An Minilyon na Gadan Ngonyan Mabubuhay Liwat

AN MINILYON na gadan ngonyan mabubuhay liwat—nakaoogma nanggad sa pusong paglaom! Alagad realistiko daw iyan? Ano an kaipuhan tanganing makombensir kamo? Tanganing tumubod sa sarong panuga, kaipuhan na segurado nindo na an nanunuga gusto asin kayang otobon iyan. Kun siring, siisay an nanunuga na an minilyon na gadan ngonyan mabubuhay liwat?

Kan tigsoli nin 31 C.E., si Jesu-Cristo mapusong nagsabi na sia tinawan nin kapangyarihan ni Jehova Dios na buhayon liwat an mga gadan. Si Jesus nanuga: “Kun paanong an Ama minabangon kan mga gadan asin binubuhay sinda, binubuhay man kan Aki an mga boot niang buhayon. Dai kamo magngalas kaini, huli ta an oras maabot na an gabos na nasa mga lolobngan nin girumdoman makadadangog kan saiyang [ki Jesus] tingog asin maruluwas.” (Juan 5:21, 28, 29) Iyo, si Jesu-Cristo nanuga na an minilyon na gadan ngonyan mabubuhay liwat sa dagang ini asin magkakaigwa kan paglaom na magdanay dian sagkod lamang. (Juan 3:16; 17:3; ikomparar an Salmo 37:29 asin Mateo 5:5.)a Mantang si Jesus an nanuga, daing peligrong ipamugtak na gusto niang otobon iyan. Alagad kaya daw nia iyan?

Sono sa rekord kan Biblia, sagkod kan panahon na iyan ipanuga ni Jesus, mayo pa sia nin binubuhay liwat. Alagad pakalihis nin mayo pang duwang taon, ipinaheling nia sa makapangyarihan na paagi na gusto asin kaya niang gibohon an pagbuhay liwat.

“Lazaro, Lumuwas Ka!”

Idto nakapuPukaw sa boot na pangyayari. Si Lazaro grabe an helang. An duwa niang tugang na babae, si Maria asin Marta, nagpatogon ki Jesus, na yaon sa ibong kan Salog nin Jordan: “Kagurangnan, uya an namomotan mo naghehelang.” (Juan 11:3) Iyo, namomotan na gayo ni Jesus an pamilyang ini. Sia nagin bisita sa saindang harong sa Betania, tibaad parate. (Lucas 10:38-42; ikomparar an Lucas 9:58.) Alagad ngonyan grabe an helang kan namomotan na katood ni Jesus.

Alagad, ano an linalaoman ni Maria asin Marta na gibohon ni Jesus? Dai ninda ipinakiolay saiya na magduman sa Betania. Alagad aram ninda na namomotan ni Jesus si Lazaro. Dai daw mamawoton ni Jesus na maheling an saiyang katood na naghehelang? Daing duwa-duwa na sinda naglaom na paoomayan sia ni Jesus sa milagrosong paagi. Total, kan panahon na idto sa saiyang ministeryo, dakol nang milagro nin pagpaomay an ginibo ni Jesus, asin pati rayo dai nakaolang sa saiya. (Ikomparar an Mateo 8:5-13.) Dai daw nia iyan gigibohon sa sarong namomotan na katood? Pambibirang marhay, imbes na paduman tolos sa Betania, si Jesus dai naghale sa namumugtakan nia kan sumunod na duwang aldaw.—Juan 11:5, 6.

Nagadan si Lazaro dai nahaloy pakapadarahan kan mensahe, tibaad kan panahon na naresibi ni Jesus an bareta. (Ikomparar an Juan 11:3, 6, 17.) Alagad ta dai na kaipuhan an dagdag na mensahe. Aram ni Jesus kan magadan si Lazaro, asin may plano siang gibohon manongod dian. Sa pagtaram manongod sa pagkagadan ni Lazaro, sinabihan nia an saiyang mga disipulo: “Si Lazaro na katood niato nagpahingalo, alagad ako maduman tanganing pukawon ko sia sa pagtotorog.” (Juan 11:11) May binuhay na liwat si Jesus na duwang gadan, na sa kada kaso dai nahaloy pagkagadan kan tawo.b Alagad ngonyan magigin laen an pangyayari. Kan umabot si Jesus sa Betania, apat nang aldaw na gadan an saiyang namomotan na katood. (Juan 11:17, 39) Kaya daw ni Jesus na buhayon liwat an saro na arog na kaiyan kahaloy na gadan asin nagpopoon nang malapa an bangkay?

