Ginibo Ninda an Kabotan ni Jehova

An Pinakadakulang Tawo Naggibo nin Mapakumbabang Paglilingkod

ARAM ni Jesus na an saiyang huring mga oras kaiba an saiyang mga apostol magigin mahalagang marhay. Dai mahahaloy, sia aarestaron, asin an saiyang pagtubod mababalo nin dai pang kapareho kaidto. Aram man ni Jesus na may darakulang bendisyon na nakatagama sa ngapit. Madali na siang pamurawayon sa toong kamot nin Dios asin tawan kan “ngaran na halangkaw kisa sa lambang ibang ngaran, tanganing sa ngaran ni Jesus an lambang tuhod lumuhod kaidtong mga nasa langit asin sa daga asin mga nasa irarom kan daga.”—Filipos 2:9, 10.

Pero, an kahaditan manongod sa saiyang nagdadangadang na kagadanan ni an pagkagalaga para sa ipinanuga sa saiyang balos dai nagrayo kan atension ni Jesus sa mga pangangaipo kan saiyang mga apostol. Sia “namoot sa sainda sagkod sa katapusan,” an isinurat ni Juan kan huri sa saiyang Ebanghelyo. (Juan 13:1) Asin sa kritikal na huring mga oras na ini kan saiyang buhay bilang sangkap na tawo, si Jesus nagtokdo sa saiyang mga apostol nin mahalagang marhay na leksion.

Sarong Leksion Manongod sa Kapakumbabaan

Kaiba ni Jesus an mga apostol sa sarong kuarto sa itaas sa Jerusalem tanganing selebraron an Paskua. Kan nakaagi, nadangog sinda ni Jesus na nagdidiriskutiran manongod sa kun siisay an pinakadakula sa sainda. (Mateo 18:1; Marcos 9:33, 34) Ipinaliwanag na nia an bagay na ini sa sainda asin naghingoang ikorehir an saindang punto de vista. (Lucas 9:46) Minsan siring, idinoon ngonyan ni Jesus an mga leksion na idto na ginagamit an laen man na pamamaagi. Pinagmarhay nia na bako sanang magtaram sa sainda manongod sa kapakumbabaan kundi aktuwal na gibohon iyan.

Si Jesus “nagbuhat sa pamanggihan asin hinukas an saiyang panluwas na gubing,” an isinurat ni Juan. “Pakakua nin tuwalya, naghagkos sia. Pagkatapos kaiyan naglaag sia nin tubig sa sarong planggana asin nagpoon na hanawan an mga bitis kan mga disipulo patin marahon iyan kan tuwalya na nahahagkos sa saiya.”—Juan 13:4, 5.

Sa maalingahot na klima sa suanoy na Tahaw na Sirangan, an mga tawo sa parate nagsusulot kaidto nin sandalyas mantang sinda naglalakaw sa maalpog na mga tinampo. Paglaog ninda sa harong nin sarong ordinaryong tawo, sinda tataratarahon kan kag-imbitar, na matao nin mga lalagan asin tubig tanganing mahanawan ninda an saindang mga bitis. Sa mas mayaman na mga harong, sarong oripon an mahanaw kan mga bitis.—Hokom 19:21; 1 Samuel 25:40-42.

Sa kuarto sa itaas, si Jesus asin an saiyang mga apostol bakong bisita nin siisay man. Mayong kag-imbitar na matao nin mga lalagan, asin mayo nin mga oripon na mahanaw kan mga bitis. Kan ponan ni Jesus na hanawan an saindang mga bitis, an mga apostol namugtak sa alanganon na situwasyon. Digdi an Saro na pinakadakula sa sainda an naggibo kan pinakamapakumbabang gibohon!

Kan primero, si Pedro nagsayuma na pahanaw kan saiyang mga bitis ki Jesus. Alagad sinabihan sia ni Jesus: “Apuera sana kun hanawan taka, mayo kang kabtang sa sako.” Pakahanawe ni Jesus kan mga bitis kan gabos na apostol, sia nagsabi: “Aram nindo kun ano an ginibo ko sa saindo? Inaapod nindo akong, ‘Paratokdo’ asin, ‘Kagurangnan,’ asin tama kamo, huli ta siring man nanggad ako kaiyan. Kun siring, kun ako, minsan Kagurangnan asin Paratokdo, naghanaw kan saindong mga bitis, maninigo na hanawan man nindo an bitis kan lambang saro. Huli ta ako nagtao sa saindo nin arogan, tanganing, kun ano an ginibo ko sa saindo, iyo man an gibohon nindo.”—Juan 13:6-15.

Si Jesus dai nag-iintrodusir nin sarong ritual sa paghanaw nin bitis. Imbes, tinatabangan nia an saiyang mga apostol na magkaigwa nin bagong aktitud—aktitud na may kapakumbabaan asin pagigin andam na gibohon an pinakamenus na gibohon para sa saindang mga tugang. Malinaw na nasabotan ninda an boot sabihon. Estudyare an nangyari pakalihis nin mga taon kan lumataw an hapot manongod sa pagturi. Minsan ngani nagkaigwa nin “dakol na diskutiran,” pinagdanay kan mga presente an marahay na areglo asin magalang na naghinanyog sa punto de vista kan lambang saro. Apuera kaini, minalataw na an nangenot sa miting iyo si disipulo Santiago—bakong saro sa mga apostol, na tibaad iyong linaoman niato, huling sinda presente. An detalyeng ini sa pagkasaysay sa Gibo nagsusuherir na an mga apostol nakagibo nin awad-awad na pag-oswag sa pagpaheling nin kapakumbabaan.—Gibo 15:6-29.

Leksion Para sa Sato

Paagi sa paghanaw kan mga bitis kan saiyang mga disipulo, si Jesus nagtao nin sarong mapuersang leksion manongod sa kapakumbabaan. Tunay nanggad, an mga Kristiano maninigo na dai mag-isip na sinda importanteng marhay kaya an iba maninigong pirmeng maglingkod sa sainda, ni maninigo man na mawoton ninda an mga posisyon na may onra asin prestihio. Imbes, sinda maninigong sumunod sa arogan na itinao ni Jesus, na “nagdigdi, bakong tanganing paglingkodan, kundi tanganing maglingkod asin magtao kan saiyang kalag bilang pantubos na karibay nin dakol.” (Mateo 20:28) Iyo, an mga parasunod ni Jesus maninigong magin andam na gibohon an pinakamapakumbabang mga paglilingkod para sa lambang saro.

Si Pedro may marahay na dahelan na nagsurat: “Maghagkos nin kababaan nin isip sa lambang saro, huli ta tinutumang nin Dios an mga maabhaw, alagad ta tinatawan nia nin dai na kutana maninigong kabootan an mga mapakumbaba.” (1 Pedro 5:5) An termino sa Griego para sa “maghagkos” hale sa termino na an kahulogan “tapi nin oripon,” na ihinahagkos sa ibabaw nin haluag na gubing. Puede daw na an boot sabihon ni Pedro iyo an paghagkos ni Jesus sa saiya man sana nin tuwalya asin paghanaw sa mga bitis kan saiyang mga apostol? Dai ini puedeng sabihon na may kasiertohan. Minsan siring, an mapakumbabang paglilingkod ni Jesus nagkaigwa nin nagdadanay na epekto sa puso ni Pedro, siring sa maninigo man na mangyari sa puso kan gabos na magigin mga parasunod ni Cristo.—Colosas 3:12-14.