Arogon an Saindang Pagtubod

“Nagtutubod Ako”

NAIIMAHINAR pa ni Marta—an lolobngan kan tugang niang lalaki, sarong kueba na an laogan naseserahan nin dakulang gapo. Grabe an kamondoan nia na siring kagabat kan gapong iyan. Haros dai sia makapaniwala na mayo na an namomotan niang si Lazaro. An apat na aldaw na idto, poon kan magadan ini, garo nagin halawigon asin nakakatension na panahon nin pagmondo, pag-abot nin mga nakikidamay, saka mga ekspresyon nin pakidumamay.

Asin ngonyan, nakatindog sa atubangan ni Marta an tawong nagin pinakamahalaga ki Lazaro. Kan maheling nia giraray si Jesus, lalong naggrabe an kamondoan nia, huling si Jesus sana sa bilog na kinaban an puede kutanang nakasalbar sa tugang nia. Pero, minsan paano naranga si Marta huling kaiba nia si Jesus sa luwas kan sadit na banwaan nin Betania na nasa bakilid. Sa halipot na panahon na kaiba nia si Jesus, sia naogma giraray huli sa maboot na ekspresyon kan mga mata ni Jesus, an hararom na empatiya na pirmeng nakakapakosog na marhay. Sia hinapot ni Jesus dapit sa mga bagay na makakatabang sa saiya na magkonsentrar sa saiyang pagtubod asin mga paniniwala manongod sa pagkabuhay liwat. Huli sa pag-oolay na iyan, ikinapahayag ni Marta an saro sa pinakaimportanteng nasabi nia kasuarin man: “Nagtutubod ako na ika an Cristo na Aki nin Dios, an Saro na madatong sa kinaban.”—Juan 11:27.

Si Marta sarong babae na may pambihirang pagtubod. An kadikit sanang sinasabi sa sato kan Biblia dapit sa saiya nagtatao nin madonong na mga leksion na makakapakosog kan sato mismong pagtubod. Tanganing masabotan kun gurano iyan katotoo, estudyaran niato an enot na pagkasaysay sa Biblia manongod ki Marta.

“Nahahadit Asin Natataranta”

Pirang bulan bago kaini, buhay pa asin makosog si Lazaro. Madalaw sa harong ninda sa Betania an pinakaimportanteng bisita, si Jesu-Cristo. Si Lazaro, Marta, asin Maria sarong pamilya nin adultong magturugang na magkairiba sa harong. Isinusuherir nin nagkapirang parasiyasat na posibleng si Marta an pinakamatua, huling sia an malinaw na sibot-sibot sa pag-asikaso asin kun beses iyo an enot na nasasambitan. (Juan 11:5) Mayo kita nin paagi na maaraman kun baga nag-agom an siisay man sa sainda. Ano man an nangyari, sinda nagin dayupot na amiga asin amigo ni Jesus. Durante kan ministeryo ni Jesus sa Judea, na duman napaatubang sia sa grabeng pagtumang asin pagkaongis, an harong ninda an nagin pulian nia. Mayong duda na pinahalagahan niang marhay an istaran na iyan na may katoninongan asin pagsuporta.

Dakula an kabtang ni Marta tanganing an harong ninda magin maginhawa asin angay sa pag-istimar nin mga bisita. Huling sia sibot-sibot asin mahigos na tawo, sia garo baga pirme na sanang naghihidali. Arog sia kaiyan, lalo na kan magdalaw si Jesus. Tolos siang nagplano nin espesyal na handa na dakol an putahe para sa saiyang espesyal na bisita asin, tibaad, para sa nagkapirang kaiba kaini sa pagbaklay. Kaidto, importanteng marhay an pagkamapag-istimar. Pag-abot nin sarong bisita, maogma siang inaako paagi sa paghadok, paghale kan saiyang sandalyas, paghanaw sa saiyang bitis, asin paglahid sa saiyang payo nin nakakaginhawang pahamot na gibo sa lana. (Lucas 7:44-47) Inaasikasong marhay an saiyang dadagosan asin kakakanon.