Kan mabaretaan na nagdadangadang si Jesus, si Marta, babae na minahiro tolos, nagdalagan sa pagsabat sa saiya. (Ikomparar an Lucas 10:38-42.) Pagkasabat nia tolos ki Jesus, pinahiro sia kan saiyang puso na magsabi: “Kagurangnan, kun uya ka digdi dai kutana nagadan an sakong tugang.” Pero, ipinahayag man nia an saiyang pagtubod: “Naaaraman ko na an gabos na hagadon mo sa Dios, itatao sa saimo nin Dios.” Napahiro kan saiyang kamondoan, pinanugaan sia ni Jesus: “An saimong tugang mabubuhay liwat.” Kan iparisa nia an saiyang pagtubod sa maabot na pagbuhay liwat, sinabihan sia nin malinaw ni Jesus: “Ako iyo an pagkabuhay liwat asin an buhay. An naggigibo nin pagtubod sa sako, minsan pa sia magadan, mabubuhay.”—Juan 11: 20-25.

Pag-abot sa linubngan, ipinagboot ni Jesus na haleon an gapo na itinakop sa entrada. Kan primero nagreklamo si Marta: “Kagurangnan, sa panahon na ini mabata na sia, ta apat na aldaw na siang gadan.” Alagad ta pinakosog ni Jesus an gaiyang boot: “Bakong sinabi ko sa saimo na kun tumubod ka maheheling mo an kamurawayan nin Dios?” Dangan, pakasabi nia nin makosog, sia nagboot: “Lazaro, lumuwas ka!” Sa pagboot ni Jesus luminuwas si Lazaro, minsan ngani apat na aldaw na siang gadan!—Juan 11:38-44.

Talaga daw na Nangyari Iyan?

An tala manongod sa pagbuhay liwat ki Lazaro iinaatubang sa Ebanghelyo ni Juan bilang makasaysayan na pangyayari. An mga detalye buhay na buhay kaya iyan dai puwedeng talinhaga sana. An pagduda sa pagkamakasaysayan kaiyan pagduda sa gabos na milagro sa Biblia, pati an pagbuhay liwat ki Jesu-Cristo mismo.c Asin an pagdehar sa pagbuhay liwat ki Jesus pagdehar sa bilog na Kristianong pagtubod.—1 Corinto 15:13-15.

An totoo, kun inaako nindo na an Dios nabubuhay, maninigo na dai kamo madepisilan na tumubod sa pagbuhay liwat. Bilang ilustrasyon: Puwedeng ibugtak nin saro sa videotape an saiyang huring testamento, asin pagkagadan nia garo man sana sia pinagheheling asin pinagdadangog kan saiyang mga paryentes asin amigo mantang ipinaliliwanag nia kun ano an gigibohon sa saiyang mga sadiri. Kan sanggatos na taon na an nakaagi, dai maiisip an siring na bagay. Asin para sa nagkapirang tawo na nag-iistar ngonyan sa hararayong parte kan kinaban, dai ninda kayang saboton an “milagro” nin video recording. Kun an sientipikong mga prinsipyo na ibinugtak kan Kaglalang magagamit nin mga tawo tanganing bilogon liwat an siring na naheheling asin nadadangog na eksena, bako daw na maninigong orog pa dian an magibo kan Kaglalang? Kun siring, bako daw na rasonable na an Sarong naglalang sa buhay kayang buhayon liwat an sarong tawo paagi sa pagbilog liwat sa saiyang personalidad sa sarong bagong hawak?

An milagro kan pagbuhay liwat ki Lazaro nakapakosog kan pagtubod ki Jesus asin sa pagbuhay liwat. (Juan 11:41, 42; 12:9-11, 17-19) Sa nakapupukaw sa boot na paagi, ipinaheheling man kaiyan an kagustohan asin kamawotan ni Jehova asin kan saiyang Aki na gibohon an pagbuhay liwat.

‘An Dios Magkakaigwa nin Pagkapungaw’

An reaksion ni Jesus sa pagkagadan ni Lazaro nagpapaheling nin dakulang kabootan kan Aki nin Dios. An hararom niang mga pagmate sa okasyon na ini malinaw na nagpaparisa kan saiyang makosog na pagmawot na buhayon liwat an mga gadan. Mababasa niato: “Si Maria ngani, kan pagdatong nia sa namumugtakan ni Jesus asin naheling sia, naglaob sa saiyang pamitisan, na nagsasabi sa saiya: ‘Kagurangnan, kun uya ka digdi, dai kutana nagadan an sakong tugang.’ Kaya, si Jesus, kan maheling nia siang nananangis asin an mgasa Judiong kairiba nia nagtatarangis, nag-agrangay espiritu asin napurisaw; asin sia nagsabi: ‘Saen sia nindo ibinugtak?’ Sinda nagsarabi sa saiya: ‘Kagurangnan, madia asin helinga.’ Si Jesus naghibi. Kaya an mga Judio nagsarabi: ‘Helinga, kun gurano an pagkamoot nia saiya!’”—Juan 11:32-36.

An odok sa pusong pagkaherak ni Jesus ipinaririsa digdi nin tolong ekspresyon: “nag-agrangay,” “napurisaw,” asin “naghibi.” An mga termino sa orihinal na tataramon na ginamit ni apostol Juan sa pagsurat kan nakapahihirong eksenang ini nagpaparisa kun gurano napahiro si Jesus nin emosyon.

