Magkaigwa nin Katuninungan sa Panahon nin Krisis

1. Ano “an katuninungan nin Diyos,” asin paano kita nakikinabang sa pagkaigwa kaiyan? (Filipos 4:6, 7)

IGWA nin sarong klase nin katuninungan na dai aram kan kinaban na ini. Iyan “an katuninungan nin Diyos,” an pagigin kalmado na resulta kan pagkaigwa nin mahalagang marhay na relasyon sa satong Ama sa langit. Pag igwa kita kan katuninungan nin Diyos, tiwasay kita. (Basahon an Filipos 4:6, 7.) Igwa kita kan dayupot na pakikiamigo sa iba na namumuot sa saiya. Asin igwa kita nin dayupot na relasyon sa “Diyos nin katuninungan.” (1 Tes. 5:23) Pag midbid ta an satuyang Ama asin nagtitiwala kita saka nagsusunod sa saiya, an katuninungan nin Diyos puwedeng pakalmahon an purisaw tang puso pag napapaatubang kita sa masakit na sitwasyon.

2. Taano ta makakasigurado kita na posible na magkaigwa kan katuninungan nin Diyos?

² Posible daw talaga na magkaigwa kan katuninungan nin Diyos pag napapaatubang kita sa sarong krisis, siring kan biglang paglakop nin hilang, kalamidad, kariribukan sa sosyedad, o persekusyon? An arin man sa mga krisis na ini puwedeng magin dahilan na makamati kita nin takot. Pero, sinadol ni Jesus an saiyang mga parasunod: “Dai mapurisaw an saindong puso ni mawaran iyan nin kumpiyansa dahil sa takot.” (Juan 14:27) Nakakaugma ta sinunod kan mga tugang an sadol ni Jesus. Sa tabang ni Jehova, nagibo nindang magkaigwa nin katuninungan mantang tinatagalan an grabeng mga pagbalo.

3. Paano puwedeng maapektaran nin epidemya o pandemya an satong katuninungan?

³ An epidemya o pandemya puwedeng magresulta nin grabeng pagbabago sa haros gabos na aspekto nin buhay. Pag-isipan an nagin epekto kan COVID-19 sa dakul na tawo. Sa sarong surbey, labi sa kabanga kan mga tawo an dai napapaturog sa panahon kan pandemyang iyan. An pandemya nakakontribwir sa dakulang paglangkaw kan bilang kan mga nag-aagi nin kapurisawan saka depresyon, kan mga nag-aabuso sa droga saka alkohol, kan kadahasan sa laog kan pamilya, asin kan mga pagpurbar na maghugot. Kun igwa nin biglang paglakop nin hilang sa saimong lugar, paano mo magigibo na dai gayo mapurisaw asin magkaigwa kan katuninungan nin Diyos?

4. Taano ta an pakaaram sa hula ni Jesus manungod sa huring mga aldaw nagtatao sa sato nin katuninungan?

⁴ Ihinula ni Jesus na durante kan huring mga aldaw, magkakaigwa nin mga epidemya, o lakop na mga hilang, na “sunod-sunod . . . sa manlain-lain na lugar.” (Luc. 21:11) Paano an pakaaram kaiyan nagtatao sa sato nin katuninungan? Dai na kita nagngangalas sa pagkaigwa nin biglang paglakop nin hilang. Nasasabutan ta na nangyayari an mga bagay na iyan kauyon kan sinabi ni Jesus. Kaya may marahay na dahilan kita na sunudon an sadol na itinao ni Jesus sa mga nabuhay durante kan panahon kan katapusan: “Siyertuhon nindo na dai kamo mataranta.”—Mat. 24:6.

5. (a) Kauyon kan sinasabi sa Filipos 4:8, 9, ano an dapat tang ipamibi kun napapaatubang sa biglang paglakop nin hilang? (b) Paano ka makikinabang kun madangog ka sa mga audio recording kan Bibliya?

