Hapot Hali sa mga Parabasa

Pag-isipan kun ano an simbag diyan kan Bibliya.

Sinasabi sa sato kan Gibo 24:15 na “bubuhayon liwat . . . an mga matanos pati an mga bakong matanos.” An mga matanos iyo idtong nagin makinuyog sa Diyos bago sinda nagadan, kaya nakasurat sa libro nin buhay an saindang pangaran. (Mal. 3:16) Kaiba sa mga bakong matanos an mga nagadan na dai nagkaigwa nin igong oportunidad na makanuod manungod ki Jehova, kaya dai nakasurat sa libro nin buhay an saindang pangaran.

Sinambit sa Juan 5:28, 29 an iyo man sanang duwang grupo na sinambit sa Gibo 24:15. Sinabi ni Jesus na “idtong mga naggiribo nin marahay” maruluwas pasiring sa “pagkabuhay liwat para sa buhay, asin idtong mga naggiribo nin karatan pasiring sa pagkabuhay liwat para sa paghukom.” An mga matanos naggiribo nin marahay bago sinda nagadan. Maruluwas sinda pasiring sa pagkabuhay liwat para sa buhay huling an pangaran ninda nakasurat pa man giraray sa libro nin buhay. Alagad, an mga bakong matanos naggiribo nin karatan bago sinda nagadan. Maruluwas sinda pasiring sa pagkabuhay liwat para sa paghukom. An saindang pangaran dai pa nakasurat sa libro nin buhay, asin mapapasairarom sinda sa sarong peryodo nin paghukom, o maingat sindang susubaybayan para testingon. Sa panahon na iyan, magkakaoportunidad sinda na makanuod manungod ki Jehova asin na maisurat an saindang pangaran sa libro nin buhay.

Ipinapaliwanag kan Kapahayagan 20:12, 13 na an gabos na binuhay liwat kakaipuhanon na sunudon an “mga nakasurat sa mga rolyo,” an buot sabihon, an bagong mga pagbuot na ipapautob sa bagong kinaban. An mga dai nagsusunod lalaglagon.—Isa. 65:20.

Ihinula kan Daniel 12:2 na an nagkapira sa mga nagtuturog sa kagadanan mamata “pasiring sa daing katapusan na buhay asin an iba pa pasiring sa kasusupgan saka sa daing katapusan na katuyawan.” Sinasambit kan bersikulong ini an pangultimong paghukom sa mga binuhay liwat—magsalang “daing katapusan na buhay” o “daing katapusan na katuyawan.” Kaya sa katapusan kan 1,000 taon, may mga tatawan nin buhay na daing katapusan asin an iba lalaglagon sagkod lamang.—Kap. 20:15; 21:3, 4.

Pag-isipan an sarong ilustrasyon. An sitwasyon kan duwang grupong binuhay liwat puwedeng iagid sa mga dayuhan na gustong mag-istar sa ibang nasyon. An mga matanos garo idtong mga tinawan nin work visa o resident visa na nagtatao sainda maski paano nin pagmidbid kan gobyerno asin nin katalingkasan. Sa kabaliktaran, an mga bakong matanos garo idtong mga dayuhan na tinawan nin temporary visa o visitor’s visa. Kaipuhan ngunang patunayan kan mga dayuhan na iyan na maninigo sindang tugutan na padagos na mag-istar sa linipatan nindang nasyon. Sa kaagid na paagi, kaipuhan kan binuhay liwat na mga bakong matanos na sunudon an mga pagbuot ni Jehova asin patunayan na matanos sinda tanganing magdanay sinda sa Paraiso. Asin ano man na visa an sa primero itao sa mga dayuhan pagkalaog ninda sa ibang nasyon, pag-abot nin panahon, an nagkapira sa sainda tibaad tugutan nang magin siyudadano mantang an iba tibaad ideportar. An resulta ibabasar sa ugali saka paggawi ninda sa linipatan nindang nasyon. Sa kaagid na paagi, an pangultimong paghukom para sa gabos na binuhay liwat na iyan madepende sa kaimbudan saka paggawi ninda sa bagong kinaban.

Si Jehova bako lang Diyos nin pagkamuot kundi Diyos man nin hustisya. (Deu. 32:4; Sal. 33:5) Ipapahiling niya an saiyang pagkamuot paagi sa pagbuhay liwat sa mga matanos siring man sa mga bakong matanos. Kasabay kaiyan, papagdanayon niya an saiyang halangkaw na mga pamantayan sa kun ano an tama asin sala. Idto sanang mga namumuot sa saiya saka namumuhay kauyon kan saiyang matanos na mga pamantayan an tutugutan na padagos na mabuhay sa bagong kinaban.