Dakol an dapat gibohon ni Marta asin Maria para sa importanteng bisita ninda. Si Maria, na kun minsan iyo an ibinibilang na mas sensitibo asin maginirumdom sa duwa, siertong nagtabang sa tugang nia kan primero. Alagad pag-abot ni Jesus, nagbago an situwasyon. Minansay ni Jesus an pagkakataon na iyan na panahon tanganing magtokdo—asin sia talagang nagtokdo! Bakong arog kan mga lider sa relihion kan panahon na idto, iginalang ni Jesus an mga babae asin dai sia nag-alangan sa pagtokdo sa sainda manongod sa Kahadean nin Dios, an tema kan ministeryo nia. Si Maria ogmahon nanggad sa oportunidad na ini, kaya sia nagtukaw sa may pamitisan ni Jesus asin dinangog an gabos na sinabi Nia.

Maiimahinar nanggad niato an naggagrabeng tension na namamatean ni Marta. Huli sa dakol na putaheng kaipuhan niang andamon asin sa gabos na kaipuhan niang asikasohon para sa saiyang mga bisita, sia orog na nahadit asin nataranta. Mantang sia sibot-sibot na nagpapabalikbalik asin naheheling an saiyang tugang na nakatukaw na dai man lamang nagtatabang sa saiya, namula daw an lalawgon nia, makosog na naghangos nin hararom, o nagmurusdot? Bakong makangangalas kun iyo. Dai nia kayang gibohon an gabos na ini kun sia sana!

Sa katapustapusi, dai na mapugolan ni Marta an pagkauyam nia. Mantang nagtataram si Jesus, sia biglang suminingit: “Kagurangnan, ano baliwala saimo na pinapabayaan ako kan sakong tugang na ako sana an mag-asikaso? Kun siring, sabihi sia na tabangan ako.” (Lucas 10:40) Magabat na mga tataramon ini. Arog kaini an pagkatradusir nin dakol na bersion sa hapot nia: “Kagurangnan, dai ka lamang nakikiaram . . . ?” Dangan nakiolay sia ki Jesus na itanos si Maria asin pabalikon ini sa ginigibo nia.

An simbag ni Jesus posibleng nakabigla ki Marta, asin iyo man sa dakol na parabasa nin Biblia poon kaidto. May kabootan siang nagsabi: “Marta, Marta, ika nahahadit asin natataranta manongod sa dakol na bagay. Pero, pira sanang bagay an kaipuhan, o saro sana. Para sa saiya, pinili ni Maria an marahay na kabtang, asin dai iyan hahaleon sa saiya.” (Lucas 10:41, 42) Ano an boot sabihon ni Jesus? Sinasabi daw nia na materyalistiko si Marta? Binabaliwala daw nia an pagmamaigot ni Marta na maghanda nin masiram na kakanon?

Dai man. Malinaw na naheling ni Jesus na mamomoton asin dalisay an motibo ni Marta. Dugang pa, para sa saiya bako man sala an pag-istimar paagi sa bastanteng handa. Gikan sa boot siang nag-atender sa “dakulang bangkete” na inandam ni Mateo para sa saiya dai pa sana nahahaloy bago kaini. (Lucas 5:29) Bako man mayor na isyu digdi an handa ni Marta; kundi an mga prioridad nia. Nagkonsentrar siang marhay sa saiyang magarbong handa kaya nalingawan na nia kun ano an pinakamahalaga. Ano iyan?

Si Jesus, an bugtong na Aki ni Jehova Dios, nasa harong ni Marta tanganing magtokdo kan katotoohan. Mayo na nin ibang mas mahalaga dian, dawa pa an saiyang magayon an pagkapresentar na mga luto asin pagpreparar kaiyan. Daing duda na namondo si Jesus huling nalilipasan ni Marta an sarong pambihirang oportunidad na mapakosog an saiyang pagtubod, alagad pinabayaan nia na si Marta mismo an pumili. Pero, ibang bagay na kun sasabihan ni Marta si Jesus na piriton si Maria na lipasan man an oportunidad na iyan.

