An Espiritismo Asin an Paghanap sa Tunay na Espirituwalidad

KITA gabos igwa nin espirituwal saka materyal na mga pangangaipo. Iyan an dahelan kun taano ta kadakol an naghahapot nin siring kan, Ano an katuyohan kan buhay, taano ta nagdudusa an mga tawo, asin ano an nangyayari sa sato kun kita magadan? An dakol na sinserong tawo naghahanap nin simbag sa mga hapot na ini asin sa kaagid na mga hapot sa mga pagtiripon nin mga espiritista, na dian kinokonsulta ninda an mga patagolainan (na inaapod man na mga pinakapaagihan), sa paglaom na makikomunikar sa espiritu kan mga gadan. An gibong ini inaapod na espiritismo.

An mga parasunod sa espiritismo manonompongan sa dakol na nasyon, asin sinda nagtitiripon sa mga kongregasyon asin simbahan. Halimbawa, sa Brazil, kinakarkulong 4,000,000 na espiritista an nagsusunod sa katokdoan na isinurat ni Hyppolyte Léon Denizard Rivail, sarong Pranses na edukador asin pilosopo kan ika-19 siglo na nagsurat sa alyas na Allan Kardec. Si Kardec enot na nagkainteres sa espiritistikong mga pangyayari kaidtong 1854. Sia naghapot sa mga patagolainan sa dakol na lugar asin isinurat an mga simbag sa The Book of Spirits, na ipinublikar kan 1857. An duwa pang publikasyon na isinurat nia iyo an The Mediums’ Book asin The Gospel According to Spiritism.

An espiritismo kaidto pa konektado na sa mga relihiosong mga gibo na siring kan vodu, panraratak, mahika, o Satanismo. Minsan siring, an mga nagsusunod sa katokdoan ni Allan Kardec nagsasabi na laen an saindang mga paniniwala. An saindang publikasyon sa parate kinokotar an Biblia, asin inaapod ninda si Jesus na “an giya asin halimbawa para sa bilog na katawohan.” Sinasabi ninda na an katokdoan ni Jesus iyo “an pinakadalisay na kapahayagan kan ley nin Dios.” Minansay ni Allan Kardec an mga isinurat kan mga espiritista bilang ikatolong kapahayagan kan ley nin Dios sa katawohan, na an duwang naenot iyo an katokdoan ni Moises asin an ki Jesus.

An espiritismo nakaaakit sa dakol huli ta itinatampok kaiyan an pagkamoot sa kataed asin pag-abuloy sa mga nangangaipo. An sarong paniniwala nin mga espiritista iyo na: “Kun mayo nin pag-abuloy mayo nin kaligtasan.” Aktibo an dakol na espiritista sa serbisyo sosyal, nagtatabang na mag-establisar nin mga ospital, eskuelahan, asin iba pang institusyon. An siring na mga paghihingoa kaomaw-omaw. Pero, kumusta kun ikokomparar an mga paniniwala kan mga espiritista sa katokdoan ni Jesus na nasusurat sa Biblia? Helingon niato an duwang halimbawa: an paglaom para sa mga gadan asin an dahelan nin pagdusa.

Ano an Paglaom Para sa mga Gadan?

An dakol na espiritista naniniwala sa reenkarnasyon. An sarong publikasyon nin mga espiritista nagsasabi: “An reenkarnasyon iyo an solamenteng doktrina na tama sa satong ideya manongod sa hustisya nin Dios; iyan an solamenteng doktrina na makapaliliwanag kan ngapit asin makapakokosog kan satong paglaom.” Ipinaliliwanag kan mga espiritista na pagnagadan binabayaan kan kalag, o “nagpakangtawong espiritu,” an hawak​—garo kulagbaw na minaluwas sa kokon kaiyan. Naniniwala sinda na an mga espiritung ini sa huri rinereenkarnar bilang tawo tanganing haleon an kasalan na naginibo sa nakaaging buhay. Alagad mayong pakagirumdom kan nakaaging mga kasalan na idto. “Pinagmarahay kan Dios na tahoban an nakaagi,” an sabi kan The Gospel According to Spiritism.

