An Tataramon ni Jehova Nandadaog!

“Sa makapangyarihan na paagi an tataramon ni Jehova padagos na nagtalubo asin nandaog.”—GIBO 19:20.

 1. Ano an pag-oolayan sa pag-adal na ini sa libro kan Biblia na Mga Gibo kan mga Apostol?

BINUBUKASAN ni Jehova an sarong tata pasiring sa gibohon. Si Pablo, “sarong apostol sa mga nasyon,” nangorognang mangengenot sa gibohon na iyan. (Roma 11:13) An totoo, an padagos niatong pag-adal sa Mga Gibo kan mga Apostol nagpapaheling na sia nasa makaoogmang mga pagbiyahe bilang misyonero.—Gibo 16:6–19:41.

 2. (a) Paano si apostol Pablo naglingkod bilang pinasabngan nin Dios na parasurat magpoon kan mga 50 C.E. sagkod 56 C.E.? (b) Ano an nangyari mantang binibendisyonan nin Dios an ministeryo ni Pablo asin nin iba?

² Si Pablo saro man na parasurat na pinasabngan nin Dios. Magpoon kan mga 50 C.E. sagkod 56 C.E., isinurat nia an 1 asin 2 Tesalonica hale sa Corinto, an Mga Taga-Galacia hale sa siudad na iyan o sa Antioquia nin Siria, an 1 Corinto hale sa Efeso, 2 Corinto hale sa Macedonia, asin an Mga Taga-Roma hale sa Corinto. Asin mantang binibendisyonan nin Dios an ministeryo ni Pablo asin kan iba pa, “sa makapangyarihan na paagi an tataramon ni Jehova padagos na nagtalubo asin nandaog.”—Gibo 19:20.

Poon sa Asia Sagkod sa Europa

 3. Paano si Pablo asin an saiyang kairiba nagtao nin marahay na halimbawa mapadapit sa paggiya kan banal na espiritu?

³ Si Pablo asin an saiyang kairiba nagtao nin marahay na halimbawa sa pag-ako nin paggiya kan banal na espiritu. (16:6-10) Seguro paagi sa nadadangog na mga kapahayagan, pangatorogan, o bisyon, ipinangalad sainda kan espiritu an paghuhulit sa distrito nin Asia asin probinsia nin Bitinia, na kan huri naabot kan maogmang bareta. (Gibo 18:18-21; 1 Pedro 1:1, 2) Taano ta inolang kan espiritu an mas amay na paglaog? Pipira sana an trabahador, asin ginigiyahan sinda kan espiritu sa mas mabungang mga langtad sa Europa. Kaya ngonyan, kun may olang an dalan palaog sa sarong teritoryo, an mga Saksi ni Jehova naghuhulit sa ibang lugar, na nakasisierto na gigiyahan sinda kan espiritu nin Dios sa mga arog-karnero.

 4. Ano an reaksion sa naheling ni Pablo sa bisyon na sarong Macedonio na nakikimaherak na tabangan?

⁴ Dangan si Pablo asin an saiyang kairiba ‘inagihan’ an Misia, sarong rehiyon sa Asia Minor, bilang langtad sa pagmimisyonero. Alagad, sa sarong bisyon, naheling ni Pablo an sarong Macedonio na nakikimaherak na tabangan. Kaya an mga misyonero nagduman tolos sa Macedonia, sarong rehiyon sa Balkan Peninsula. Siring man, an dakol na Saksi ginigiyahan kan banal na espiritu na maglingkod ngonyan kun saen dakula an pangangaipo sa mga parabalangibog kan Kahadean.

 5. (a) Taano ta masasabi na an tataramon ni Jehova nandaog sa Filipos? (b) Sa anong paagi na an dakol na Saksi sa presenteng aldaw kapareho ni Lidia?

