An Paralamag Nakaheling nin Dakulang Liwanag

NAGPUPUTOK an kaanggotan ni Saulo sa mga parasunod ni Jesus. Dai pa nakontento sa paglamag na ginibo na sa sainda sa Jerusalem, kabale an paggapo ki Esteban, hinihingoa nia ngonyan na dugangan an pagbabawal. “Naghahangos pa nin huma asin paggadan tumang sa mga disipulo [si Saulo] nagduman sa halangkaw na saserdote asin naghagad sa saiya nin mga surat sa mga sinagoga sa Damasco, tanganing madara nia na nakagapos sa Jerusalem an siisay man na manompongan nia na nasa Dalan, mga lalaki sagkod mga babae.”​—Gibo 9:​1, 2.

Mantang naglalakaw si Saulo pasiring sa Damasco, siertong ineestudyaran nia kun paano nia magigibo sa pinakaepektibong paagi an mandato sa saiya. An autoridad na itinao sa saiya kan halangkaw na saserdote daing duda na seseguradohon an kooperasyon kan mga namomoon sa darakulang komunidad nin mga Judio sa siudad na iyan. Hahagadon ni Saulo an saindang tabang.

Sierto na napupukaw an boot ni Saulo mantang naghaharani sia sa saiyang padudumanan. Nakapanluluya an pagbaklay hale sa Jerusalem pa-Damasco​—pito o walong aldaw na paglakaw nin mga 220 kilometros. Bigla na sana kan mga odto, sarong liwanag na mas nakasusula kisa saldang an nagsilyab sa palibot ni Saulo, asin natumba sia. May nadangog siang tingog na nagsasabi sa saiya sa Hebreo: “Saulo, Saulo, taano ta pinaglalamag mo ako? An pagparasipa sa pan-alaw nagpapagin masakit para sa saimo.” “Siisay ka, Kagurangnan?,” an hapot ni Saulo. “Ako si Jesus, na pinaglalamag mo,” an simbag. “Minsan siring, buhat asin tumindog ka. Huli ta sa katuyohan na ini nagpaheling ako saimo, tanganing pilion ka bilang katabang asin saksi kapwa kan mga bagay na naheling mo asin mga bagay na ipaheheling ko saimo mapadapit sa sako; mantang iliniligtas taka sa banwaan na ini asin sa mga nasyon, na susugoan ko sa saimo.” “Ano an gigibohon ko Kagurangnan?,” an hapot ni Saulo. “Buhat, paduman ka sa Damasco, asin duman sasabihon saimo an manongod sa gabos na bagay na itinalaan na gigibohon mo.”​—Gibo 9:​3-6; 22:​6-10; 26:​13-17.

An mga nagbabaklay na kaibanan ni Saulo nakadangog nin tingog, alagad dai ninda naheling an nagtataram o nasabotan an saiyang sinasabi. Huli sa pagigin masula kan liwanag, kan tumindog si Saulo dai na sia makaheling asin kinaipuhan na kabiton. “Sa laog nin tolong aldaw dai sia nakaheling, asin dai sia nagkakan ni nag-inom.”​—Gibo 9:​7-9; 22:11.

Tolong Aldaw na Paghorophorop

Si Saulo inistimar ni Judas sa saiyang harong, na nag-eerok sa kalye na inaapod Tanos.a (Gibo 9:11) An kalyeng ini​—na sa Arabe inaapod Darb al-Mustaqim​—sagkod ngonyan pangenot na agihan sa Damasco. Imahinara an nagsabong sa isip ni Saulo mantang sia nasa harong ni Judas. Dahel sa saiyang naeksperyensiahan si Saulo nabuta asin namungnan. Ngonyan igwa nin panahon na horophoropon an mga implikasyon kaiyan.

An paralamag napaatubang sa ibinilang niang makangingisi. An ipinakong Kagurangnan na Jesu-Cristo​—na kinondenar kan pinakahalangkaw na Judiong autoridad asin “pinagduhagi asin isinikwal nin mga tawo”​—buhay. Tara, sia nagtitindog pa ngani na may pag-oyon sa too nin Dios sa “dai maranihan na liwanag”! Si Jesus iyo an Mesiyas. Tama si Esteban asin an iba pa. (Isaias 53:​3; Gibo 7:​56; 1 Timoteo 6:16) Biyong sala si Saulo, ta si Jesus midbid na konektadong marhay sa mismong mga pinaglalamag ni Saulo! Sa atubangan kan ebidensia, paano mahihimo ni Saulo na ‘magparasipa sa pan-alaw’? Maski an sutil na torong baka sa kahurihurihi naaalaw sa direksion na gusto kan kagsadiri kaiyan. Kun siring, paagi sa pagsayumang magkooperar sa mga pagsadol ni Jesus, kinokolgan ni Saulo an sadiri nia.