“An pagdehar sa reenkarnasyon pagdehar man sa mga tataramon ni Cristo,” an isinurat ni Allan Kardec. Minsan siring, nungkang nasambitan ni Jesus an terminong “reenkarnasyon” asin nungkang sinabi nia an siring na ideya. (Helingon an “Itinotokdo daw kan Biblia an Reenkarnasyon?” sa pahina 22.) Imbes, itinokdo ni Jesus an pagkabuhay liwat kan mga gadan. Durante kan saiyang daganon na ministeryo, tolong tawo an binuhay nia liwat​—an aking lalaki nin sarong babaeng balo sa Nain, an aking babae kan nangengenot na opisyal nin sarong sinagoga, asin an saiyang dayupot na katood na si Lazaro. (Marcos 5:​22-​24, 35-​43; Lucas 7:​11-​15; Juan 11:​1-​44) Estudyaran niato an saro sa pambihirang mga pangyayaring idto asin helingon ta kun ano an boot sabihon ni Jesus kan “pagkabuhay liwat.”

An Pagkabuhay Liwat ni Lazaro

Nabaretaan ni Jesus na nagkahelang an saiyang katood na si Lazaro. Pakalihis nin duwang aldaw, sinabihan nia an saiyang mga disipulo: “Si Lazaro na katood niato nagpahingalo, alagad ako maduman tanganing pukawon sia sa pagkatorog.” Dai nasabotan kan mga disipulo kun ano an boot sabihon ni Jesus, kaya sinabi nia nin sayod: “Si Lazaro nagadan.” Kan sa katapustapusi nagduman si Jesus sa linobngan ki Lazaro, an tawong iyan apat na aldaw nang gadan. Pero, si Jesus nagboot na haleon an gapo na nakatakop sa entrada kan lolobngan. Dangan sia nagkurahaw: “Lazaro, lumuwas ka!” Sa puntong iyan, may nangyaring makangangalas. “Idtong nagadan luminuwas na an saiyang mga bitis asin kamot nagagapos nin mga henerong sa gadan, asin napapatos nin sarong podong an saiyang lalauogon. Si Jesus nagsabi sa sainda: ‘Hubadi sia nindo asin palakawa.’”​—Juan 11:​5, 6, 11-14, 43, 44.

Malinaw na bako ining reenkarnasyon. Sinabi ni Jesus na an gadan na si Lazaro natotorog, daing pag-aram. Siring kan pagkasabi kaiyan kan Biblia, ‘an saiyang mga pag-isip napapara.’ “Mayo man lamang [sia] nin pakaaram.” (Salmo 146:4; Eclesiastes 9:5) An binuhay liwat na si Lazaro bakong ibang persona na an espiritu rineenkarnar. Igwa sia kan iyo man sanang personalidad, iyo man sanang edad, asin iyo man sanang memorya. Ipinadagos nia an saiyang normal na buhay bago sia nagadan na mayo pa sa panahon asin nagbalik sa saiyang mga namomotan na nagtangis huli sa saiyang kagadanan.​—Juan 12:​1, 2.

Kan huri, si Lazaro nagadan giraray. Kaya, ano an katuyohan kan saiyang pagkabuhay liwat? Kaiba kan iba pang pagkabuhay liwat na ginibo ni Jesus, iyan nagpapasarig sa satong tiwala sa panuga nin Dios na an Saiyang fiel na mga lingkod bubuhayon hale sa mga gadan sa Saiyang itinalaan na panahon. An mga milagrong idto ni Jesus orog pang tinatawan nin puersa an saiyang mga tataramon: “Ako iyo an pagkabuhay liwat asin an buhay. An naggigibo nin pagtubod sa sako, minsan pa sia magadan, mabubuhay.”​—Juan 11:25.