⁵ An tataramon ni Jehova nandaog sa Macedonia. (16:11-15) Sa Filipos, sarong kolonya na an kadaklan na nag-iistar mga siudadanong Romano, minalataw na pipira sana an Judio asin mayo nin sinagoga. Kaya an mga tugang nagduman sa “sarong lugar na pamibian” sa pangpang nin salog sa luwas kan siudad. Kaiba sa mga nanompongan duman iyo si Lidia, na posibleng sarong Judiang proselita na taga-Tiatira, sarong siudad sa Asia Minor na midbid sa industriya kaiyan na pagtugma. Sia nagtitinda nin tugmang purpura o mga tela asin gubing na iyan an kolor. Pakabautismohi ki Lidia asin sa saiyang pamilya, maigoton an saiyang pag-alok nin pag-istimar kaya si Lucas nagsurat: “Pinirit nia kami.” Pinasasalamatan niato an siring na mga tugang na babae ngonyan.

An Sarong Bantay sa Bilanggoan Nagtubod

 6. Paano an aktibidad nin demonyo nagbunga kan pagkabilanggo ni Pablo asin Silas sa Filipos?

⁶ Seguradong ikinaanggot ni Satanas an espirituwal na mga pangyayari sa Filipos, ta an aktibidad nin demonyo duman nagbunga kan pagkabilanggo ni Pablo asin Silas. (16:16-24) Sa laog nin dakol na aldaw sinusundan sinda nin sarong daragita na may “demonyo sa pagtoodtood” (sa literal, “sarong espiritu nin piton [o sawa]”). Tibaad an demonyo nagsagin an Pythian Apollo, sarong dios na guminadan daa sa sarong halas na an ngaran pyʹthon. An daragita nagtao nin dakulang ganansia sa saiyang mga kagurangnan paagi sa panhuhula. Tara, tibaad sia an nagsabi sa mga paraoma kun noarin matanom, sa mga daraga kun noarin mapaagom, asin sa mga minero kun saen hahanapon an bulawan! Sia daing ontok sa pagsunod sa mga tugang asin sa pagkurahaw: “An mga lalaking ini mga oripon kan Kaharohalangkaweng Dios, na nagbabalangibog sa saindo kan dalan nin kaligtasan.” Tibaad ipinasabi ini sa saiya kan demonyo tanganing palatawon na an saiyang mga hula ipinasabong nin Dios, alagad ta an mga demonyo mayo nin diretso na magbalangibog manongod ki Jehova asin sa saiyang probisyon para sa kaligtasan. Kan mapagal na si Pablo sa panriribok, pinaluwas nia an demonyo sa ngaran ni Jesus. Huling naraot an saindang negosyo, ginuyod kan mga kagurangnan kan daragita si Pablo asin Silas sa sadan, na duman sinda hinampak nin samulig. (2 Corinto 11:25) Dangan ibinilanggo sinda asin ibinugtak sa pandog an saindang mga bitis. An siring na mga kasangkapan naliliwat tanganing bikraton an mga tabay, na nagtatao nin makuring kolog.

 7. Para kiisay asin paano na an pagkabilanggo ni Pablo asin Silas sa Filipos nagbunga nin mga bendisyon?

⁷ An pagkabilanggong ini nagbunga nin mga bendisyon sa bantay asin sa saiyang pamilya. (16:25-40) Kaidtong matanga na si Pablo asin Silas namimibi asin inoomaw an Dios sa pag-awit, na nakasisierto na sia nasa sainda. (Salmo 42:8) Sa panale, binukasan nin sarong linog an mga pinto asin hinubad an gabos na gapos kan an mga kadena matangkas sa mga panalgan o lanob. An bantay natakot na mapadusahan nin kagadanan huli ta nakadulag an saiyang mga bilanggo. Maghuhugot na kutana sia kan si Pablo magkurahaw: “Dai mo pagkologan an saimong sadiri, huli ta uya kami gabos!” Sa pagdara ki Pablo asin Silas sa luwas, naghapot an bantay kun paano sia maliligtas. “Tumubod ka sa Kagurangnan na Jesus,” an simbag. Kan madangog an tataramon ni Jehova, “sia asin an saiyang harong tolos na nabautismohan.” Kanigoan an kagayagayahan na itinao kaiyan!