⁵ An biglang paglakop nin hilang puwedeng magresulta tulos sa kadaihan nin kasiguruhan asin pagkataranta pa ngani. Nangyari iyan sa sister na si Desi.b Kan an saiyang tiyo, pinsan, asin doktor magadan dahil sa COVID-19, natakot siya na tibaad magka-COVID man siya asin maipasa niya iyan sa saiyang gurang nang ina. Naapektuhan man an saiyang trabaho dahil sa pandemya, kaya nahadit siya kun sain siya makua nin pambakal nin kakanon asin pambayad sa harong. Dahil sa pagparahadit niya sa mga bagay na iyan, dai na siya napapaturog pag banggi. Pero nagkaigwa giraray nin katuninungan si Desi. Paano? Espesipiko siyang namibi ki Jehova na tabangan siyang magin kalmado asin na magin positibo. (Basahon an Filipos 4:8, 9.) Dinangog niya si Jehova mantang “kinakaulay” siya paagi sa mga audio recording kan Bibliya. Sinabi niya, “An nakakarangang boses kan mga nagbabasa nagpahupa kan sakuyang kahaditan asin nagpagirumdom sa sako kan pagkahirak ni Jehova.”—Sal. 94:19.

6. Paano makakatabang sa saimo an personal na pag-adal asin mga pagtiripon kan kongregasyon?

⁶ An biglang paglakop nin hilang siguradong makakaraot kan saimong rutina, pero dai pagtugutan na makaulang iyan sa saimong personal na pag-adal o pag-atender sa mga pagtiripon. An mga eksperyensiya na yaon sa satong mga publikasyon asin mga video mapagirumdom sa saimo na pinapagdanay kan saimong mga tugang an saindang integridad sa ibong kan arog kaiyan na mga kadipisilan. (1 Ped. 5:9) An mga pagtiripon makakatabang sa saimo na panuon an saimong kaisipan nin positibong mga bagay sa Kasuratan. Matao man iyan sa saimo nin mga oportunidad na pakusugon an iba asin ika man mismo mapakusog. (Roma 1:11, 12) Mantang hinuhurop-hurop mo kun paano sinuportaran ni Jehova an saiyang mga parasamba kan sinda may hilang, natatakot, o nagmumundo, mapapakusog an saimong pagtubod asin magigin kang kumbinsido na susuportaran ka man niya.

7. Anong leksiyon an manunudan mo ki apostol Juan?

⁷ Hinguwahon na makaulay an saimong mga tugang. Dahil sa biglang paglakop nin hilang, tibaad hagadon sa sato na papagdanayon an physical distancing dawa pag kaibanan ta an satong mga kapwa parasamba. Sa arog kaiyan na panahon, tibaad mamati mo an arog kan namati ni apostol Juan. Gusto niyang mahiling nin personal an saiyang amigong si Gayo. (3 Juan 13, 14) Pero, aram ni Juan na kan panahon na idto, dai pa posible na mahiling niya si Gayo. Kaya ginibo ni Juan kun ano an makakaya niya; sinuratan niya si Gayo. Kun bako pirming posible na mabisita mo nin personal an saimong mga tugang, hinguwahon na kontakon sinda paagi sa telepono, video call, o text message. Pag pirmi mong nakakakomunikar an saimong mga kapwa Kristiyano, mas magigin tiwasay ka asin matuninong. Hinguwahon na makaulay an mga elder lalong-lalo na kun napupurisaw ka, asin akuon an saindang mamumuton na pampakusog.—Isa. 32:1, 2.

8. Paano an sarong kalamidad puwedeng makaapektar sa saimong katuninungan?

⁸ Kun naeksperyensiyahan mo nang maapektaran nin pagbaha, linog, o kasulo, tibaad haloy mong mamatian an grabeng paghadit dahil sa nangyari. Kun nawaran ka nin mga mahal sa buhay o nin mga pagsadiri, tibaad namatian mo an grabeng kamunduan, kawaran nin paglaom, o pagkaanggot pa ngani. Dai iyan nangangahulugan na materyalistiko ka o mayo ka nin pagtubod. Masakit na pagbalo an inagihan mo, asin tibaad asahan kan iba na negatibo an magigin reaksiyon mo. (Job 1:11) Pero sa ibong kan nakakamundong mga kamugtakan na iyan, puwede kang magkaigwa nin katuninungan. Paano?

