Kun Paano Magigin Andam sa Bawtismo

1-2. Kun dai ka pa andam na magpabawtismo, taano ta dai ka dapat madisganar? (Hilingon an ritrato sa cover.)

KUN iniisip mo nang magpabawtismo, sarong marahayon na pasuhan an gusto mong maabot. Handa ka na daw na gibuhon an lakdang na iyan? Kun sa hiling mo iyo na saka uyon an mga elder, dai mag-alangan na magpabawtismo sa sunod na may pagkakataon. Sarong maugmahon na buhay sa paglilingkod ki Jehova an naghahalat sa saimo.

² Sa ibong na lado, sinabi daw saimo na kaipuhan mong gumibo nin urog na pag-uswag bago magpabawtismo? O nahihiling mo daw mismo iyan sa sadiri mo? Kun iyo, dai ka madisganar. Puwede kang umuswag tanganing magibo an importanteng lakdang na iyan, ika man hoben o may edad na.

3. Ano an ihinapot ki Felipe kan Etiope na opisyal nin palasyo, asin anong hapot an minabangon? (Gibo 8:36, 38)

³ Basahon an Gibo 8:36, 38. Sarong opisyal nin palasyo na haling Etiopia an naghapot ki Felipe na ebanghelisador: “Ano an nakakaulang sa sako para mabawtismuhan?” Gusto kan lalaking Etiope na mabawtismuhan. Pero handa na daw talaga siya para sa importanteng lakdang na iyan?

4. Paano ipinahiling kan Etiope na determinado siyang padagos na makanuod?

⁴ An Etiope “nagduman . . . sa Jerusalem tanganing sumamba.” (Gibo 8:27) Kaya siguradong saro siyang Judiong proselito; nakumbertir siya sa Judaismo. Daing duda na nakanuod siya manungod ki Jehova hali sa sagradong mga kasuratan kan Hebreong Kasuratan. Pero gustong-gusto niyang makanuod pa. Sa katunayan, kan manumpungan ni Felipe sa tinampo an opisyal na iyan, ano an nahiling ni Felipe na ginigibo kan lalaki? Binabasa niya an rolyo kan mga isinurat ni propeta Isaias. (Gibo 8:28) Matagas na espirituwal na kakanon iyan. Dai kontento an opisyal nin palasyo na manudan an pira sanang panginot na katukduan; gusto niyang padagos na makanuod.

5. Ano an ginibo kan Etiope sa nanudan niya?

⁵ An lalaki sarong halangkaw na opisyal ni Reyna Candace kan Etiopia; “siya an namamahala sa gabos na kayamanan kan reyna.” (Gibo 8:27) Kaya siguradong saro siyang sibot na tawo na may dakul na responsabilidad. Minsan siring, nagtao siya nin panahon para magsamba ki Jehova. Dai siya kontento na pag-adalan lang an katotoohan; inaplikar niya an nanudan niya. Kaya nagbiyahe siya hali pang Etiopia tanganing sumamba ki Jehova sa templo sa Jerusalem. Siguradong nangaipo nin dakul na panahon asin kuwarta an pagbiyaheng iyan, pero andam an lalaki na gumibo nin ano man na paghihinguwa para sumamba ki Jehova.

6-7. Paano padagos na nagtalubo an pagkamuot kan Etiope ki Jehova?

⁶ Nanudan kan Etiope ki Felipe an nagkapirang mahalagang marhay na bagong katotoohan, kaiba na an midbidan kan Mesiyas. (Gibo 8:34, 35) Siguradong naugma an opisyal na ini nin palasyo na maaraman an ginibo ni Jesus para saiya. Ano an ginibo kan Etiope? Puwede kutang nagdanay na lang siya kun ano siya, sarong respetadong Judiong proselito. Pero dai, huling padagos na nagtalubo an pagkamuot niya ki Jehova saka sa Saiyang Aki. Napahiro siya na gumibo nin mahalagang marhay na desisyon na magpabawtismo bilang sarong parasunod ni Jesu-Cristo. Huling nahiling ni Felipe na andam na an lalaki, binawtismuhan niya siya.

