Panahon na Magpuka

“Sa gabos na nasyon an maogmang bareta kaipuhan na ikahulit nguna. . . . Alagad an makatagal sagkod sa katapusan iyo an maliligtas.”​—MARCOS 13:​10, 13.

1. Taano ta maninigo kitang magtagal asin magmapuso?

DAPAT kitang magtagal​—sa tahaw nin daing pagtubod asin bikong kapag-arakian! Poon kan 1914 sarong kapag-arakian nin mga tawo an nagin maraot, siring kan kaaldawan ni Jesus. Asin ngonyan an karatan nasa pambilog na kinaban na sokol. Sa “huring mga aldaw” na ini, an “delikadong mga panahon na masakit pakibagayan” na ilinadawan ni apostol Pablo nagpapasakit sa katawohan. ‘An mga maraot asin madaya padagos na orog na nagraraot.’ Malinaw nanggad, “an bilog na kinaban namumugtak sa kapangyarihan kan maraot,” si Satanas na Diablo, na ginigibo ngonyan an saiyang pangultimong paghihingoa na laglagon an daga. Alagad magmapuso kamo! May maabot na “dakulang kahorasaan” na matao nin permanenteng kaginhawahan sa gabos na namomoot sa katanosan.​—2 Timoteo 3:​1-5, 13; 1 Juan 5:19; Kapahayagan 7:14.

2. Paano naotob an hula kan 1914?

² Nakaoogma, pinatukaw na ngonyan ni Jehova an Kagurangnan na Jesu-Cristo sa trono sa kalangitan, bilang pag-andam para sa paghale sa mapan-aping mga kaiwal nin katawohan. (Kapahayagan 11:15) Siring kaidtong enot na pagdatong kan Mesiyas, naootob man sa siglong ini an sarong pambihirang hula na isinurat ni Daniel. Sa Daniel 4:​16, 17, 32, isinasabi sa sato an pagpondo nin may katanosan na paghade sa daga sa laog nin peryodo nin “pitong panahon.” Sa mayor na kaotoban kaiyan, an pitong panahon na ini katimbang nin pitong Biblikal na taon nin 360 ‘aldaw’ an kada saro, o 2,520 taon gabos.a Iyan nagpoon kaidtong 607 B.C.E., kan ponan na batayan kan Babilonya an kahadean nin Israel, sagkod kan 1914 C.E., an taon kan pagtukaw ni Jesus sa trono sa langit bilang may katanosan na Hade kan katawohan. Dangan natapos “an itinalaan na mga panahon kan mga nasyon.” (Lucas 21:24) Alagad an mga nasyon habong pumasakop sa bagong Mesiyanikong Kahadean.​—Salmo 2:​1-6, 10-12; 110:​1, 2.

3, 4. (a) Paano ikakokomparar an mga pangyayari kan enot na siglo sa mga pangyayari sa satong panahon? (b) Anong napapanongod na mga hapot an puedeng ihapot?

³ Mantang nagdadangadang an ika-70 semana nin mga taon (29-36 C.E.), asin sa giraray mantang naghaharani an taon nin 1914, an matatakton sa Dios na mga tawo naghahalat sa pagdatong kan Mesiyas. Asin talagang nagdatong sia! Minsan siring, sa lambang kaso an paagi kan saiyang pagtunga nagin laen sa linaoman. Sa lamba man na kaso, pakalihis nin halipot sanang peryodo nin panahon, sarong maraot na “kapag-arakian” an sa katapustapusi ginagadan paagi sa pagboot nin Dios.​—Mateo 24:34.

⁴ Sa satong sinundan na artikulo, nasabotan niato kun paano natapos an maraot na Judiong kapag-arakian na naghagad na gadanon si Jesus. Kumusta man, kun siring, an kapahapahamak na kapag-arakian nin katawohan na minsan ngonyan tinutumang o iniignoro sia? Noarin hohokoman an daing pagtubod na kapag-arakian na ini?

“Magpuka Kamo”!

5. (a) Huli sa anong marahay na dahelan na dai niato kaipuhan na aramon kun noarin an “aldaw asin oras” ni Jehova? (b) Sono ki Marcos, paagi sa anong madonong na hatol tinapos ni Jesus an saiyang hula?