Kaya si Marta may kabootan na itinanos ni Jesus, na duwang beses na sinambit an ngaran nia tanganing pakalmahon sia, asin sinierto sa saiya ni Jesus na dai nia kaipuhan na ‘mahadit asin mataranta manongod sa dakol na bagay.’ An simpleng handa na may saro o duwang putahe supisyente na, lalo na kun igwa nin espirituwal na bangkete. Kun siring, dai nia nanggad hahaleon ki Maria “an marahay na kabtang” na pinili kaini—an makanood ki Jesus!

Dakol na leksion an manonodan kan mga parasunod ni Cristo ngonyan sa halipot na pangyayaring ini sa harong ni Marta. Nungka niatong togotan an ano man na agawan nin lugar an pagpanigo sa “espirituwal na pangangaipo” niato. (Mateo 5:3) Minsan ngani gusto tang arogon an pagigin matinao asin mahigos ni Marta, nungka niatong bobooton na ‘mahadit asin matarantang’ marhay manongod sa bakong gayong importanteng kabtang nin pagkamapag-istimar, na huli kaiyan nalilipasan na niato kun ano an pinakamahalaga. Sa pangenot, kita nakikiasosyar sa mga kapagtubod, bakong tanganing maghanda o magkakan nin maluhong kakanon, kundi tanganing magpakinosogkosogan asin makatao nin espirituwal na mga regalo. (Roma 1:11, 12) Puedeng magin nakakapakosog an siring na okasyon dawa pinakasimpleng kakanon sana an ipuesto.

Namomotan na Tugang na Nagadan—Asin Binuhay Liwat

Inako daw ni Marta an maboot na pagsagwe ni Jesus asin nakanood dian? Dai kita dapat magngalas. Bilang pag-introdusir ni apostol Juan sa nakakaogmang pagkasaysay manongod sa tugang na lalaki ni Marta, sia nagpagirumdom sa sato: “Ngonyan namotan ni Jesus si Marta asin an saiyang tugang na babae patin si Lazaro.” (Juan 11:5) Pirang bulan na an nakaagi pagkatapos kan pagdalaw ni Jesus sa Betania na ilinadawan sa enotan. Malinaw na dai nagraot an boot ni Marta; sia dai naghinanakit ki Jesus huli sa mamomoton na hatol kaini. Isinapuso nia iyan. Sa bagay man na ini, sia nagtao sa sato nin marahayon na halimbawa nin pagtubod, huling siisay sa sato an dai nangangaipo kun beses nin kadikit na pagtatanos?

Kan magkahelang an saiyang tugang na lalaki, nagin sibot si Marta sa pag-ataman sa saiya. Ginibo nia an gabos na makakaya tanganing mabawasan an pagsakit kaini asin matabangan na magrahay. Minsan siring, mas naggrabe pa an helang ni Lazaro. Oras-oras asin aroaldaw na nagdanay sa kataed nia an saiyang mga tugang tanganing atamanon sia. Pirang beses daw minasdan ni Marta an makaheherak na lalawgon kan tugang nia, na ginigirumdom an dakol na taon na sinda magkaibanan, asin an mga panahon na sinda maogma saka mamondo?

Kan sa heling ninda garo mayo na sindang magigibo tanganing matabangan si Lazaro, si Marta asin Maria nagpadara nin mensahe ki Jesus. Sia naghuhulit kaidto sa lugar na mga duwang aldaw na pagbaklay an rayo sa sainda. Simple sana an mensahe ninda: “Kagurangnan, uya! naghehelang an padangat mo.” (Juan 11:1, 3) Aram ninda na namomotan ni Jesus an tugang ninda, asin nagtutubod sinda na gigibohon nia an ano man na makakaya nia tanganing tabangan an saiyang amigo. Naglaom daw sinda na maabot si Jesus bago magin huri an gabos? Kun iyo, dai nangyari an linalaoman ninda. Nagadan si Lazaro.

Si Marta asin Maria magkaibanan na nagmondo huli sa saindang tugang, na inasikaso an mga preparasyon para sa paglobong sa saiya asin iniistimar an dakol na nakikidamay hale sa Betania saka sa mga lugar na nasa palibot kaiyan. Pero, mayo pa man giraray bareta dapit ki Jesus. Siertong paorog nang paorog na nagpaparaisip si Marta mantang nag-aagi an mga aldaw. Sa katapustapusi, apat na aldaw pagkagadan ni Lazaro, nabaretaan ni Marta na si Jesus harani na sa banwaan. Si Marta, na pirmeng listo sa paghiro dawa sa mamondong mga oras na ini, nagtindog na dai sinabihan si Maria, dangan marikas na nagluwas tanganing sabaton si Jesus.—Juan 11:20.

