Kun Paano Ibinabantog ni Jesus an Katanosan nin Dios

“Ibinugtak [si Cristo] nin Dios bilang dolot na pampagian nin boot paagi sa pagtubod sa saiyang dugo. Ini para sa pagpahayag kan saiyang sadiring katanosan.”—ROMA 3:25.

1, 2. (a) Ano an itinotokdo sa sato kan Biblia manongod sa kamugtakan nin katawohan? (b) Anong mga hapot an ipapaliwanag kan artikulong ini?

BANTOG na marhay an pagkasaysay sa Biblia manongod sa pagrebelde sa hardin nin Eden. Namamatean niato gabos an mga epekto kan kasalan ni Adan, arog kan ipinaliwanag sa mga tataramon na ini: “Paagi sa sarong tawo an kasalan naglaog sa kinaban asin an kagadanan huli sa kasalan, asin sa siring an kagadanan nakalakop sa gabos na tawo huli ta sinda gabos nagkasala.” (Roma 5:12) Gurano man an pagmamaigot niato na gibohon an tama, nakakagibo kita nin mga sala, na huli dian kaipuhan niato an kapatawadan nin Dios. Dawa si apostol Pablo nag-agrangay: “An marahay na minamawot ko dai ko ginigibo, kundi an maraot na hinahaboan ko iyo an ginigibo ko. Herak man sa sako!”—Roma 7:19, 24.

² Sa artikulong ini, pag-oolayan niato an importanteng mga hapot na ini: Huling gabos kita makasalan, paano nagin posible para ki Jesus nin Nazaret na mamundag na mayo nin minanang kasalan, asin taano ta binautismohan sia? Paano ibinantog kan pamumuhay ni Jesus an katanosan ni Jehova? An pinakaimportante, ano an nagibo kan kagadanan ni Cristo?

Kinuestion an Katanosan nin Dios

 3. Paano dinaya ni Satanas si Eva?

³ An satong enot na mga magurang, si Adan asin Eva, may kalolongan na isinikwal an soberaniya nin Dios asin nagpasakop sa “orihinal na halas, an inaapod na Diablo asin Satanas.” (Kap. 12:9) Isip-isipa kun paano ini nangyari. Kinuestion ni Satanas an katanosan kan paagi nin pamamahala ni Jehova Dios. Ginibo nia iyan paagi sa paghapot ki Eva: “Ano totoo na an Dios nagsabi na dai kamo magkakan sa gabos na kahoy kan hardin?” Inotro ni Eva an malinaw na pagboot nin Dios na dai puedeng dotdoton an sarong espesipikong kahoy, huling ikakagadan ninda iyan. Dangan, an Dios sinahotan ni Satanas nin pagputik. “Dai nanggad kamo magagadan,” an sabi kan Diablo. Si Eva padagos na dinaya kaini, na pinapatubod sia na an Dios may ipinapanguri sa saiya na sarong bagay na marahay asin na paagi sa pagkakan kan bunga, sia magigin arog nin Dios, na may moral na independensia.—Gen. 3:1-5.

 4. Paano an katawohan napasairarom sa karibal na soberaniya, ki Satanas?

⁴ Sa pundamental, ipinarisa ni Satanas na magigin mas maogma an katawohan kun sinda independiente sa Dios. Imbes na suportaran an katanosan kan soberaniya nin Dios, dinangog ni Adan an saiyang agom asin inibanan nia ini sa pagkakan kan ipinagbabawal na bunga. Sa siring, pinili ni Adan na mawara an saiyang sangkap na kamugtakan ki Jehova asin ipinasa man nia sa sato an nakakapagabat na kasalan asin kagadanan. Kadungan kaiyan, an katawohan napasairarom sa karibal na soberaniya, ki Satanas, an “dios kaining kinaban.”—2 Cor. 4:4, An Marahay na Bareta Biblia; Roma 7:14.

 5. (a) Paano pinatunayan ni Jehova na dai nasasala an saiyang tataramon? (b) Anong paglaom an itinao nin Dios sa mga magikan ki Adan asin Eva?