⁵ Pakatapos maghula nin mga pangyayari na masagkod sa panahon nin “dakulang kahorasaan,” idinagdag ni Jesus: “Mapadapit sa aldaw asin oras na iyan mayo nin siisay man na nakaaaram, ni an mga anghel kan kalangitan ni an Aki, kundi an Ama sana.” (Mateo 24:​3-36; Marcos 13:​3-32) Dai niato kaipuhan na aramon kun noarin an eksaktong panahon nin mga pangyayari. Imbes, an satong pagkonsentrar dapat na nasa pagigin puka, na nagpapatalubo nin makosog na pagtubod, asin nagdadanay na sibot sa paglilingkod ki Jehova​—bakong sa pagkuenta nin petsa. Tinapos ni Jesus an saiyang dakulang hula paagi sa pagsabi: “Magbantay kamo, magpuka kamo, huli ta dai nindo aram kun noarin an itinalaan na panahon. . . . Magpuka [kamo] . . . An isinasabi ko sa saindo isinasabi ko sa gabos, Magpuka kamo.” (Marcos 13:​33-37) An peligro naglulukob sa kadikloman kan presenteng kinaban. Dapat kitang magpuka!​—Roma 13:​11-13.

6. (a) Sa ano maninigong iangkla an satong pagtubod? (b) Paano niato ‘mabibilang an satong mga aldaw’? (c) Ano sa pundamental an boot sabihon ni Jesus kan “kapag-arakian”?

⁶ Bako sanang dapat niatong tawan nin atension an ipinasabong na mga hula mapadapit sa huring mga aldaw na ini nin maraot na palakaw kundi dapat niatong iangkla an satong pagtubod nangorogna sa mahalagang marhay na atang ni Cristo Jesus asin sa makangangalas na mga panuga nin Dios na basado dian. (Hebreo 6:​17-19; 9:14; 1 Pedro 1:​18, 19; 2 Pedro 1:​16-19) Galagang maheling an katapusan kan maraot na palakaw na ini, an banwaan ni Jehova may beses na nagbanabana manongod sa kun noarin mapoon an “dakulang kahorasaan,” na ikinokonektar pa ngani ini sa mga pagkuenta kan lawig nin buhay nin sarong kapag-arakian poon kan 1914. Minsan siring, kita ‘nagkakamit nin puso na may kadonongan,’ bakong paagi sa pagbanabana manongod sa kun pirang taon o aldaw an lawig nin sarong kapag-arakian, kundi paagi sa pag-isip manongod sa kun paano niato ‘bibilangon an satong mga aldaw’ sa pagtao nin magayagayang pag-omaw ki Jehova. (Salmo 90:12) Imbes na magtao nin basihan sa pagsokol nin panahon, an terminong “kapag-arakian” na ginamit ni Jesus sa pangenot nanonongod sa magkakakontemporanyong mga tawo sa sarong makasaysayan na panahon, kaiba kan nagpapamidbid na mga karakteristiko kaiyan.b

7. Ano an isinurat nin sarong propesor sa kasaysayan manongod sa “kapag-arakian kan 1914,” asin paano ini konektado sa hula ni Jesus?

⁷ Kaoyon kan nasa enotan, an propesor sa kasaysayan na si Robert Wohl nagsurat sa saiyang librong The Generation of 1914: “An sarong makasaysayan na kapag-arakian dai nasosokol paagi sa kronolohikong mga limitasyon kaiyan . . . Bako iyan na depende sa mga petsa.” Alagad idinoon nia na an Guerra Mundial I pinaggikanan “nin nakapangingibabaw na pakamate nin pakasuhay sa nakaagi,” asin idinagdag nia: “An mga nakaligtas sa guerra dai noarin man nahahale sa isip na may sarong kinaban na natapos asin may saro na nagpoon kan Agosto 1914.” Totoo nanggad iyan! Nasesentro iyan sa pangenot na kabtang kan bagay. “An kapag-arakian na ini” nin katawohan poon kan 1914 nakaeksperyensia nin grabeng mga pagbabago. Naheling kaiyan an kinaban na nasagom kan dugo nin minilyon. An mga ralaban, paglaglag sa sarong rasa, terorismo, krimen, asin katampalasanan puminutok sa bilog na kinaban. An gutom, helang, asin inmoralidad luminakop sa satong globo. Si Jesus naghula: “Kamo man, kun maheling na nindong [kan saiyang mga disipulo] nangyayari an mga bagay na ini, aramon nindo na an kahadean nin Dios harani na. Sa katotoohan ako nagsasabi saindo, An kapag-arakian na ini dai nanggad makalilihis sagkod na mangyari an gabos na bagay.”​—Lucas 21:​31, 32.

