“Nagkauruyon Kami”

1, 2. (a) Anong mahalagang mga hapot an napaatubang sa namamahalang grupo kan Kristiyanong kongregasyon kan inot na siglo? (b) Anong tabang an inako kan mga lalaking idto para makagibo nin tamang desisyon?

NAGHAHALAT an gabos. Naghirilingan sa kada saro an mga apostol asin kamagurangan na yaon sa sarong kuwarto sa Jerusalem huling aram ninda na oras na para gumibo nin sarong importanteng desisyon. An isyu manungod sa pagturi nagbangon nin mahalagang marhay na mga hapot. Nasa irarom pa daw kan Katugunan ni Moises an mga Kristiyano? Dapat daw na mansayon na napapalain sa mga Kristiyanong Judio an mga Kristiyanong Hentil?

² Dakul na ebidensiya an nakonsiderar na kan nanginginot na mga lalaking ini. Napag-ulayan na ninda kun ano an sinasabi kan mga propesiya sa Tataramon nin Diyos pati na an mapuwersang personal na mga testimonya na nagpapahiling kan pag-uyon ni Jehova sa mga Kristiyanong Hentil. Nasabi na kan kada saro an gabos na gusto nindang sabihon. Nasa sainda na an gabos na impormasyon na kaipuhan ninda para makagibo nin desisyon. Malinaw na ginigiyahan sinda kan espiritu ni Jehova sa tamang direksiyon. Susunudon daw kan mga lalaking ini an paggiyang iyan?

3. Paano kita makikinabang sa pagsiyasat ta sa Gibo kapitulo 15?

³ Kaipuhan nin dakulang pagtubod saka kusog nin buot para akuon an paggiya kan espiritu sa sitwasyon na ini. Puwede ninda kaining mapagrabe an pagkaanggot sa sainda kan Judiong mga lider nin relihiyon. Asin napapaatubang man sinda sa pagkontra kan nagkapirang lalaki sa laog kan kongregasyon na determinadong ibalik an dating pagsarig kan banwaan nin Diyos sa Katugunan ni Moises. Ano an gigibuhon kan namamahalang grupo? Aramon ta. Maaaraman ta man kun paano an mga lalaking ini nagtao nin arugan na sinusunod kan Namamahalang Grupo kan Mga Saksi ni Jehova sa ngunyan. Ini man an arugan na kaipuhan tang sunudon pag napapaatubang kita sa mga pagdedesisyon asin kadipisilan sa satong buhay bilang mga Kristiyano.

4, 5. Anong pakasabot sa propetikong mga Tataramon nin Diyos an ihiniras ni Santiago sa pag-uulay?

⁴ Nagtaram an disipulong si Santiago, an tugang ni Jesus sa ina.a Minalataw na sa pagkakataon na ini, siya an nagseserbing tsirman kan miting. Sinumaryo kan mga sinabi niya an garo baga nagin desisyon kan grupo. An sabi ni Santiago sa nagkakatiripon na mga lalaki: “Detalyadong isinaysay ni Symeon kun paanong sa inot na pagkakataon tinawan nin Diyos nin atensiyon an mga nasyon tanganing kumua hali sa sainda nin sarong banwaan para sa saiyang pangaran. Asin minauyon diyan an mga tataramon kan Mga Propeta.”—Gibo 15:14, 15.

⁵ An mga sinabi ni Symeon, o Simon Pedro, asin an mga patunay na isinaysay ni Bernabe asin Pablo posibleng nakatabang ki Santiago na magirumduman an nagkapirang aplikadong kasuratan na nagtaong linaw mapadapit sa isyung saindang pinag-uulayan. (Juan 14:26) Pagkatapos na sabihon ni Santiago na “minauyon diyan an mga tataramon kan Mga Propeta,” kinotar niya an mga tataramon sa Amos 9:11, 12. An librong iyan kaiba sa kabtang kan Hebreong Kasuratan na inaapod na “Mga Propeta.” (Mat. 22:40; Gibo 15:16-18) Maririsa mo na an mga tataramon na kinotar ni Santiago medyo may pagkakalain sa mababasa ta ngunyan sa libro nin Amos. Posibleng marhay na nagkotar si Santiago sa Septuagint, sarong Griegong traduksiyon kan Hebreong Kasuratan.

