Pahalagahan na Marhay an Saimong Pribilehiyo na Mamibi

1. Paano ta dapat mansayon an oportunidad na mamibi ki Jehova?

TINAWAN kita nin sarong magayunon na pribilehiyo—an dumulok sa Kaggibo kan langit asin daga paagi sa pamibi. Isipa na sana: puwede tang sabihon ki Jehova an laog kan satong puso ano man na oras asin sa ano man na lengguwahe, na dai kaipuhan na makipag-appointment. Puwede kitang mamibi saiya maski nakahigda kita sa ospital o nakapreso, na nagtitiwala na dadangugon kita kan satong mamumuton na Ama. Dai ta binabaliwala an pribilehiyong ini.

2. Paano ipinahiling ni Hading David na pinahalagahan niyang marhay an pribilehiyo na mamibi?

² Pinahalagahan na marhay ni Hading David an pribilehiyo na mamibi. Nagkanta siya ki Jehova: “Lugod na an sakong pamibi magin siring sa inandam na insenso sa atubangan mo.” (Sal. 141:1, 2) Kan panahon ni David, maingat na inaandam an sagradong insenso na ginagamit kan mga saserdote para sa tunay na pagsamba. (Exo. 30:34, 35) An pagsambit ni David sa insenso nagpapahiling na gusto niyang pag-isipan na marhay kun ano an sasabihon niya sa saiyang Ama sa langit. Iyan man an udok sa pusong pagmawot ta. Gusto ta na an satong mga pamibi nakakapaugma ki Jehova.

3. Ano an dapat na magin sabuot ta pag namimibi kita ki Jehova, asin taano?

³ Pag namimibi kita ki Jehova, dapat na likayan niyato an pagigin sobra kakaswal. Imbes, mamibi kita na may hararom na paggalang. Pag-isipan an manungod sa makangangalas na bisyon na ipinaabot ki Isaias, Ezekiel, Daniel, asin Juan. An mga bisyon na idto magkakaiba, pero may pagkakapareho an mga iyan. Gabos iyan ilinaladawan si Jehova bilang mamuraway na Hadi. Si Isaias, nahiling “si Jehova na nakatukaw sa sarong nakataas na trono na an kinamumugtakan halangkawon.” (Isa. 6:1-3) Si Ezekiel, nahiling si Jehova na nakatukaw sa saiyang langitnon na karwahe, na napapalibutan nin “maliwanagon na liwanag . . . na arog nin bulalangaw.” (Ezek. 1:26-28) Si Daniel, nahiling “an Suanoy kan mga Aldaw” na nakasulot nin puting gubing, asin may mga laad nin kalayo na naghahali sa Saiyang trono. (Dan. 7:9, 10) Asin si Juan, nahiling si Jehova na nakatukaw sa trono na napapalibutan nin sarong magayunon na bulalangaw na kulor berde siring sa esmeralda. (Kap. 4:2-4) Mantang hinuhurop-hurop ta an daing kaagid na kamurawayan ni Jehova, napapagirumdom kita manungod sa pambihirang pribilehiyo nin pagdulok saiya paagi sa pamibi asin sa kahalagahan kan paggibo kaiyan na may hararom na paggalang. Pero paano kita dapat mamibi?

4. Ano an manunudan ta sa pambukas na mga tataramon kan modelong pamibi na nasa Mateo 6:9, 10?

⁴ Basahon an Mateo 6:9, 10. Sa Sermon sa Bukid, itinukdo ni Jesus sa saiyang mga disipulo kun paano mamimibi sa paaging nakakapaugma sa Diyos. Pagkatapos na sabihon ni Jesus na “kun siring, mamibi kamo sa arog kaining paagi,” inot niyang sinambit an mahalagang mga bagay na direktang konektado sa katuyuhan ni Jehova: an pagpakangbanal sa Saiyang pangaran; an pag-abot kan Kahadian, na malaglag sa gabos na nagkokontra sa Diyos; asin an gigibuhon Niya sa daga saka an itatao Niyang bendisyon sa mga tawo sa maabot na panahon. Paagi sa pag-iba kan mga bagay na iyan sa satong mga pamibi, ipinapahiling ta na mahalaga sa sato an kabutan nin Diyos.