⁷ Kun aarugon mo an halimbawa kan Etiopeng iyan, magigin andam ka man na magpabawtismo. Masasabi mo man nin may lubos na kumpiyansa, “Ano an nakakaulang sa sako para mabawtismuhan?” Pag-ulayan ta kun paano mo magigibo an kaparehong mga lakdang na ginibo niya: Padagos siyang nag-adal, huminiro kauyon kan nanudan niya, asin padagos na pinatalubo an saiyang pagkamuot sa Diyos.

8. Ano an sinasabi kan Juan 17:3 na kaipuhan mong gibuhon?

⁸ Basahon an Juan 17:3. Nakatabang daw saimo an mga tataramon na ini ni Jesus para magdesisyon kang mag-adal nin Bibliya? Totoo iyan para sa dakul sa sato. Pero sinasabi man daw sa sato kan mga tataramon na iyan na padagos na mag-adal? Iyo. Nungka kitang mapundo sa ‘pagmidbid sa iyo sanang tunay na Diyos.’ (Ecl. 3:11) Sa bilog na panahon na daing sagkod, padagos kitang makakanuod. Mantang mas nakakanuod kita, mas napaparani man kita ki Jehova.—Sal. 73:28.

9. Ano an kaipuhan tang gibuhon pagkatapos na makanuod kan panginot na mga katukduan sa Bibliya?

⁹ Siyempre, an pag-adal manungod ki Jehova nagpupuon sa panginot na mga katukduan. Sa saiyang surat sa mga Hebreo, sinambit ni apostol Pablo an panginot na mga katukduan na iyan bilang an “pundamental na mga bagay.” Dai niya minemenos “an pundamental na doktrina”; ikinumparar niya iyan sa gatas na nagpapakusog sa sarong umboy. (Heb. 5:12; 6:1) Pero sinadol niya man an gabos na Kristiyano na padagos pang makanuod bako lang kan panginot na mga katukduan kundi pati man kan harararom na katotoohan kan Tataramon nin Diyos. Nagkaigwa ka daw nin makusog na pagmawot na makanuod kan mas harararom na mga katukduan kan Bibliya? Gusto mo daw na padagos pang umuswag, na padagos na makanuod manungod ki Jehova asin sa saiyang katuyuhan?

10. Taano ta dipisil para sa nagkapira na mag-adal?

¹⁰ Minsan siring, dakul sa sato an nadidipisilan sa pag-adal. Iyo ka man daw? Sa eskuwelahan, nakanuod ka daw na magbasa asin mag-adal na marhay? Nag-enjoy ka daw sa pag-adal asin nakanuod na marhay? O nasabi mo daw sa sadiri mo na bako ka talagang mahusay sa pag-adal nin mga libro? Kun iyo, dai ka nagsosolo. Minsan siring, puwede kang tabangan ni Jehova. Perpekto siya asin siya an pinakamahusay na Paratukdo.

11. Paano ipinapahiling ni Jehova na siya an “Pinakanangungurog na Instruktor”?

¹¹ Inaapod ni Jehova an saiyang sadiri bilang “saimong Pinakanangungurog na Instruktor.” (Isa. 30:20, 21) Siya sarong mapasensiya, mabuot, saka mapagsabot na Paratukdo. An marahay sa saiyang mga estudyante iyo an pighihiling niya. (Sal. 130:3) Asin dai niya nuarin man inaasahan sa sato an labi sa kaya tang gibuhon. Tandaan, siya an nagdisenyo kan saimong hutok, sarong makangangalas na regalo. (Sal. 139:14) Igwa kita nin natural na pagmawot na makanuod. Gusto kan satong Kaglalang na padagos kitang makanuod sagkod pa man—asin na ikaugma iyan. Kaya madunong na magkaigwa kita ngunyan nin “grabeng pagmawot” sa mga katotoohan sa Bibliya. (1 Ped. 2:2) Magbugtak nin mga pasuhan na kaya mong maabot, asin magkaigwa nin regular na iskedyul sa pagbasa asin pag-adal nin Bibliya. (Jos. 1:8) Sa tabang ni Jehova, mas lalo mong mai-enjoy an pagbasa asin an pag-adal manungod sa saiya.

