Namumutan ni Jehova an mga ‘Namumunga na May Pakatagal’

1, 2. (a) Taano ta napapakusog kita kan maimbod na mga naglilingkod sa mga teritoryong bako gayong interesado an mga tawo? (Hilingon an ritrato sa itaas.) (b) Ano an sinabi ni Jesus dapit sa paghuhulit sa “sadiri niyang banwa”? (Hilingon an nota sa ibaba.)

SI Sergio asin Olinda sarong mag-agom na payunir na labi nang 80 anyos asin nakaistar sa Estados Unidos. Kasuarin pa sana, nasasakitan na sindang maglakaw huli sa makulog nindang bitis. Pero arog kan pirang dekada na nindang ginigibo, naglalakaw sinda pag aga pasiring sa matawong lugar sa banwaan, asin minaabot diyan nin alas siyete. Minapuwesto sinda harani sa sarong bus stop asin nag-aalok kan satong mga literatura na basado sa Bibliya sa mga nag-aagi. Dai sinda iniintindi kan kadaklan, pero nagdadanay lang sa puwesto ninda an mag-agom asin nagngingirit sa mga naghihiling sa sainda. Pag udto na, luway-luway sindang malakaw pauli. Kinaagahan, sa oras na alas siyete, minapuwesto giraray sinda sa matawong lugar na idto. Sa katunayan, sibot an maimbod na mag-agom na iyan sa paghulit diyan kan mensahe kan Kahadian anom na aga kada semana, sa bilog na taon.

² Arog ni Sergio asin Olinda, dakul na maimbod na tugang sa bilog na kinaban an pirang dekada nang naghuhulit sa sadiri nindang teritoryo na bako gayong interesado an mga tawo. Kun arog ka ninda, kinokomendaran mi ikang marhay sa saimong pakatagal.a An saimong padagos na paglilingkod ki Jehova nakakapakusog sa dakul—dawa sa eksperyensiyado nang mga kapagtubod. Risahon an komento nin mga paraataman nin sirkito: “Pag nakakaiba ko sa ministeryo an maimbod na mga tugang na iyan, napapakusog ako kan halimbawa ninda.” “Nadadagka ako kan saindang kaimbudan na padagos na magtagal asin magin makusog an buot sa sakong ministeryo.” “Napapahiro kan saindang halimbawa an puso ko.”

 3. Ano an tulong hapot na pag-uulayan ta, asin taano?

³ Tanganing magin mas determinado kitang matapos an paghuhulit na iinasignar sa sato ni Jesus, pag-ulayan ta an simbag sa tulong hapot: Taano ta tibaad nadidisganar kita kun minsan? Paano kita makakapamunga? Ano an makakatabang sa sato na padagos na mamunga na may pakatagal?

 4. (a) Ano an nagin epekto ki Pablo kan negatibong reaksiyon kan mga Judio? (b) Taano ta nakamati nin arog kaiyan si Pablo?

⁴ Kun may panahon na nadisganar ka mantang naghuhulit sa mga teritoryong bako gayong interesado an mga tawo, masasabutan mo an namatian ni Pablo. Durante kan mga 30 taon na ministeryo niya, dakul an natabangan niyang magin disipulo ni Cristo. (Gibo 14:21; 2 Cor. 3:2, 3) Pero, dikit sanang Judio an napahiro niya na magin tunay na parasamba. Sa kabaliktaran, hinabuan si Pablo kan kadaklan sa sainda, asin pinersegir pa ngani siya kan iba. (Gibo 14:19; 17:1, 4, 5, 13) Ano an nagin epekto ki Pablo kan negatibong reaksiyon kan mga Judio? Prangka niyang inadmitir: “Nagsasabi ako kan totoo bilang parasunod ni Cristo . . . na igwa akong grabeng kamunduan asin dai nahahaling kulog sa sakuyang puso.” (Roma 9:1-3) Taano ta nakamati nin arog kaiyan si Pablo? Dedikado si Pablo sa paghuhulit. Naghulit siya sa mga Judio huling nagmamalasakit siyang marhay sa sainda. Kaya makulog para ki Pablo na mahiling na isinisikwal ninda an pagkahirak nin Diyos.

 5. (a) Ano an nakakapahiro sa sato na maghulit sa mga tawo? (b) Taano ta bakong makangangalas na nadidisganar kita kun minsan?