6. Paano nagtao nin liwanag an Kasuratan manungod sa isyung pinag-uulayan?

⁶ Paagi ki propeta Amos, ihinula ni Jehova na maabot an panahon na ititindog niya an “payag-payag ni David,” an buot sabihon, an mga tagapagmana kan trono kan hadi na masagkod sa Mesiyanikong Kahadian. (Ezek. 21:26, 27) Magkakaigwa daw giraray si Jehova nin sarong piniling nasyon na kompuwesto sana nin mga Judio sa laman? Dai. Sinabi kan propesiya na an “mga tawo kan gabos na nasyon” titiripunon asin magigin ‘mga tawo na inaapod sa pangaran nin Diyos.’ Girumdumon na kasasabi pa sana ni Pedro na an Diyos ‘dai man lamang sinda [mga Kristiyanong Hentil] minansay na napapalain sa sato [mga Kristiyanong Judio], kundi dinalisay niya an puso ninda dahil sa saindang pagtubod.’ (Gibo 15:9) Sa ibang pagtaram, kabutan nin Diyos na an mga Judio saka an mga Hentil parehong magin mga tagapagmana kan Kahadian. (Roma 8:17; Efe. 2:17-19) Dai lamang nin ipinaparisa an ipinasabong na mga propesiya na dapat ngunang turion o magin mga proselito an nagturubod na mga Hentil.

7, 8. (a) Ano an sinabi ni Santiago? (b) Paano niyato dapat sabuton an sinabi ni Santiago?

⁷ Huli kan siring na patotoo hali sa Kasuratan asin kan nadangog niyang mapuwersang mga testimonya, ini an sinabi ni Santiago sa grupo: “Kaya an desisyon ko digdi, dai na pagpasakitan an mga tawo kan mga nasyon na nagmamawot maglingkod sa Diyos, kundi na suratan sinda na maglikay sa mga bagay na konektado sa pagsamba sa mga idolo, sa seksuwal na imoralidad, sa pagkakan nin mga hayop na tinilok, asin sa dugo. Huli ta puon pa kan suanoy na mga panahon, igwa sa lambang siyudad nin mga naghuhulit kan mga isinurat ni Moises, asin binabasa an mga iyan nin makusog sa mga sinagoga kada aldaw nin Sabbath.”—Gibo 15:19-21, nota sa ibaba.

⁸ Kan sabihon ni Santiago na “kaya an desisyon ko digdi,” iniinsistir daw niya sa iba pang mga tugang na may awtoridad siya—tibaad bilang tsirman kan miting—na solong magdesisyon para sa grupo sa kun ano an gigibuhon? Dai nanggad! An Griegong ekspresyon na itrinadusir na “an desisyon ko” puwede man mangahulugan na “an hatol ko” o “an opinyon ko.” Dai nagdedesisyon si Santiago para sa bilog na grupo, kundi nagtatao lang siya nin suhestiyon sa kun ano an puwedeng gibuhon base sa mga nadangog niyang testimonya asin sa sinasabi kan Kasuratan.

9. Ano an magigin mga pakinabang kan suhestiyon ni Santiago?

⁹ Marahay daw an suhestiyon ni Santiago? Daing dudang iyo, huling inaprubaran iyan kan huri kan mga apostol asin kamagurangan. Ano an magigin mga pakinabang kaiyan? An saro iyo na dai na kaiyan ‘papasakitan’ an mga Kristiyanong Hentil huling dai na ninda kaipuhan na sunudon an mga kahagadan kan Katugunan ni Moises. (Gibo 15:19) An saro pang pakinabang iyo na maipapahiling kaiyan an paggalang sa konsiyensiya kan mga Kristiyanong Judio, na dakul na taon nang nagdadangog sa “mga isinurat ni Moises [na] binabasa . . . nin makusog sa mga sinagoga kada aldaw nin Sabbath.”b (Gibo 15:21) An suhestiyon na iyan siguradong mapakusog kan relasyon kan mga Kristiyanong Judio asin mga Kristiyanong Hentil. Asin urog sa gabos, mapapaugma kaiyan an Diyos na Jehova, huling kauyon iyan kan saiyang katuyuhan. Saro nanggad ining marahayon na paagi nin pagresolber sa sarong problemang diit-diitan pang makaraot sa katuninungan asin pagkasararo kan bilog na kongregasyon kan banwaan nin Diyos! Magayunon nanggad na halimbawa ini para sa mga Kristiyanong kongregasyon ngunyan!