 8. Anong aksion an ginibo kan mga mahistrado sibil sa Filipos, asin ano an tibaad mangyari kun admitiron ninda an saindang sala sa publiko?

⁸ Kan sumunod na aldaw, an mga mahistrado sibil nagpatogon na paluwason si Pablo asin Silas. Alagad si Pablo nagsabi: ‘Hinampak ninda kami nin hayag na dai hinokoman, kami na mga siudadano nin Roma, asin binilanggo kami. Ngonyan paluluwason sana kami sa hilom? Pumadigdi sinda asin iluwas kami.’ Kun aadmitiron kan mga mahistrado an saindang sala sa publiko, tibaad mag-alangan sindang hampakon asin ibilanggo an ibang Kristiano. Huling dai napaluwas an mga siudadano nin Roma, nagduruman an mga mahistrado asin pinakiolayan an mga tugang na maghale, alagad an mga ini naghale sana pakatapos na mapakosog an mga kapagtubod. An siring na interes nagpapahiro ngonyan sa mga miembro kan Namamahalang Grupo asin sa iba pang nagbibiyaheng representante na sumongko asin magpakosog sa banwaan nin Dios sa bilog na daga.

An Tataramon ni Jehova Nandaog sa Tesalonica Asin Berea

 9. Sa anong paagi, na ginagamit pa sagkod ngonyan nin mga Saksi ni Jehova, na ‘ipinaliwanag asin pinatunayan’ ni Pablo na an Mesiyas kaipuhan na magsakit asin mabuhay liwat hale sa mga gadan?

⁹ An tataramon nin Dios sumunod na nandaog sa Tesalonica, an kabesera asin mayor na puerto nin Macedonia. (17:1-9) Duman si Pablo nakipagrasonan sa mga Judio, na “ipinaliliwanag asin pinatutunayan” na an Mesiyas kaipuhan na magsakit asin mabuhay liwat hale sa mga gadan. (Ginibo iyan ni Pablo paagi sa pagkokomparar kan mga hula sa mga pangyayari bilang kaotoban, arog kan ginigibo nin mga Saksi ni Jehova.) Kaya, an nagkapirang Judio, dakol na proselito, asin iba pa nagturubod. Kan an nagkapirang nag-iimon na Judio mag-iriba sa pagsururog pero dai nanompongan si Pablo asin Silas, dinara ninda si Jason asin iba pang tugang sa mga namomoon sa siudad asin pinagsahotan sinda nin sedisyon, putik na sahot na sagkod ngonyan ginagamit tumang sa banwaan ni Jehova. Minsan siring, binutasan an mga tugang pakatao ninda nin “igong piyansa.”

10. Sa anong sentido na an mga Judio sa Berea ‘maingat na siniyasat’ an Kasuratan?

¹⁰ Sumunod si Pablo asin Silas nagduman sa siudad nin Berea. (17:10-15) Duman an mga Judio ‘maingat na siniyasat’ an Kasuratan, arog kan isinasadol nin mga Saksi ni Jehova sa mga tawo ngonyan. An mga taga-Berea dai pinagdudahan si Pablo kundi nagsiyasat tanganing patunayan na si Jesus an Mesiyas. An resulta? An dakol na Judio asin an nagkapirang Griego (tibaad mga proselito) nagturubod. Kan an kadaklan ribokon nin mga Judiong taga-Tesalonica, ihinatod si Pablo kan mga tugang sa baybayon, na duman an iba sa saiyang kairiba tibaad nagsakay nin barko pa Piraeus (Piraiévs sa modernong aldaw), an siudad na puerto nin Atenas.