8. Paano idinodoon kan mga propeta ni Jehova an pangangaipong magpuka?

⁸ Iyo, harani na an biyong kapangganahan kan Mesiyanikong Kahadean! May pakinabang daw, kun siring, sa paghanap nin mga petsa o sa pagbanabana manongod sa literal na lawig nin buhay nin sarong “kapag-arakian”? Mayo nanggad! An Habacuc 2:3 malinaw na nagsasabi: “An bisyon para sa itinalaan na panahon pa, asin iyan naghahangoshangos sagkod sa katapusan, asin dai iyan magpuputik. Minsan pa iyan maatraso, padagos iyan na halaton; huli ta sierto nanggad na iyan maootob. Dai iyan mahuhuri.” Parani nang parani an aldaw nin paniningil ni Jehova.​—Jeremias 25:​31-33; Malaquias 4:1.

9. Anong mga pangyayari poon kan 1914 an nagpapaheling na halipot na sana an panahon?

⁹ Kan magpoon na mamahala an Kahadean ni Cristo kan 1914, si Satanas ihinolog digdi sa daga. Ini nangahulogan na “herak man kan daga . . . huli ta huminilig na dian saindo an Diablo, na may dakulang kaanggotan, sa pakaaram na halipot na sana an saiyang panahon.” (Kapahayagan 12:12) Tunay na halipot an panahon na iyan kun ikokomparar sa rinibong taon na pamamahala ni Satanas. Harani na an Kahadean, asin siring man an aldaw asin oras ni Jehova para sa paghokom sa maraot na kapag-arakian na ini!​—Talinhaga 3:​25; 10:​24, 25.

An “Kapag-arakian” na Minalihis

10. Paano “an kapag-arakian na ini” nakaaagid kan sa kaaldawan ni Noe?

¹⁰ Orog niatong siyasaton an pananaram ni Jesus sa Mateo 24:​34, 35: “Sa katotoohan sinasabi ko saindo na an kapag-arakian na ini dai noarin man makalilihis sagkod na an gabos na bagay na ini mangyari. An langit asin daga makalilihis, alagad an sakong mga tataramon dai noarin man makalilihis.” An kasunod na mga tataramon ni Jesus nagpapaheling na ‘mayo nin siisay man na nakaaaram kan aldaw asin oras na iyan.’ An mas mahalaga, ipinaheheling nia na dapat niatong likayan an mga siod na nakapalibot sa sato sa kapag-arakian na ini. Sa siring idinadagdag ni Jesus: “Huli ta kun paano kan mga aldaw ni Noe, siring man an presensia kan Aki nin tawo. Huli ta kun paano sinda kan mga aldaw na idto bago kan baha, nagkakarakan asin nag-iirinom, an mga lalaki nag-aaragom asin an mga babae nagpapaaragom, sagkod kan aldaw na si Noe naglaog sa dahong; asin dai sinda nagmangno sagkod na magdatong an baha asin iinanod sinda gabos, magigin siring man kaiyan an presensia kan Aki nin tawo.” (Mateo 24:​36-39) Ikinomparar digdi ni Jesus an kapag-arakian kan saiyang kaaldawan sa kapag-arakian kan kaaldawan ni Noe.​—Genesis 6:​5, 9; nota sa ibaba.

