Tatabangan Ka ni Jehova na Makayanan an Dai Inaasahan na mga Problema

1. Sa ano kita kumbinsido?

BILANG mga lingkod ni Jehova, aram ta na namumutan niya kita asin na gusto niya na makamtan ta an pinakamarahay na buhay na posible. (Roma 8:35-39) Kumbinsido man kita na an mga prinsipyo sa Bibliya pirming para sa kapakinabangan ta pag inaplikar ta an mga iyan. (Isa. 48:17, 18) Minsan siring, paano kun mapaatubang kita sa dai inaasahan na mga problema?

2. Anong mga problema an puwedeng mapaatubang sa sato, asin ano an tibaad maihapot ta huli kaiyan?

² Gabos na lingkod ni Jehova nakakaeksperyensiya nin mga problema. Halimbawa, tibaad pangluyahan kita nin buot huli sa sarong kapamilya. Tibaad igwa kita nin grabeng problema sa salud kaya nalilimitaran kita sa paglilingkod ki Jehova. Tibaad naeksperyensiyahan ta an grabeng epekto nin sarong kalamidad. O tibaad persegiron kita huli sa satong pagtubod. Pag napaatubang kita sa arog kaiyan na mga kasakitan, tibaad maisip ta: ‘Taano ta nangyayari ini sa sako? May nagibo daw akong sala? Nangangahulugan daw ini na dai ako binebendisyunan ni Jehova?’ Namati mo na man daw an arog kaiyan? Kun iyo, dai ka madisganar. Dakul na maimbod na lingkod ni Jehova an nagsakit man huli sa arog kaiyan na mga pagmati.—Sal. 22:1, 2; Hab. 1:2, 3.

3. Ano an puwede tang manudan sa Salmo 34:19?

³ Basahon an Salmo 34:19. Mangnuhon an duwang importanteng punto sa salmong ini: (1) An matanos na mga tawo napapaatubang sa mga problema. (2) Iliniligtas kita ni Jehova sa satong mga kasakitan. Paano kita iliniligtas ni Jehova? An sarong paagi iyo an pagtabang sa sato na magkaigwa nin realistikong pagmansay sa buhay sa sistemang ini nin mga bagay. Dawa ngani nanunuga si Jehova na magigin maugma kita sa paglilingkod sa saiya, dai niya man ginagarantiya na dai kita magkakaigwa nin problema ngunyan. (Isa. 66:14) Dinadagka niya kita na magpokus sa satong puturo—sa panahon na magkakaigwa kita kan buhay na gusto niyang makamtan ta sagkod pa man. (2 Cor. 4:16-18) Pero mantang dai pa iyan nag-aabot, tinatabangan niya kita na makapagpadagos sa kada aldaw.—Lam. 3:22-24.

4. Ano an pag-uulayan ta sa artikulong ini?

⁴ Pag-ulayan ta kun ano an puwede tang manudan sa mga halimbawa kan maimbod na mga parasamba ni Jehova, kan mga panahon kan Bibliya asin sa satong panahon. Arog kan mahihiling ta, puwede kitang mapaatubang sa dai inaasahan na mga problema. Pero kun magsasarig kita ki Jehova, pirmi niya kitang aalalayan. (Sal. 55:22) Mantang pinag-uulayan ta an mga halimbawang ini, haputon an sadiri: ‘Ano daw kutana an ginibo ko kun yaon ako sa arog kaiyan na sitwasyon? Paano pinapakusog kan mga halimbawang ini an pagtitiwala ko ki Jehova? Anong mga leksiyon an puwede ko mismong iaplikar?’