An Tataramon ni Jehova Nandaog sa Atenas

11. (a) Paano si Pablo mapusong nagpatotoo sa Atenas, alagad ta siisay an nakipagdiskutiran sa saiya? (b) Ano an ipinasentido nin nagkapira kan apodon ninda si Pablo na “matabil”?

¹¹ Mapusong patotoo an itinao sa Atenas. (17:16-21) Huli sa mga sinabi ni Pablo manongod ki Jesus asin sa pagkabuhay liwat, nakipagdiskutiran saiya an mga pilosopo. An iba Epicureo, na nagdoon nin kasingawan. An iba Estoico, na nagdodoon nin pagdisiplina sa sadiri. “Ano an boot sabihon kan matabil na ini?” an hapot nin iba. An “matabil” (sa literal, “paratuka nin banhi”) nagpapasentido na si Pablo garo gamgam na nagtutuka nin banhi asin nananao nin karukapidasong kaaraman pero kulang nin kadonongan. An iba nagsabi: “Garo sia parahayag nin ibang mga dios.” Seryoso ini, ta si Socrates nawaran nin buhay huli sa sahot na iyan. Dai nahaloy si Pablo dinara sa Areopago (Bolod ni Marte), na posibleng duman an nasa luwas na korte suprema nagtiripon harani sa Acropolis.

12. (a) Anong mga kabtang nin marahay na pagpapahayag sa publiko an risa sa pahayag ni Pablo sa Areopago? (b) Anong mga punto an idinoon ni Pablo manongod sa Dios, asin may anong mga resulta?

¹² An pahayag ni Pablo sa Areopago ekselenteng halimbawa nin saro na may epektibong introduksion, lohikong pagkasunodsunod, asin nakakokombensir na argumento—arog kan itinotokdo sa Teokratikong Paadalan sa Pagmiministro kan mga Saksi ni Jehova. (17:22-34) Sinabi nia na an mga taga-Atenas mas relihiyoso kisa iba. Tara, igwa pa ngani sinda nin altar para “Sa Dios na Dai Midbid,” tibaad tanganing malikayan na maanggot an siisay man na dios! Si Pablo nagtaram manongod sa Kaglalang na “ginibo hale sa sarong tawo an gabos na nasyon kan mga tawo” asin “ibinugtak an itinalaan na mga panahon asin an mga kasagkodan kan erokan nin mga tawo,” arog baga kan kun noarin popohoon an mga Cananeo. (Genesis 15:13-21; Daniel 2:21; 7:12) Puwedeng manompongan an Dios na ini, “huli ta kita man mga aki nia,” sabi ni Pablo, na nasambitan an pagkalalang ni Jehova sa tawo asin kinotar an saindang mga poeta na si Aratus asin Cleanthes. Bilang mga aki nin Dios, dai niato maninigong isipon na an sangkap na Kaglalang siring sa idolo na ginibo nin bakong sangkap na tawo. Kaidto pinabayaan nin Dios an siring na ignoransia pero ngonyan sinasabihan nia an katawohan na magsolsol, ta sia nagtalaan nin aldaw na hokoman an mga tawo paagi sa saiyang Nombrado. Mantang si Pablo “nagpapahayag kan maogmang bareta ki Jesus,” aram kan mga nagdadangog sa saiya na an boot niang sabihon si Cristo an Hokom na iyan. (Gibo 17:18; Juan 5:22, 30) An pahayag manongod sa pagsolsol ikinauyam kan mga Epicureo, asin naako kan mga pilosopong Griego an mga komento manongod sa inmortalidad pero bakong an manongod sa kagadanan asin pagkabuhay liwat. Maliwanag na, kapareho nin dakol na ngonyan dai nag-iintindi sa maogmang bareta, an iba nagsabi: ‘Madangog kami saimo sa ibang panahon.’ Pero an huwes na si Dionisio asin an iba pa nagturubod.

An Tataramon nin Dios Nandaog sa Corinto

13. Paano sinuportaran ni Pablo an saiyang sadiri sa ministeryo, asin anong katimbang sa modernong aldaw an manonompongan niato?