⁵ Arog ni Pablo, naghuhulit kita sa mga tawo huling udok sa puso kitang nagmamalasakit sa sainda. (Mat. 22:39; 1 Cor. 11:1) Taano? Base sa sadiri tang eksperyensiya, aram ta kun gurano kadakul kan bendisyon na makakamtan kan mga nagdedesisyon na maglingkod ki Jehova. Pag iniisip ta an mga tawo sa satong teritoryo, sinasabi ta sa satong sadiri, ‘Kun matatabangan ta lang sindang mahiling kun ano an mga napapalampas ninda!’ Kaya, padagos ta sindang dinadagka na aramon an katotoohan dapit ki Jehova asin an saiyang katuyuhan para sa katawuhan. Garo ta man sana sinasabi sa mga tawong hinuhulitan ta: ‘May magayon kaming regalo para saindo. Akua man tabi nindo.’ Kaya pag sinayumahan ninda iyan, bakong makangangalas kun makamati kita nin ‘kulog sa satong puso.’ Dai man iyan nangangahulugan na kulang an pagtubod ta kundi ipinapahiling kaiyan na dedikado kita sa gibuhon na paghuhulit. Kaya dawa kun minsan nadidisganar kita, padagos kitang nagtatagal. Mauyon an dakul sa sato sa sinabi ni Elena, na labi nang 25 taon sa pagpayunir: “Para sako, dipisil an paghuhulit. Pero dai ko iyan iriribay sa ano pa man na ibang gibuhon.”

 6. Anong hapot an pag-uulayan niyato, asin paano ta iyan masisimbag?

⁶ Taano ta makakasigurado kita na maski sain kita maghulit, puwede kitang magkaigwa nin mabungang ministeryo? Tanganing masimbag an mahalagang hapot na iyan, siyasaton niyato an duwang ilustrasyon ni Jesus na diyan tinukar niya an dapit sa pangangaipong ‘mamunga.’ (Mat. 13:23) An inot iyo an dapit sa puon nin ubas.

 7. (a) Siisay an irinerepresentar kan “paraataman,” kan “puon nin ubas,” asin kan “mga sanga”? (b) Anong hapot an gusto niyatong masimbag?

⁷ Basahon an Juan 15:1-5, 8. Risahon na sinabi ni Jesus sa mga apostol niya: “An sakuyang Ama napapamuraway kaini, na kamo padagos na namumunga nin dakul asin na pinapatunayan nindo na kamo sakuyang mga disipulo.” Sinambit ni Jesus na si Jehova “an paraataman,” na si Jesus “an tunay na puon nin ubas,” asin na an saiyang mga disipulo “an mga sanga.”b Ano man kun siring an bunga na dapat maprodusir kan mga parasunod ni Cristo? Sa ilustrasyon na ini, dai direktang sinabi ni Jesus kun ano an bungang iyan, pero nagsambit siya nin sarong mahalagang detalye na makakatabang sa sato na maaraman an simbag.

 8. (a) Sa ilustrasyon na ini, taano ta an bunga dai puwedeng nanunungod sa bagong mga disipulo? (b) Ano an sigurado niyato dapit sa mga kahagadan na itinatao ni Jehova?

⁸ Mapadapit sa saiyang Ama, sinabi ni Jesus: “An lambang sanga ko na dai namumunga pinuputol niya.” Sa ibang pagtaram, ibibilang sana kita ni Jehova na mga lingkod niya kun kita namumunga. (Mat. 13:23; 21:43) Kaya sa ilustrasyon na ini, an bunga na dapat maprodusir kan lambang Kristiyano dai puwedeng nanunungod sa bagong mga disipulo na nagkapribilehiyo kitang tabangan. (Mat. 28:19) Huling kun iyo, magigin arog kan mga sangang dai namumunga sa ilustrasyon ni Jesus an maimbod na mga Saksi na mayong nagibong bagong disipulo huling nasa teritoryo sindang bako gayong interesado an mga tawo. Pero bako nanggad tama an kongklusyon na iyan! Taano? Huling dai ta puwedeng piriton an mga tawo na magin disipulo. Kontra sa mamumuton na mga pamamaagi ni Jehova na idiskuwalipikar an saiyang mga lingkod huling dai ninda nagibo an sarong bagay na dai ninda kaya. Dai sa sato hahagadon ni Jehova an sarong bagay na aram niyang dai ta magigibo.—Deut. 30:11-14.

 9. (a) Namumunga kita paagi sa pakikikabtang sa anong aktibidad? (b) Anong ilustrasyon an pag-uulayan ta, asin taano?

⁹ Kaya, ano an bunga na dapat niyatong maprodusir? Malinaw na an bunga siguradong nanunungod sa sarong gibuhon na kayang isagibo kan lambang saro sa sato. Anong gibuhon an nagpapahiling kan ideya nin ‘pamumunga’? An paghulit kan maugmang bareta kan Kahadian nin Diyos.c (Mat. 24:14) Kinukumpirmar kan ilustrasyon ni Jesus dapit sa parasabwag an kongklusyon na ini. Pag-ulayan ta an ikaduwang ilustrasyon na ini.

10. (a) Sa ilustrasyon na ini, ano an irinerepresentar kan banhi asin kan daga? (b) Ano an ibinubunga kan sarong puon nin trigo?