Bilang an Mesiyas, si Jesus dai puedeng kinondenar nin Dios. Pero, tinogotan ni Jehova na sia umagi sa pinakamakasusupog na kagadanan asin masentensiahan sono sa Ley: “Sarong isinumpa nin Dios an sarong nabibitay.” (Deuteronomio 21:23) Nagadan si Jesus mantang nakabitin sa hariging pasakitan. Sia sinumpa, bakong dahel sa saiya mismong mga kasalan, ta mayo siang kasalan, kundi dahel sa pagkamakasalan nin katawohan. Kan huri ipinaliwanag ni Saulo: “An gabos na nagsasarig sa mga gibo kan ley nasa irarom nin sumpa; ta nasusurat: ‘Sinumpa an gabos na dai nagdadanay sa gabos na nasusurat sa balumbon kan Ley tanganing otobon iyan.’ Dugang pa, hayag na paagi sa ley mayo nin siisay man na pinapakangmatanos sa Dios . . . Tinubos kita ni Cristo sa sumpa kan Ley paagi sa pagigin sumpa imbes na kita, huli ta nasusurat: ‘Sinumpa an lambang tawo na binitay sa harigi.’”​—Galacia 3:​10-13.

An atang ni Jesus igwa nin nakababalukat na halaga. Paagi sa pag-ako kan atang na iyan, sa piguratibong paagi ipinako ni Jehova sa harigi an Ley asin an sumpa kaiyan. Kan masabotan an katunayan na iyan, puedeng ibilang ni Saulo na “kadonongan nin Dios” an hariging pasakitan na “sa mga Judio sarong singkogan.” (1 Corinto 1:​18-25; Colosas 2:14) Kaya, kun siring, kun an kaligtasan dai makakamtan paagi sa mga gibo nin ley kundi paagi sa dai na kutana maninigong kabootan nin Dios sa mga parakasala na arog ki Saulo mismo, may posibilidad na iyan bukas para sa mga bakong sakop kan Ley. Asin an mga Hentil an pinagsugoan ni Jesus ki Saulo.​—Efeso 3:​3-7.

Dai niato masabi kun gurano man nanggad kadakol kaini an nasabotan ni Saulo kan panahon na sia makombertir. Si Jesus makikipag-olay liwat sa saiya, tibaad labi sa sarong beses, manongod sa saiyang misyon sa mga nasyon. Dugang pa, nagkapirang taon an uminagi bago isinurat ni Saulo an gabos na ini paagi sa pagpasabong nin Dios. (Gibo 22:​17-​21; Galacia 1:​15-​18; 2:​1, 2) Minsan siring, pirang aldaw sana an uminagi bago nakaresibi si Saulo nin dugang pang mga instruksion hale sa saiyang bagong Kagurangnan.

Pagsongko ni Ananias

Pakatapos na magpaheling ki Saulo, si Jesus nagpaheling man ki Ananias, na sinasabi sa saiya: “Pumaduman ka sa tinampo na inaapod Tanos, asin sa harong ni Judas hanapon mo an sarong tawo na an ngaran Saulo, hale sa Tarso. Huli ta, uya! sia namimibi, asin sa sarong bisyon nakaheling sia nin sarong lalaki na an ngaran Ananias na luminaog asin nagdoon kan saiyang mga kamot sa saiya tanganing makabalik an saiyang pagheling.”​—Gibo 9:​11, 12.

Huling may aram na si Ananias dapit ki Saulo, natural sanang mabigla sia sa mga tataramon ni Jesus. Sia nagsabi: “Kagurangnan, ako nakadangog sa dakol manongod sa lalaking ini, kun gurano kadakol na nakadadanyar na bagay an ginibo nia sa saimong mga banal sa Jerusalem. Asin digdi igwa sia nin autoridad gikan sa poon na mga saserdote na gaposon an gabos na nag-aapod sa saimong ngaran.” Minsan siring, sinabihan ni Jesus si Ananias: “Lakaw, huli ta an tawong ini sarong piniling lalagan para sa sako tanganing magdara kan sakong ngaran sa mga nasyon saka sa mga hade asin mga aki ni Israel.”​—Gibo 9:​13-15.