5. Angay daw na ipamibi ta an manungod sa personal na mga bagay?

⁵ Sa sunod na kabtang kan pamibi, ipinahiling ni Jesus na angay man na ipamibi an manungod sa personal na mga bagay. Puwede tang hagadon ki Jehova na tawan kita kan satong kakanon para sa bilog na aldaw, na patawadon kita sa satong mga kasalan, na protektaran kita sa mga sugot, asin na iligtas kita sa saro na maraot. (Mat. 6:11-13) Pag hinahagad ta ki Jehova an mga bagay na ini, ipinapahiling ta an satong pagsarig sa saiya asin ipinapahayag ta an satong pagmawot na kamtan an saiyang pag-uyon.

6. An mga ipinapamibi ta daw idto sanang mga bagay na espesipikong sinambit sa modelong pamibi? Ipaliwanag.

⁶ Dai inaasahan ni Jesus na eksaktong aarugon kan saiyang mga parasunod an mga tataramon sa modelong pamibi. Sa ibang mga pamibi ni Jesus, nagsambit siya nin manlain-lain na bagay na mahalaga saiya kan mga panahon na namimibi siya. (Mat. 26:39, 42; Juan 17:1-26) Arog niya, puwede man kitang mamibi nin ano man na mahalaga sa sato. Pag kaipuhan tang gumibo nin desisyon, puwede kitang mamibi para sa kadunungan asin pakasabot. (Sal. 119:33, 34) Pag pupunan ta na an sarong masakit na asignasyon, puwede kitang mamibi para sa pakasabot asin pakamansay. (Tal. 2:6) Puwedeng ipamibi kan mga magurang an saindang mga aki, puwedeng ipamibi kan mga aki an saindang mga magurang, asin gabos kita puwede nanggad na ipamibi an satong mga tinutukduan sa Bibliya saka an mga nahuhulitan ta. Siyempre, an satong mga pamibi dapat na bako sanang mga kahagadan.

7. Taano ta dapat tang umawon si Jehova sa pamibi?

⁷ Dai ta dapat paglingawan na umawon si Jehova sa satong mga pamibi. Mayo nang ibang pinakamaninigo na tawan nin pag-umaw kundi an satong Diyos. Siya “marahay asin andam na magpatawad.” Siya man “mahihirakon asin mapagmalasakit, dai tulos naaanggot asin abunda sa maimbod na pagkamuot saka kaimbudan.” (Sal. 86:5, 15) May marahayon nanggad kitang dahilan para umawon si Jehova huli sa kun anong klaseng Diyos siya asin huli sa mga ginigibo niya.

8. Ano an nagkapirang bagay na puwede tang ipagpasalamat ki Jehova? (Salmo 104:12-15, 24)

⁸ Apuwera sa pag-umaw ki Jehova sa satong mga pamibi, napapahiro man kitang pasalamatan siya huli sa marahayon na mga bagay na itinatao niya. Halimbawa, puwede ta siyang pasalamatan huli sa magagayon na kulor na nahihiling ta sa mga burak, sa kadakul na manlain-lain na masisiram na kakanon, asin sa pagkaigwa nin nakakaugmang pag-iribanan bilang dayupot na mag-aramigo. Itinatao kan satong mamumuton na Ama an mga bagay na ini asin an dakul na iba pa, para sana magin maugma kita. (Basahon an Salmo 104:12-15, 24.) An mas importante, pinapasalamatan ta si Jehova sa abundang espirituwal na kakanon na itinatao niya asin sa marahayon na paglaom na igwa kita para sa maabot na panahon.

9. Ano an puwedeng makatabang sato para magirumduman tang pasalamatan si Jehova? (1 Tesalonica 5:17, 18)

⁹ Puwedeng madalion sanang malingawan na pasalamatan si Jehova sa gabos na bagay na ginigibo niya para sa sato. Ano an makakatabang saimo para magirumduman iyan? Puwede kang gumibo nin sarong lista nin espesipikong mga hinagad mo sa pamibi asin sa pana-panahon hilingon an lista para mahiling kun paano iyan sinimbag ni Jehova. Dangan pasalamatan siya paagi sa pamibi para sa tabang na itinao niya saimo. (Basahon an 1 Tesalonica 5:17, 18.) Pag-isipan ini: Nauugma kita asin namamati tang pinapahalagahan kita pag pinapasalamatan kita nin iba. Siring man, nauugma si Jehova pag nagigirumduman tang pasalamatan siya huling sinimbag niya an satong mga pamibi. (Col. 3:15) Alagad, ano an saro pang importanteng dahilan na pasalamatan an satong Diyos?