¹³ Si Pablo nagdagos sa Corinto, kabesera kan probinsia nin Acaya. (18:1-11) Duman nanompongan nia si Aquila asin Priscila, na nagduman kan pagbotan ni Claudio Cesar an mga Judio na bakong mga siudadano nin Roma na humale sa Roma. Tanganing masuportaran an sadiri sa ministeryo, si Pablo naggibo nin mga tolda kaiba kan Kristianong mag-agom na ini. (1 Corinto 16:19; 2 Corinto 11:9) An pagtabas asin pagtahi nin matagas na telang gibo sa balukag nin kanding magabat na trabaho. Siring man, an mga Saksi ni Jehova nagtatagama para sa saindang materyal na mga pangangaipo paagi sa sekular na trabaho, pero an ministeryo an saindang propesyon.

14. (a) Kan napapaatubang sa daing ontok na pagtumang kan mga Judio sa Corinto, ano an ginibo ni Pablo? (b) Paano naparigon an boot ni Pablo na maninigo siang magdanay sa Corinto, alagad paano ginigiyahan ngonyan an banwaan ni Jehova?

¹⁴ An mga Judiong taga-Corinto daing ontok sa pagmuda mantang ibinabalangibog ni Pablo an pagka-Mesiyas ni Jesus. Kaya ipinagpag nia an saiyang gubing tanganing nigaran an paninimbagan sa sainda asin nagpoon na mangenot sa mga pagtiripon sa harong ni Ticio Justo, na posibleng sarong Romano. An dakol (kaiba an dating nangengenot na opisyal kan sinagoga na si Crispo asin an saiyang pamilya) nagin bautisadong nagturubod. Kun huli sa pagtumang kan mga Judio inisip ni Pablo kun baga magdadanay pa sia sa Corinto, nawara an pagduda kan sabihan sia kan Kagurangnan sa bisyon: ‘Dai ka matakot. Padagos kang magtaram, huli ta ako nasa saimo asin mayo nin magibo sa saimo nin maraot. Dakol an sakong mga tawo sa siudad na ini.’ Kaya si Pablo nagpadagos sa pagtokdo kan tataramon nin Dios duman, sa laog nin sarong taon asin anom na bulan. Minsan ngani an banwaan ni Jehova dai nag-aako ngonyan nin mga bisyon, an pamibi asin paggiya kan banal na espiritu kapwa nagtatabang sainda na gumibo nin siring man na madonong na mga desisyon na nakakaapektar sa mga intereses kan Kahadean.

15. Ano an nangyari kan si Pablo iatubang ki Pronconsul Galion?

¹⁵ Dinara si Pablo kan mga Judio ki Proconsul Junio Galion. (18:12-17) Ipinasentido ninda na si Pablo nangongombertir sa ilegal na paagi—sarong putik na sahot na ginigibo ngonyan nin Griegong mga klerigo tumang sa mga Saksi ni Jehova. Aram ni Galion na si Pablo dai nin naginibong krimen asin na an mga Judio dai man nin malasakit sa Roma asin sa ley kaiyan, kaya pinahale nia sinda. Kan bugbugon nin mga miron si Sostenes, an bagong nangengenot na opisyal sa sinagoga, dai nakilabot si Galion, seguro sa pag-isip na an nangengenot sa pagsururog tumang ki Pablo nag-aako kan maninigo sa saiya.

