiyo na direkta nindang naheheling—si Jehova, an Unibersal na Soberano.—Mateo 18:10.

Sarong Maogma, Daing Sagkod na Ngapit

23. Ano an posible manongod sa linahidan na mga Kristiano, na may anong resulta sa mga nag-eerok sa daganon na Paraiso?

²³ Nasa kamugtakan nin posibilidad asin nin probabilidad na, sa maabot na aldaw sa ngapit, an mga ngaran kan gabos na linahidan na Kristiano na ginibong sierto an saindang “pag-apod asin pagpili” sa langitnon na Kahadean asin benendisyonan paagi kan langitnon na pagkabuhay liwat ipupublikar sa kabilogan para sa impormasyon kan pamilya nin tawo sa saindang daganon na Paraiso. (2 Pedro 1:10; Salmo 87:5, 6) Kaya, an pagkawara kan 144,000 na pinaniaki kan espiritu na linahidan na mga disipulo ni Jesu-Cristo sa daganon na Paraiso lubos na masasabotan sa satispaksion nin lambang saro asin may bilog na pusong paggayagaya sa sainda asin kairiba ninda.

24. (a) Ano an mahahaman ni Jehova manongod sa saiyang “tongtongan”? (b) Paano niato maaaraman na an bagong kinaban dai noarin man matatapos, asin anong makahulang kanta an maootob?

²⁴ Magigin maogma an daing sagkod na ngapit para sa gabos na nagdadanay sa dai nababaring debosyon ki Jehova, an arogan na Soberano kan bilog na uniberso. An igo sana an pagkapano na Paraisong daga magigin sarong nababagay na lugar, sarong angay na lugar, bilang an “tongtongan” tanganing an mga bitis nin Dios puwedeng piguratibong magpahingalo. Iyo, para sa panahon na daing sagkod pamumurawayon ni Jehova ‘an namumugtakan kan saiyang mga bitis,’ asin an gabos na katawohan magdadanay na nagpapasakop sa saiya! (Mateo 5:34, 35; Gibo 7:49) An bagong kinaban magigin sarong kinaban na mayong katapusan huli ta “an kadakolan kan sa-prinsipeng pamamahala asin katoninongan magigin daing sagkod.” (Isaias 9:7) Dangan, an makahulang kanta kan langitnon na mga anghel sa pagkamundag ni Jesus sa Betlehem nin Judea kan 2 B.C.E. maootob: “Kamurawayan sa Dios sa kaitaasan, asin sa daga katoninongan sa mga tawo na igwa kan marahay na boot.”—Lucas 2:13, 14.

25. (a) Ano an pahahalagahan ngonyan kan mga kabilang sa “dakulang kadaklan” kan mga “ibang karnero”? (b) Ano an maninigong magin odok na pagmawot niato?

²⁵ An mga kabilang sa “dakulang kadaklan” nin “ibang karnero” kan Marahay na Pastor nagpapahalaga sa nagpapahiro nin kalag na mga tataramon kan panugang ibinalik na Paraiso. Pribihehiyo nindang magin kairiba sa organisasyon nin Dios ngonyan asin magin maigot na nakikikabtang sa gibohon na ihinula kan Kagurangnan na si Jesu-Cristo, an paghuhulit kan maogmang bareta kan Kahadean sa bilog na ineerokan na daga para sa pantapos na patotoo. (Mateo 24:14; Marcos 13:10) An samuyang sinsero, odok sa pusong pagmawot bilang mga Saksi ni Jehova iyo an magdanay sa samuyang integridad na daing digta sagkod sa panahon na daing katapusan, sa daing sagkod na kamurawayan asin pagbindikar sa Unibersal na Soberano, si Jehova Dios, sa pagsakop kan makahadeng pamamahala kan saiyang bugtong na Aki, si Jesu-Cristo. “Aleluya!”—Kapahayagan 19:1, 3, 4, 6, RSV, New International Version; Talinhaga 10:9.

Paano Kamo Masimbag?

◻ Anong panuga an ginibo ni Jehova manongod sa saiyang piguratibong tongtongan, an daga?

◻ Siisay an matabang sa pagbabalik kan Paraiso?

◻ Hale kairisay manombra an Hade, si Jesu-Cristo, nin “mga prinsipe sa bilog na daga”?

◻ Anong nagpapahirong eksperyensia an magigin saindo kun mangyari na an pagbuhay liwat?

◻ Anong ngapit an naghahalat sa mga nagdadanay sa dai nababaring debosyon ki Jehova?