Huling naasegurar giraray, dinumanan ni Ananias an adres na itinao sa saiya ni Jesus. Kan manuparan asin taratarahon si Saulo, idinoon ni Ananias an saiyang mga kamot sa saiya. “Asin tolos-tolos,” sabi kan pagkasaysay, “may naholog gikan sa . . . mga mata [ni Saulo] na garo mga kiskis, asin nakabalik an saiyang pagheling.” Andam na ngonyan si Saulo na maghinanyog. Kinompirmar kan mga tataramon ni Ananias an posibleng nasabotan ni Saulo sa mga tataramon ni Jesus: “An Dios kan satong mga apoon pinili ka na makaaram kan saiyang kabotan asin makaheling kan matanos na Saro patin makadangog kan tingog kan saiyang ngoso, huli ta ika magigin saksi para sa saiya sa gabos na tawo dapit sa mga bagay na saimong naheling asin nadangog. Asin ngonyan taano ta nag-aabala ka? Tindog, pabautismo ka patin hugasa an saimong mga kasalan paagi sa saimong pag-apod sa saiyang ngaran.” An resulta? Si Saulo “buminuhat asin binautismohan, asin sia kuminakan asin kuminosog.”​—Gibo 9:​17-19; 22:​12-16.

Pakatapos na otobon an sugo sa saiya, an fiel na si Ananias nawara sa eksena nin siring karikas kan paglataw nia, asin mayo nang sinabi sa sato manongod sa saiya. Alagad sinorpresa ni Saulo an gabos na nagdangog sa saiya! An dating paralamag, na nagduman sa Damasco tanganing arestaron an mga disipulo ni Jesus, nagpoon na maghulit sa mga sinagoga asin magpatunay na si Jesus iyo an Cristo.​—Gibo 9:​20-​22.

“Apostol sa mga Nasyon”

An naenkuentro ni Saulo sa dalan pasiring sa Damasco an nagpaontok sa saiyang ginigibong paglamag. Narerealisar na kun siisay an Mesiyas, ikaaaplikar na ni Saulo ki Jesus an dakol na konsepto asin hula kan Hebreong Kasuratan. An pakaaram na si Jesus nagpaheling sa saiya asin ‘nagkapot sa saiya’ patin nagsugo sa saiya bilang “apostol sa mga nasyon” biyong luminiwat kan buhay ni Saulo. (Filipos 3:​12; Roma 11:13) Ngonyan bilang si apostol Pablo, igwa sia nin pribilehio asin autoridad na makakaapektar bako sanang sa natatada pa niang mga aldaw digdi sa daga kundi siring man sa dalagan kan Kristianong kasaysayan.

Pakalihis nin dakol na taon, kan diskutiron an pagkaapostol ni Pablo, idinepensa nia an saiyang autoridad paagi sa pagsambit kan saiyang naeksperyensiahan sa dalan pasiring sa Damasco. “Bako daw ako apostol? Bako daw na naheling ko si Jesus na satong Kagurangnan?,” an hapot nia. Asin pakatapos na sambiton an mga pagpaheling sa iba kan binuhay liwat na si Jesus, si Saulo (Pablo) nagsabi: “Sa kahurihurihi nagpaheling man sia sa sako na garo sa saro na namundag na kulang sa bulan.” (1 Corinto 9:​1; 15:8) Garo baga si Saulo, paagi sa saiyang bisyon kan langitnon na kamurawayan ni Jesus, antemanong tinawan kan onra na mamundag, o buhayon liwat, sa espiritung buhay.

Inako ni Saulo an saiyang pribilehio asin nagmaigot na otobon iyan. “Ako an pinakasadangoton sa mga apostol, asin bako akong angay na apodon apostol, huli ta pinaglamag ko an kongregasyon nin Dios,” an isinurat nia. ‘Alagad an dai na kutana maninigong kabootan [nin Dios] na ipinaheling sa sako dai nasayang, kundi ako nagpagal nin labi kisa [gabos na iba pang apostol].’​—1 Corinto 15:​9, 10.

Tibaad arog ki Saulo nagigirumdoman nindo an panahon kan narealisar nindo na tanganing makamit an pabor nin Dios, kinaipuhan nindong liwaton an haloy nang pinangaptan na relihiosong mga punto de vista. Daing duda na nagpapasalamat kamong marhay na tinabangan kamo ni Jehova na masabotan an katotoohan. Kan maheling ni Saulo an liwanag asin marealisar an hinahagad sa saiya, dai sia nagduwaduwang gibohon iyan. Asin padagos niang ginibo iyan na may kaigotan asin determinasyon sa bilog niang buhay digdi sa daga. Kanigoan karahay na halimbawa para sa gabos na nagmamawot na magkamit kan pabor ni Jehova ngonyan!

[Nota sa Ibaba]

[Ritrato sa pahina 27]

An kalye na inaapod Tanos sa presenteng panahon na Damasco

[Credit Line]

Rinetrato kan ROLOC Color Slides