9. Paano kita inandam ni Jesus para sa kapaha-pahamak na mga pangyayari?

⁹ Girumdumon an pigpropesiya ni Jesus. May mga tawo sa kinaban na iniisip na dai lamang sinda maaapektaran nin kalamidad, pero kita, inaasahan tang madakul pa an grabeng kalamidad, na puwedeng an nagkapira kaiyan makaapektar sa sato. Sinabi ni Jesus sa saiyang mga parasunod na “magkakaigwa nin makusog na mga linog” asin iba pang mga kalamidad bago mag-abot an katapusan. (Luc. 21:11) Pigpropesiya niya man na magkakaigwa nin “pag-urog nin karatan,” na risang-risang nangyayari ngunyan dahil sa mga krimen, kadahasan, asin pag-atake nin mga terorista. (Mat. 24:12) Nungkang sinabi ni Jesus na an maaapektaran sana kan mga kalamidad na ini iyo idtong mga binayaan ni Jehova. Sa katunayan, dakul sa maimbod na mga lingkod ni Jehova an naapektaran nin mga kalamidad. (Isa. 57:1; 2 Cor. 11:25) Puwedeng dai man kita milagrosong protektaran ni Jehova sa gabos na kalamidad, pero tatawan niya kita kan ano man na kaipuhan ta para magdanay na kalmado asin may katuninungan.

10. Taano ta an pag-andam ngunyan para sa kalamidad sarong kapahayagan nin pagtubod? (Talinhaga 22:3)

¹⁰ Magigin mas madali para sa sato na magdanay na kalmado pag may emerhensiya kun patiinot kitang nagplano para diyan. Pero an pag-andam daw nagpaparisa na mayo kita nin pagtubod ki Jehova? Dai. An totoo, an pag-andam para sa kalamidad nagpapahiling na talagang may pagtubod kita sa saiyang kakayahan na atamanon kita. Paano man? Sinasadol kita kan Tataramon nin Diyos na mag-andam para sa mga kalamidad na posibleng mangyari. (Basahon an Talinhaga 22:3.) Asin paagi sa mga artikulo sa magasin, mga pagtiripon kan kongregasyon, asin napapanahon na mga paisi, pauruutro kitang sinasadol kan organisasyon nin Diyos na mag-andam para sa emerhensiya.c Nagtitiwala daw kita ki Jehova? Kun iyo, susunudon ta an sadol na iyan ngunyan—bago mag-abot an sarong kalamidad.

11. Ano an manunudan mo sa halimbawa ni Margaret?

¹¹ Pag-isipan an eksperyensiya kan sister na si Margaret. Pinagbutan siya na maghali sa saiyang harong kan magkaigwa nin wildfire sa lugar niya. Huling dakulon na tawo an sarabay na nagdudurulag, dai na makahiro an mga sasakyan sa mga tinampo. Biyong nagdiklom an palibot huli sa maitom na aso, asin dahil diyan dai makaluwas si Margaret sa saiyang awto. Pero, nakaligtas siya huling andam siya. Sa saiyang sadit na bag, igwa siya nin mapa na makakatabang sa saiya para makahanap nin ibang agihan. Sa katunayan, dati na niyang pinurbaran na mag-agi diyan bilang pag-andam enkaso may emerhensiya. Marahay na sana ta nag-andam si Margaret kaya nakaligtas siya.

