An Ministeryo sa Harong-Harong​—⁠Taano ta Importante Iyan Ngonyan?

“Aroaldaw sa templo asin sa harong-harong nagpadagos sinda na daing ontok sa pagtokdo asin pagpahayag kan maogmang bareta dapit sa Cristo, si Jesus.”—GIBO 5:42.

1, 2. (a) Anong paagi nin paghuhulit midbid na marhay an Mga Saksi ni Jehova? (b) Ano an pag-oolayan niato sa artikulong ini?

PARATE sindang naheheling sa haros gabos na nasyon sa daga. Duwang indibiduwal na areglado an bulos an minadolok sa sarong harong asin naghihingoang ihiras sa kagharong an halipot na mensahe hale sa Biblia mapadapit sa Kahadean nin Dios. Kun an kagharong nagpapaheling nin interes sa mensahe, sinda puedeng mag-alok nin babasahon na basado sa Biblia asin nin daing bayad na pag-adal sa Biblia. Dangan nagpapadagos sinda sa sunod na harong. Kun nakikikabtang kamo sa gibohon na ini, posibleng marhay na maririsa nindo na sa parate midbid na kamo kan mga tawo bilang saro sa Mga Saksi ni Jehova dawa bago pa kamo magtaram. Tunay nanggad na an ministeryo sa harong-harong nagin nang midbidan niato.

² Laen-laen na paagi an ginagamit niato tanganing otobon an itinaong sugo ni Jesus na maghulit asin gumibo nin mga disipulo. (Mat. 28:19, 20) Nagpapatotoo kita sa mga sadan, kanto nin tinampo, asin sa iba pang pampublikong lugar. (Gibo 17:17) Nakikikomunikar kita sa dakol na tawo paagi sa telepono asin surat. Ipinapaabot niato an mga katotoohan sa Biblia sa mga nanonompongan niato durante kan satong aroaldaw na mga aktibidad. Igwa pa ngani kita nin opisyal na Web site, na nagtatao nin basado sa Bibliang impormasyon sa labing 300 na lenguahe.a An gabos na paaging ini nagbubunga nin marahay na mga resulta. Pero, sa kadaklan na lugar, an pangenot na paagi niato sa pagpalakop kan maogmang bareta iyo an paghuhulit sa harong-harong. Ano an basehan sa paaging ini nin paghuhulit? Paano iyan nagagamit na marhay kan banwaan nin Dios sa presenteng mga panahon? Asin taano ta mahalaga iyan ngonyan?

An Pamamaagi kan mga Apostol

 3. Anong mga instruksion manongod sa paghuhulit an itinao ni Jesus sa mga apostol, asin ano an ipinaparisa kaini manongod sa kun paano sinda dapat na maghulit?

³ An paagi nin paghuhulit sa harong-harong may basehan sa Kasuratan. Kan sugoon ni Jesus na maghulit an mga apostol, tinawan nia sinda nin instruksion: “Sa ano man na siudad o baryo kamo lumaog, hanapon nindo kun siisay dian an maninigo.” Paano ninda hahanapon an mga maninigo? Sinabihan sinda ni Jesus na magduman sa harong kan mga tawo, na nagsasabi: “Sa paglaog nindo sa harong, taratarahon nindo an kasararo sa harong; asin kun an harong maninigo, an katoninongan na minawot nindo dian pabayaan na dumatong dian.” Madalaw daw sinda minsan ngani dai man sinda inimbitaran? Mangnohon an sinabi pa ni Jesus: “Saen man na an siisay man dai umako sa saindo o dai maghinanyog sa saindong mga tataramon, sa pagluwas nindo sa harong na iyan o sa siudad na iyan pagpagon nindo an kabokabo sa saindong mga bitis.” (Mat. 10:11-14) Linilinaw kan mga instruksion na ini na mantang an mga apostol ‘naglilibot sa teritoryo na nagduduman sa mga baryo, na nagpapahayag kan maogmang bareta,’ kaipuhan na magkaigwa sinda nin inisyatiba na dalawon an mga tawo sa saindang harong.—Luc. 9:6.

 4. Saen espesipikong sinasambit sa Biblia an paghuhulit sa harong-harong?

⁴ Espesipikong sinasambit kan Biblia na an mga apostol naghulit sa harong-harong. Halimbawa, an Gibo 5:42 nagsasabi manongod sa sainda: “Aroaldaw sa templo asin sa harong-harong nagpadagos sinda na daing ontok sa pagtokdo asin pagpahayag kan maogmang bareta dapit sa Cristo, si Jesus.” Pakalihis nin mga 20 taon, ipinagirumdom ni apostol Pablo sa kamagurangan na lalaki kan kongregasyon sa Efeso: “Dai ako nagpugol sa pagsabi sa saindo kan ano man na mga bagay na kapakipakinabang ni sa pagtokdo sa saindo sa publiko asin sa harong-harong.” Nagdalaw daw si Pablo sa kamagurangan na idto bago sinda nagin mga paratubod? Malinaw na iyo, huli ta tinokdoan nia sinda, kabilang sa iba pang bagay, “manongod sa pagsolsol sa Dios asin sa pagtubod sa satong Kagurangnan na Jesus.” (Gibo 20:20, 21) Sa pagkomento sa Gibo 20:20, an Word Pictures in the New Testament ni Robertson nagsasabi: “Mahalagang mangnohon na an pinakanakakalabi sa mga parahulit na ini naghulit sa harong-harong.”