5. Anong mga kadipisilan an inagihan ni Jacob dahil ki Laban? (Hilingon an ritrato sa cover.)

⁵ An mga lingkod ni Jehova kan mga panahon kan Bibliya napaatubang sa dai inaasahan na mga kadipisilan. Pag-isipan si Jacob. Sinabihan siya kan saiyang ama na magkua nin maaagom hali sa mga aking babayi ni Laban, sarong kapagtubod na paryente, asin sinigurado saiya na abunda siyang bebendisyunan ni Jehova. (Gen. 28:1-4) Kaya ginibo ni Jacob kun ano an tama. Binayaan niya an daga nin Canaan asin nagbiyahe pasiring sa lugar ni Laban, na may duwang aking babayi—si Lea saka si Raquel. Namuot si Jacob sa nguhod na aking babayi ni Laban na si Raquel asin nag-uyon siya na magserbi nin pitong taon ki Laban bago agumon si Raquel. (Gen. 29:18) Pero iba sa linalauman ni Jacob an nangyari. Dinaya siya ni Laban tanganing an mapangagom niya iyo an matuang aki na si Lea. Pakalihis nin sarong semana, tinugutan ni Laban si Jacob na mapangagom si Raquel, pero kaipuhan niyang magserbi nin pito pang taon. (Gen. 29:25-27) Apuwera kaiyan, dai man nagin makatanusan si Laban sa pakikipagtransaksiyon niya ki Jacob. Inaprobetsaran niya si Jacob sa laog nin 20 taon!—Gen. 31:41, 42.

6. Ano pang mga problema an tinagalan ni Jacob?

⁶ Tinagalan ni Jacob an iba pang mga problema. Dakula an saiyang pamilya, pero an saiyang mga aking lalaki dai pirming nagkakasurundo. Ipinabakal pa ngani ninda an sainda mismong tugang na si Jose para magin uripon. An duwang aki ni Jacob, si Simeon asin si Levi, nagdara nin kasusupgan sa pamilya asin katuyawan sa pangaran ni Jehova. Apuwera kaiyan, nagadan an namumutan na agom ni Jacob na si Raquel mantang ipinapangaki an ikaduwa nindang aki. Asin huli sa grabeng tiggutom, napiritan si Jacob na magbalyo sa daga nin Ehipto dawa gurang na siya.—Gen. 34:30; 35:16-19; 37:28; 45:9-11, 28.

7. Paano ipinahiling ni Jehova an Saiyang pag-uyon ki Jacob?

⁷ Sa ibong kan gabos na iyan, dai nawara an pagtubod ni Jacob ki Jehova asin sa Saiyang mga panuga. Bilang balos, ipinahiling ni Jehova ki Jacob na inuuyunan Niya ini. Halimbawa, sa ibong kan pandadaya ni Laban, binendisyunan ni Jehova si Jacob nin mga pagsasadiri. Asin isipa na sana an grabeng pasasalamat ni Jacob ki Jehova kan makaibanan niya giraray si Jose—an saiyang aki na pighuna niyang haloy nang gadan! Huli sa pagigin dayupot ni Jacob ki Jehova, nakayanan niya an mga kasakitan. (Gen. 30:43; 32:9, 10; 46:28-30) Kun magdadanay kitang dayupot ki Jehova, makakayanan ta man an dai inaasahan na mga problema.

8. Ano an linalauman ni Hading David na gibuhon?

⁸ Dai magibo ni Hading David an gabos na linalauman niyang magibo sa paglilingkod ki Jehova. Halimbawa, gustong-gusto ni David na magpatugdok nin templo para sa saiyang Diyos. Sinabi niya an pagmawot niyang iyan ki propeta Natan. Bilang simbag, sinabi ni Natan: “Gibuha an ano man na nasa puso mo, ta nasa kaibanan mo an tunay na Diyos.” (1 Cron. 17:1, 2) Maiimahinar ta nanggad kun paano napakusog si David kan mga tataramon na idto. Posibleng pinunan niya tulos an pagplano para sa dakulang proyektong ini.

9. Ano an ginibo ni David kan madangog niya an nakakadisganar na bareta?

⁹ Pero, dai nahaloy, buminalik an propeta ni Jehova na may nakakadisganar na bareta. “Kan mismong bangging idto,” sinabi ni Jehova ki Natan na bako si David an mapatugdok kan templo; imbes, saro sa mga aki niyang lalaki an magibo kaiyan. (1 Cron. 17:3, 4, 11, 12) Ano an ginibo ni David kan madangog niya an mensaheng ini? Binago niya an saiyang pasuhan. Nagpokus siya sa pagtipon nin pondo saka mga materyales na kakaipuhanon kan saiyang aking si Solomon para sa proyekto.—1 Cron. 29:1-5.

