An Saiyang Ilustrasyon Manungod sa Sampulong Mina

Dawa ngani mapa-Jerusalem si Jesus, posibleng yaon pa siya sa harong ni Zaqueo kaiba an mga disipulo. Naniniwala an mga disipulo na biglang madatong “an Kahadian nin Diyos” kun sain si Jesus an Hadi. (Lucas 19:11) Sala an pakasabot ninda sa bagay na ini, kun paanong dai man ninda nasabutan na dapat magadan si Jesus. Kaya nagtao siya nin ilustrasyon para tabangan sindang masabutan na haloy pa an pagdatong kan Kahadian.

Nagsabi siya: “Sarong tawo na gikan sa respetadong pamilya an mabiyahe pasiring sa harayong lugar tanganing manombrahan bilang hadi, asin pagkatapos mabalik siya.” (Lucas 19:12) Mahahaloy an pagbiyaheng iyan. Malinaw na si Jesus an “tawo na gikan sa respetadong pamilya” na mapasiring sa “harayong lugar,” sa langit, kun sain siya nonombrahan kan saiyang Ama bilang hadi.

Sa ilustrasyon, bago maghali an “tawo na gikan sa respetadong pamilya,” inapod niya an sampulong suruguon asin tinawan nin tigsararong pirak na mina, na sinasabi sa sainda: “Inegosyo nindo an mga ini sagkod sa mag-abot ako.” (Lucas 19:13) An literal na mga pirak na mina makantidad na kuwarta. An sarong mina katumbas nin labing tulong bulan na tangdan nin trabahador sa uma.

Tibaad nasabutan kan mga disipulo na kapareho sinda kan sampulong suruguon sa ilustrasyon, huling iinagid na sinda ni Jesus sa mga paraani. (Mateo 9:35-38) Siyempre, dai man niya sinabing magdara sinda nin mga inaning trigo. Imbes, an mga inani iyo an iba pang mga disipulo na magkakaigwa nin lugar sa Kahadian nin Diyos. Ginagamit kan mga disipulo an ano man na mga pagsadiri ninda para gumibo nin dakul pang tagapagmana kan Kahadian.

Ano pa an ihinayag ni Jesus sa ilustrasyon? Sinabi niya na “nauungis sa [tawo na gikan sa respetadong pamilya] an mga kahimanwa niya asin nagsugo sinda nin mga representante na magduman sa saiya tanganing sabihon, ‘Habo ming magin hadi mi an tawong ini.’” (Lucas 19:14) Aram kan mga disipulo na dai inaako kan mga Judio si Jesus—gusto pa ngani siyang gadanon kan iba. Pagkagadan ni Jesus asin pagkasakat niya sa langit, ipinahiling kan mga Judio sa pangkagabsan kun ano an pagmansay ninda sa saiya paagi sa pagpersegir sa mga disipulo niya. Malinaw na ipinahiling kan mga paratumang na ini na habo nindang magin Hadi ninda si Jesus.—Juan 19:15, 16; Gibo 4:13-18; 5:40.

Kun manungod sa sampulong suruguon, paano ninda ginamit an saindang mga mina sagkod na an “tawo na gikan sa respetadong pamilya” nombrahan “bilang hadi” asin magbalik? Nagsaysay si Jesus: “Kan sa huri makabalik siya pagkatapos na manombrahan bilang hadi, ipinaapod niya an mga uripon na tinawan niya kan kuwarta, tanganing isihon kun pira an ginanar ninda sa saindang pagnegosyo. Kaya nagrani an inot asin nagsabi, ‘Kagurangnan, an saimong mina tuminubo nin sampulong mina.’ Sinabi niya sa saiya, ‘Magayon an ginibo mo, marahay na uripon! Dahil nagin maaasahan ka sa saditon na bagay, mamahala ka sa sampulong siyudad.’ Nagrani ngunyan an ikaduwa, na nagsasabi, ‘Kagurangnan, an saimong mina nadagdagan nin limang mina.’ Sinabi man niya sa sarong ini, ‘Ika man, mamahala ka sa limang siyudad.’”—Lucas 19:15-19.

Kun nasabutan kan mga disipulo na arog sinda kan mga uripon na ginamit nin lubos an mga pagsadiri para gumibo nin dakul pang disipulo, makakasiguro sinda na mauugma sa sainda si Jesus. Asin makakapagtiwala sinda na babalusan niya an siring na kahigusan. Siyempre, bakong gabos na disipulo ni Jesus parareho an kamugtakan sa buhay, ni parareho man an mga oportunidad ninda o mga kakayahan. Pero si Jesus, na nonombrahan “bilang hadi,” mimidbidon asin bebendisyunan an maimbod nindang paghihinguwa na gumibo nin mga disipulo.—Mateo 28:19, 20.

Pero mangnuhon an sarong pagkakaiba sa pagtatapos ni Jesus kan ilustrasyon: “Alagad may saro pang [suruguon na] nagrani, na nagsasabi, ‘Kagurangnan, uni an saimong mina na itinago kong nakapatos sa tela. Natatakot kaya ako sa saimo ta mahigpiton kang tawo; pigkukubra mo an dai mo man idineposito, asin pig-aani mo an dai mo man isinabwag.’ Sinabi niya sa saiya, ‘Sa sadiri mong mga tataramon huhusgaran taka, maraot na uripon. Bakong kasasabi mo pa sanang mahigpiton akong tawo, na nagkukubra kan dai ko idineposito asin nag-aani kan dai ko isinabwag? Kaya taano ta dai mo ilinaog sa bangko an kuwarta ko? Dangan sa pag-abot ko, makukua ko kuta iyan na may kaibang tubo.’ Sa siring sinabi niya sa mga nakatindog duman, ‘Kuana nindo sa saiya an mina asin itao iyan sa saro na may sampulong mina.’”—Lucas 19:20-24.

Huling dai nagtrabaho para madagdagan an kayamanan kan kahadian kan kagurangnan niya, dakula an nawara sa suruguon na ini. Pighahalat-halat kan mga apostol an pamamahala ni Jesus sa Kahadian nin Diyos. Kaya base sa sinabi niya dapit sa huring uripon na ini, posibleng marhay na nasabutan ninda na kun bako sindang mahigos, dai sinda magkakaigwa nin lugar sa Kahadian.

Siguradong napahiro kan mga sinabi ni Jesus an maimbod na mga disipulo para urog pa sindang maghinguwa. Bilang pagtatapos, sinabi niya: “Sinasabi ko sa saindo, an siisay man na igwa, tatawan nin mas dakul pa, alagad an saro na mayo, maski an yaon sa saiya kukuanon.” Sinabi pa niya na huling habo kan mga kaiwal niya na siya “magin hadi sa sainda,” sinda gagadanon. Dangan nagpadagos si Jesus sa pagbaklay pa-Jerusalem.—Lucas 19:26-28.