Anong Klase nin Diyos si Jehova?

Pag naiisip mo an Diyos na Jehova, ano an minalaog sa isip mo manungod sa saiya? Naiisip mo daw na siya kahanga-hangang marhay pero harayuon saimo, arog kan mga bituon sa harayong galaksiya? O naiisip mo daw na saro sana siyang makusog na puwersa, arog nin kikilat saka daguldol? Ano talaga si Jehova, siisay siya? Sinasabi sato kan Bibliya kun ano an mga kuwalidad ni Jehova. Sinasabi man kaiyan na nagmamalasakit siya sa saimo.

1. Taano ta dai ta nahihiling an Diyos?

“An Diyos sarong Espiritu.” (Juan 4:24) Si Jehova mayo nin pisikal na hawak. Saro siyang dai nahihiling na Persona na nakaistar sa langit, sarong lugar na dai ta nahihiling.

2. Ano an pira sa mga kuwalidad ni Jehova?

Dai ta nahihiling si Jehova. Pero pag nabisto ta siya, mamumutan ta siya dahil saro siyang tunay na Persona na may magagayon na kuwalidad. Sinasabi kan Bibliya: “Si Jehova mamumuton sa hustisya, asin dai niya babayaan an mga maimbod sa saiya.” (Salmo 37:28) Siya “mamumuton na marhay asin mahihirakon,” lalo na sa mga tawong nagsasakit. (Santiago 5:11) “Harani si Jehova sa mga nalugadan an puso; iliniligtas niya an mga nangluluya an buot.” (Salmo 34:18, nota sa ibaba) Saka aram mo daw na may epekto ki Jehova an mga ginigibo ta? Nakukulgan siya saka namumundo pag pinipili kan saro na gumibo nin sala. (Salmo 78:40, 41) Pero nauugma siya pag ginigibo nin saro an tama.—Basahon an Talinhaga 27:11.

3. Paano ipinapahiling ni Jehova na namumutan niya kita?

Pagkamuot an nangingibabaw na kuwalidad ni Jehova. Sa katunayan, “an Diyos pagkamuot.” (1 Juan 4:8) Buot sabihon, bako lang na an Diyos may pagkamuot kundi siya mismo pagkamuot. Ipinapahiling sa sato ni Jehova an pagkamuot niya bako lang paagi sa Bibliya kundi paagi man sa mga linalang niya. (Basahon an Gibo 14:17.) Halimbawa, pag-isipan kun paano niya kita linalang. Tinawan niya kita nin kakayahan na mahiling an magagayon na kulor, madangog an magagayon na musika, asin manamitan an masisiram na kakanon. Gusto niya na magin maugma kita.

ARAMON PA

4. Banal na espiritu—an aktibong puwersa nin Diyos

Kun kamot an ginagamit ta sa pagtrabaho, si Jehova man banal na espiritu an ginagamit. Itinutukdo kan Bibliya na an banal na espiritu bakong persona kundi an puwersa na ginagamit nin Diyos tanganing magibo an mga bagay-bagay. Basahon an Lucas 11:13 asin Gibo 2:17, dangan pag-ulayan an mga hapot na ini:

• “Ibububo” nin Diyos an saiyang banal na espiritu sa mga naghahagad kaiyan. Kaya ano sa hiling mo an banal na espiritu? Iyan daw persona, o aktibong puwersa nin Diyos? Taano ta nasabi mo iyan?

Ginagamit ni Jehova an saiyang banal na espiritu para maggibo nin makangangalas na mga bagay. Basahon an Salmo 33:6 asin 2 Pedro 1:20, 21, dangan pag-ulayan an hapot na ini:

• Ano an pira sa mga ginibo ni Jehova paagi sa saiyang banal na espiritu?

5. An magagayon na kuwalidad ni Jehova

Haloy na kaidtong nagsasamba si Moises sa saiyang Diyos. Pero gusto niya na mas mamidbid pa an saiyang Kaglalang. Kaya sinabi ni Moises sa saiya: “Ipaaram mo sa sako an saimong mga dalan, tanganing mamidbid taka.” (Exodo 33:13) Bilang simbag, sinabi ni Jehova ki Moises an pira sa Saiyang mga kuwalidad. Basahon an Exodo 34:4-6, dangan pag-ulayan an mga hapot na ini:

• Ano an pira sa mga kuwalidad ni Jehova na sinabi niya ki Moises?

• Arin sa mga kuwalidad ni Jehova an pinakagusto mo?

6. Nagmamalasakit si Jehova sa mga tawo

Uripon kaidto sa Ehipto an mga Hebreo, an banwaan nin Diyos. Ano an namatian ni Jehova sa pagsakit ninda? I-play an AUDIO asin subaybayan iyan, o basahon an Exodo 3:1-10. Dangan pag-ulayan an mga hapot.

AUDIO: Nagmalasakit Sainda si Jehova (2:45)

• Ano an itinutukdo saimo kan istoryang ini kun manungod sa namamatian ni Jehova sa pagsakit nin mga tawo?—Hilingon an bersikulo 7 asin 8.

• Ano sa hiling mo, gusto daw talagang tabangan ni Jehova an mga tawo saka kaya niya daw talagang gibuhon iyan? Taano ta nasabi mo iyan?

7. Mahihiling sa mga linalang an mga kuwalidad ni Jehova

Mahihiling an mga kuwalidad ni Jehova sa mga linalang niya. I-play an VIDEO. Dangan basahon an Roma 1:20, asin pag-ulayan an hapot.

VIDEO: Ihinahayag kan mga Linalang an Pagkamuot ni Jehova—Hawak nin Tawo (1:57)

• Anong mga kuwalidad ni Jehova an nahihiling mo sa mga linalang niya?

SUMARYO

Si Jehova sarong Persona na dai ta nahihiling. May magagayon siyang kuwalidad, asin an pagkamuot an nangingibabaw diyan.

Rebyu

• Taano ta dai ta nahihiling si Jehova?

• Ano an banal na espiritu?

• Ano an pira sa mga kuwalidad ni Jehova?

HILINGON MAN

Mas midbidon pa si Jehova paagi sa pag-aram sa saiyang apat na panginot na kuwalidad.

“Ano an mga Kuwalidad nin Diyos?” (An Torrengbantayan Num. 1 2019)

Pag-isipan an patunay na si Jehova bakong puwersa na yaon maski sain.

“An Diyos Daw Yaon sa Gabos na Lugar?” (Artikulo sa jw.org/bcl)

Hilingon kun taano ta sinasabi kan Bibliya na kamot nin Diyos an banal na espiritu.

“Ano an Banal na Espiritu?” (Artikulo sa jw.org/bcl)

Nasakitan an sarong lalaking buta na maniwala na nagmamalasakit an Diyos sa saiya. Aramon kun ano an nakapabago sa paniniwala niyang iyan.

“Nadarama Ko Na Ngayon na Nakatutulong Ako sa Iba” (Ang Bantayan, Oktubre 1, 2015)