Inorganisar ni Pablo an mga Kontribusyon na Ayuda Para sa mga Banal

AN ESPIRITUWAL na intereses an may pangenot na halaga para sa tunay na mga Kristiano. Minsan siring, an pagmalasakit sa pisikal na ikararahay kan iba importante man sainda. Parate nindang tinatawan nin probisyon an mga nakakaeksperyensia nin kasakitan. Minomotibar an mga Kristiano kan pagkamoot sa tugang tanganing tabangan an mga kapagtubod na nangangaipo.​—Juan 13:​34, 35.

An pagkamoot sa saiyang espirituwal na mga tugang na lalaki asin babae an nagpahiro ki apostol Pablo tanganing organisaron an arambagan sa tahaw kan mga kongregasyon sa Acaya, Galacia, Macedonia, asin distrito nin Asia. Taano ta kinaipuhan na gibohon ini? Paano inorganisar an programa sa pag-ayuda? Ano an nagin reaksion? Asin taano ta maninigo kitang magin interesado sa nangyari?

An Situwasyon kan Kongregasyon sa Jerusalem

Pagkatapos kan Pentecostes 33 C.E., an mga Judio asin proselito na hale kun saen na nagin mga disipulo kan Pentecostes nagdanay sa Jerusalem nin haloy-haloy tanganing makanood nin dugang pa manongod sa tunay na pagtubod. Kun kinakaipuhan, maogmang nagtabang an mga kapwa parasamba sa pagpasan kan kagabatan kan siring na halawig na pagdanay. (Gibo 2:​7-11, 41-44; 4:​32-37) An sibil na kariribokan tibaad nagbunga nin dugang pang pangangaipo mantang an nasyonalistang mga Judio nagsusutsut nin rebelyon asin madahas na pagsururog. Minsan siring, tanganing mayong magutom na parasunod ni Cristo, ginibo an aroaldaw na pagdistribwir sa nangangaipong mga babaeng balo. (Gibo 6:​1-6) Maisog na pinaglamag ni Herodes an kongregasyon, asin sa kabangaan nin dekada 40 C.E., dinanyaran nin makuring kakulangan nin kakanon an Judea. Kun para sa mga parasunod ni Jesus, an gabos na ini tibaad nagbunga kan inaapod ni Pablo na “mga pagdusa,” “kahorasaan,” asin “pagsamsam sa [saindang] mga rogaring.”​—Hebreo 10:​32-34; Gibo 11:​27–​12:1.

Kaidtong mga 49 C.E., an situwasyon grabe pa man giraray. Sa siring, pakapagkaoroyonan na si Pablo makonsentrar sa mga Hentil sa saiyang paghuhulit, sinadol sia ni Pedro, Santiago, asin Juan na “girumdomon an mga dukha.” Iyan an pinagmaigotan na gibohon ni Pablo.​—Galacia 2:​7-10.

Pag-organisar kan Arambagan

Dinirehiran ni Pablo an pagtipon nin pondo para sa dukhang mga Kristiano sa Judea. Kaidtong mga 55 C.E., sinabihan nia an mga taga Corinto: “Mapadapit sa arambagan na manongod sa mga banal, siring sa ipinagboot ko sa mga kongregasyon sa Galacia, iyan man an gibohon nindo. Sa kada enot na aldaw kan semana an lambang saro sa saindo sa saiyang sadiring harong magtagama na sono sa saiyang nakukua . . . [Dangan] an siisay man na pagmarahayon nindo sa surat, sinda an sakong susugoon na magdara kan saindong maboot na regalo sa Jerusalem.” (1 Corinto 16:​1-3) Pakalihis nin sarong taon sinabi ni Pablo na an Macedonia asin Acaya nagpapartisipar sa pag-ayuda. Asin kan ipinadara sa Jerusalem an bilog na halagang naako, an pagigin yaon duman kan mga delegado hale sa distrito nin Asia garo nagpaparisa na an mga kongregasyon sa rehion na iyan nagkontribwir man.​—Gibo 20:​4; 2 Corinto 8:​1-4; 9:​1, 2.