Mapadapit sa pagkabuhay liwat na iyan sa ngapit, si Jesus nagsabi: “An oras maabot na an gabos na nasa mga lolobngan na girumdoman makadadangog kan [sakong] tingog asin maruluwas, idtong naggiribo nin marahay sa pagkabuhay liwat sa buhay, idtong naggiribo nin maraot sa pagkabuhay liwat sa paghokom.” (Juan 5:​28, 29) Arog kan nangyari ki Lazaro, iyan magigin pagkabuhay liwat nin mga tawong gadan. Bako iyan na pag-ibanan giraray kan may pag-aram na mga espiritu asin kan binuhay liwat na mga hawak na nalapa na asin tibaad nagin kabtang na nin ibang nabubuhay na mga organismo. An pagbuhay liwat kan mga gadan kayang-kayang gibohon kan Kaglalang kan langit asin daga, na dai marorop an kadonongan asin kapangyarihan.

Bako daw na an doktrina nin pagkabuhay liwat, siring kan itinokdo ni Jesu-Cristo, naghahayag kan hararom na pagkamoot nin Dios sa mga tawo bilang mga indibiduwal? Alagad kumusta man an ikaduwang hapot na nasambitan kasubago?

Ano an Dahelan kan Pagdusa?

An kadaklan na pagdusa nangyayari huli sa mga bagay na ginigibo nin bakong madonong, daing kabatidan, o maraot pa nganing mga tawo. Pero, kumusta man an makaturotristeng mga pangyayari na dai puedeng ibasol nin direkta sa mga tawo? Halimbawa, taano ta igwa nin mga aksidente asin natural na mga kalamidad? Taano ta namumundag an nagkapirang aki na igwa nin mga kakundian poon sa pagkaaki. Minamansay ni Allan Kardec an siring na mga bagay bilang padusa. Isinurat nia: “Kun kita pinadudusahan kun siring sierto na may naginibong sala. Kun an salang iyan bakong sa presenteng buhay kun siring iyan siertong kan nakaaging pag-eksister.” An mga espiritista tinokdoan na mamibi: “Kagurangnan, Ika an lubos na hustisya. An helang na pinagkanigo Mong itao sako maninigo nanggad . . . Inaako ko iyan bilang kabayadan sa sakong nakaagi asin bilang sarong pagbalo sa sakong pagtubod asin pagpasakop sa Saimong banal na kabotan.”​—The Gospel According to Spiritism.

Itinokdo daw ni Jesus an siring kaiyan? Dai. Aram nanggad ni Jesus an sinasabi sa Biblia: “An panahon asin pagkanorongod nangyayari sa sainda gabos.” (Eclesiastes 9:11) Aram nia na kun minsan basta na sanang nangyayari an maraot na mga bagay. Dai man kaipuhan na iyan padusa sa mga kasalan.

Estudyare an pangyayaring ini sa buhay ni Jesus: “Mantang [si Jesus] minaagi naheling nia an sarong lalaking buta poon kan mamundag. Asin hinapot sia kan saiyang mga disipulo: ‘Rabi, siisay an nagkasala, an tawong ini o an saiyang mga magurang, kaya sia namundag na buta?’” An itinaong simbag ni Jesus lubos na nagtatao nin kaliwanagan: “Ni an tawong ini ni an saiyang mga magurang dai nagkasala, kundi tanganing mahayag an mga gibo nin Dios sa kamugtakan nia. Pakatapos niang sabihon an mga bagay na ini, naglutab sia sa daga asin guminibo nin laboy paagi sa laway, asin ibinugtak an saiyang laboy sa mga mata kan lalaki asin sinabi sa saiya: ‘Lakaw asin maghugas ka sa tangke nin Siloam.’ . . . Kaya sia naghale asin naghugas, asin nagbalik na nakaheheling.”​—Juan 9:1-3, 6, 7.

An mga tataramon ni Jesus nagpapaheling na bakong an lalaki ni an saiyang mga magurang an responsable sa saiyang pagkabuta poon sa pagkaaki. Kaya dai sinuportaran ni Jesus an ideya na an lalaki pinadudusahan sa nakomiter na mga kasalan sa nakaaging buhay. Totoo, aram ni Jesus na gabos na tawo nagmamana nin kasalan. Alagad minamana ninda an kasalan ni Adan, bakong an mga kasalan na nakomiter ninda bago sinda mamundag. Huli sa kasalan ni Adan, an gabos na tawo namumundag na bakong sangkap sa pisikal, na puedeng magkahelang asin magadan. (Job 14:4; Salmo 51:5; Roma 5:12; 9:11) Sa katunayan, iyan an situwasyon na sinugoan ki Jesus na remedyohan. Si Juan na Bautisador nagsabi na si Jesus “an Kordero nin Dios na naghahale kan kasalan kan kinaban!”​—Juan 1:29.a