⁵ Kaoyon kan dai nasasalang tataramon ni Jehova, sinentensiahan nia nin kagadanan si Adan asin Eva. (Gen. 3:16-19) Alagad dai boot sabihon kaiyan na dai na nagin mapanggana an katuyohan nin Dios. Kabaliktaran nanggad kaiyan an totoo! Kan sinesentensiahan si Adan asin Eva, tinawan ni Jehova an mga magikan sa sainda nin marahayon na dahelan na maglaom. Ginibo nia iyan paagi sa paghayag kan saiyang katuyohan na magbangon nin “banhi” na lulugadon ni Satanas sa bool. Minsan siring, an ipinanugang Banhing iyan maoomayan sa pagkalugad sa bool asin “lulugadon [si Satanas] sa payo.” (Gen. 3:15) Dapit digdi, an Biblia nagtao pa nin detalye paagi sa pagsabi kan minasunod manongod ki Jesu-Cristo: “Sa katuyohan na ini an Aki nin Dios ihinayag, tanganing laglagon an mga gibo kan Diablo.” (1 Juan 3:8) Alagad paano ibinantog kan paggawe asin kagadanan ni Jesus an katanosan nin Dios?

An Kahulogan kan Bautismo ki Jesus

 6. Taano ta masasabi niato na si Jesus dai nagmana ki Adan nin kasalan?

⁶ Bilang sarong adulto, si Jesus an magigin eksaktong katumbas kan dating sangkap na si Adan. (Roma 5:14; 1 Cor. 15:45) Nangangahulogan ini na kaipuhan siang mamundag na sangkap. Paano iyan nagin posible? An malinaw na paliwanag itinao kan anghel na si Gabriel sa ina ni Jesus, si Maria: “An banal na espiritu madatong sa saimo, asin an kapangyarihan kan Kaharohalangkawe malindong sa saimo. Sa dahelan man na iyan an ipapangaki aapodon na banal, Aki nin Dios.” (Luc. 1:35) Sa enot na mga taon kan buhay ni Jesus, minalataw na sinabi ni Maria ki Jesus an nagkapirang impormasyon manongod sa saiyang pagkamundag. Sa siring, sa sarong pangyayari kan si Jesus manompongan ni Maria asin kan saiyang kag-ampon na ama, si Jose, sa templo nin Dios, an aki naghapot: “Dai kamo nakakaaram na ako dapat na nasa harong kan sakong Ama?” (Luc. 2:49) Minalataw na dawa aki pa, aram na ni Jesus na sia Aki nin Dios. Kun siring, mahalagang marhay sa saiya an pagbantog sa katanosan nin Dios.

 7. Igwa si Jesus kaidto nin anong mahalagang marhay na mga bagay?

⁷ Ipinaheling ni Jesus na interesadong-interesado sia sa espirituwal na mga bagay paagi sa regular na pag-atender sa mga pagtiripon para sa pagsamba. Huling sangkap an saiyang isip, seguradong nasabotan niang marhay an gabos na nadadangog asin nababasa nia sa Hebreong Kasuratan. (Luc. 4:16) Igwa man sia nin saro pang mahalagang marhay na bagay—sarong sangkap na hawak nin tawo na puedeng iatang para sa katawohan. Kan si Jesus bautismohan, namimibi sia asin tibaad iniisip nia kaidto an makahulang mga tataramon sa Salmo 40:6-8.—Luc. 3:21; basahon an Hebreo 10:5-10.a

 8. Taano ta kan enot habo ni Juan na Bautisador na bautismohan si Jesus?

⁸ Kan enot, habo ni Juan na Bautisador na bautismohan si Jesus. Taano? Huling binabautismohan ni Juan an mga Judio bilang simbolo kan pagsolsol ninda sa saindang kasalan sa Ley. Bilang haraning paryente, seguradong aram ni Juan na si Jesus matanos asin huli kaiyan dai kaini kaipuhan na magsolsol. Sinierto ni Jesus ki Juan na angay sanang magpabautismo Sia. “Sa paaging iyan,” an paliwanag ni Jesus, “maninigo para sa sato na otobon an gabos na matanos.”—Mat. 3:15.