Dai nin siisay man na pinirit na magtao nin labi kisa kaya nia. Imbes, may koneksion iyan sa pagpantaypantay tanganing an ano man na sobra tibaad makahipno sa kakulangan sa tahaw kan mga banal sa Jerusalem asin Judea. (2 Corinto 8:​13-15) “Gumibo an lambang saro nin oyon sa napagdesisyonan nia sa saiyang puso,” an sabi ni Pablo, “bakong sa maraot na boot o sa kapiritan, huli ta an Dios namomoot sa maogmang paratao.”​—2 Corinto 9:7.

Tinawan nin marahay na rason kan apostol an mga taga Corinto na magin buka an palad. Si Jesus ‘nagin dukha huli sa sainda, tangani na sinda magin mayaman’ sa espirituwal. (2 Corinto 8:9) Daing duwa-duwa na bobooton nindang arogon an saiyang espiritu nin pagtatao. Dugang pa, huli ta pinayayaman sinda nin Dios “para sa lambang klase nin pagkamatinao,” tama sanang tumabang sinda sa pagtao kan mga pangangaipo kan mga banal.​—2 Corinto 9:​10-12.

Aktitud kan mga Nagpartisipar

Dakol kitang manonodan manongod sa boluntaryong pagtatao paagi sa pag-estudyar sa aktitud kan mga nagpartisipar sa programa nin pag-ayuda para sa mga banal kan enot na siglo. Labi pa sa pagmakolog sana para sa dukhang mga kapwa parasamba ni Jehova an ipinaheling kan arambagan. Ipinarisa kaiyan na igwa nin bogkos nin pagkanitugang sa pag-oltanan nin mga Kristianong Judio asin Hentil. An pagtao asin pag-ako nin mga kontribusyon nangahulogan nin pagkasararo asin pagkakatood sa pag-oltanan kan mga Hentil asin Judiong ini. An saindang paghihirirasan sa materyal siring man sa espirituwal.​—Roma 15:​26, 27.

Tibaad sa kapoonpooni dai man inimbitaran ni Pablo an mga Kristianong taga Macedonia na magpartisipar​—grabe man an saindang kadukhaan. Minsan siring, sinda ‘padagos na nakimaherak para sa pribilehio na pagtao.’ Tara, dawa ngani naeeksperyensiahan ninda an “dakulang pagbalo sa irarom nin kasakitan,” magayagaya sindang nagtao nin “labi pa sa saindang talagang kakayahan”! (2 Corinto 8:​1-4) An dakulang pagbalo sa sainda minalataw na kaiba an mga akusasyon na sinda nag-ootob nin sarong relihion na ilegal para sa mga Romano. Kaya natural sanang magkaigwa sinda nin pakikidamay sa mga tugang nindang taga Judea, na nag-aagi nin kaparehong mga kasakitan.​—Gibo 16:​20, 21; 17:​5-9; 1 Tesalonica 2:14.

Minsan ngani ginamit ni Pablo an enot na kaigotan kan mga taga Corinto para sa arambagan tanganing enkaminaron an mga taga Macedonia, nagluya an entusiasmo sa Corinto. Sinitar ngonyan kan apostol an pagigin buka an palad kan mga taga Macedonia tanganing motibaron an mga taga Corinto. Naheling niang kaipuhan na ipagirumdom sa sainda na panahon nang taposon an naponan ninda sarong taon na an nakaagi. Ano an nangyari?​—2 Corinto 8:​10, 11; 9:​1-5.

Pinonan ni Tito an arambagan sa Corinto, alagad may mga problemang naglataw na posibleng marhay na nakaolang sa saiyang paghihingoa. Pakatapos na makipag-olay ki Pablo sa Macedonia, nagbuelta si Tito kaiba an duwa pa tanganing pasarigon an kongregasyon sa Corinto asin taposon an arambagan. An nagkapira tibaad nag-insinwar na nagprobar si Pablo na aprobetsaran an mga taga Corinto. Kaya gayod nagsugo sia nin tolong lalaki tanganing taposon an arambagan asin nagtao nin rekomendasyon sa balang saro sa sainda. “Linilikayan niamo na an siisay man makaheling nin sala sa samo may koneksion sa bastanteng kontribusyon na ini na pamamahalaan niamo,” an sabi ni Pablo. “Huli ta kami ‘naggigibo nin sadiosan na pagtatagama, bako sanang sa pagheling ni Jehova, kundi sa pagheling man nin mga tawo.’”​—2 Corinto 8:​6, 18-23; 12:18.