¹⁰ Basahon an Lucas 8:5-8, 11-15. Sa ilustrasyon dapit sa parasabwag, an banhi iyo “an tataramon nin Diyos,” o an mensahe kan Kahadian. An daga nanunungod sa piguratibong puso nin tawo. An mga banhing nahulog sa marahay na daga nagkagamot, nagtubo, asin nagin, sabihon ta nang, puon nin trigo. Dangan, “namunga [iyan] nin tigsaranggatos.” Pero ano an ibinubunga kan sarong puon nin trigo? Nagbubunga daw iyan nin saradit na puon nin trigo? Dai, kundi nin bagong banhi, na puwedeng magin mga puon nin trigo pag-abot nin panahon. Sa ilustrasyon na ini, an sarong tipasi nin banhi na nagtubo nagbunga nin sanggatos na tipasi. Paano aplikado sa satong ministeryo an aspektong iyan kan ilustrasyon?

11. (a) Paano aplikado sa satong ministeryo an ilustrasyon dapit sa parasabwag? (b) Paano kita namumunga nin bagong banhi kan Kahadian?

¹¹ Bilang pagkumparar, sabihon tang pirang taon na an nakaagi itinukdo sa sato nin mga Saksi o kan satong Kristiyanong mga magurang an dapit sa bareta kan Kahadian. Naugmang marhay sinda huling narisa nindang igwa kitang puso na andam na mag-ako kan arog-banhing mensahe kan Kahadian. Kun paanong pinagdanay kan marahay na daga an banhi sa ilustrasyon ni Jesus, inako ta man an mensahe kan Kahadian asin pinangaptan iyan. Kaya, an arog-banhing mensahe kan Kahadian nagkagamot asin nagdakula, sabi ngani, dangan nagin puon nin trigo na pag-abot nin panahon nagin andam na man na mamunga. Asin kun paanong an puon nin trigo namumunga nin bagong banhi, bako nin bagong mga puon nin trigo, kita man namumunga nin bagong banhi kan Kahadian, bako nin bagong mga disipulo.d Paano kita namumunga nin bagong banhi kan Kahadian? Sa kada pagbalangibog niyato kan mensahe kan Kahadian sa ano man na paagi, garo ta man sana kinokopya asin iwinawarak an banhi na itinanom sa satong puso. (Luc. 6:45; 8:1) Kaya, itinutukdo sa sato kan ilustrasyon na ini na sagkod na padagos niyatong ibinabalangibog an mensahe kan Kahadian, “namumunga [kita] na may pakatagal.”

12. (a) Ano an makukua niyatong leksiyon sa mga ilustrasyon ni Jesus dapit sa puon nin ubas asin sa parasabwag? (b) Ano an epekto sa saimo kan leksiyon na iyan?

¹² Ano an makukua niyatong leksiyon sa mga ilustrasyon ni Jesus dapit sa puon nin ubas asin sa parasabwag? Natatabangan kita kaiyan na masabutan na an kakayahan niyatong mamunga dai nakadepende sa reaksiyon kan mga tawo sa satong teritoryo. Imbes, nakadepende iyan sa sato mismong kaimbudan. Sinambit ni Pablo an katotoohan na iyan kan sinabi niya: “An lambang tawo maako kan balos niya sigun sa saiyang sadiring gibo.” (1 Cor. 3:8) An balos nakadepende sa gibo, bako sa mga resulta kan gibuhon na iyan. Si Matilda, na 20 taon nang payunir, nagsabi: “Nauugma ako huling aram kong binabalusan ni Jehova an satong mga paghihinguwa.”

13, 14. Sigun sa Roma 10:1, 2, ano an mga dahilan kaya dai nagpundo si Pablo sa paghulit sa mga tawong negatibo an reaksiyon sa mensahe kan Kahadian?

¹³ Ano an makakatabang sa sato na padagos na mamunga na may pakatagal? Arog kan pinag-ulayan ta, nadisganar si Pablo sa negatibong reaksiyon kan mga Judio sa mensahe kan Kahadian. Dawa arog kaiyan, dai siya nagpundo sa paghulit sa sainda. Risahon kun ano pa an sinabi niya sa surat niya sa mga Kristiyano sa Roma dapit sa namamatian niya para sa mga Judiong idto: “Tunay nanggad na an minamawot kan sakuyang puso asin an ipinagngangayo-ngayo ko sa Diyos iyo an saindang kaligtasan. Huli ta ako makakapagpatotoo na igwa sinda nin kaigutan para sa Diyos, alagad bakong uyon sa tamang kaaraman.” (Roma 10:1, 2) Ano an idinuon ni Pablo na mga dahilan kaya nagpadagos siya sa ministeryo?

