Sa Jerusalem sa Kapiyestahan nin Tabernakulo

Si Jesus namidbid na marhay kan mga taon puon kan bawtismuhan siya. Rinibong Judio an nakahiling kan mga milagro niya, asin an bareta manungod diyan nakalakop sa bilog na nasyon. Ngunyan, sa Kapiyestahan nin mga Tabernakulo (o, Payag-payag) sa Jerusalem, dakul an naghahanap sa saiya.

Magkakalain nanggad an mga opinyon dapit ki Jesus. “Marahay siyang tawo,” an sabi kan iba. An iba man nagsasabi: “Bako. Pigloloko niya an mga tawo.” (Juan 7:12) An kadaklan kan hiringhingan na ini nangyari kan inot na mga aldaw kan kapiyestahan. Alagad mayo nin may kusog nin buot na magtaram nin hayagan para ki Jesus huling natatakot an dakul sa magigin reaksiyon kan Judiong mga lider.

Kan nangangabangaan na an kapiyestahan, naglaog si Jesus sa templo. Napangalas an dakul sa pambihira niyang kakayahan sa pagtutukdo. Dai man siya nakapag-adal sa mga eskuwelahan nin mga rabbi, kaya napangalas an mga Judio: “Paano nagkaigwa an tawong ini nin arog kaiyan na kaaraman sa Kasuratan mantang dai man siya nakapag-adal sa mga eskuwelahan?”—Juan 7:15.

“An itinutukdo ko bakong hali sa sako,” an paliwanag ni Jesus, “kundi hali sa saiya na nagsugo sa sako. Kun an siisay man nagmamawot na gibuhon an Saiyang kabutan, maaaraman niya kun baga an katukduan hali sa Diyos o kun baga nagtataram ako kan sadiri kong mga ideya.” (Juan 7:16, 17) An itinutukdo niya kauyon kan Katugunan nin Diyos, kaya maliwanag na naghihinguwa siyang matawan nin kamurawayan an Diyos, bako an sadiri.

Dangan nagsabi siya: “Itinao ni Moises sa saindo an Katugunan, bakong iyo? Alagad mayo ni saro sa saindo an nagsusunod kan Katugunan. Taano ta hinihinguwa nindong gadanon ako?” Dai ini aram kan nagkapira sa kadaklan, huling posibleng sinda nagbisita hali sa luwas kan siyudad. Garo baga dai sinda makapaniwala na may gustong gumadan sa paratukdo na arog niya. Huli kaini, naisip nindang may diperensiya siya kaya nasabi niya iyan. “Igwa ka nin demonyo,” an sabi ninda. “Siisay man an naghihinguwang gumadan sa saimo?”—Juan 7:19, 20.

An totoo, saro may kabangang taon bago kaini, gusto kan Judiong mga lider na gadanon si Jesus pakatapos na paumayan an sarong lalaki kan aldaw nin Sabbath. Naggamit ngunyan si Jesus nin nakakapukaw sa isip na pangangatanusan asin ibinuyagyag na bako sindang makatanusan. Sinabi niya na sa Katugunan, an sarong umboy na lalaki dapat turion sa ikawalong aldaw, dawa Sabbath. Dangan naghapot siya: “Kun an sarong tawo tinuturi sa aldaw nin sabbath tanganing dai mabalga an Katugunan ni Moises, ano ta angguton kamo sa sako sa ginibo kong lubos na pagpaumay sa sarong tawo sa aldaw nin sabbath? Magpundo na kamo sa paghusgar base sa pangluwas na itsura, kundi maghusgar kamo sa matanos na paagi.”—Juan 7:23, 24.

An mga nakaistar sa Jerusalem na nakakaisi kan paghihinguwa kaidto kan mga tagapamahala nagsarabi: “Bakong iyo ini su tawong pighihinguwa nindang gadanon? Pero hilinga! nagtataram siya sa publiko, asin silensiyo lang sinda. Dai daw iniisip na talaga kan mga tagapamahala na iyo ini an Cristo?” Kun siring, taano ta dai nagtutubod an mga tawo na siya an Cristo? “Aram ta kun sain naggikan an tawong ini; pero pag nagdatong an Cristo, dai nin makakaaram kun sain siya naggikan,” an sabi ninda.—Juan 7:25-27.

Si Jesus nagsimbag: “Midbid nindo ako asin aram nindo kun sain ako naggikan. Dai ako nagdatong sa sadiri kong kabutan, alagad Siya na nagsugo sa sako talagang totoo, asin dai nindo siya midbid. Midbid ko siya, huli ta representante niya ako, asin Siya an nagsugo sa sako.” (Juan 7:28, 29) Huli sa malinaw na kapahayagan na iyan, hininguwa nindang dakupon si Jesus, magsalang para ipreso o para gadanon. Pero, dai ninda iyan nagibo huling bako pang panahon para magadan siya.

Pero, dakul an nagturubod ki Jesus, na dapat man talaga nindang gibuhon. Naglakaw siya sa ibabaw nin tubig, pinakalma an duros, milagrosong pinakakan an rinibo paagi sa kadikit na tinapay saka sira, pinaumayan an mga may hilang, pinalakaw an mga pilay, binuksan an mga mata kan mga buta, pinaumayan an mga may leproso, asin binuhay pa ngani an mga gadan. Iyo, may marahay sindang dahilan na maghapot: “Pag dumatong an Cristo, dai man siya magibo nin mas dakul na tanda kisa ginibo kan tawong ini, bako?”—Juan 7:31.

Kan madangog kan mga Fariseo an mga tawo na nagsasarabi kaini, sinda saka an panginot na mga saserdote nagsugo nin mga guwardiya para dakupon si Jesus.