Paghatod kan Kontribusyon

Kan tigsoli nin 56 C.E., an idinonar na kuarta andam na tanganing darahon sa Jerusalem. Maiba si Pablo sa delegasyon na pinili kan mga nagkontribwir. An Gibo 20:​4 nagsasabi: “Inibanan sia ni Sopater na aki ni Pirro na taga Berea, ni Aristarco asin Segundo na kabilang sa mga taga Tesalonica, asin ni Gayo na taga Derbe, patin ni Timoteo, asin hale sa distrito nin Asia si Tiquico asin Trofimo.” Minalataw na kaiba man ninda si Lucas, na tibaad irinirepresentar an mga Kristiano sa Filipos. Sa siring, kisuerra siyam na lalaki an nag-iba sa misyon na ini.

“An bilog na kantidad na natipon sa arambagan seguradong dakula,” an sabi kan nag-espesyalisar na si Dieter Georgi, “huli ta an ultimong mga paghihingoa, na imbuelto si Pablo asin kadakol na delegado, magigin sayang kutana kun bakong sulit an pagpapagal asin gastos.” An grupo bako sanang nakatabang na maseguro an seguridad kundi maprotehiran man si Pablo sa ano man na akusasyon nin pandadaya. An mga isinugong idto an nagrerepresentar sa mga kongregasyon na Hentil sa atubangan kan mga banal sa Jerusalem.

Naglalayag hale sa Corinto pa-Siria, an delegasyon makaaabot kutana sa Jerusalem sa Paskua. Minsan siring, an bareta na may pakanang gadanon si Pablo nagresulta sa pagbabago nin mga plano. (Gibo 20:3) Tibaad plano kan saiyang mga enemigo na gadanon sia sa dagat.

Si Pablo may ibang ikinapupurisaw. Bago humale, sinuratan nia an mga Kristiano sa Roma na mamibi na sia ‘iligtas logod sa mga daing pagtubod sa Judea asin na an saiyang ministeryo para sa Jerusalem magin makawiwili logod para sa mga banal.’ (Roma 15:​30, 31) Minsan ngani daing duda na aakoon kan mga banal an mga kontribusyon na may hararom na pagpasalamat, si Pablo tibaad nahahadit manongod sa pagkariribok na ibubunga sa tahaw kan mga Judio sa pankagabsan kan saiyang pag-abot.

Tunay nanggad na ginigirumdom kan apostol an mga dukha. Minsan ngani dai sinasabi kan Kasuratan kun kasuarin itinao an kontribusyon, pinaoswag kan paghatod kaiyan an pagkasararo asin pinangyari na ipaheling kan mga Kristianong Hentil sa mga kapagtubod na taga Judea an pagpasalamat para sa espirituwal na kayamanan na naako hale sa sainda. An pagpaheling ni Pablo sa templo dai nahaloy pagkaabot nia sa Jerusalem nagpukaw nin pagkariribok asin nagbunga kan pag-arestar sa saiya. Alagad sa katapustapusi ini an nagtao sa saiya nin mga oportunidad na makapagpatotoo sa mga gobernador asin hade.​—Gibo 9:​15; 21:​17-36; 23:​11; 24:​1–​26:32.

An Satong mga Kontribusyon Ngonyan

Poon kan enot na siglo, dakol na an nagbago​—alagad bako an pundamental na mga prinsipyo. Ipinaaaram nin tama sa mga Kristiano an pinansial na mga pangangaipo. An ano man na kontribusyon na itinatao ninda para sa mga nangangaipo maninigong gikan sa boot, motibado nin pagkamoot sa Dios asin sa kapwa tawo.​—Marcos 12:​28-31.

An pag-ayudang ginibo para sa mga banal kan enot na siglo nagpapaheling na an pagdirehir sa siring na mga kontribusyon dapat na organisadong marhay asin asikasohon sa maingat asin onestong paagi. Siempre, aram ni Jehova Dios an mga pangangaipo, asin naggigibo sia nin probisyon para sa saiyang mga lingkod tanganing makapagpadagos sinda sa paghiras sa iba kan maogmang bareta kan Kahadean sa ibong nin mga kasakitan. (Mateo 6:​25-34) Pero, gabos kita puedeng gumibo kan kabtang ta, ano man an satong pinansial na kamugtakan. Sa paaging iyan, ‘an tawo na igwa nin dakol dai magsosobra, asin an tawo na may kadikit dai magkukulang.’​—2 Corinto 8:15.