LEKSIYON 15
Siisay si Jesus?
Si Jesus an saro sa pinakamidbid na tawo sa kasaysayan. Pero bistado lang siya kan kadaklan sa pangaran. Asin iba-iba an opinyon kan mga tawo kun siisay talaga si Jesus. Ano an sinasabi kan Bibliya manungod sa saiya?
1. Siisay si Jesus?
Si Jesus sarong makapangyarihan na espiritu na nakaistar sa langit. Si Jesus an pinakainot na linalang kan Diyos na Jehova. Kaya inaapod siya na “panganay sa gabos na linalang.” (Colosas 1:15) Inaapod man si Jesus sa Bibliya na “bugtong na Aki” nin Diyos huling siya sana an direktang linalang ni Jehova. (Juan 3:16) Si Jesus kaiba-iba sa pagtrabaho kan saiyang Ama, si Jehova, sa paglalang kan gabos na iba pang bagay. (Basahon an Talinhaga 8:30.) Nagdanay na dayupot si Jesus ki Jehova. Inaapod man siyang “an Tataramon,” huling maimbod siyang naglilingkod bilang tagapagtaram nin Diyos para magpaabot kan Saiyang mga mensahe asin instruksiyon.—Juan 1:14.
2. Taano ta nagdigdi si Jesus sa daga?
Mga 2,000 na taon na an nakaagi, ginamit ni Jehova an saiyang banal na espiritu tanganing ibalyo an buhay ni Jesus hali sa langit pasiring sa matris kan hoben na birhen na si Maria. Paagi sa milagrong iyan, namundag si Jesus bilang tawo. (Basahon an Lucas 1:34, 35.) Nagdigdi si Jesus sa daga para magin an ipinanugang Mesiyas, o Cristo, asin tanganing iligtas an katawuhan.a Nautob ki Jesus an gabos na propesiya sa Bibliya manungod sa Mesiyas. Paagi kaiyan, nabisto kan mga tawo na siya “an Cristo, an Aki kan buhay na Diyos.”—Mateo 16:16.
3. Hain si Jesus ngunyan?
Kan matapos an buhay ni Jesus bilang tawo, binuhay siya liwat nin Diyos bilang sarong anghel asin nagbalik sa langit. Sa langit, “ibinugtak siya nin Diyos sa sarong mas halangkaw na posisyon.” (Filipos 2:9) Ngunyan, si Jesus saro nang makapangyarihan na anghel. Si Jehova sana an nakakalabi saiya sa kapangyarihan.
ARAMON PA
Aramon pa kun siisay talaga si Jesus asin kun taano ta importanteng marhay na maaraman ta an manungod sa saiya.
4. Bako si Jesus an Diyos na Makakamhan sa Gabos
Itinutukdo kan Bibliya na dawa ngani si Jesus sarong makapangyarihan na espiritung linalang sa langit, nagpapasakop siya sa saiyang Diyos asin Ama, si Jehova. Paano ta nasabi iyan? I-play an VIDEO para maaraman an itinutukdo kan Bibliya manungod sa pagkakaiba ni Jesus sa makakamhan sa gabos na Diyos.
Makakatabang an minasunod na mga teksto para masabutan ta an relasyon ni Jehova asin ni Jesus. Basahon an kada teksto, dangan pag-ulayan an mga hapot.
Basahon an Lucas 1:30-32.
Ano an sinabi kan anghel manungod sa relasyon ni Jesus asin kan Diyos na Jehova, an “Kahuruhalangkawi”?
Basahon an Mateo 3:16, 17.
Kan bawtismuhan si Jesus, ano an sinabi kan boses na hali sa langit?
Sa hiling mo, kiisay an boses na idto?
Basahon an Juan 14:28.
Siisay an mas gurang saka mas halangkaw an awtoridad, an ama o an aki?
Ano an buot sabihon ni Jesus kan apudon niya si Jehova na saiyang Ama?
Basahon an Juan 12:49.
Inisip daw ni Jesus na siya saka an saiyang Ama saro sanang persona? Ano sa hiling mo?
5. Mga patunay na si Jesus an Mesiyas
Kadakul nin mga propesiya sa Bibliya na makakatabang sa sato na mamidbid an Mesiyas—an pinili nin Diyos na magligtas sa katawuhan. I-play an VIDEO para maaraman an nagkapira sa mga propesiya na nautob ki Jesus kan magdigdi siya sa daga.
Basahon an minasunod na mga propesiya sa Bibliya, dangan pag-ulayan an mga hapot.
Basahon an Mikas 5:2 tanganing maaraman kun sain mamumundag an Mesiyas.b
Nautob daw an propesiyang ini kan mamundag si Jesus?—Mateo 2:1.
Basahon an Salmo 34:20 asin Zacarias 12:10 tanganing maaraman an mga propesiya manungod sa mga detalye kan kagadanan kan Mesiyas.
Nautob daw an mga propesiyang ini?—Juan 19:33-37.
Sa hiling mo, kaya daw maniobrahon ni Jesus an mga bagay-bagay para mautob saiya an mga propesiyang iyan?
Ano an pinapatunayan kaini saimo manungod ki Jesus?
6. Makikinabang kita kun mas bibistuhon ta si Jesus
Idinuduon kan Bibliya an kahalagahan kan pagkua nin kaaraman manungod ki Jesus asin sa saiyang papel sa katuyuhan nin Diyos. Basahon an Juan 14:6 asin 17:3, dangan pag-ulayan an hapot na ini:
Taano ta mahalagang marhay na aramon ta an manungod ki Jesus?
Binukasan ni Jesus an dalan para magin amigo kita nin Diyos. Itinukdo niya an katotoohan manungod ki Jehova, asin paagi sa saiya, puwede kitang magkaigwa nin buhay na daing katapusan
MAY MGA NAGSASABI: “Dai man nagtutubod ki Jesus an mga Saksi.”
Ano an sasabihon mo?
SUMARYO
Si Jesus sarong makapangyarihan na espiritu. Siya an Aki nin Diyos asin an Mesiyas.
Rebyu
Taano ta inapod si Jesus na “panganay sa gabos na linalang”?
Bago nagdigdi sa daga, ano an ginigibo ni Jesus sa langit?
Paano ta naaraman na si Jesus an Mesiyas?
HILINGON MAN
Aramon pa an manungod sa papel ni Jesus bilang Mesiyas.
“Pinapatunayan Daw kan mga Hula sa Bibliya na si Jesus an Mesiyas?” (Artikulo sa jw.org/bcl)
Aramon kun baga itinutukdo kan Bibliya na an Diyos nagin literal na ama ni Jesus na arog kan pagigin ama kan mga tawo sa aki ninda.
“Taano ta Inaapod si Jesus na Aki nin Diyos?” (Artikulo sa jw.org/bcl)
Pag-isipan kun taano ta an Trinidad dai itinutukdo kan Bibliya.
Basahon kun paano nabago an buhay nin sarong babayi pagkatapos na siyasaton niya an sinasabi kan Bibliya manungod ki Jesus.
“Kung Bakit Binago ng Isang Babaing Judio ang Paniniwala Niya” (Gumising!, Mayo 2013)
a Ipapaliwanag sa Leksiyon 26 asin 27 kun taano ta kaipuhan iligtas an katawuhan asin kun paano kita iliniligtas ni Jesus.
b Hilingon an Dagdag na Impormasyon 2 para maaraman an sarong propesiya na eksaktong nagsasabi kun nuarin maabot an Mesiyas sa daga.