12. Taano ta dapat tang pag-adalan an buhay asin ministeryo ni Jesus?

¹² Regular na magtao nin panahon para hurop-hurupon an buhay asin ministeryo ni Jesus. An pagsunod na marhay sa mga lakad ni Jesus mahalagang marhay sa paglilingkod ki Jehova, lalo na sa masakit na panahon na ini. (1 Ped. 2:21) Prangkang sinabi ni Jesus an manungod sa mga kadipisilan na maeeksperyensiyahan kan mga parasunod niya. (Luc. 14:27, 28) Minsan siring, tiwala siya na arog niya makakayanan iyan kan saiyang tunay na mga parasunod. (Juan 16:33) Pag-adalan an mga detalye manungod sa buhay ni Jesus, asin magkaigwa nin mga pasuhan na arugon siya sa saimong pang-aroaldaw na buhay.

13. Ano an dapat na padagos mong hagadon ki Jehova, asin taano?

¹³ Bakong igo an kaaraman sana. An panginot na kahalagahan kaiyan iyo an kun paano ka kaiyan matatabangan na mas mabisto pa si Jehova asin magkaigwa kan mga kuwalidad na arog kan pagkamuot sa saiya asin pagtubod sa saiya. (1 Cor. 8:1-3) Mantang mas nakakanuod ka, padagos na hagadon ki Jehova na tabangan ka na magkaigwa nin urog na pagtubod. (Luc. 17:5) Bukas-palad niyang sinisimbag an siring na mga pamibi. An tunay na pagtubod na nakabasar sa tamang kaaraman mapadapit sa satong Diyos matabang sa saimo na urog pang umuswag.—Sant. 2:26.

14. Paano idinuon ni apostol Pedro an kahalagahan kan pag-aplikar kan nanunudan ta? (Hilingon man an ritrato.)

¹⁴ Idinuon ni apostol Pedro kun gurano kaimportante para sa mga parasunod ni Cristo na padagos na iaplikar an saindang nanunudan. Sinambit niya an pagkasaysay sa Bibliya manungod ki Noe. Sinabi ni Jehova ki Noe na paagi sa sarong baha, paparaon Niya an maraot na mga tawo kan panahon na iyan. An pakaaram sana na may papaabot na baha bakong igo para maligtas si Noe asin an saiyang pamilya. Mangnuhon na an sinambit ni Pedro iyo an panahon bago an Baha “mantang ginigibo an arka.” (1 Ped. 3:20) Iyo, si Noe asin an saiyang pamilya huminiro kauyon kan saindang naaraman hali sa Diyos paagi sa paggibo nin arka, sarong dakulaon na barko. (Heb. 11:7) Dangan an ginibong iyan ni Noe ikinumparar ni Pedro sa bawtismo, isinurat niya: “An bawtismo, na katumbas kaini, iyo man ngunyan an nagliligtas sa saindo.” (1 Ped. 3:21) Kun siring, puwede tang ikumparar an ginigibo mo ngunyan para magin handa sa bawtismo sa ginibo ni Noe asin kan saiyang pamilya sa laog nin dakul na taon para makagibo nin arka. Ano an kaipuhan mong gibuhon para magin handa sa bawtismo?