¹⁴ Inot, sinambit ni Pablo kun taano ta padagos siyang naghulit sa mga Judio. Napahiro siya kan “minamawot kan [saiyang] puso.” Mawot kan puso niya na makaligtas an nagkapira sa mga Judio. (Roma 11:13, 14) Ikaduwa, sinambit ni Pablo an ‘pagngayo-ngayo niya sa Diyos’ para sa sainda. Nakimahirak siya sa Diyos sa pamibi na tabangan an lambang Judio na akuon an mensahe kan Kahadian. Ikatulo, sinabi pa ni Pablo: “Igwa sinda nin kaigutan para sa Diyos.” Nahiling niya na may potensiyal an mga tawo na gumibo nin marahay. An kaigutan, kun nagiyahan sa tama, puwedeng makapabago sa sinserong mga indibidwal na magin maigot na disipulo ni Cristo, arog kan mismong nangyari ki Pablo.

15. Paano niyato maaarog si Pablo? Magtao nin mga halimbawa.

¹⁵ Paano ta maaarog si Pablo? Inot, hinihinguwa niyatong papagdanayon an udok sa pusong pagmawot na hanapon an siisay man na tibaad “igwang pusong nasa tamang kamugtakan para sa buhay na daing katapusan.” Ikaduwa, nagngangayo-ngayo kita ki Jehova sa pamibi na buksan an puso kan sinserong mga indibidwal. (Gibo 13:48; 16:14) Si Silvana, na haros 30 taon nang payunir, nagsabi, “Bago ko dumanan an sarong harong sa teritoryo, namimibi ako ki Jehova na tawan niya ako nin positibong sabuot.” Namimibi man kita sa Diyos na lugod giyahan kita kan mga anghel pasiring sa mga tawong sadiyosan an puso. (Mat. 10:11-13; Kap. 14:6) Nagkomento si Robert, na labi nang 30 taon sa pagpayunir, “Exciting na magtrabaho kaiba an mga anghel na nakakaaram kan mga nangyayari sa buhay kan mga kagharong.” Ikatulo, hinihinguwa niyatong hilingon an potensiyal kan mga tawo na gumibo nin marahay. Si Carl, sarong elder na nabawtismuhan labi nang 50 taon an nakaagi, nagsabi, “Naghahanap ako nin maski dikit na indikasyon na talagang sinsero an sarong tawo, halimbawa kun nagngirit siya, mabuot an hiling, o onestong naghapot.” Iyo, arog ni Pablo, puwede kitang padagos na mamunga.

16, 17. (a) Ano an manunudan niyato sa instruksiyon na nasa Parahulit 11:6? (b) Magtao nin halimbawa kun paano an satong pagsabwag puwedeng magkaigwa nin epekto sa mga nag-oobserbar sa sato.

¹⁶ Dawa kun tibaad sa hiling ta dai naaabot kan mensahe kan Kahadian an puso kan mga tawo, dai niyato dapat menuson an epekto kan satong gibuhon na pagsabwag. (Basahon an Parahulit 11:6.) Totoo, dakul an dai nagdadangog sa sato, pero inoobserbaran ninda kita. Naririsa ninda an satong mabining pagbado, pagigin magalang, asin mainamigong ngirit. Sa paglihis nin panahon, an satong marahay na paggawi puwedeng makatabang sa iba na mahiling na bako man talaga kitang arog kan tibaad iniisip ninda. Narisa ni Sergio asin Olinda, na sinambit kasubago, an arog kaiyan na pagbabago.

¹⁷ Inistorya ni Sergio: “Huling nagkahilang kami, medyo haloy-haloy kaming dai nakaduman sa puwesto mi. Pagbalik mi duman, may mga nag-aaraging naghapot samo, ‘Ano pong nangyari? Na-miss mi kamo.’” Nakangirit na sinabi ni Olinda: “May mga drayber nin bus na nagpapaypay samo tapos may pira saindang nagkukurahaw mantang nagmamaneho, ‘Ayos po an ginigibo nindo!’ Naghagad pa ngani sinda nin mga magasin ta.” Asin talagang nasurpresa an mag-agom kan may sarong lalaking naghapit sa witnessing cart ninda dangan tinawan sinda nin bukey nin burak, asin pinasalamatan sinda sa ginigibo ninda.

18. Taano ta determinado kang ‘mamunga na may pakatagal’?

¹⁸ Iyo, sagkod na ‘dai ta pinapahingaluan an satong kamot’ sa pagsabwag kan banhi kan Kahadian, igwa kita nin mahalagang kabtang sa pagtao nin “patotoo sa gabos na nasyon.” (Mat. 24:14) Urog sa gabos, igwa kita kan tunay na kagaya-gayahan huling aram niyato na inuuyunan kita ni Jehova, huling namumutan niya an gabos na “namumunga . . . na may pakatagal”!