Nagpuon si Jesus na Gumibo nin mga Disipulo

Pagkatapos nin 40 aldaw sa kaawagan asin bago bumalik sa Galilea, nagpasiring giraray si Jesus ki Juan na nagbawtismo sa saiya. Mantang parani si Jesus, itinukdo siya ni Juan asin nagsabi sa mga yaon duman: “Hilinga, an Kordero nin Diyos na naghahali kan kasalan kan kinaban! Ini an saro na manungod sa saiya sinabi ko: ‘Igwang tawo na maabot kasunod ko na nainot na sa sako, huli ta buhay na siya bago pa ako nabuhay.’” (Juan 1:29, 30) Dawa matua nin dikit si Juan ki Jesus, aram niyang nainot na ining nabuhay sa saiya bilang espiritung persona sa langit.

Mga pirang semana bago kaini, kan magdulok si Jesus para magpabawtismo, garo baga dai sigurado si Juan na si Jesus an magigin Mesiyas. “Maski ako dai ko siya namidbid,” an sabi ni Juan, “pero an dahilan kaya ako nagbabawtismo sa tubig iyo na maihayag siya sa Israel.”—Juan 1:31.

Dangan isinaysay ni Juan sa mga nagdadangog sa saiya kun ano an nangyari kan bawtismuhan niya si Jesus: “Nahiling ko an espiritu na nagbababa hali sa langit na siring sa salampati, asin nagdanay iyan sa saiya. Maski ako dai ko siya namidbid, alagad Siya mismo na nagsugo sa sakuya na magbawtismo sa tubig nagsabi sa sako: ‘An siisay man na mahiling mong sa saiya nagbababa asin nagdadanay an espiritu, ini an saro na mabawtismo sa banal na espiritu.’ Asin nahiling ko iyan, asin nagpatotoo ako na ini iyo an Aki nin Diyos.”—Juan 1:32-34.

Kaiba ni Juan an duwa sa mga disipulo niya kan magdulok giraray si Jesus kan suminunod na aldaw. Sinabi ni Juan: “Hilinga, an Kordero nin Diyos!” (Juan 1:36) Pakatapos kaini, an duwang disipulo ni Juan Bautista suminunod ki Jesus. An pangaran kan saro Andres. Posibleng marhay na an saro pa iyo an mismong nagsurat kan pangyayaring ini, na Juan man an pangaran. Minalataw na pinsan ni Jesus an Juan na ini, huling aki siya ni Salome. Posibleng tugang ni Maria si Salome, asin an agom kaini si Zebedeo.

Kan magsalingoy si Jesus asin mahiling na nagsusunod sa saiya si Andres asin Juan, naghapot siya: “Ano an tuyo nindo?”

“Rabbi . . . sain ka nagdadagos?” an hapot ninda sa saiya.

“Madya, asin mahihiling nindo,” an simbag ni Jesus.—Juan 1:37-39.

Mga alas kuwatro na nin hapon, asin si Andres saka Juan nagdanay na kaiba ni Jesus kan aldaw na iyan. Ugmahon na marhay si Andres kaya hinanap niya an saiyang tugang na si Simon, na inaapod man na Pedro, asin sinabi sa saiya: “Nanumpungan mi na an Mesiyas.” (Juan 1:41) Iiniba ni Andres si Pedro ki Jesus. May mga pangyayari pakalihis kaini na nagpaparisa na hinanap man ni Juan an tugang niyang si Santiago para darahon ki Jesus; pero dai iiniba ni Juan an personal na detalyeng ini sa saiyang salaysay kan mga pangyayari.

Kan suminunod na aldaw, nanumpungan ni Jesus si Felipe, na taga Betsaida. Harani iyan sa norteng baybayon kan Dagat kan Galilea asin iyo an ginikanan na siyudad ni Andres asin Pedro. Sinabi ni Jesus ki Felipe: “Magin parasunod taka.”—Juan 1:43.

Dangan nanumpungan ni Felipe si Natanael, na inaapod man na Bartolome, asin nagsabi: “Nanumpungan na niyamo an saro na sinambit sa Katugunan ni Moises asin sa mga isinurat kan mga Propeta: si Jesus na aki ni Jose, na gikan sa Nazaret.” Nagduda si Natanael asin nagsabi ki Felipe: “Igwa daw nin ano man na marahay na magikan sa Nazaret?”

“Madya asin hilinga,” an sabi ni Felipe sa saiya. Kan marisa ni Jesus na si Natanael parani sa saiya, nagsabi siya: “Hilinga, sarong tunay na Israelita na sa saiya mayong pandadaya.”

“Ano ta midbid mo ako?” an hapot ni Natanael.

Nagsimbag si Jesus: “Bago ka inapod ni Felipe, kan yaon ka sa sirong kan puon nin higera, nahiling taka na.”

Nagsimbag si Natanael na nagngangalas: “Rabbi, ika an Aki nin Diyos, Hadi ka nin Israel.”

“Nagtutubod ka daw dahil sinabi ko sa saimo na nahiling taka sa sirong kan puon nin higera?” an hapot ni Jesus. “Makakahiling ka nin mga bagay na mas urog pa sa mga ini.” Dangan nanuga si Jesus: “Sinisigurado ko nanggad sa saindo, mahihiling nindo na nabuksan an langit asin na nagsasarakat diyan an mga anghel nin Diyos saka nagbabaraba pasiring sa Aki nin tawo.”—Juan 1:45-51.

Pagkatapos tulos kaini, si Jesus, kaiba an saiyang inot na nakuang mga disipulo, naghali sa Kababan nin Jordan asin nagpasiring sa Galilea.