16. Taano ta tama man na ipaaris ni Pablo an saiyang buhok may koneksion sa sarong panuga?

¹⁶ Si Pablo nagbarko hale sa puerto sa Aegean na Cencrea pasiring sa Efeso, sarong siudad sa Asia Minor. (18:18-22) Bago kan biyaheng idto ‘ipinaaris nia an saiyang buhok, ta sia may panuga.’ Dai sinasabi kun baga ginibo ni Pablo an kapanugaan bago nagin parasunod ni Jesus o kun baga ini an kapinonan o katapusan kan panahon nin kapanugaan. An mga Kristiano dai sakop kan Pagboot, pero idto itinao nin Dios asin banal, asin bako man na kasalan an siring na panuga. (Roma 6:14; 7:6, 12; Galacia 5:18) Sa Efeso, si Pablo nakipagrasonan sa mga Judio, na nanunugang bumuwelta kun bobooton nin Dios. (An panugang iyan naotob sa huri.) An pagbuwelta nia sa Antioquia nin Siria tuminapos sa saiyang ikaduwang pagbiyahe bilang misyonero.

An Tataramon ni Jehova Nandaog sa Efeso

17. Mapadapit sa bautismo, anong instruksion an kaipuhan ni Apolos asin nin iba pa?

¹⁷ Dai nahaloy pinonan ni Pablo an saiyang ikatolong biyahe sa pagmimisyonero (mga 52-56 C.E.). (18:23–19:7) Mientras tanto sa Efeso, si Apolos nagtotokdo manongod ki Jesus pero an aram sana an bautismo ni Juan bilang simbolo nin pagsolsol sa mga kasalan tumang sa tipan nin Pagboot. Si Priscila asin Aquila “ipinaliwanag nin mas tama an dalan nin Dios sa saiya,” na posibleng ipinaliliwanag na kaiba sa pagpabautismo siring ki Jesus an pagpalubog nin saro sa tubig asin pag-ako kan ibinubong banal na espiritu. Pakatapos na mangyari an bautismo sa banal na espiritu kan Pentecostes 33 C.E., an siisay man na nabautismohan sa bautismo ni Juan kaipuhan na mabautismohan liwat sa ngaran ni Jesus. (Mateo 3:11, 16; Gibo 2:38) Dangan sa Efeso, an mga 12 Judiong lalaki na nagpabautismo sa bautismo ni Juan “nagpabautismo sa ngaran kan Kagurangnan na Jesus” sa solamenteng pagpabautismo liwat na nasusurat sa Kasuratan. Kan idoon sa sainda ni Pablo an saiyang kamot, sinda nag-ako kan banal na espiritu asin nin duwang milagrosong tanda nin langitnon na pag-ako—an pagtaram sa laen-laen na tataramon asin paghula.

18. Saen naghulit si Pablo kan nasa Efeso, asin may anong resulta?

¹⁸ Si Pablo tunay na nagin masibot sa Efeso, siudad na may mga 300,000 na habitante. (19:8-10) An templo duman kan diosang si Artemis saro sa pitong ngangalasan sa suanoy na kinaban, asin an teatro duman may tukawan para sa 25,000. Sa sinagoga, si Pablo ‘naggamit nin pangongombensir’ paagi sa pagtao nin nakakokombensir na mga argumento pero naghale kan may magtaram na may pagmuda sa An Dalan, o pamumuhay basado sa pagtubod ki Cristo. Sa laog nin duwang taon, si Pablo nagpahayag aroaldaw sa auditoryo kan eskuwelahan ni Tirano, asin “an tataramon” nakalakop sa bilog na distrito nin Asia.

19. Ano an nangyari sa Efeso na nagpangyari na ‘an tataramon ni Jehova nagtalubo asin nandaog’ duman?

¹⁹ Ipinaheling nin Dios an pag-oyon sa aktibidad ni Pablo paagi sa pagpangyari saiya na makagibo nin mga pagpaomay asin magpaluwas nin mga demonyo. (19:11-20) Pero an pitong aki kan pangenot na saserdoteng si Esceva dai nakapaluwas nin demonyo sa ngaran ni Jesus ta dai sinda nagrerepresentar sa Dios asin ki Cristo. Nalugadan pa ngani sinda kan lalaking may demonyo! Huli kaini natakot an mga tawo, asin “an ngaran kan Kagurangnan na Jesus padagos na napamuraway.” An mga nagturubod pinagdenunsiar an saindang mga gibong okulto asin sinolo sa publiko an saindang mga libro na may mga orasyon asin pormula sa mahika. “Kaya,” an surat ni Lucas, “sa makapangyarihan na paagi an tataramon ni Jehova padagos na nagtalubo asin nandaog.” Ngonyan man, an mga lingkod nin Dios nagtatabang na makalda an mga tawo sa demonismo.—Deuteronomio 18:10-12.