10. Paano sinusunod kan Namamahalang Grupo ngunyan an arugan na itinao kan namamahalang grupo kan inot na siglo?

¹⁰ Arog kan sinambit sa sinundan na kapitulo, arog kan namamahalang grupo kan inot na siglo, an Namamahalang Grupo kan Mga Saksi ni Jehova ngunyan nagsasarig ki Jehova, an Soberano kan Uniberso, asin ki Jesu-Cristo, an Payo kan kongregasyon, para sa paggiya sa gabos na bagay.c (1 Cor. 11:3) Paano ninda ini ginigibo? Ini an paliwanag ni Albert D. Schroeder, na naglingkod bilang miyembro kan Namamahalang Grupo puon 1974 sagkod na matapos an saiyang buhay digdi sa daga kan Marso 2006: “An Namamahalang Grupo nagmimiting kada Miyerkules, na pinupunan an miting paagi sa pamibi asin hinahagad an pagdirehir kan espiritu ni Jehova. Ginigibo an tunay na paghihinguwa tanganing siguraduhon na an gabos na bagay na inaasikaso asin gabos na desisyon na ginigibo kauyon kan Tataramon nin Diyos, an Bibliya.” Kaagid kaiyan, si Milton G. Henschel, na haloy na nagin miyembro kan Namamahalang Grupo asin natapos an saiyang buhay sa daga kan Marso 2003, may ihinapot na sarong mahalagang marhay na hapot sa mga magradwar sa ika-101 klase kan Watchtower Bible School of Gilead. An hapot niya, “Igwa daw nin iba pang organisasyon digdi sa daga na an Namamahalang Grupo kaiyan nagkokonsulta sa Tataramon nin Diyos, an Bibliya, bago gumibo nin mahalagang mga desisyon?” Malinaw an simbag—mayo nin iba pa.

11. Paano ipinaabot sa mga kongregasyon an desisyon kan namamahalang grupo?

¹¹ Gabos sa namamahalang grupo sa Jerusalem nagkauruyon sa sarong desisyon sa isyu manungod sa pagturi. Alagad tanganing humirong may pagkasararo an mga tugang sa mga kongregasyon, kaipuhan na ipaabot sa sainda an desisyon sa malinaw, positibo, asin nakakapakusog na paagi. Paano iyan gigibuhon? Ini an sabi kan pagkasaysay: “An mga apostol asin an kamagurangan, kaiba an bilog na kongregasyon, nagdesisyon na magsugo sa Antioquia nin mga lalaking pinili hali sa sainda, na maiba ki Pablo saka ki Bernabe; isinugo ninda si Judas na inaapod na Barsabas asin si Silas, mga lalaking nanginginot sa mga tugang.” Apuwera kaiyan, naggibo man nin surat asin ipinadara sa mga lalaking ini tanganing basahon sa gabos na nasa kongregasyon sa Antioquia, Siria, asin Cilicia.—Gibo 15:22-26.

12, 13. Ano an marahay na naisagibo kan (a) pagsugo ki Judas asin Silas? (b) pagpadara nin surat hali sa namamahalang grupo?