15. Paano ta maipapahiling na tunay an satong pagsulsol?

¹⁵ An saro sa inot na dapat tang gibuhon iyo an sinserong pagsulsol sa satong mga kasalan. (Gibo 2:37, 38) An tunay na pagsulsol makakatabang para makagibo nin tunay na pagbabago. Hinali mo na daw an ano man na gibo na ikinakaanggot ni Jehova, arog kan imoral na pamumuhay, paggamit nin tabako, o pagtaram nin maraot o mapang-insultong mga tataramon? (1 Cor. 6:9, 10; 2 Cor. 7:1; Efe. 4:29) Kun dai pa, padagos na maghinguwang gumibo nin mga pagbabago. Makipag-ulay sa nagtutukdo saimo sa Bibliya, o maghapot sa mga elder sa kongregasyon para sa tabang asin paggiya. Kun ika hoben asin nag-iistar sa harong kaiba kan saimong mga magurang, padagos na magpatabang sa sainda para mahali mo an ano man na maraot na ugali na tibaad nakakaulang sa saimo na mabawtismuhan.

16. Ano an kaiba sa sarong marahay na espirituwal na rutina?

¹⁶ Mahalaga man na magkaigwa kita nin marahay na espirituwal na rutina. Kaiba diyan an pag-atender sa Kristiyanong mga pagtiripon asin pagpartisipar sa mga iyan. (Heb. 10:24, 25) Asin pag nakuwalipikar ka nang magpartisipar sa Kristiyanong ministeryo, gibuhon man iyan nin regular. Mantang mas nagpapartisipar ka sa nagliligtas-buhay na gibuhon na iyan, mas mai-enjoy mo man iyan. (2 Tim. 4:5) Kun ika hoben asin nakaistar sa harong kaiba kan saimong mga magurang, haputon an saimong sadiri: ‘Kaipuhan daw na pagirumdumon pa ako kan sakong mga magurang na mag-atender sa mga pagtiripon o umiba sa ministeryo? O ako na mismo an minahiro?’ Kun ika na mismo an minahiro para sa sadiri mo, ipinapahiling mo an saimong pagtubod asin an pagkamuot saka pasasalamat sa Diyos na Jehova. An mga iyan “mga gibong nagpapahiling nin debosyon sa Diyos,” mga regalong idinudulot mo ki Jehova. (2 Ped. 3:11; Heb. 13:15) Nakakapaugma sa satong Diyos an gabos na regalo na idinudulot ta nin gikan sa buot asin dai napipiritan. (Ikumparar an 2 Corinto 9:7.) Ginigibo ta an mga iyan huling nauugma kita na itao ki Jehova an satong pinakamarahay.

17-18. Anong mahalagang marhay na kuwalidad an matabang sa saimo na umuswag pasiring sa bawtismo, asin taano? (Talinhaga 3:3-6)

¹⁷ Mantang padagos kang nag-uuswag pasiring sa bawtismo, makakaeksperyensiya ka nin mga kadipisilan. Tibaad tuya-tuyaon ka kan iba huli sa saimong bagong pagtubod; tibaad kontrahon o persegiron ka pa ngani ninda. (2 Tim. 3:12) Mantang pinagmamaigutan mong mahali an saimong maraot na gawi-gawi, tibaad sa pana-panahon magibo mo na man iyan. O tibaad mawaran ka nin pasensiya asin madisganar ta garo haluyon pa bago mo maabot an pasuhan mo. Ano an makakatabang sa saimo na magpadagos? An sarong mahalagang marhay na kuwalidad—pagkamuot ki Jehova.

¹⁸ An saimong pagkamuot ki Jehova sarong magayon na kuwalidad, an pinakamarahay mong kuwalidad. (Basahon an Talinhaga 3:3-6.) An makusog na pagkamuot sa Diyos makakatabang sa saimo na makayanan an mga problema sa buhay. Parating sinasambit kan Bibliya an maimbod na pagkamuot ni Jehova sa saiyang mga lingkod. Huli sa saiyang maimbod na pagkamuot, nungka niyang babayaan an saiyang mga lingkod, o mapundo sa pagpahiling nin pagkamuot sa sainda. (Sal. 100:5) Ginibo ka sa ladawan nin Diyos. (Gen. 1:26) Paano mo maipapahiling an arog kaiyan na pagkamuot?

