LEKSIYON 18
Kun Paano Mamimidbid an Tunay na mga Kristiyano
Binilyon an nagsasabi na mga Kristiyano sinda. Pero iba-iba an mga paniniwala ninda. Iba-iba man an saindang mga pamantayan sa buhay. Kaya paano ta mamimidbid an tunay na mga Kristiyano?
1. Siisay an tunay na mga Kristiyano?
An mga Kristiyano mga disipulo, o parasunod, ni Jesu-Cristo. (Basahon an Gibo 11:26.) Paano ninda pinapatunayan na mga disipulo sinda ni Jesus? Sinabi ni Jesus: “Kun magdadanay kamo sa sakuyang tataramon, kamo talaga an sakuyang mga disipulo.” (Juan 8:31) Buot sabihon, an tunay na mga Kristiyano nagsusunod sa mga itinukdo ni Jesus. Kun paanong ibinase ni Jesus sa Kasuratan an saiyang mga itinukdo, ibinabase man sa Bibliya kan tunay na mga Kristiyano an saindang mga paniniwala.—Basahon an Lucas 24:27.
2. Paano nagpapahiling nin pagkamuot an tunay na mga Kristiyano?
Sinabi ni Jesus sa saiyang mga parasunod: “Kamutan nindo an lambang saro arog kan pagkamuot ko sa saindo.” (Juan 15:12) Paano ipinahiling ni Jesus na namumutan niya an saiyang mga disipulo? Nagtao siya nin panahon para makaibanan sinda, pinakusog sinda, asin tinabangan sinda. Itinao pa ngani niya an saiyang buhay para sa sainda. (1 Juan 3:16) Arog ni Jesus, dai sana itinutukdo kan tunay na mga Kristiyano ngunyan na dapat magpahiling nin pagkamuot. Pinapatunayan ninda na namumutan ninda an lambang saro paagi sa tataramon asin gibo.
3. Sa anong gibuhon sibot an tunay na mga Kristiyano?
Tinawan ni Jesus nin gibuhon an saiyang mga disipulo. “Isinugo niya sinda na ihulit an Kahadian nin Diyos.” (Lucas 9:2) Naghulit an inot na mga Kristiyano bako lang sa saindang mga lugar nin pagsamba kundi pati man sa iba pang pampublikong mga lugar saka sa harong-harong. (Basahon an Gibo 5:42; 17:17.) Arog man kaiyan an tunay na mga Kristiyano ngunyan. Ihinuhulit ninda an mga katotoohan sa Bibliya sain man may tawo. Namumutan ninda an saindang kapwa, kaya maugma nindang ginagamit an saindang panahon asin kusog para sabihon sa iba an mensahe kan Bibliya na nagtatao nin paglaom asin pampakusog.—Marcos 12:31.
ARAMON PA
Aramon an pagkakaiba kan tunay na mga Kristiyano sa mga tawong dai nagsusunod sa mga itinukdo saka halimbawa ni Jesus.
4. Sinisiyasat ninda an mga katotoohan sa Bibliya
An inot na mga Kristiyano may pagpapahalaga sa Tataramon nin Diyos
Bako gabos na nagsasabing Kristiyano sinda nagpapahalaga sa mga katotoohan sa Bibliya. I-play an VIDEO, dangan pag-ulayan an hapot.
Ano an ginibo kan mga relihiyon na naghihingakong Kristiyano kaya dai nanudan kan mga tawo an mga itinukdo ni Jesus?
Itinukdo ni Jesus an katotoohan hali sa Tataramon nin Diyos. Basahon an Juan 18:37, dangan pag-ulayan an hapot na ini:
Uyon ki Jesus, paano ta mabibisto an mga Kristiyano na “nasa kampi kan katotoohan”?
5. Itinutukdo ninda an katotoohan sa Bibliya
An inot na mga Kristiyano naghuhulit sa iba
Bago magsakat sa langit, tinawan ni Jesus an saiyang mga parasunod nin sarong gibuhon na nagpapadagos sagkod ngunyan. Basahon an Mateo 28:19, 20 asin Gibo 1:8, dangan pag-ulayan an hapot na ini:
Sagkod nuarin asin magigin gurano kahiwas an gibuhon na paghuhulit?
6. Isinasabuhay ninda an itinutukdo ninda
Taano ta kumbinsido an sarong lalaki na an pangaran Tom na nahanap na niya an tunay na mga Kristiyano? I-play an VIDEO, dangan pag-ulayan an mga hapot.
Sa video, taano ta nawaran na nin gana si Tom sa relihiyon?
Taano ta kumbinsido siya na nakua na niya an katotoohan?
Mas mahihiling sa mga ginigibo mo kun siisay ka talaga kisa sa mga sinasabi mo. Basahon an Mateo 7:21, dangan pag-ulayan an hapot na ini:
Para ki Jesus, ano an mas importante—an pigsasabi tang pigtutubudan ta o an ginigibo ta?
7. Namumutan ninda an lambang saro
An inot na mga Kristiyano namumutan an lambang saro
Talaga daw na isasakripisyo kan mga Kristiyano an saindang buhay para sa mga kapwa ninda Kristiyano? I-play an VIDEO, dangan pag-ulayan an mga hapot.
Sa video, handa si Brother Likhwide na itao an saiyang buhay para ki Brother Johansson. Ano an nagpahiro saiya na gibuhon iyan?
Sa hiling mo, an ginibo daw niya patunay na saro siyang tunay na Kristiyano?
Basahon an Juan 13:34, 35, dangan pag-ulayan an mga hapot na ini:
Paano tinatrato kan mga disipulo ni Jesus (kan tunay na mga Kristiyano) an mga tawo na iba an lahi o nasyonalidad?
Paano ninda iyan ipinapahiling pag may giyera?
MAY MGA NAGSASABI: “Parareho man kitang Kristiyano. Saro man lang an Diyos na tinutubod ta.”
Anong teksto an puwede mong basahon para ipahiling kun paano ta maaaraman kun siisay an tunay na mga Kristiyano?
SUMARYO
Sinusunod kan tunay na mga Kristiyano an sinasabi kan Bibliya, nagpapahiling nin mapagsakripisyong pagkamuot, asin ihinuhulit an mga katotoohan sa Bibliya.
Rebyu
Sain ibinabase kan tunay na mga Kristiyano an saindang mga paniniwala?
Anong kuwalidad an nagpapamidbid sa tunay na mga Kristiyano?
Sa anong trabaho sibot an tunay na mga Kristiyano?
HILINGON MAN
Aramon pa an manungod sa organisasyon na naghihinguwang sunudon an halimbawa saka mga itinukdo ni Jesu-Cristo.
Aramon kun paano nanumpungan nin sarong dating madre an tunay na espirituwal na pamilya.
“Ginamit Ninda an Bibliya sa Pagsimbag sa Kada Hapot!” (An Torrengbantayan, Mayo-Hunyo 2014)
Aramon kun paano ipinapahiling kan tunay na mga Kristiyano an saindang pagkamuot sa mga kapwa parasamba na nangangaipo nin tabang.
Pagtabang sa Satong mga Tugang Pag May mga Kalamidad—Excerpt (3:57)
Aramon kun paano inaarog kan tunay na mga Kristiyano ngunyan an mga Kristiyano kan inot na siglo na nagpapatunay na talagang mga parasunod sinda ni Jesus.
“Ano ang mga Pagkakakilanlan ng Tunay na Kristiyano?” (Ang Bantayan, Marso 1, 2012)