¹² Bilang “mga lalaking nanginginot sa mga tugang,” lubos na kuwalipikado si Judas asin Silas na magin mga representante kan namamahalang grupo. Malinaw na ipapahiling kan pagpadara nin delegasyon na kompuwesto nin apat na lalaki na an mensaheng dara ninda bako lang basta simbag sa isyu manungod sa pagturi, kundi saro man ining bagong instruksiyon hali sa namamahalang grupo. An presensiya kan “mga lalaking pinili” na ini makakatabang na magin mas dayupot sa mga Kristiyanong Judio sa Jerusalem an mga Kristiyanong Hentil sa mga kongregasyon sa luwas kan Jerusalem. Saro nanggad ining madunong asin mamumuton na areglo! Siguradong nagresulta iyan nin katuninungan asin pagkasararo sa banwaan nin Diyos.

¹³ An surat nagtao nin malinaw na paggiya sa mga Kristiyanong Hentil bako lang sa isyu manungod sa pagturi kundi pati man sa kun ano an dapat nindang gibuhon tanganing makamtan an pag-uyon asin bendisyon ni Jehova. Ini an sabi sa pinakaimportanteng parte kan surat: “Pinagmarhay kan banal na espiritu asin niyamo mismo na dai na magdagdag pa nin pagabat sa saindo apuwera kan mga bagay na ini na kaipuhan nanggad: na padagos na maglikay sa mga bagay na inatang sa mga idolo, sa dugo, sa pagkakan nin mga hayop na tinilok, asin sa seksuwal na imoralidad. Kun pagmamaigutan nindong rayuan an mga bagay na ini, mapapakarhay kamo. Ingatan tabi nindo an saindong sadiri.”—Gibo 15:28, 29.

14. Paano nagin posible an pagkasararo kan mga lingkod ni Jehova sa nagkakabarangang kinaban sa ngunyan?

¹⁴ Sa ngunyan, an Mga Saksi ni Jehova, na labi nang 8,000,000 sa labing 100,000 na kongregasyon sa bilog na daga, nagkakasararo man sa mga tinutubod asin gibuhon. Paano nagin posible an pagkasararong iyan, lalo na huling an mga tawo sa kinaban ngunyan grabe an pagkabaranga saka kariribukan? Nagkakasararo kita, panginot na, huli sa malinaw asin mapagtitiwalaan na paggiya na itinatao ni Jesu-Cristo, an Payo kan kongregasyon, paagi kan “maimbod asin mapagmansay na uripon,” na iyo an Namamahalang Grupo. (Mat. 24:45-47) Nagkakasararo man kita huli sa pagigin andam na makikooperar kan pambilog na kinaban na kasararuan nin magturugang sa paggiyang itinatao kan Namamahalang Grupo.

15, 16. Ano an nagin reaksiyon kan mga kongregasyon sa instruksiyon hali sa namamahalang grupo, asin taano ta positibo an nagin resulta?

¹⁵ Sinabi pa kan pagkasaysay sa Mga Gibo na kan an delegasyon nin mga tugang na haling Jerusalem makaabot sa Antioquia, “tinipon ninda an gabos na disipulo saka itinao sa sainda an surat.” Ano an nagin reaksiyon kan mga tugang sa instruksiyon na hali sa namamahalang grupo? “Pagkabasa [kan surat], nag-urugma sinda dahil sa nakakapakusog na mga tataramon.” (Gibo 15:30, 31) Apuwera kaiyan, “pinarigon [ni Judas asin Silas] an buot kan mga tugang paagi sa dakul na diskurso asin pinakusog an mga ini.” Inapod na “mga propeta” an duwa huling ipinahayag o ihinayag ninda an kabutan nin Diyos, kun paanong si Bernabe, Pablo, asin an iba pa inapod man na mga propeta.—Gibo 13:1; 15:32; Exo. 7:1, 2.

¹⁶ Malinaw na binendisyunan ni Jehova an ginibong mga pamamaagi nin pagresolber sa isyu. Taano ta positibo an nagin resulta? Daing duda, dahil iyan sa malinaw asin napapanahon na instruksiyon kan namamahalang grupo basado sa Tataramon nin Diyos asin sa paggiya kan banal na espiritu. Saro pa, huli iyan sa pagsugo nin mga tugang na nagpaabot kan desisyon sa mga kongregasyon sa mamumuton na paagi.