 9. Sa ano nagsimbolisar an bautismo ki Jesus?

⁹ Bilang sarong sangkap na tawo, puede kutanang isipon ni Jesus na sia, arog ni Adan, may potensial na magin ama nin sangkap na rasa. Minsan siring, nungkang minawot ni Jesus an siring na futuro huling bako iyan an kabotan ni Jehova para sa saiya. Si Jesus isinugo nin Dios sa daga tanganing otobon an papel kan ipinanugang Banhi, o Mesiyas. Kaiba digdi an pag-atang ni Jesus kan saiyang sangkap na buhay bilang tawo. (Basahon an Isaias 53:5, 6, 12.) Siempre, an kahulogan kan bautismo ki Jesus bakong kapareho kan sa sato. Dai kaiba sa bautismo ki Jesus an pagdusay ki Jehova, huling kabtang na sia kan nagdusay sa Dios na nasyon nin Israel. Imbes, an bautismo ki Jesus nagsimbolisar kan pagpresentar kan saiyang sadiri tanganing gibohon an kabotan nin Dios para sa Mesiyas, siring kan sinambit sa Kasuratan.

10. Bilang Mesiyas, ano an kaiba sa paggibo ni Jesus kan kabotan nin Dios, asin ano an saboot nia digdi?

¹⁰ Kalabot sa kabotan ni Jehova para ki Jesus an paghuhulit kan maogmang bareta kan Kahadean nin Dios, paggibo nin mga disipulo, asin pag-andam sa sainda para sa paggibo nin mga disipulo. Kaiba man sa pagpresentar ni Jesus kan saiyang sadiri an pagigin andam nia na tagalan an persekusyon asin maringis na kagadanan bilang pagsuportar sa matanos na soberaniya ni Jehova Dios. Huling namomotan nanggad ni Jesus an saiyang langitnon na Ama, ikinaogma niang marhay na gibohon an kabotan nin Dios asin kontento siang marhay na ipresentar an saiyang hawak bilang atang. (Juan 14:31) Naogma man siang maaraman na an halaga kan saiyang sangkap na buhay puedeng idolot sa Dios bilang pantubos tanganing balukaton kita sa pagkaoripon sa kasalan asin kagadanan. Inoyonan daw nin Dios an pagpresentar ni Jesus kan saiyang sadiri tanganing akoon an seryosong mga paninimbagan na ini? Iyo nanggad!

11. Paano ipinaheling ni Jehova an saiyang pag-oyon ki Jesus bilang an ipinanugang Mesiyas, o Cristo?

¹¹ An gabos na apat na kagsurat kan Ebanghelyo nagpapatunay kan malinaw na pahayag nin pag-oyon ni Jehova Dios mantang pahawas si Jesus sa tubig kan Salog nin Jordan. “Naheling ko an espiritu na naghihilig na garo salampati hale sa langit,” an patotoo ni Juan na Bautisador, “asin iyan nagdanay [ki Jesus] . . . Asin iyan naheling ko, asin ako nagpatotoo na an sarong ini iyo an Aki nin Dios.” (Juan 1:32-34) Dugang pa, sa pangyayaring iyan, ihinayag ni Jehova: “Ini an sakong Aki, an namomotan, na sakong inoyonan.”—Mat. 3:17; Mar. 1:11; Luc. 3:22.

Maimbod Sagkod sa Kagadanan

12. Ano an ginibo ni Jesus sa laog nin tolo may kabangang taon pagkatapos kan saiyang bautismo?

¹² Sa suminunod na tolo may kabangang taon, ginamit ni Jesus an bilog niang kosog asin panahon sa pagtokdo sa mga tawo manongod sa saiyang Ama asin sa katanosan kan soberaniya nin Dios. An pagbaklay sa bilog na Dagang Panuga nagin nakakapagal sa saiya, alagad mayo nin makakapapondo sa saiya sa lubos na pagpatotoo dapit sa katotoohan. (Juan 4:6, 34; 18:37) Itinokdo ni Jesus sa iba an manongod sa Kahadean nin Dios. Paagi sa milagrosong pagpaomay sa mga may helang, pagpakakan sa nagugutom na mga grupo nin tawo, asin pagbuhay pa ngani sa mga gadan, ipinaheling nia kun ano an gigibohon kan Kahadean para sa katawohan.—Mat. 11:4, 5.