10. Sigun sa 1 Pedro 2:21, taano ta may dahilan kitang pasalamatan si Jehova sa pagsugo niya ki Jesus digdi sa daga?

¹⁰ Basahon an 1 Pedro 2:21. Dapat tang pasalamatan si Jehova sa pagsugo niya kan saiyang namumutan na Aki para tukduan kita. Pag pinag-aadalan ta an buhay ni Jesus, dakulon kitang nanunudan manungod ki Jehova asin kun paano siya mapapaugma. Kun nagpapahiling kita nin pagtubod sa atang ni Cristo, magkakaigwa kita nin dayupot asin personal na relasyon sa Diyos na Jehova asin kakamtan ta an pakipagkatuninungan sa Saiya.—Roma 5:1.

11. Ano an papel ni Jesus sa satong mga pamibi ki Jehova?

¹¹ Nagpapasalamat kita ki Jehova ta puwede kitang mamibi saiya paagi sa saiyang Aki. Si Jesus an paagihan na ginagamit ni Jehova para itao sa sato an satong mga kahagadan. Dinadangog asin sinisimbag ni Jehova an mga pamibi na ipinapahayag sa ngaran ni Jesus. Ipinaliwanag ni Jesus: “Ano man na hagadon nindo sa ngaran ko, gigibuhon ko iyan, tanganing an Ama mapamuraway paagi sa Aki.”—Juan 14:13, 14.

12. Ano an saro pang dahilan na pasalamatan si Jehova para sa saiyang Aki?

¹² Pinapatawad ni Jehova an satong mga kasalan basado sa atang na pantubos ni Jesus. Ilinaladawan kan Kasuratan si Jesus bilang an satong “halangkaw na saserdote [na nakatukaw] sa may tuo kan trono kan Kamahalan sa kalangitan.” (Heb. 8:1) Si Jesus an satong “paratabang na kaibanan kan Ama.” (1 Juan 2:1) Nagpapasalamat nanggad kita ki Jehova na itinao niya sa sato an sarong madinamayon na Halangkaw na Saserdote na nasasabutan an satong mga kaluyahan asin “nakikiulay . . . para sa sato”! (Roma 8:34; Heb. 4:15) Bako kitang mga perpektong tawo, kaya kun bakong dahil sa atang ni Jesus dai kita makakadulok ki Jehova sa pamibi. Daing duda na mauyon ka na nungka tang lubos na maipapahayag an satong pasasalamat sa mahalagang marhay na regalo na itinao ni Jehova sa sato—an pagtao niya kan saiyang namumutan na Aki!

13. Kan banggi bago magadan si Jesus, paano niya ipinahiling na namumutan niya an saiyang mga disipulo?

¹³ Kan banggi bago magadan si Jesus, namibi siya nin halawig para sa saiyang mga disipulo, na hinahagad sa saiyang Ama na “bantayan . . . sinda dahil sa saro na maraot.” (Juan 17:15) Mamumuton nanggad si Jesus! Madali nang atubangon ni Jesus an masakit na pagbalo sa saiya; pero, inisip pa man giraray niya an kapakanan kan saiyang mga apostol.

14. Paano ta maipapahiling na namumutan ta an satong mga tugang?

¹⁴ Bilang pag-arog ki Jesus, dai kita nagpopokus sa sadiri ta sanang mga pangangaipo. Imbes, pirmi tang ipinapamibi an satong mga tugang. Pag ginigibo ta iyan, sinusunod ta an pagbuot ni Jesus na kamutan an lambang saro asin ipinapahiling ta ki Jehova kun gurano ta namumutan an satong mga kapagtubod. (Juan 13:34) An pagpamibi para sa satong mga tugang bakong pagsayang nin panahon. Sinasabi sa sato kan Tataramon nin Diyos na “an pagngayo-ngayo na ginigibo nin sarong matanos igwa nin dakulang epekto.”—Sant. 5:16.

15. Taano ta kaipuhan kan satong mga kapwa parasamba an mga pamibi ta?

¹⁵ Kaipuhan kan satong mga kapwa parasamba an mga pamibi ta huling nag-aagi sinda nin dakul na kasakitan. Puwede tang hagadon ki Jehova na tabangan sinda na tagalan an hilang, natural na kalamidad, giyera, persekusyon, o iba pang mga kadipisilan. Puwede ta man na ipamibi an satong mapagsakripisyong mga tugang na nagtatabang sa pagtao nin ayuda sa mga nangangaipo. Tibaad may mga kamidbid ka na nag-aagi nin siring na mga kadipisilan. Puwede mo daw sambiton an saindang mga pangaran sa saimong personal na mga pamibi? Ipinapahiling ta an satong tunay na pagkamuot sa mga tugang paagi sa paghagad ki Jehova na tabangan sindang magtagal.