17. Sa anong mga paagi nakakaagid ki Pablo, Bernabe, Judas, asin Silas an mga paraataman nin sirkito ngunyan?

¹⁷ Bilang pagsunod sa arugan na iyan, an Namamahalang Grupo kan Mga Saksi ni Jehova ngunyan nagtatao nin napapanahon na paggiya sa pambilog na kinaban na kasararuan nin magturugang. Pag may nagigibo sindang mga desisyon, malinaw asin direktang ipinapaabot an mga iyan sa mga kongregasyon. An sarong paagi iyo an mga pagdalaw kan mga paraataman nin sirkito. An mapagsakripisyong mga brother na ini nagbibiyahe puon sa sarong kongregasyon pasiring sa saro pang kongregasyon tanganing magtao nin malinaw na instruksiyon asin mamumuton na pampakusog. Arog ni Pablo asin Bernabe, naggagamit sinda nin dakul na oras sa ministeryo, na ‘nagtutukdo saka nagpapahayag kan maugmang bareta mapadapit sa tataramon ni Jehova.’ (Gibo 15:35) Arog ni Judas asin Silas, pinaparigon ninda an buot “kan mga tugang paagi sa dakul na diskurso” asin pinapakusog sinda.

18. Paano masisigurado kan mga lingkod nin Diyos na padagos nindang makakamtan an bendisyon ni Jehova?

¹⁸ Kumusta man an mga kongregasyon? Ano an nakakatabang sa mga kongregasyon sa bilog na daga na padagos na magin matuninong asin nagkakauruyon sa nagkakabarangang kinaban sa ngunyan? Girumdumon na kan huri an disipulong si Santiago nagsurat: “An kadunungan na gikan sa itaas inot sa gabos dalisay, tapos mapagpatuninong, rasonable, andam na magsunod . . . Dugang pa, an bunga nin katanusan isinasabwag sa matuninong na mga kamugtakan para sa mga nakikipagkatuninungan.” (Sant. 3:17, 18) Dai ta aram kun su miting sa Jerusalem an nasa isip digdi ni Santiago. Alagad base sa napag-ulayan tang mga pangyayari sa Gibo kapitulo 15, makakasigurado kita na padagos tang makakamtan an bendisyon ni Jehova kun nagkakasararo kita asin nagsusunod sa mga instruksiyon kan mga nanginginot.

19, 20. (a) Ano an nagpapahiling na igwa na nin katuninungan asin pagkasararo sa kongregasyon sa Antioquia? (b) Ano an magigibo na ngunyan ni Pablo asin Bernabe?

¹⁹ Malinaw na igwa na nin katuninungan asin pagkasararo sa kongregasyon sa Antioquia. Imbes na makidiskutir sa mga tugang na hali sa Jerusalem, inapresyar na marhay kan mga tugang sa Antioquia an pagbisita ni Judas asin Silas. Sinabi kan pagkasaysay: “Nagpirmi sinda duman nin pirang panahon, asin kan pahali na sinda, sinabi kan mga tugang na lugod matiwasay sindang makabalik sa mga nagsugo sa sainda,” buot sabihon, sa Jerusalem.d (Gibo 15:33) Makakasigurado kita na naugma man an mga tugang sa Jerusalem kan madangog ninda an mga sinabi kan duwang lalaking ini manungod sa saindang pagbiyahe. Salamat sa daing kapantay na kabuutan ni Jehova, mapanggana nindang naisagibo an saindang misyon!

²⁰ Makakapokus na ngunyan si Pablo asin Bernabe, na nagdanay sa Antioquia, sa saindang paghihinguwang panginutan an gibuhon na pag-eebanghelyo, na iyo man an ginigibo kan mga paraataman nin sirkito sa ngunyan pag nagdadalaw sinda sa mga kongregasyon na nakaasignar sa sainda. (Gibo 13:2, 3) Bendisyon nanggad sinda sa mga lingkod ni Jehova! Alagad, paano pa urog na ginamit asin benindisyunan ni Jehova an duwang maigot na ebanghelisador na ini? Iyan an aaramon ta sa sunod na kapitulo.