11. Anong pagkokomparar nin ‘mga kapag-arakian’ an ginibo ni Jesus, siring kan ibinareta ni Mateo asin Lucas?

¹¹ Bako ini an kaenot-enoteng pakadangog kan mga apostol ki Jesus na pinagkokomparar an ‘mga kapag-arakian,’ huli ta pirang aldaw bago kaini sia nagsabi mapadapit sa saiyang sadiri: “An Aki nin tawo . . . dapat [na] umagi nin dakol na kasakitan asin isikwal kan kapag-arakian na ini. Dugang pa, siring sa nangyari kan mga aldaw ni Noe, siring man an mangyayari sa mga aldaw kan Aki nin tawo.” (Lucas 17:​24-26) Sa siring, an Mateo kapitulo 24 asin Lucas kapitulo 17 naggigibo nin parehong pagkomparar. Kan kaaldawan ni Noe ‘an gabos na laman na luminaglag kan daga’ asin nagadan sa Baha iyo “an kapag-arakian na ini.” Kan kaaldawan ni Jesus an apostatang banwaan nin mga Judio na nagsisikwal ki Jesus iyo “an kapag-arakian na ini.”​—Genesis 6:​11, 12; 7:1.

12, 13. (a) Ano ngonyan “an kapag-arakian na ini” na dapat na lumihis? (b) Paano nakapanggagana an banwaan ni Jehova sa “maraot asin bikong kapag-arakian na ini”?

¹² Kun siring, sa ultimong kaotoban kan hula ni Jesus ngonyan, “an kapag-arakian na ini” minalataw na nanonongod sa mga tawo sa daga na nakaheheling sa tanda kan presensia ni Cristo alagad nasusudyang itanos an saindang dalan. Sa kabaliktaran, kita bilang mga disipulo ni Jesus nagsasayumang moldehon kan estilo nin pamumuhay kan “kapag-arakian na ini.” Minsan ngani nasa kinaban, kita dai dapat na magin kabtang kaiyan, “huli ta harani na an itinalaan na panahon.” (Kapahayagan 1:3; Juan 17:16) Sinasadol kita ni apostol Pablo: “Padagos nindong gibohon an gabos na bagay na mayo nin mga paggumodgumod asin diriskutiran, tanganing magin kamong daing kasagwean asin daing kasalan, mga aki nin Dios na daing kaninan sa tahaw nin maraot asin bikong kapag-arakian, na sa tahaw kaiyan kamo nagliliwanag siring sa mga ilaw kan kinaban.”​—Filipos 2:​14, 15; Colosas 3:​5-10; 1 Juan 2:​15-17.

¹³ Bako sanang pagpaheling nin malinig na Kristianong personalidad an kabale sa satong ‘pagliwanag siring sa mga ilaw’ kundi, orog sa gabos, an pag-otob sa makahulang sugo ni Jesus: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 24:14) Mayo nin tawong makasasabi kun noarin an katapusan na iyan, alagad aram niato na maabot an katapusan kan “kapag-arakian na ini” nin maraot na mga tawo oras na ikinatao na an patotoo sono sa gusto nin Dios “sagkod sa kaporoporohi kan daga.”​—Gibo 1:8.

An “Aldaw Asin Oras na Iyan”

14. Anong sadol an itinao kapwa ni Jesus asin ni Pablo kun dapit sa “mga panahon asin kapanahonan,” asin ano an maninigo niatong magin reaksion?

¹⁴ Kun nahaman na an panglobong pagpapatotoo sa hiwas na sono sa katuyohan ni Jehova, iyan na an magigin saiyang “aldaw asin oras” na haleon an palakaw na ini kan kinaban. Dai niato kaipuhan na aramon nin patienot an petsa. Sa siring, sa pagsunod sa halimbawa ni Jesus, si apostol Pablo nagsadol: “Ngonyan kun dapit sa mga panahon asin mga kapanahonan, mga tugang, dai na kamo nangangaipo na suratan pa nin ano man. Huli ta kamo man sana nakaaaram na gayo na an aldaw ni Jehova madatong na kabaing na gayo nin parahabon kun banggi. Sa panahon na sinda nagsasarabi: ‘Katoninongan asin katiwasayan!’ dangan an biglang pagkalaglag madaling maabot sainda siring sa kolog kan bados na babae; asin dai sinda makaliligtas minsan sa anong paagi.” Mangnohon an pangenot na iniisip ni Pablo: “Sa panahon na sinda nagsasarabi.” Iyo, kun igwa nin orolay dapit sa “katoninongan asin katiwasayan,” kun iyan pinakadai linalaoman, biglang maghohokom an Dios. Angay nanggad an hatol ni Pablo: “Kaya, kun siring, dai kita magtorog arog kan ginigibo kan iba, kundi magpuka kita asin papagdanayon niato an toltol na pag-isip”!​—1 Tesalonica 5:​1-3, 6; helingon man an bersikulo 7-11; Gibo 1:7.