16. Taano ta dapat tang ipamibi an mga nanginginot sa sato?

¹⁶ Pinapahalagahan na marhay kan mga nanginginot sa kongregasyon pag ipinapamibi sinda kan iba asin nakikinabang sinda diyan. Totoong-totoo iyan ki apostol Pablo. Nagsurat siya: “Ipamibi man nindo ako, na lugod itao sa sako an mga tataramon pag ibinuka ko an sakuyang nguso, tanganing makapagtaram ako nin may kusog nin buot mantang ipinapahayag ko an sagradong hilom kan maugmang bareta.” (Efe. 6:19) Ngunyan, dakul man kitang mahihigos na brother na nanginginot sa sato. Ipinapahiling ta na namumutan ta sinda paagi sa paghagad ki Jehova na bendisyunan an saindang mga ginigibo.

17-18. Sa anong mga pagkakataon tibaad pakiulayan kitang mamibi para sa iba, asin ano an dapat tang girumdumon?

¹⁷ Kun minsan, pinapakiulayan kita na mamibi para sa iba. Halimbawa, puwedeng pakiulayan kan sister na nagkokondukta nin pag-adal sa Bibliya an sister na kaiba niya para iyo an mamibi. Tibaad dai pa gayong midbid kan kaibanan na sister an tinutukduan, kaya puwedeng mas gusto niya na siya an mamibi sa pagtatapos kan pag-adal. Paagi kaiyan, mas maibabagay niya an saiyang pamibi sa pangangaipo kan tinutukduan.

¹⁸ Puwedeng pakiulayan an sarong brother na mamibi sa pagtiripon bago maglingkod sa langtad o sa pagtiripon kan kongregasyon. Dapat na girumdumon kan mga brother na igwa kan pribilehiyong iyan an katuyuhan kan pagtiripon. Dai dapat gamiton an pamibi para magtao nin konseho sa kongregasyon o magpaabot nin mga paisi. Sa mga pagtiripon kan kongregasyon, limang minuto an itinagama para sa kanta asin pamibi, kaya an mga brother na nanginginot sa pamibi dai kaipuhan na ‘kadakul kan pigtataram’ lalo na sa pagpupuon kan pagtiripon.—Mat. 6:7.

19. Ano an makakatabang sa sato tanganing magin andam sa aldaw nin paghukom ni Jehova?

¹⁹ Mantang paparani kita sa aldaw nin paghukom ni Jehova, mas kinakaipuhan tang gibuhon na priyoridad sa satong buhay an pagpamibi. Manungod digdi, sinabi ni Jesus: “Kaya, magdanay kamong mata, na nagngangayo-ngayo sa gabos na oras tanganing makadulag kamo sa gabos na bagay na ini na kaipuhan mangyari.” (Luc. 21:36) Iyo, an pirming pagpamibi makakatabang sa sato na magdanay na mata sa espirituwal tanganing dai kita maabutan na bakong andam sa aldaw nin paghukom nin Diyos.

20. Paano nagigin siring sa mahamuton na insenso an satong mga pamibi?

²⁰ Ano an napag-ulayan niyato? Pinapahalagahan tang marhay an satong pribilehiyo na mamibi. An panginot na pokus kan satong mga pamibi dapat manungod sa mga bagay na direktang konektado sa katuyuhan ni Jehova. Ipinapahayag ta man an satong pasasalamat para sa Aki nin Diyos asin sa saiyang pamamahala sa Kahadian, saka ipinapamibi ta an satong mga kapwa parasamba. Asin siyempre, puwede ta man ipamibi an satong pisikal asin espirituwal na mga pangangaipo. Pag pinag-iisipan tang marhay kun ano an sasabihon ta sa satong mga pamibi, ipinapahiling ta na pinapahalagahan tang marhay an magayunon na pribilehiyong ini. An satong mga tataramon magigin siring sa mahamuton na insenso ki Jehova—na “nakakapaugma sa Saiya.”—Tal. 15:8.