12. Taano ta nagsusunod kita sa mga pag-iingat para sa kaligtasan?

¹² Para protektaran kita asin magin areglado an mga bagay-bagay, tibaad hagadon sato kan mga awtoridad na sumunod sa curfew, na mag-ebakwar, o na gumibo nin iba pang praktikal na mga lakdang. May mga tawo na haloy magsunod o nagpapaliman-liman huling habo nindang bayaan an mga pagsadiri ninda. Kumusta man an mga Kristiyano? Sinasabi sato kan Bibliya: “Alang-alang sa Kagurangnan, magpasakop kamo sa lambang institusyon na minukna nin tawo, iyan man sa hadi bilang may halangkaw na katungdan o sa mga gobernador bilang mga isinugo niya.” (1 Ped. 2:13, 14) An organisasyon nin Diyos nagtatao man sa sato nin instruksiyon para magdanay kitang ligtas. Regular kitang pinapagirumdom na itao sa mga elder an pinakabagong contact information niyato tanganing makontak ninda kita sa panahon nin emerhensiya. Ginibo mo na daw iyan? Tibaad makaresibi man kita nin instruksiyon manungod sa kun baga magdadanay kita sa harong o maebakwar, kun paano makakakua nin mga ayuda, o kun paano asin nuarin puwedeng tumabang sa iba. Kun dai kita masunod, puwedeng maisapeligro ta an satuyang buhay asin an buhay kan mga elder. Tandaan na an maimbod na mga lalaking ini padagos na nagbabantay sa sato. (Heb. 13:17) Sinabi ni Margaret, “Nagtutubod nanggad ako na an pagsunod sa instruksiyon kan mga elder asin kan organisasyon iyo an nagligtas kan buhay ko.”

13. Ano an nagtao nin kaugmahan asin katuninungan sa dakul na Kristiyano na napiritan na maghali sa saindang harong?

¹³ Dakul na tugang na napiritan na maghali sa saindang harong huli sa kalamidad o giyera o kariribukan sa sosyedad an ginibo an saindang pinakamakakaya para makapag-adjust sa bago nindang sitwasyon asin makikabtang tulos sa teokratikong mga aktibidad. Arog kan inot na mga Kristiyano na nagkasuruway-suway dahil sa persekusyon, padagos sindang “nagpapahayag kan maugmang bareta.” (Gibo 8:4) An paghuhulit nakatabang sa sainda na magpokus sa Kahadian imbes na sa masakit na mga kamugtakan. Bilang resulta, napagdanay ninda an saindang kaugmahan asin katuninungan.

14. Paano puwedeng maapektaran nin persekusyon an satong katuninungan?

¹⁴ Dahil sa persekusyon, puwedeng mawara sa sato an dakul na bagay na sa parati nagtatao sa sato nin katuninungan. Maugma kita saka kontento pag libre kitang nakakapagtiripon, nakakapaghulit, asin nakakapagsagibo kan pang-aroaldaw na rutina ta na dai natatakot na arestaron. Kun dai ta na nagigibo an mga bagay na iyan, tibaad mahadit kita, na ikinakatakot an sunod na mangyayari. Normal sana iyan. Pero, dapat kitang mag-ingat. Sinabi ni Jesus na an persekusyon puwedeng magin dahilan na masingkog an saiyang mga parasunod. (Juan 16:1, 2) Kaya paano niyato mapapagdanay an satong katuninungan mantang nag-aagi kita nin persekusyon?

15. Taano ta dai kita dapat matakot sa persekusyon? (Juan 15:20; 16:33)

¹⁵ Sinasabi sa sato kan Tataramon nin Diyos: “An gabos na nagmamawot na mamuhay na may debosyon sa Diyos bilang mga parasunod ni Cristo Jesus pepersegiron man.” (2 Tim. 3:12) An brother na si Andrei nasakitan na akuon an bagay na iyan pagkatapos na ipagbawal an satuyang gibuhon sa saindang nasyon. Nangatanusan siya: ‘Dakulon kaming Saksi digdi. Paano kami gabos aarestaron kan mga awtoridad?’ Pero imbes na magkaigwa nin katuninungan si Andrei, an pagparaisip diyan nagin dahilan lugod na pirmi siyang purisaw. An ibang mga tugang ipinabaya sa mga kamot ni Jehova an kaaabtan, na dai iniisip na dai sinda aarestaron. Aram ninda na posibleng arestaron sinda, pero kumpara ki Andrei, daing gayo sinda napupurisaw. Kaya nagdesisyon siya na arugon an saindang sabuot asin lubos na magtiwala sa Diyos. Dai nahaloy nakamati siya nin katuninungan, asin igwa na siya ngunyan nin kaugmahan sa ibong nin mga kadipisilan. Puwede man na magin totoo iyan sa sato. Baga man sinabi sato ni Jesus na asahan an persekusyon, inasigurar niya man kita na puwede kitang magdanay na maimbod.—Basahon an Juan 15:20; 16:33.

