Duwang Mahalagang Bagay—Pamibi Asin Kapakumbabaan

Naisaysay na ni Jesus sa mga disipulo an ilustrasyon sa pagigin pursigido sa pamimibi. (Lucas 11:5-13) Nasa Samaria na siya ngunyan o sa Galilea, asin idinuon niya liwat ini sa saro pang ilustrasyon:

“Sa sarong siyudad, igwa nin sarong huwes na dai natatakot sa Diyos asin mayong irinerespetong tawo. Igwa man sa siyudad na iyan nin sarong babaying balo na sigeng balik-balik sa saiya, na sinasabi, ‘Siguraduhon mo tabi na matawan ako nin hustisya laban sa kaasunto ko.’ Sa huruhalawig na panahon, habo niyang tabangan ini, alagad kan huri sinabi niya sa sadiri niya, ‘Maski dai ako natatakot sa Diyos asin mayo akong irinerespetong tawo, pero dahil dai ako pigpupunduhan kan balong ini, sisiguraduhon kong matawan siya nin hustisya tanganing dai na siya magparadigdi asin pagparapakonsumisyunon ako.’”—Lucas 18:2-5.

Idinuon ni Jesus an leksiyon: “Danguga an sinabi kan huwes maski bako siyang matanos! Kun siring, bako daw na sisiguraduhon nin Diyos na matawan nin hustisya an saiyang mga pinili na nag-aagrangay sa saiya aldaw-banggi, maski ngani garo baga haloy siyang maghiro dahil mapasensiya siya para sa kapakinabangan ninda?” (Lucas 18:6, 7) Ano an punto ni Jesus?

Dai buot sabihon ni Jesus na si Jehova Diyos kapareho kan bakong matanos na huwes. May pagkakalain an punto niya: Kun an sarong bakong matanos na huwes ngani mahimati sa pursigidong pakimahirak, siyertong gigibuhon man iyan nin Diyos. Siya matanos asin marahay saka masimbag siya kun an mga lingkod niya dai nagpupundo sa pamimibi. Mahihiling iyan sa sinabi pa ni Jesus: “Sinasabi ko sa saindo, papangyarihon nin Diyos na marikas sindang matawan nin hustisya.”—Lucas 18:8.

Sa parati dai natatawan nin hustisya an mga hamak asin dukha, pero an mga maimpluwensiya asin mayaman parating pinapaburan. Bako arog kaiyan an Diyos. Sa tamang panahon, papadusahan niya an mga maraot alagad tatawan nin buhay na daing katapusan an mga lingkod niya.

Siisay an may pagtubod na arog kan sa babaying balo? Pira an talagang nagtutubod na “papangyarihon nin Diyos na marikas sindang matawan nin hustisya”? Idinuon pa sana ni Jesus sa ilustrasyon an pursigidong pamimibi. Ngunyan, dapit sa pagtubod sa kapangyarihan kan pamibi, siya naghapot: “Pag-abot kan Aki nin tawo, manunumpungan daw talaga niya an arog kaining pagtubod digdi sa daga?” (Lucas 18:8) Ipinaparisa kaini na sa pag-abot ni Cristo, puwedeng dikit sana an may siring na pagtubod.

Para sa nagkapira sa mga nagdadangog ki Jesus, sigurado na sinda sa pagtubod ninda. Nagtitiwala sinda sa sadiri ninda na matanos sinda, mantang minemenos ninda an iba. An siring na mga tawo an pinapanungdan ni Jesus sa ilustrasyon na ini:

“May duwang tawo na naglaog sa templo tanganing mamibi, an saro Fariseo asin an saro parasingil nin buhis. Nagtindog an Fariseo asin nagpuon na mamibi, na sinasabi an mga bagay na ini sa buot niya, ‘O Diyos, nagpapasalamat ako sa saimo na bako akong arog nin iba diyan—mga parakikil, mga bakong matanos, mga parasambay—o pati na kan parasingil na ini nin buhis. Duwang beses akong nag-aayuno kada semana; itinatao ko an ikasampulong kabtang kan gabos na bagay na nakukua ko.’”—Lucas 18:10-12.

Midbid an mga Fariseo sa hayagan na pagpahiling kan sagin-sagin nindang katanusan. Ginigibo ninda ini para hangaan sinda kan iba. Nakatudan na nindang gibuhon an siring na pag-ayuno, na sadiring kabutan man sana ninda, sa mga aldaw nin Lunes asin Huwebes kun nuarin matawo sa mga saudan kaya dakul an makakahiling sa sainda. Asin istrikto nindang itinatao an ikasampulong kabtang maski kan saradit na pananom. (Lucas 11:42) Mga pirang bulan bago kaini, nagpahayag sinda nin pang-iinsulto sa mga ordinaryong tawo: “An mga tawong ini na ignorante sa Katugunan [uyon sa pagmansay kan mga Fariseo] mga tawong isinumpa.”—Juan 7:49.

Nagpadagos si Jesus sa ilustrasyon: “Alagad an parasingil nin buhis, na nakatindog sa harayo, habo man lamang magtangad sa langit kundi pigpaparatubtob niya an saiyang daghan, na sinasabi, ‘O Diyos, mahirak ka sa sakuya na sarong parakasala.’” Iyo, mapakumbabang inako kan parasingil nin buhis an mga pagkukulang niya. Bilang pagtatapos sinabi ni Jesus: “Sinasabi ko sa saindo, an tawong ini nagpuli sa saiyang harong na mas matanos kisa sa Fariseong iyan. Huli ta an siisay man na naglalangkaw kan saiyang sadiri ibababa, alagad an siisay man na nagpapakumbaba ilalangkaw.”—Lucas 18:13, 14.

Sa siring malinaw na ipinahiling ni Jesus na kaipuhan na magin mapakumbaba. Kapaki-pakinabang an sadol na ini para sa mga disipulo, na nagdakula sa nasyon kun sain ipinag-oorgulyo kan nagpapakangmatanos na mga Fariseo an posisyon asin ranggo. Mahalagang sadol ini para sa gabos na parasunod ni Jesus.