Kan maheling nia an saiyang Kagurangnan, sinabi nia digdi an nasa isip ninda ni Maria na pirang aldaw nang nagpapasakit sa sainda: “Kagurangnan, kun yaon ka digdi dai kutana nagadan an sakong tugang.” Pero, si Marta dai pa nawawaran nin paglaom asin pagtubod. Sia nagsabi pa: “Alagad minsan ngonyan naaaraman ko na an gabos na hagadon mo sa Dios, itatao sa saimo nin Dios.” Si Jesus tolos na nagsabi sa saiya nin sarong bagay tanganing pakosogon an paglaom nia: “Mabangon an saimong tugang.”—Juan 11:21-23.

An paghona ni Marta an sinasabi ni Jesus iyo an manongod sa pagkabuhay liwat sa maabot na panahon, kaya nagsimbag sia: “Aram ko na sia mabangon sa pagkabuhay liwat sa huring aldaw.” (Juan 11:24) Kahangahanga an pagtubod nia sa katokdoan na iyan. An nagkapirang Judiong namomoon sa relihion, na inaapod na mga Saduceo, dai nagtutubod na magkakaigwa nin pagkabuhay liwat, minsan ngani sarong malinaw na katokdoan iyan sa ipinasabong na Kasuratan. (Daniel 12:13; Marcos 12:18) Minsan siring, aram ni Marta na itinokdo ni Jesus an paglaom na pagkabuhay liwat asin nakagibo na ngani nin mga pagbuhay liwat—alagad mayo sa mga iyan an haloy nang gadan na arog ki Lazaro. Dai nia aram kun ano an mangyayari.

Dangan, sinabi ni Jesus an dai malilingawan na kapahayagan na ini: “Ako iyo an pagkabuhay liwat asin an buhay.” Tunay nanggad na itinao ni Jehova Dios sa saiyang Aki an autoridad na gumibo sa maabot na panahon nin mga pagbuhay liwat sa bilog na kinaban. Si Marta hinapot ni Jesus: “Nagtutubod ka digdi?” Kan oras na idto ipinahayag nia an saiyang simbag na tinokar sa kapinonan kan artikulong ini. Sia nagtubod na si Jesus an Cristo, o Mesiyas, na sia an Aki ni Jehova Dios, asin na ihinula kan mga propeta na sia maabot sa kinaban.—Juan 5:28, 29; 11:25-27.

Pinapahalagahan daw ni Jehova Dios asin kan saiyang Aki, si Jesu-Cristo, an siring na klase nin pagtubod? An suminunod na mga pangyayari na naheling mismo ni Marta nagtatao kan pinakamalinaw na simbag. Naghidali sia tanganing apodon an saiyang tugang. Pagkatapos kaiyan, naheling nia na napahirong marhay an boot ni Jesus mantang kinakaolay si Maria asin an dakol na nagmomondo kaiba kaini. Naheling nia an pagluha kan mga mata ni Jesus mantang daing pag-alangan na ipinapaheling kaini an grabeng kamondoan huli sa kolog na resulta kan kagadanan. Nadangog nia na nagboot si Jesus na haleon an gapo sa lolobngan kan tugang nia.—Juan 11:28-39.