13. Ano an itinokdo ni Jesus mapadapit sa pamibi?

¹³ Imbes na kuanon an onra huli sa saiyang mga katokdoan asin pagpaomay, nagpaheling si Jesus nin marahayon na halimbawa paagi sa mapakumbabang pagtao ki Jehova kan gabos na pag-omaw. (Juan 5:19; 11:41-44) Ipinaaram man ni Jesus an pinakamahalagang mga bagay na maninigo niatong ipamibi. Maninigo na kaiba sa satong mga pamibi an paghagad na logod an ngaran nin Dios, na Jehova, “ibilang na banal” asin an maraot na pamamahala ni Satanas salidahan kan matanos na soberaniya nin Dios tanganing ‘magibo an Saiyang kabotan, kun paano sa langit, siring man sa daga.’ (Mat. 6:9, 10; nota sa ibaba) Sinadol man kita ni Jesus na humiro kaoyon kan siring na mga pamibi paagi sa ‘paghanap nguna kan kahadean asin kan katanosan nin Dios.’—Mat. 6:33.

14. Minsan ngani sangkap si Jesus, taano ta kinaipuhan nia an paghihingoa tanganing maotob an saiyang papel sa katuyohan nin Dios?

¹⁴ Mantang nagrarani an panahon kan saiyang kagadanan bilang atang, mas nasasabotan ni Jesus kun gurano kagabat kan saiyang paninimbagan. An katuyohan asin reputasyon kan Ama ni Jesus nakadepende sa pagtagal nia sa bakong makatanosan na pagbalo asin maringis na kagadanan. Limang aldaw bago sia magadan, si Jesus namibi: “Ngonyan napupurisaw an sakong kalag, asin ano an sasabihon ko? Ama, iligtas mo ako sa oras na ini. Minsan siring, dahel kaini na ako nakaabot sa oras na ini.” Pagkatapos na ipahayag an natural na mga pagmateng ini bilang tawo, daing kaimotan na ibinalyo ni Jesus an saiyang atension sa bagay na mas mahalaga asin namibi sia: “Ama, pamurawaya an saimong ngaran.” Si Jehova tolos na nagsimbag: “Iyan pinamuraway ko na sagkod papamurawayon ko liwat iyan.” (Juan 12:27, 28) Iyo, andam si Jesus na atubangon an pinakagrabeng pagbalo sa integridad na puedeng maeksperyensiahan nin siisay man na tawo. Alagad daing duda na an pakadangog sa mga tataramon na idto kan saiyang langitnon na Ama nagparigon nanggad sa boot ni Jesus na sia magigin mapanggana sa pagbantog asin pagbindikar kan soberaniya ni Jehova. Asin nagin mapanggana nanggad sia!

Kun Ano an Nagibo kan Kagadanan ni Jesus

15. Bago si Jesus magadan, taano ta sinabi nia: “Tapos na”?

¹⁵ Mantang si Jesus nakapako sa hariging pasakitan asin madali nang mautsan, sia nagsabi: “Tapos na!” (Juan 19:30) Dakulang mga bagay nanggad an nagibo ni Jesus sa tabang nin Dios durante kan tolo may kabangang taon poon kan sia mabautismohan sagkod na sia magadan! Kan si Jesus magadan, nagkaigwa nin makosog na linog asin an opisyal kan hukbo nin Roma na namamahala sa paggadan ki Jesus napahiro na magsabi: “Totoong gayo na ini an Aki nin Dios.” (Mat. 27:54) Minalataw na naheling kan opisyal na si Jesus inoolog-olog huli sa pagsabing sia Aki nin Dios. Sa ibong kan gabos na tinios nia, pinagdanay ni Jesus an saiyang integridad asin pinatunayan na si Satanas maraoton na putikon. Kinuestion ni Satanas an gabos na nagsusuportar sa soberaniya nin Dios paagi sa pagsabi kaini: “An gabos na sadiri nin tawo isusuko nya para sa saiyang buhay.” (Job 2:4; An Banal na Biblia, Edisyon na 2007) Paagi sa kaimbodan ni Jesus, ipinaheling nia na kaya kutana ni Adan asin Eva na magin maimbod sa mas pasil nanggad na pagbalo sa sainda. An pinakaimportante, ilinangkaw asin ibinantog kan buhay asin kagadanan ni Jesus an katanosan kan soberaniya ni Jehova. (Basahon an Talinhaga 27:11.) Igwa daw nin iba pang nagibo an kagadanan ni Jesus? Igwa nanggad!