10. Paano ni Jehova binendisyunan si David?

¹⁰ Pagkatapos tulos na sabihon ki David na bako siya an mapatugdok kan templo, nakipagtipan si Jehova sa saiya. Nanuga si Jehova ki David na an saro sa saiyang mga gikan mamamahala sagkod lamang. (2 Sam. 7:16) Sa bagong kinaban, imahinara kun magigin gurano kaugma si David pag naaraman niya na nabubuhay siya sa irarom kan Sangribong Taon na Pamamahala ni Jesus, sarong Hadi na hali mismo sa saiyang pamilya! Tinatabangan kita kan istoryang ini na mahiling na dawa dai ta magibo an gabos na linalauman tang magibo para ki Jehova, tibaad an satong Diyos igwa nin ibang bendisyon na itinagama para sa sato na dai ta lamang pighuhuna.

11. Paano binendisyunan an inot na siglong mga Kristiyano dawa ngani dai nag-abot an Kahadian sa panahon na linalauman ninda? (Gibo 6:7)

¹¹ Napaatubang an inot na siglong mga Kristiyano sa dai inaasahan na mga kadipisilan. Halimbawa, gustong-gusto na nindang mag-abot an Kahadian nin Diyos, pero dai ninda aram kun nuarin iyan mangyayari. (Gibo 1:6, 7) Kaya ano an ginibo ninda? Padagos sindang nagin sibot sa gibuhon na paghuhulit. Mantang naglalakop an maugmang bareta, nahiling ninda an malinaw na patunay na binebendisyunan ni Jehova an saindang mga paghihinguwa.—Basahon an Gibo 6:7.

12. Ano an ginibo kan inot na siglong mga Kristiyano kan magkaigwa nin tiggutom?

¹² May panahon na nagkaigwa nin grabeng tiggutom “sa bilog na daga.” (Gibo 11:28) Dai nakalibre diyan dawa an inot na siglong mga Kristiyano. Naiimahinar mo daw kun paano sinda kaiyan naapektaran na marhay? Siguradong nahadit an mga payo nin pamilya kun paano ninda masusustentuhan an saindang mga pamilya. Asin kumusta man an mga hoben na nagpaplanong pahiwason an saindang ministeryo? Naisip daw ninda na dai nguna idagos an saindang plano? Ano man an saindang nagin kamugtakan, nag-adjust an mga Kristiyanong idto. Padagos sindang naghulit sa ano man na paaging makakaya ninda, asin maugma nindang ihiniras an ano man na materyal na bagay na igwa sinda sa saindang mga kapagtubod sa Judea.—Gibo 11:29, 30.

13. Anong mga bendisyon an inako kan mga Kristiyano durante kan tiggutom?

¹³ Anong mga bendisyon an inako kan mga Kristiyano durante kan tiggutom? Nahiling mismo kan mga nakaresibi nin ayuda an pagtabang sainda ni Jehova. (Mat. 6:31-33) Siguradong nagin mas dayupot sinda sa saindang mga kapagtubod na nagtabang sa sainda. Asin namatian man kaidtong mga nagdonar o nagtabang sa pag-ayuda sa ibang paagi an kaugmahan huli sa pagtao. (Gibo 20:35) Binendisyunan sinda gabos ni Jehova huling nag-adjust sinda sa nagbabagong mga kamugtakan.

14. Ano an nangyari ki Bernabe saka ki apostol Pablo, asin ano an nagin resulta? (Gibo 14:21, 22)

¹⁴ Parating nakakaeksperyensiya nin persekusyon an inot na siglong mga Kristiyano, na kun minsan sa mga panahon na dai ninda inaasahan. Pag-isipan an nangyari ki Bernabe asin ki apostol Pablo mantang naghuhulit sinda sa lugar nin Listra. Kan primero, maugma sindang inako kan mga nagdangog sa sainda. Pero dai nahaloy, “sinutsutan kan mga [parakontra] an mga tawo,” kaya an nagkapira sa mga tawo man sanang idto na nagdangog sa sainda ginarapo si Pablo asin binayaan sa paghuna na gadan na siya. (Gibo 14:19) Pero padagos na naghulit si Bernabe asin Pablo sa ibang lugar. An resulta? Natabangan nindang magin “disipulo an medyo dakul na tawo,” asin an saindang mga sinabi saka halimbawa nakapakusog sa saindang mga kapagtubod. (Basahon an Gibo 14:21, 22.) Dakul an nakinabang huling dai nagpundo si Bernabe asin Pablo sa ibong kan biglaan na persekusyon. Sagkod na dai kita minasuko sa gibuhon na ipinapagibo sato ni Jehova, bebendisyunan niya kita.