Mangnoha man na dai sinabi ni Jesus na tinuyo nin Dios na mamundag na buta an lalaki tanganing si Jesus dumatong asin paomayan sia pag-abot nin panahon. Abaa karingis, kamapagtuya kutana kaiyan! Iyan daw nagbunga kutana nin kaomawan sa Dios? Dai. Imbes, an milagrosong pagpaomay sa tawong buta nagpangyaring “mahayag an mga gibo nin Dios.” Arog kan dakol na iba pang pagpaomay na ginibo ni Jesus, iyan nagpabanaag kan sinserong pagkamoot nin Dios sa nagdudusang katawohan asin pinatunayan an pagkamapagtitiwalaan kan Saiyang panuga na taposon an gabos na helang asin pagdusa nin tawo sa Saiyang itinalaan na panahon.​—Isaias 33:24.

Bako daw na nakararangang madiskobre na imbes na nagpapangyari nin pagdusa, an satong langitnon na Ama nagtatao nin “marahay na mga bagay sa mga naghahagad sa saiya”? (Mateo 7:11) Kanigoan na kamurawayan an itatao sa Kaharohalangkawe kun an mga mata kan mga buta magkaburuklat na, an mga talinga kan mga bungog magkaburukasan na, asin an mga pilay magralakaw, magrulukso, asin magdaralagan na!—Isaias 35:5, 6.

Pagpanigo sa Satong Espirituwal na mga Pangangaipo

Ipinahayag ni Jesus: “An tawo dapat na mabuhay, bakong sa tinapay sana, kundi sa lambang tataramon na minaluwas sa ngoso ni Jehova.” (Mateo 4:4) Iyo, an satong espirituwal na mga pangangaipo napaninigoan kun binabasa ta an Tataramon nin Dios, an Biblia, asin iinooyon dian an satong buhay. An pagkonsulta sa mga patagolainan dai nanggad nakapaninigo sa satong espirituwal na mga pangangaipo. Tunay nanggad, an siring na gibo malinaw na kinokondenar sa inaapod ni Allan Kardec na enot na kapahayagan kan ley nin Dios.​—Deuteronomio 18:10-13.

An dakol, kaiba an mga espiritista, minimidbid na an Dios iyo an Supremong Persona, daing sagkod, dai marorop sa pagkasangkap, maboot, marahay, asin makatanosan. Alagad orog pa dian an ihinahayag kan Biblia. Ihinahayag kaiyan na sia igwa nin personal na ngaran, Jehova, na dapat niatong tawan nin onra arog kan ginibo ni Jesus. (Mateo 6:9; Juan 17:6) Ilinaladawan kaiyan an Dios bilang tunay na persona na sa saiya puedeng magkaigwa nin dayupot na relasyon an mga tawo. (Roma 8:​38, 39) Sa pagbasa kan Biblia, nanonodan ta na an Dios maheherakon asin na “dai nia ginibo sa sato an sono sa satong mga kasalan; dai man nia itinao sa sato an maninigo sa sato sono sa satong mga pagkakasala.” (Salmo 103:10) Paagi sa saiyang nasusurat na Tataramon, ihinahayag kan Soberanong Kagurangnan na Jehova an saiyang pagkamoot, supremasiya, asin pagkarasonable. Sia an Saro na naggigiya asin nagpoprotehir sa makinuyog na mga tawo. An pakamidbid ki Jehova asin sa saiyang Aki, si Jesu-Cristo, “nangangahulogan nin buhay na daing katapusan.”​—Juan 17:3.