16, 17. (a) Taano ta posible para sa mga saksi ni Jehova bago kan mga Kristiano na magkaigwa nin matanos na kamugtakan sa saiya? (b) Paano ni Jehova tinawan nin balos an kaimbodan kan saiyang Aki, asin ano an padagos na ginigibo kan Kagurangnan na Jesu-Cristo?

¹⁶ Dakol na lingkod ni Jehova an nabuhay bago si Jesus magdigdi sa daga. Sinda igwa nin matanos na kamugtakan sa Dios asin tinawan kan paglaom na pagkabuhay liwat. (Isa. 25:8; Dan. 12:13) Alagad sa anong legal na basehan puedeng bendisyonan kan banal na Dios, si Jehova, an makasalan na mga tawo sa siring na marahayon na paagi? An Biblia nagpapaliwanag: “Ibinugtak [si Jesu-Cristo] nin Dios bilang dolot na pampagian nin boot paagi sa pagtubod sa saiyang dugo. Ini tanganing ipaheling an saiyang sadiring katanosan, huli ta saiyang ipinapatawad an mga kasalan na nangyari kan nakaagi mantang an Dios nagtitios; tanganing ipaheling an saiyang sadiring katanosan sa presenteng panahon na ini, tanganing sia magin matanos dawa kun ipinapahayag na matanos an tawo na igwa nin pagtubod ki Jesus.”—Roma 3:25, 26.b

¹⁷ Tinawan ni Jehova nin balos si Jesus na pagkabuhay liwat sa sarong katongdan na mas halangkaw kisa kaidtong bago sia nagdigdi sa daga. Si Jesus igwa na nin imortalidad bilang mamuraway na espiritung linalang. (Heb. 1:3) Bilang Halangkaw na Saserdote asin Hade, padagos na tinatabangan kan Kagurangnan na Jesu-Cristo an saiyang mga parasunod na ibantog an katanosan nin Dios. Asin ipinagpapasalamat nanggad niato na an satong langitnon na Ama, si Jehova, iyo an Parabalos sa gabos na naggigibo kaini asin maimbod na naglilingkod sa saiya bilang pag-arog sa saiyang Aki!—Basahon an Salmo 34:3; Hebreo 11:6.

18. Ano an tema kan sunod na artikulong pag-aadalan?

¹⁸ An maimbod na mga tawo poon pa ki Abel igwa na nin dayupot na relasyon ki Jehova huling nagtutubod sinda asin may kompiansa sinda sa ipinanugang Banhi. Aram ni Jehova na an saiyang Aki magdadanay na may integridad asin na an kagadanan kaini magigin sangkap na pantakop sa “kasalan kan kinaban.” (Juan 1:29) An kagadanan ni Jesus nagtatao man nin mga pakinabang sa mga tawong nabubuhay ngonyan. (Roma 3:26) Sa siring, anong mga bendisyon an puedeng itao sa saindo kan pantubos ni Cristo? Iyan an tema kan sunod na artikulong pag-aadalan.

[Mga Nota sa Ibaba]

Ano an Isisimbag Nindo?

• Paano kinuestion an katanosan nin Dios?

• Sa ano nagsimbolisar an bautismo ki Jesus?

• Ano an nagibo kan kagadanan ni Jesus?

[Ritrato sa pahina 9]

Aram daw nindo kun sa ano nagsimbolisar an bautismo ki Jesus?