15. Ano an nanudan mo sa halimbawa ni Brother A. H. Macmillan?

¹⁵ Kan mga taon bago an 1914, may dakulang inaasahan an banwaan ni Jehova. Halimbawa, pag-isipan si Brother A. H. Macmillan. Arog kan dakul kan panahon na iyan, inisip ni Brother Macmillan na madali na niyang akuon an saiyang langitnon na balos. Sa sarong pahayag niya kan Setyembre 1914, sinabi niya: “Ini na gayod an huring pampublikong pahayag na itatao ko.” Siyempre, bako iyan an nagin huri niyang pahayag. Kan huri, isinurat ni Brother Macmillan: “Tibaad an nagkapira sa sato medyo nagin pabigla-bigla sa pag-isip na masakat na tulos kita sa langit.” Sinabi pa niya: “An dapat niyatong gibuhon iyo na padagos na magin sibot sa paglilingkod sa Kagurangnan.” Asin talagang padagos na nagin sibot si Brother Macmillan. Maigot siya sa ministeryo. Nagkapribilehiyo siya na pakusugon an dakul na tugang na napreso huli sa saindang neutralidad. Asin maimbod siyang nag-atender sa mga pagtiripon kan kongregasyon dawa kan maedad na siya. Paano nakinabang si Brother Macmillan sa pagigin sibot sa paglilingkod mantang hinahalat an saiyang balos? Bago siya magadan kan 1966, isinurat niya: “An pagtubod ko ngunyan arog pa man giraray kakusog kan dati.” Marahayon nanggad na sabuot na puwede tang arugon gabos—lalo na kun nagtatagal kita nin mas haloy kisa sa inaasahan ta!—Heb. 13:7.

16. Anong dai inaasahan na kadipisilan an inagihan ni Herbert Jennings saka kan saiyang agom? (Santiago 4:14)

¹⁶ Dakul na lingkod ni Jehova an nasasakitan huli sa dai inaasahan na mga problema sa salud. Halimbawa, sa istorya nin buhay ni Brother Herbert Jennings,b inistorya niya kun gurano sindang mag-agom kaugma sa saindang asignasyon bilang mga misyonero sa Ghana. Alagad, pag-abot nin panahon, na-diagnose na igwa siya nin malalang mood disorder. Sa pagkotar sa Santiago 4:14, inapod ni Brother Jennings an sitwasyon na iyan na “sarong ‘aga’ na dai mi inaasahan.” (Basahon.) Isinurat niya: “Kaipuhan ming magin realistiko, kaya binayaan mi an Ghana saka an dakul na dayupot ming amigo asin nagbalik kami sa Canada [para magpabulong].” Tinabangan ni Jehova si Brother Jennings saka an saiyang agom na padagos na maglingkod na may kaimbudan sa ibong kan kadipisilan na inaagihan ninda.

17. Paano nakatabang an halimbawa ni Brother Jennings sa saiyang mga kapagtubod?

¹⁷ An prangkang mga tataramon ni Brother Jennings na mababasa sa saiyang istorya nin buhay nagkaigwa nin dakulang epekto sa iba. Isinurat nin sarong sister: “Ngunyan lang ako napahiro nin arog kaini mantang binabasa ko an artikulong ini. . . . Kan mabasa ko na kinaipuhan ni Brother Jennings na bayaan an saiyang asignasyon para magparahay, nakatabang iyan sako na mansayon an sakong sitwasyon sa balanseng paagi.” Kaagid kaiyan, sarong brother an nagsurat: “Pagkatapos na maglingkod bilang sarong elder sa kongregasyon sa laog nin sampulong taon, kinaipuhan kong butasan an sakong pribilehiyo huli sa sarong hilang sa isip. Grabe talaga su pangluluya ko nin buot na sa parati namumundo ako pag nagbabasa nin mga artikulo manungod sa istorya nin buhay. . . . Pero an pagtagal ni Brother Jennings talagang nakapakusog sa sako.” Nagpapagirumdom ini sa sato na pag tinatagalan ta an dai inaasahan na mga problema, puwede tang mapakusog an iba. Dawa an mga nangyari sa buhay ta iba kisa sa inaasahan ta, puwede pa man giraray kitang magin sarong buhay na halimbawa nin pagtubod asin pakatagal.—1 Ped. 5:9.

