“An Ilaw kan Kinaban”—An Aki nin Diyos

Kan ultimong aldaw kan Kapiyestahan nin mga Tabernakulo, an ikapitong aldaw, si Jesus nagtutukdo sa parte kan templo na “namumugtakan kan mga lalagan nin kontribusyon.” (Juan 8:20; Lucas 21:1) Minalataw na yaon ini sa Patyo kan mga Babayi, kun sain ihinuhulog kan mga tawo an mga kontribusyon ninda.

Pag banggi durante kan kapiyestahan, an parteng ini kan templo pinaliliwanag nin espesyal na mga ilawan. Igwa digdi nin apat na darakulaon na patungan nin lampara, na an kada saro igwang apat na darakulang planggana na pano nin lana. Maliwanagon an ilaw kan mga lamparang ini kaya naliliwanagan an kapalibutan sagkod sa harayo. An maliwanagon na ilaw na ini puwedeng naikonektar kan mga nagdadangog ki Jesus sa sinabi niya ngunyan: “Ako an ilaw kan kinaban. An siisay man na magsunod sa sako dai nanggad malakaw sa kadikluman, kundi mapapasaiya an ilaw nin buhay.”—Juan 8:12.

Nagkontra an mga Fariseo sa ipinahayag ni Jesus asin nagsabi: “Ika an nagpapatotoo manungod sa sadiri mo; bakong balido an patotoo mo.” Nagsimbag si Jesus: “Maski ako mismo an nagpapatotoo manungod sa sadiri ko, balido an sakuyang patotoo, huli ta aram ko kun sain ako hali asin kun sain ako maduman. Alagad dai nindo aram kun sain ako hali asin kun sain ako maduman.” Sinabi pa niya: “Nasusurat sa sadiri nindong Katugunan: ‘An patotoo nin duwang tawo balido.’ Saro ako na nagpapatotoo manungod sa sadiri ko, asin an Ama na nagsugo sa sako nagpapatotoo manungod sa sako.”—Juan 8:13-18.

Huling dai inako an saiyang pangangatanusan, naghapot an mga Fariseo: “Hain an saimong Ama?” Prangkang nagsimbag si Jesus: “Dai nindo ako midbid pati an sakuyang Ama. Kun namidbid nindo ako, mamimidbid man nindo an sakuyang Ama.” (Juan 8:19) Dawa ngani gusto pa man giraray kan mga Fariseo na dakupon si Jesus, mayo nin duminakop sa saiya.

Inutro ni Jesus an sarong bagay na dati na niyang sinabi: “Mahali ako, asin hahanapon nindo ako, alagad ta magagadan kamong makasalan. Sa dudumanan ko, dai kamo makakaduman.” An mga Judio, na biyong sala an pakaintindi sa sinabi ni Jesus, nagsarabi: “Mahugot daw siya? Sabi niya kaya, ‘Sa dudumanan ko, dai kamo makakaduman.’” Dai ninda nasabutan an buot niyang sabihon, huling dai ninda aram an saiyang ginikanan. Nagpaliwanag siya: “Kamo mga taga digdi sa ibaba; ako taga duman sa itaas. Kamo taga digdi sa kinaban na ini; ako bakong taga digdi sa kinaban na ini.”—Juan 8:21-23.

An sinasabi ni Jesus iyo na siya nabuhay na sa langit bago nagin tawo asin na siya an ipinanugang Mesiyas, o Cristo, na dapat kutanang hinahalat kan mga lider na ini nin relihiyon. Minsan siring, mapang-insulto nanggad na ihinapot ninda: “Siisay ka?”—Juan 8:25.

Sa ibong kan pagsikwal asin pagkontra ninda, si Jesus nagsimbag: “Taano ta nakikipag-ulay pa baya ako sa saindo?” Itinao pa man niya giraray an atensiyon sa saiyang Ama asin ipinaliwanag kun taano ta dapat na magdangog an mga Judio sa Aki: “Siya na nagsugo sa sako pirming totoo an sinasabi, asin an mismong mga bagay na nadangog ko sa saiya itinataram ko sa kinaban.”—Juan 8:25, 26.

Dangan ipinahayag ni Jesus an pagtitiwala sa saiyang Ama, na mayo sa mga Judiong ini: “Pag ikinaitaas na nindo an Aki nin tawo, dangan nindo maaaraman na ako iyo an sinabi kong ako asin na dai akong ginigibo sa sadiri kong kabutan; kundi kun ano an itinukdo kan Ama sa sako, an mga bagay na ini an itinataram ko. Asin Siya na nagsugo sa sako nasa kaibanan ko; dai niya ako pinabayaan na ako sana, huli ta pirmi kong ginigibo an mga bagay na nakakapaugma sa saiya.”—Juan 8:28, 29.

Pero, may mga Judio na talagang nagturubod ki Jesus, asin sinabihan niya sinda: “Kun magdadanay kamo sa sakuyang tataramon, kamo tunay kong mga disipulo, asin maaaraman nindo an katotoohan, asin an katotoohan mapatalingkas sa saindo.”—Juan 8:31, 32.

Para sa nagkapira, an sinabi niyang ini dapit sa pagpatalingkas garo baga malain. Nagkontra sinda: “Mga aki kami ni Abraham asin dai kami kasuarin man nagin uripon nin siisay man. Ano ta nagsasabi kang ‘Magigin talingkas kamo’?” Aram kan mga Judio na may mga panahon na nagin sakop sinda nin ibang nasyon, alagad habo nindang apudon sinda na mga uripon. Pero, idinuon ni Jesus na mga uripon pa man giraray sinda: “Sinisigurado ko nanggad sa saindo, an lambang naggigibo nin kasalan uripon nin kasalan.”—Juan 8:33, 34.

Namemeligro an mga Judio huling habo nindang akuon na mga uripon sinda nin kasalan. “An uripon dai nagdadanay sa harong kan saiyang kagurangnan sagkod lamang,” an paliwanag ni Jesus. “An aki nagdadanay diyan sagkod lamang.” (Juan 8:35) An sarong uripon mayo nin deretso sa sarong pamana, asin puwede siyang pahalion ano man na oras. An aki sana na talagang ipinangaki o inampon kan pamilya an magdadanay “sagkod lamang,” an buot sabihon, sagkod na siya nabubuhay.

Kaya, an katotoohan dapit sa Aki iyo an katotoohan na nagpapatalingkas sa mga tawo sagkod lamang sa nakakagadan na kasalan. “Kun patalingkason kamo kan Aki, kamo magigin tunay na talingkas,” an sabi ni Jesus.—Juan 8:36.