An termino sa Griego na trinadusir na “nag-agrangay” hale sa sarong berbo (em·bri·maʹo·mai) na nangangahulogan mapahiro nin makolog, o hararom. An komentador sa Biblia na si William Barclay nagsasabi: “Sa ordinaryong Griegong klasikal an parateng paggamit sa [em·bri·maʹo·mai] para sa sarong kabayo na nagpupusngak. Digdi iyan daing ibang kahulogan kundi na si Jesus nakamate nin hararom na emosyon kaya pirit na luminuwas sa Saiyang puso an dai tinutuyong agrangay.”

An ekspresyon na trinadusir na “napurisaw” hale sa sarong terminong Griego (ta·rasʹso) na nagpaparisa nin karibokan. Sono sa The New Thayer’s Greek-English Lexicon of the New Testament, iyan nangangahulogan “tawan an saro nin karibokan sa laog, . . . pamateon nin makuring kolog o kamondoan.” An ekspresyon na “naghibi” naghale sa sarong berbong Griego (da·kryʹo) na nangangahulogan “lumuha, maghibi nin silensio.” Ini laen sa ‘pagtangis’ ni Maria asin kan mga Judiong kaiba nia, na sinasabi sa Juan 11:33. Dian an ginamit na termino sa Griego (hale sa klaiʹo) nangangahulogan maghibi nin nadadangog o makosog.d

Kaya, si Jesus napahirong gayo kan pagkagadan kan namomotan niang katood na si Lazaro asin kan pakaheling sa tugang ni Lazaro na nananangis. An puso ni Jesus pano-pano nin emosyon kaya an saiyang mga mata napaluha. An pambihira digdi iyo na duwa na an binuhay liwat ni Jesus. Asin sa okasyon na ini intension nia nanggad na iyan man an gibohon ki Lazaro. (Juan 11:11, 23, 25) Pero, sia “naghibi.” Kaya, an pagbuhay liwat sa mga tawo bako sanang sarong trabaho para ki Jesus. An saiyang maboot asin hararom na mga saboot na ipinaheling sa okasyon na ini malinaw na nagpaparisa kan saiyang makosog na kamawotan na haleon an mga danyos nin kagadanan.

Mantang si Jesus an ‘eksaktong representasyon kan mismong naturalesa ni Jehova Dios,’ tama sana na iyan man an laoman niato sa satong langitnon na Ama. (Hebreo 1:3) Manongod sa kagustohan ni Jehova na gibohon an pagbuhay liwat, an maimbod na tawong si Job nagsabi: “Kun an makosog na tawo magadan puwede pa daw siang mabuhay liwat? . . . Ika maapod, asin ako masimbag sa saimo. Para sa ginibo kan saimong mga kamot ika magkakaigwa nin pagkapungaw.” (Job 14:14, 15) An termino sa orihinal na tataramon na trinadusir na “ika magkakaigwa nin pagkapungaw” nagpaparisa nin odok na pagkagalaga asin pagmawot. (Genesis 31:30; Salmo 84:2) Malinaw na seguradong hinahalat na marhay ni Jehova an pagbuhay liwat.

Talaga daw na matutubod niato an panuga sa pagbuhay liwat? Bueno, daing duwa-duwa na si Jehova asin an saiyang Aki pareho gusto asin kayang otobon iyan. Ano an kahulogan kaini para sa saindo? Igwa kamo kan paglaom na makaibanan liwat an gadan na mga namomotan digdi mismo sa daga sa irarom nin matoninong na mga kamugtakan!

Iyan an paglaom ngonyan ni Roberta (na nasambitan sa sinusundan na artikulo). Mga pirang taon pagkagadan kan saiyang ina, tinabangan sia kan mga Saksi ni Jehova na maingat na pag-adalan an Biblia. An paggirumdom nia: “Kan manodan ko an paglaom sa pagbuhay liwat, napahibi ako. Nakaoogmang maaraman na maheheling ko liwat an sakong ina.” Kun an saindong puso nagmamawot man na maheling liwat an sarong namomotan, sierto na boot nindong makaaram pa nin orog manongod sa makangangalas na pag-laom na ini. An kasegurohan kan paglaom na ini orog pang ipinaliliwanag sa pahina 13-23 kan magasin na ini.

[Mga Nota sa Ibaba]

[Ritrato sa pahina 5]

An pagbuhay liwat ni Jesus sa aking babae ni Jairo nagtatao nin pasisikadan na tumubod sa maabot na pagbuhay liwat sa mga gadan

[Ritrato sa pahina 6]

Si Jesus napahirong gayo an boot kan pagkagadan ni Lazaro

[Ritrato sa pahina 7]

An kagayagayahan kan mga makakaheling sa pagbuhay liwat magigin kapareho kan kagayagayahan kan balong taga-Nain kan buhayon liwat ni Jesus an gadan niang aki