Huling si Marta pirmeng realistiko, sia nagkontra na nagsasabing mabata na an bangkay, huli ta ini apat na aldaw nang gadan. Ipinagirumdom sa saiya ni Jesus: “Bakong sinabi ko sa saimo na kun tumubod ka maheheling mo an kamurawayan nin Dios?” Sia talagang nagtubod, asin talagang naheling nia an kamurawayan ni Jehova Dios. Tolos-tolos niang tinawan nin kapangyarihan an saiyang Aki na buhayon liwat si Lazaro! Isip-isipa an mga pangyayari na siertong nakatadom sa isip ni Marta sagkod sa katapusan kan buhay nia: an pag-apod ni Jesus na nagboboot, “Lazaro, lumuwas ka!”; an maluwayon na ribok hale sa laog kan kuebang linobngan ki Lazaro kan sia magbuhat asin luway-luway na magduman sa may pinto kan kueba na nakabenda pa nin pambangkay; an pagboot ni Jesus na “hubadi sia nindo asin palakawa”; asin segurado, an tolos-tolos na pagkugos ni Marta asin Maria sa tugang ninda huli sa labi-labing kaogmahan. (Juan 11:40-44) Nawara na an nakakapagabat sa puso ni Marta!

Ipinapaheling kan pagkasaysay na ini na an pagkabuhay liwat kan mga gadan bakong pangarap sana; iyan sarong nakakaogmang katokdoan sa Biblia asin napatunayan na talagang nangyari sa kasaysayan. Gustong-gusto ni Jehova asin kan saiyang Aki na magtao nin balos sa mga nagtutubod, arog kan ginibo ninda ki Marta, Maria, asin Lazaro. May itinagama man sindang siring na balos para sa saimo kun magkakaigwa ka nin makosog na pagtubod arog ni Marta.a

“Naglilingkod si Marta”

Si Marta sinambit nin saro pang beses sa pagkasaysay sa Biblia. Nangyari iyan sa pagpoon kan ultimong semana kan buhay ni Jesus digdi sa daga. Huling aram niang marhay an mga pagsakit na mangyayari sa saiya, pinili giraray ni Jesus an istaran na iyan sa Betania na magin dagosan nia. Hale duman, sia naglalakaw nin 3 kilometros pa-Jerusalem. Si Jesus asin Lazaro nagkakakan sa harong ni Simon na leproso, asin duman si Marta huring nasambitan nin arog kaini: “Naglilingkod si Marta.”—Juan 12:2.

Talagang mahigos na babae! Kan enot niatong mabasa sa Biblia an dapit sa saiya, sia naglilingkod; asin sa huring pagkasaysay na ini, sia naglilingkod pa man giraray, na ginigibo an pinakamakakaya nia tanganing maasikaso an mga pangangaipo kan mga tawong nasa palibot nia. Sarong bendisyon nanggad para sa mga kongregasyon kan mga parasunod ni Cristo ngonyan na magkaigwa nin mga babae na arog ni Marta—makosog an boot asin buka an palad, na pirmeng ipinapaheling an saindang pagtubod paagi sa pagtao kan saindang panahon asin kosog para sa iba. Posibleng marhay na iyan nanggad an padagos na ginibo ni Marta. Kun iyo, sia nagin madonong, huling may maeeksperyensiahan pa siang mga pagbalo.

Pirang aldaw na sana, si Marta magsasakit huli sa magigin teribleng kagadanan kan saiyang namomotan na Kagurangnan, si Jesus. Dugang pa, an iyo man sanang mga mapagsaginsagin na guminadan ki Jesus desidido man na gadanon si Lazaro, huling an pagbuhay liwat sa saiya nagpapakosog sa pagtubod nin kadakol. (Juan 12:9-11) Asin siempre, pag-abot nin panahon talagang naputol huli sa kagadanan an mamomoton na relasyon ni Marta sa mga tugang nia. Dai niato aram kun paano asin kun kasuarin iyan nangyari, alagad puede kitang makasierto nanggad sa bagay na ini: An mahalagang marhay na pagtubod ni Marta nakatabang sa saiya na magtagal sagkod sa katapusan. Iyan an dahelan kaya marahay na arogon kan mga Kristiano ngonyan an pagtubod ni Marta.

[Nota sa Ibaba]

[Ritrato sa pahina 11]

Dawa kan si Marta nagmomondo, sia nagpagiya ki Jesus na magkonsentrar sa mga bagay na nakakapakosog sa pagtubod

[Ritrato sa pahina 12]

Minsan ngani “nahahadit asin natataranta,” mapakumbabang inako ni Marta an pagtatanos

[Ritrato sa pahina 15]

Tinawan nin balos an pagtubod ni Marta ki Jesus kan maheling nia an pagbuhay liwat sa tugang nia