An Biblia nagtatao kan gabos na impormasyon na kaipuhan niato manongod sa mga katuyohan nin Dios, asin sinasabi kaiyan sa sato kun ano an kaipuhan tang gibohon kun mawot niato siang paogmahon. An maingat na pagsiyasat kan Biblia nagtatao nin tunay asin nakakokontentong simbag sa satong mga hapot. An Biblia nagtatao man sa sato nin giya sa kun ano an tama asin sala, asin iyan nagtatao nin masarig na paglaom. Sinisierto kaiyan sa sato na sa harani nang ngapit, ‘papahidon nin Dios an gabos na luha sa mga mata kan katawohan, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay malihis na.’ (Kapahayagan 21:​3, 4) Paagi ki Jesu-Cristo, patatalingkason ni Jehova an katawohan sa minanang kasalan asin pagkabakong sangkap, asin an makinuyog na mga tawo magmamana nin buhay na daing sagkod sa sarong paraisong daga. Sa panahon na iyan, an saindang pisikal sagkod espirituwal na mga pangangaipo lubos nang mapaninigoan.​—Salmo 37:​10, 11, 29; Talinhaga 2:​21, 22; Mateo 5:5.

[Nota sa Ibaba]

[Kahon sa pahina 22]

ITINOTOKDO DAW KAN BIBLIA AN REENKARNASYON?

Suportado daw kan arin man na teksto sa Biblia an doktrina nin reenkarnasyon? Estudyare an nagkapira sa mga teksto na ginamit kan mga naniniwala sa doktrinang ini:

“Huli ta an gabos, an Mga Propeta asin an Ley, naghula sagkod ki Juan . . . Sia mismo si ‘Elias na nakatalagang umabot.’”​—Mateo 11:​13, 14.

Si Juan na Bautisador daw iyo man sana si Elias na namundag liwat? Kan hapoton: “Ika si Elias?” Si Juan nagsimbag nin malinaw: “Bako ako.” (Juan 1:21) Minsan siring, ihinula na si Juan maeenot sa Mesiyas “na igwa kan espiritu asin kapangyarihan ni Elias.” (Lucas 1:17; Malaquias 4:​5, 6) Sa ibang pagtaram, si Juan na Bautisador iyo si Elias sa sentido na ginibo nia an sarong gibohon na kapareho kan ki Elias.

“Kun an saro dai namundag giraray, dai sia makakaheling kan kahadean nin Dios. Dai ka magngalas na ako nagsabi saimo, Kamo kaipuhan na mamundag giraray.”​—Juan 3:​3, 7.

An saro sa mga apostol nagsurat kan huri: “Pag-omawon an Dios asin Ama kan satong Kagurangnan na si Jesu-Cristo! Paagi sa saiyang dakulang pagkaherak kita namundag giraray sa buhay na paglaom paagi sa pagkabuhay liwat ni Jesu-Cristo hale sa mga gadan.” (1 Pedro 1:​3, 4, Revised Standard Version; Juan 1:​12, 13) Malinaw nanggad, an pagkamundag liwat na sinasabi ni Jesus sarong espirituwal na eksperyensia na mangyayari mantang an saiyang mga parasunod buhay pa, bakong reenkarnasyon sa ngapit.

“Kun an tawo gadan, sia nabubuhay sagkod lamang: kun matapos na an sakong mga aldaw nin pag-eksister sa Daga, ako mahalat, na nakaaaram na ako mabalik liwat.”​—Sarong “Griegong traduksion” kan Job 14:14 na kinotar sa The Gospel According to Spiritism.

An pagkatradusir kan Revised Standard Version sa bersikulong ini: “Kun an tawo magadan, sia daw mabubuhay giraray? Sa gabos na aldaw kan sakong paglilingkod ako mahalat, sagkod na umabot an sakuyang pagkabutas.” Basahon an konteksto kan bersikulong iyan. Maheheling nindo na an mga gadan naghahalat sa lolobngan para sa saindang “pagkabutas.” (Bersikulo 13) Mantang sinda naghahalat, sinda dai nag-eeksister. “An tawo na nagadan biyong mayo na; asin kun an sarong magagadanon mapukan, mayo na sia.”​—Job 14:​10, bersion ni Bagster kan Septuaginta.

[Ritrato sa pahina 21]

An paglaom na pagkabuhay liwat naghahayag kan hararom na interes nin Dios sa sato bilang mga indibiduwal

[Mga ritrato sa pahina 23]

Tataposon nin Dios an gabos na pagdusa nin tawo