19. Paano ka magigin mas mapagpasalamat sa gabos na ginigibo ni Jehova para sa saimo? (Galacia 2:20)

¹⁹ Magpuon paagi sa pagigin mapagpasalamat. (1 Tes. 5:18) Kada aldaw, haputon an saimong sadiri, ‘Paano si Jehova nagpahiling sa sako ngunyan nin pagkamuot?’ Dangan siguraduhon na pasalamatan si Jehova sa saimong mga pamibi, na espesipikong sinasambit an mga bagay na ginibo niya para sa saimo. Ibilang na para talaga saimo an marahay niyang mga ginigibo huling namumutan ka niya, arog mismo kan narealisar diyan ni apostol Pablo manungod ki Jehova. (Basahon an Galacia 2:20.) Haputon an saimong sadiri, ‘Gusto ko man daw na ipahiling sa saiya an sakuyang pagkamuot bilang balos?’ An pagkamuot ki Jehova matabang sa saimo na padagos na likayan an mga sugot asin mapangganang tagalan an mga pagbalo. Papahiruon ka kaiyan na papagdanayon an saimong espirituwal na rutina, asin padagos na ipahiling an saimong pagkamuot sa saimong Ama aroaldaw.

20. Ano an kaipuhan mong gibuhon para idusay an saimong sadiri ki Jehova, asin gurano kaimportante an desisyon na iyan?

²⁰ Pag-abot nin panahon, papahiruon ka kan saimong pagkamuot ki Jehova na magdulot nin espesyal na pamibi sa saiya. Idudusay mo an saimong sadiri sa Diyos. Tandaan, pag dusay ka na ki Jehova, igwa ka kan pambihirang paglaom na ini: Puwede kang magin sadiri niya sagkod sa panahon na daing katapusan. Pag idinusay mo an saimong sadiri ki Jehova, nanunuga ka na paglilingkudan mo siya marahay man o maraot an sitwasyon. Dai mo na kaipuhan utruhon an panuga na iyan. Totoo, pag nagdusay kita, naggigibo kita nin seryosong desisyon. Pero pag-isipan ini: Magibo ka nin dakul na desisyon sa saimong buhay, an iba diyan marahayon, pero mayo na nin maurog pa sa desisyon mong idusay an saimong sadiri ki Jehova. (Sal. 50:14) Pagmamaigutan ni Satanas na paluyahon an saimong pagkamuot sa saimong Ama, na nag-aasa na tatalikudan mo an saimong integridad. Nungkang pagtugutan na manggana si Satanas! (Job 27:5) An saimong makusog na pagkamuot ki Jehova matabang sa saimo na mamuhay kauyon kan saimong pagdusay asin lalo pang magin dayupot sa saimong Ama sa langit.

21. Taano ta masasabi ta na an bawtismo bakong an katapusan kundi an kapinunan?

²¹ Pagkatapos mong gibuhon an saimong pagdusay ki Jehova, makipag-ulay sa mga elder sa saindong kongregasyon manungod sa sunod na mahalagang marhay na lakdang. Pero pirming tandaan na an bawtismo bako an katapusan kundi an kapinunan. Kapinunan iyan nin habangbuhay na paglilingkod ki Jehova. Kaya pakusugon na ngunyan an pagkamuot mo sa saimong Ama. Magkaigwa nin mga pasuhan tanganing an saimong pagkamuot padagos na kumusog sa kada aldaw. Sa paggibo kaiyan mapapahiro ka na magpabawtismo. Magigin maugmahon na aldaw iyan. Pero kapinunan pa sana iyan. Lugod na an saimong pagkamuot ki Jehova asin sa saiyang Aki padagos na kumusog sagkod pa man!