15, 16. (a) Taano ta dai niato maninigong isipon na an Armagedon mas harayo pa kisa sa tibaad pinaghona niato? (b) Paano dapat na padakulaon an soberaniya ni Jehova sa harani nang ngapit?

¹⁵ An mas eksaktong punto-de-vista daw niato dapit sa “kapag-arakian na ini” nangangahulogan na an Armagedon mas harayo pa kisa sa pinaghona niato? Dai nanggad! Minsan ngani nungka niatong naaaraman an “aldaw asin oras,” perming aram iyan ni Jehova Dios, asin dai sia nagliliwat. (Malaquias 3:6) Malinaw nanggad, an kinaban padagos na nagrururo pasiring sa pankatapusan na kalaglagan. An pangangaipong magpuka orog na kaipuhan kisa kasuarin pa man. Ihinayag sa sato ni Jehova “an mga bagay na kaipuhan na mangyari sa dai na mahahaloy,” asin an satong reaksion maninigo na lubos na pakamate nin pagkaapurado.​—Kapahayagan 1:1; 11:18; 16:​14, 16.

¹⁶ Mantang nagdadangadang an panahon, magpuka kamo, huli ta lalaglagon na ni Jehova an bilog na palakaw ni Satanas! (Jeremias 25:​29-31) Si Jehova nagsasabi: “Padadakulaon ko nanggad an sakong sadiri asin papakangbanalon ko an sakong sadiri patin ipamimidbid ko an sakong sadiri sa mga mata nin dakol na nasyon; asin kaipuhan na makaaram sinda na ako si Jehova.” (Ezequiel 38:23) Naghaharani na an dai mapagdududahan na “aldaw ni Jehova”!​—Joel 1:15; 2:​1, 2; Amos 5:​18-20; Sofonias 2:​2, 3.

Matanos na “Bagong Kalangitan Asin Sarong Bagong Daga”

17, 18. (a) Sono ki Jesus asin Pedro, paano malihis “an kapag-arakian na ini”? (b) Taano ta maninigo kitang magpuka kun dapit sa paggawe asin mga gibo nin diosnon na debosyon?

¹⁷ Mapadapit sa ‘gabos na bagay na ini na dapat na mangyari’ si Jesus nagsabi: “An langit asin daga makalilihis, alagad an sakong mga tataramon dai noarin man makalilihis.” (Mateo 24:​34, 35) Posibleng nasa isip ni Jesus an “langit asin daga”​—an mga namamahala asin an mga pinamamahalaan—​kan “kapag-arakian na ini.” Ginamit ni apostol Pedro an kaparehong mga tataramon sa pagsambit sa “kalangitan asin daga ngonyan,” na “itinagama sa kalayo asin inaandam sa aldaw nin paghokom asin kalaglagan kan maraot na mga tawo.” Sunod ilinaladawan nia kun paano “an aldaw ni Jehova madatong siring sa parahabon, na dian an [gobyernong] kalangitan mawawara” kaiba an sarong maraot na sosyedad nin tawo, o “daga,” asin an makasalan na mga gibo kaiyan. Dangan sinasadol kita kan apostol sa “banal na mga gawe asin gibo nin diosnon na debosyon, [mantang kita] naghahalat asin naggigirumdom sa presensia kan aldaw ni Jehova, na paagi kaiyan an kalangitan mantang naglalaad sa kalayo matutunaw asin an mga elemento mantang labi-labi kainit matutunaw!” Ano an kasunod? Dinadara ni Pedro an satong atension sa ‘bagong kalangitan asin sarong bagong daga na dian an katanosan an magdadanay.’​—2 Pedro 3:7, 10-13.c