16. Anong instruksiyon an kaipuhan tang sunudon mantang nag-aagi nin persekusyon?

¹⁶ Pag an satong gibuhon ipinagbabawal o grabe an restriksiyon, puwede kitang makaresibi nin mga instruksiyon hali sa sangang opisina asin sa mga elder. An katuyuhan kaini iyo na protektaran kita, siguraduhon na padagos kitang mag-aako nin espirituwal na kakanon, asin na tabangan kitang padagos na makapaghulit sa pinakaposibleng magigibo ta. Gibuhon an pinakamakakaya mo para sunudon an instruksiyon na inako mo, dawa pa dai mo lubos na nasasabutan kun taano ta itinao iyan. (Sant. 3:17) Siring man, dai magtao nin impormasyon manungod sa satong mga tugang o manungod sa mga aktibidad kan kongregasyon sa mga tawo na dai maninigo na makaaram kaiyan.—Ecl. 3:7.

17. Arog kan mga apostol kan inot na siglo, ano an determinado tang gibuhon?

¹⁷ An saro sa panginot na mga dahilan kun taano ta nakikipaglaban si Satanas sa mga lingkod nin Diyos iyo na sinda “igwa kan gibuhon na pagpatotoo mapadapit ki Jesus.” (Kap. 12:17) Dai magpatakot ki Satanas asin sa saiyang kinaban. An paghuhulit asin pagtutukdo sa ibong nin pagkontra nagtatao sa sato nin kaugmahan asin katuninungan. Kan pagbutan kan Judiong mga awtoridad an mga apostol na magpundo sa paghuhulit, pinili kan maimbod na mga lalaking idto na sunudon an Diyos. Padagos sindang naghulit, asin an gibuhon na iyan nagtao sa sainda nin kaugmahan. (Gibo 5:27-29, 41, 42) Siyempre, pag an satong gibuhon may restriksiyon, dapat na magin maingat kita mantang naghuhulit. (Mat. 10:16) Pero kun ginigibo niyato an pinakamakakaya ta, magkakaigwa kita nin katuninungan huling ginigibo ta an nakakapaugma ki Jehova asin nakikikabtang kita sa pagpaabot kan nagliligtas-buhay na mensahe.

18. Ano an dapat na girumdumon niyato manungod sa Gikanan kan katuninungan na kinakaipuhan ta?

¹⁸ Magkaigwa nin kumpiyansa na dawa sa pinakamasakit na mga panahon, puwede kitang magkaigwa nin katuninungan. Sa siring na mga panahon, dapat tang girumdumon na an katuninungan na kaipuhan ta iyo an katuninungan nin Diyos, an buot sabihon, an katuninungan na si Jehova sana an makakatao. Magtiwala sa saiya pag nagkaigwa nin biglang paglakop nin hilang, kalamidad, o persekusyon. Magdanay na harani sa saiyang organisasyon. Isipon an magayunon na puturo na naghahalat sa saimo. Pag ginibo mo iyan, ‘an Diyos nin katuninungan masasakaibanan mo.’ (Fil. 4:9) Sa sunod na artikulo, pag-uulayan ta kun paano niyato matatabangan an mga kapwa niyato Kristiyano na napapaatubang sa mga kasakitan na magkaigwa kan katuninungan nin Diyos.