18. Arog kan mahihiling na reenactment sa mga ritrato, ano an nanudan mo sa halimbawa kan sarong balo sa Nigeria?

¹⁸ An mga kalamidad na arog kan COVID-19 na pandemya nakaapektar sa dakul na lingkod ni Jehova. Halimbawa, may sarong balo sa Nigeria na grabe an pagtios. Sarong aga, hinapot siya kan saiyang aking babayi kun ano na an kakakanon ninda pagkatapos nindang maisapna an saindang huring takad nin bagas. Sinabi kan sister sa saiyang aki na mayo na sindang ibang kuwarta o kakanon pero kaipuhan nindang arugon an babaying balo na taga Zarefta—lutuon an saindang huring kakanon asin magtiwala nin lubos ki Jehova. (1 Ha. 17:8-16) Bago pa man sinda mag-isip kun ano an papangudtuhan ninda kan aldaw na iyan, nakaresibi sinda nin ayuda hali sa mga kapagtubod. May kairiba iyan na kakanon na puwede nindang makonsumo nin labing duwang semana. Sinabi kan sister na dai niya hunaon na arog kaiyan kaharani sa sainda si Jehova para madangog an sinabi niya sa saiyang aki. Tunay nanggad, kun masarig kita ki Jehova, an dai inaasahan na mga problema sa buhay puwede pa nganing makatabang na magin mas harani kita sa saiya.—1 Ped. 5:6, 7.

19. Anong persekusyon an tinagalan ni Aleksey Yershov?

¹⁹ Kan nakaaging mga taon, dakul sa satong mga tugang an nagtagal nin persekusyon na tibaad dai ninda inasahan. Pag-isipan si Brother Aleksey Yershov, na nakaistar sa Russia. Kan mabawtismuhan si Brother Yershov kan 1994, medyo talingkas pa an mga lingkod ni Jehova sa lugar na iyan. Pero, sa paglihis nin mga taon, nagbago an sitwasyon sa Russia. Kan 2020, linaog asin hinalughog an harong ni Brother Yershov, asin dakul sa mga gamit niya an kinumpiskar. Pakalihis nin pirang bulan, nagsangat an gobyerno nin kasong kriminal laban saiya. An mas grabe pa, ibinase an sahot sa video na pigrekord nin sarong tawo, na sa laog nin labing sarong taon, nagsagin-sagin na interesado sa pag-adal nin Bibliya. Saro nanggad na pagtraydor!

20. Paano pinakusog ni Brother Yershov an relasyon niya ki Jehova?

²⁰ May marahay daw na resulta ki Brother Yershov an inagihan niyang persekusyon? Iyo. Mas nagkusog an relasyon niya ki Jehova. “Mas parati na kami ni agom na namimibi nin magkaibanan,” an sabi niya. “Narealisar ko na dai ko matatagalan an sitwasyon na ini kun mayo an tabang ni Jehova.” Sinabi pa niya: “Nakatabang sako an personal na pag-adal para makayanan an pangluluya nin buot. Hinurop-hurop ko an mga halimbawa kan maimbod na mga lingkod kaidto. Dakul na istorya na isinurat sa Bibliya an nagduduon kun gurano kahalaga na magdanay na kalmado asin magpahiling nin tiwala ki Jehova.”

21. Ano an nanudan ta sa artikulong ini?

²¹ Ano an nanudan ta sa artikulong ini? An buhay sa sistemang ini nin mga bagay mayong kasiguraduhan. Dawa arog kaiyan, pirming tinatabangan ni Jehova an saiyang mga lingkod mantang nagsasarig sinda sa saiya. Arog kan sinasabi kan satong temang teksto, “dakul an kasakitan kan saro na matanos, pero iliniligtas siya ni Jehova sa gabos na iyan.” (Sal. 34:19) Lugod na padagos na magpokus kita, bako sa satong mga kasakitan, kundi sa nagsusustenir na kapangyarihan ni Jehova. Dangan arog ni apostol Pablo, masasabi ta: “Igwa akong kusog na atubangon an gabos na bagay paagi sa saiya na nagtatao sa sako nin puwersa.”—Fil. 4:13.