¹⁸ An “bagong kalangitan” na iyan, an pamamahala kan Kahadean paagi ki Cristo Jesus asin kan saiyang kairibang hade, mapaoran nin mga bendisyon sa matanos na “bagong daga” na sosyedad nin katawohan. Kamo daw may paglaom na magin miembro kan sosyedad na iyan? Kun iyo, may dahelan kamong mag-ogma sa natatagamang mamuraway na ngapit!​—Isaias 65:​17-19; Kapahayagan 21:​1-5.

19. Anong dakulang pribilehio an puedeng kamtan niato ngonyan?

¹⁹ Iyo, sarong matanos na “kapag-arakian” nin katawohan an tinitipon na dawa ngonyan. Ngonyan an linahidan na “maimbod asin madonong na oripon” nagtatao nin pagtotokdo nin Dios kaoyon sa mga tataramon kan Salmo 78:​1, 4: “Magdangog kamo, banwaan ko, sa sakong pagboot; ikiling nindo an saindong talinga sa mga tataramon nin sakong ngoso . . . , na isinasaysay iyan sa kapag-arakian na madatong, an mga kaomawan ni Jehova asin an saiyang kakosogan patin an makangangalas na mga bagay na saiyang ginibo.” (Mateo 24:​45-47) Kan Abril 14 kaining taon, sa labing 75,500 na kongregasyon asin sa mga 230 kadagaan, labing 12,000,000 katawo sa bilog na daga an nag-atender sa Memorial kan kagadanan ni Cristo. Kabilang daw kamo sa sainda? Isarig logod nindo an saindong pagtubod ki Cristo Jesus asin ‘mag-apod kamo sa ngaran ni Jehova para sa kaligtasan.’​—Roma 10:​10-13.

20. Mantang “nainaan na an panahon na natatada,” paano kita dapat na magpuka, asin may anong tinatanaw na paglaom?

²⁰ “Nainaan na an panahon na natatada,” an sabi ni apostol Pablo. Panahon na, kun siring, na magin puka asin sibot sa gibohon ni Jehova, mantang tinatagalan niato an mga pagbalo asin pagkaongis nin maraot na kapag-arakian nin katawohan. (1 Corinto 7:29; Mateo 10:22; 24:​13, 14) Magpuka kita, na minamasdan an gabos na ihinula sa Biblia na mangyayari sa “kapag-arakian na ini.” (Lucas 21:​31-33) Paagi sa pagdulag sa mga bagay na ini asin paagi sa pagtindog sa atubangan kan Aki nin tawo na igwa kan pag-oyon nin Dios, sa katapustapusi kamtan logod niato an premyong buhay na daing katapusan.

[Mga Nota sa Ibaba]

Mga Hapot Bilang Repaso:

◻ Nasasabotan an kaotoban kan Daniel 4:​32, paano kita ngonyan maninigo na “magpuka”?

◻ Paano ipinamimidbid kan Ebanghelyo ni Mateo asin Lucas “an kapag-arakian na ini”?

◻ Mantang hinahalat niato an “aldaw asin oras na iyan,” ano an soatong namamasdan, asin ano an maninigo niatong magin reaksion?

◻ An paglaom sa matanos na “bagong kalangitan asin sarong bagong daga” maninigong dumagka sa sato na gibohon an ano?

[Mga retrato sa pahina 17]

An nagsasakit na katawohan magiginhawahan kun lumihis na an madahas, maraot na kapag-arakian na ini

[Pasasalamat para sa pinagkuanan]

Alexandra Boulat/Sipa Press

[Pasasalamat para sa pinagkuanan]

Sa wala asin sa ibaba: Luc Delahaye/Sipa Press

[Retrato sa pahina 18]

Mamurawayon na “bagong kalangitan asin sarong bagong daga” an madalion nang kamtan kan gabos na rasa nin katawohan