LEKSIYON 54
An Papel kan “Maimbod Asin Mapagmansay na Uripon”
Si Jesus an Payo kan Kristiyanong kongregasyon. (Efeso 5:23) Mantang nasa langit, ginigiyahan ngunyan ni Jesus an saiyang mga parasunod digdi sa daga paagi sa sarong “maimbod asin mapagmansay na uripon.” (Basahon an Mateo 24:45.) Si Jesu-Cristo mismo an nagnombra sa “uripon” asin tinawan iyan nin deretso na gumibo nin partikular na mga desisyon. Pero dapat man giraray na magsunod ki Cristo an uripon na iyan asin paglingkudan an mga tugang ni Cristo. Siisay an uripon na iyan? Paano kita inaataman kan uripon?
1. Siisay “an maimbod asin mapagmansay na uripon”?
Puon pa kaidto, naggagamit na si Jehova nin sarong lalaki o sadit na grupo nin mga lalaki para magtao nin instruksiyon sa saiyang mga lingkod. (Malakias 2:7; Hebreo 1:1) Pagkagadan ni Jesus, an mga apostol asin kamagurangan sa Jerusalem an nanginot sa gibuhon. (Gibo 15:2) Bilang pagsunod sa arugan na iyan, igwa man ngunyan nin sarong sadit na grupo nin mga elder—an Namamahalang Grupo kan mga Saksi ni Jehova—na nagtatao nin espirituwal na pagkakan asin nanginginot sa gibuhon na paghuhulit. Sinda “an maimbod asin mapagmansay na uripon na ninombrahan [ni Jesus].” (Mateo 24:45a) An gabos na miyembro kan Namamahalang Grupo mga Kristiyanong linahidan kan banal na espiritu, na inaantisipar na makaibanan si Cristo sa pamamahala sa saiyang Kahadian sa langit pag natapos na an saindang buhay digdi sa daga.
2. Anong espirituwal na pagkakan an itinatao kan maimbod na uripon?
Sinabi ni Jesus na an maimbod na uripon an ‘matao sa [mga kapwa ninda Kristiyano] kan saindang kakanon sa tamang panahon.’ (Mateo 24:45b) Kun paanong an kakanon na kinakakan ta nakakatabang sa sato na magin makusog asin dai magkahilang, an espirituwal na pagkakan man—an mga instruksiyon na nasa Tataramon nin Diyos—nagtatao sa sato nin kusog na kaipuhan ta tanganing magdanay na maimbod ki Jehova asin magibo an trabahong ipinapagibo sa sato ni Jesus. (1 Timoteo 4:6) Nag-aako kita kan espirituwal na pagkakan na iyan paagi sa mga pagtiripon, asembleya, kumbensiyon, pati man sa basado sa Bibliyang mga babasahon asin video na nakakatabang sa sato na masabutan an kabutan nin Diyos asin mapakusog an satong relasyon sa saiya.
ARAMON PA
Aramon kun taano ta kaipuhan ta “an maimbod asin mapagmansay na uripon”—an Namamahalang Grupo.
An Namamahalang Grupo nagtatao nin espirituwal na pagkakan, instruksiyon, asin praktikal na tabang sa mga Saksi ni Jehova sa bilog na kinaban
3. An mga lingkod ni Jehova dapat na magin organisado
Sa paggiya ni Jesus, inoorganisar kan Namamahalang Grupo an gibuhon kan mga Saksi ni Jehova. Giniyahan man ni Jesus an mga Kristiyano kan inot na siglo sa arog kaiyan na paagi. I-play an VIDEO.
Basahon an 1 Corinto 14:33, 40, dangan pag-ulayan an hapot na ini:
Paano ipinapahiling kan mga bersikulong ini na gusto ni Jehova na magin organisado an saiyang mga Saksi?
4. Inoorganisar kan maimbod na uripon an satong gibuhon na paghuhulit
An paghuhulit an pinakaimportanteng gibuhon na ginibo kan inot na mga Kristiyano. Basahon an Gibo 8:14, 25, dangan pag-ulayan an mga hapot na ini:
Siisay an nagtatao nin instruksiyon sa mga Kristiyano kan inot na siglo sa gibuhon na paghuhulit?