An Relihiyosong Pagkapanatiko Dai Nagigin Mapanggana

20. Taano an mga platero sa Efeso ta nagsutsut nin pagkariribok, asin paano idto natapos?

²⁰ An mga Saksi ni Jehova parateng napapaatubang sa anggot na mga pagsururog, asin iyo man an mga Kristiano sa Efeso. (19:21-41) Mantang nagdadakol an mga minatubod, si Demetrio asin an iba pang platero napierde ta mas kadikit na an nagbakal kan saindang mga aroaltar na pirak kan may dakol na susong diosa sa pagigin mainaki na si Artemis. Sinutsutan ni Demetrio, dinara nin sarong grupong magkasururog an kairiba ni Pablo na si Gayo asin Aristarco sa teatro, pero dai tinogotan kan mga disipulo na maglaog si Pablo. Pati an pirang komisyonado kan mga kapiyestahan asin karawat nakimaherak na dai sia lumaog sa peligrong iyan. Sa laog nin mga duwang oras, an grupong magkasururog nagkurahaw: “Dakula si Artemis kan mga taga-Efeso!” Sa katapustapusi, an rehistrador kan siudad (na iyo an namamayo sa gobyerno munisipal) nagsabi na puwedeng iatubang kan mga platero an saindang mga sahot sa sarong proconsul, na autorisadong gumibo nin hudisyal na mga desisyon, o an saindang kaso puwedeng desisyonan sa sarong “regular na asamblea” nin mga siudadano. Ta kun dai, an mga kaiba sa iregular na asambleang ini puwedeng akusaron nin Roma nin panriribok. Dangan, pinahale nia sinda.

21. Sa anong paagi na binendisyonan nin Dios an gibo ni Pablo, asin paano nia binibendisyonan an sa mga Saksi ni Jehova ngonyan?

²¹ Si Pablo tinabangan nin Dios na maatubang an laen-laen na pagbalo asin binendisyonan an saiyang mga paghihingoa na tabangan an mga tawo na isikwal an relihiyosong sala asin akoon an katotoohan. (Ikomparar an Jeremias 1:9, 10.) Kanigoan an pasalamat niato na binibendisyonan man kan satong langitnon na Ama an satong gibohon! Kaya, ngonyan arog kaidtong enot na siglo, ‘an tataramon ni Jehova nagtatalubo asin nandadaog.’

Ano an Isisimbag Nindo?

◻ Anong halimbawa an itinao ni Pablo sa pag-ako kan paggiya kan banal na espiritu?

◻ Sa anong paagi, na sagkod ngonyan ginagamit nin mga lingkod ni Jehova, na ‘ipinaliwanag asin pinatunayan’ ni Pablo an mga bagay?

◻ Ano an pagkakapareho nin mga simbag sa pahayag ni Pablo sa Areopago asin sa paghuhulit kan mga Saksi ni Jehova?

◻ Paano sinuportaran ni Pablo an saiyang sadiri sa ministeryo, asin ano an katimbang kaini sa modernong aldaw?

◻ Arog kan ginibo nia sa gibohon ni Pablo, paano binendisyonan nin Dios an gibohon kan mga Saksi ni Jehova ngonyan?

[Mga ritrato sa pahina 8, 9]

An tataramon ni Jehova nandaog sa

1. Filipos

2. asin 3. Atenas

4. asin 6. Efeso

5. Roma

[Credit Line]

Retrato Num. 4: Manley Studios