Ano an ginibo ni Pedro asin Juan kan tawan sinda nin instruksiyon kan saindang mga kapwa apostol?
An paghuhulit an pinakaimportanteng gibuhon na inoorganisar kan Namamahalang Grupo. I-play an VIDEO.
Idinuon ni Jesus kun gurano kahalaga kan paghuhulit. Basahon an Marcos 13:10, dangan pag-ulayan an mga hapot na ini:
Taano ta mahalagang marhay para sa Namamahalang Grupo an gibuhon na paghuhulit?
Taano ta kaipuhan ta “an maimbod asin mapagmansay na uripon” sa pag-organisar kan pambilog na kinaban na gibuhon na ini?
5. An maimbod na uripon nagtatao nin mga instruksiyon
An Namamahalang Grupo nagtatao nin mga instruksiyon sa mga Kristiyano sa bilog na kinaban. Paano sinda nagdedesisyon kun ano an itataong mga instruksiyon? Pag-isipan kun paano iyan ginibo kan namamahalang grupo kan mga Kristiyano kan inot na siglo. Basahon an Gibo 15:1, 2, dangan pag-ulayan an mga hapot na ini:
Anong isyu an nagkawsa nin pagkabaranga sa nagkapirang Kristiyano kan inot na siglo?
Para maresolberan an isyung iyan, kiisay nagdulok si Pablo, Bernabe, asin an iba pang Kristiyano?
Basahon an Gibo 15:12-18, 23-29, dangan pag-ulayan an hapot na ini:
Bago magdesisyon, ano an ginibo kan namamahalang grupo kan inot na siglo para makua an paggiya kan Diyos manungod sa isyu?—Hilingon an bersikulo 12, 15, saka 28.
Basahon an Gibo 15:30, 31 asin 16:4, 5, dangan pag-ulayan an mga hapot na ini:
Ano an nagin reaksiyon kan inot na mga Kristiyano sa instruksiyon na itinao kan namamahalang grupo?
Paano binendisyunan ni Jehova an saindang pagigin masinunod?
Basahon an 2 Timoteo 3:16 asin Santiago 1:5, dangan pag-ulayan an hapot na ini:
Sa ngunyan, sain nagkukua nin giya an Namamahalang Grupo pag naggigibo nin mga desisyon?
MAY MGA NAGSASABI: “Kun nagsusunod kamo sa sinasabi kan Namamahalang Grupo, di tawo man sana an pigsusunod nindo.”
Ano an nakakumbinsir sa saimo na ginigiyahan ni Jesus an Namamahalang Grupo?
SUMARYO
An Namamahalang Grupo iyo “an maimbod asin mapagmansay na uripon” na ninombrahan ni Cristo. Iyan an nagtatao nin mga instruksiyon asin espirituwal na pagkakan sa mga Kristiyano sa bilog na kinaban.
Rebyu
Siisay an nagnombra sa “maimbod asin mapagmansay na uripon”?
Paano kita inaataman kan Namamahalang Grupo?
Kumbinsido ka daw na an Namamahalang Grupo iyo “an maimbod asin mapagmansay na uripon”?
HILINGON MAN
Aramon kun paano an pagkaorganisar kan Namamahalang Grupo para maisagibo an trabaho ninda.
“Ano an Namamahalang Grupo kan Mga Saksi ni Jehova?” (Artikulo sa jw.org/bcl)
Aramon kun paano sinisigurado kan Namamahalang Grupo na an nareresibi tang espirituwal na pagkakan tama asin mapagtitiwalaan.
Ano an namamatian kan mga miyembro kan Namamahalang Grupo sa gibuhon na inasignar sa sainda ni Jesus?
Paano mahihiling sa satong mga pagtiripon asin kumbensiyon na talagang ginigiyahan ni Jehova an Namamahalang Grupo?