Sarong Hukbo nin mga Doron sa Presenteng Panahon

 5. Paano ilinaladawan sa hula ni Joel an paghuhulit?

⁵ An paghuhulit na ginibo kan enot na siglo saro sanang sadit na halimbawa nin mas dakulang gigibohon sa satong panahon. An paghuhulit kan linahidan na mga Kristiano inagid ni propeta Joel sa mapanlaglag na damat nin mga insekto, kaiba an mga doron. (Joel 1:4) Nag-aabante siring sa hukbo, an mga doron nakakapanggana sa mga olang, naglalaog sa mga harong, asin inuubos na kakanon an gabos na agihan kaiyan. (Basahon an Joel 2:2, 7-9.) Kanigoan kalinaw na paglaladawan sa kaigotan asin lubos na paghuhulit kan banwaan nin Dios sa presenteng mga panahon! An ministeryo sa harong-harong an pangenot sa mga paaging ginagamit kan linahidan na mga Kristiano asin kan kairiba nindang “ibang mga karnero” sa pag-otob kan makahulang paglaladawan na ini. (Juan 10:16) Bilang Mga Saksi ni Jehova, paano niato inarog an pamamaagi kan mga apostol sa paghuhulit?

 6. Kan 1922, anong pagparigon sa boot an itinao manongod sa paghuhulit sa harong-harong, alagad ano an reaksion kan nagkapira?

⁶ Poon kan 1919, idinoon an paninimbagan kan lambang Kristiano na personal na makikabtang sa paghuhulit. Halimbawa, an artikulong “Service Essential” sa Watch Tower kan Agosto 15, 1922, nagpagirumdom sa linahidan na mga Kristiano dapit sa kahalagahan nin “aktibong pagpaabot sa mga tawo kan imprentadong mensahe asin pakikipag-olay sa sainda sa saindang harong, na nagpapatotoo na harani na an kahadean nin langit.” An detalyadong mga presentasyon itinao sa Bulletin (ngonyan An Satong Ministeryo sa Kahadean). Pero, kan primero dikit an bilang kan aktuwal na naghuhulit sa harong-harong. An nagkapira habong gibohon iyan. Nagsambit sinda nin manlaenlaen na pagkontra, alagad an pangenot na problema iyo na an pagmate nin nagkapira nakakapababa sa saindang dignidad an paghuhulit sa harong-harong. Mantang orog na idinodoon an paglilingkod sa langtad, dakol sa mga siring an luway-luway nang nagpondo sa pakikiasosyar sa organisasyon ni Jehova.

 7. Kan dekada nin 1950, anong pangangaipo an nagin risang-risa?

⁷ Kan suminunod na mga dekada, padakol nang padakol an nakikiiba sa paghuhulit. Minsan siring, nagin risang-risa na kaipuhan an dugang pang personal na pagsasanay sa ministeryo sa harong-harong. Kuanon niatong halimbawa an situwasyon sa Estados Unidos. Durante kan enot na mga taon kan dekada nin 1950, an 28 porsiento kan mga Saksi sa nasyon na iyan linimitaran an saindang paghuhulit paagi sa pagdistribwir nin mga handbill o pagtindog sa mga tinampo na kapot an mga magasin. Labing 40 porsiento an iregular sa paghuhulit, na pinapalihis an mga bulan na dai lamang naghuhulit. Ano daw an magigibo tanganing matabangan an gabos na nagdusay na Kristiano na maghulit sa harong-harong?

8, 9. Anong programa nin pagsasanay an pinonan kan 1953, asin ano an mga resulta?

⁸ Sa sarong internasyonal na kombension sa Siudad nin Nueva York kan 1953, tinawan nin espesyal na atension an ministeryo sa harong-harong. Sinabi ni Tugang na Nathan H. Knorr na an pangenot na gibohon kan gabos na Kristianong paraataman maninigo na iyo an pagtabang sa lambang Saksi na magin regular na ministro sa harong-harong. “An gabos,” sabi nia, “maninigong makapaghulit kan maogmang bareta sa harong-harong.” Tanganing maabot an pasohan na ini, pinonan an lakop sa kinaban na programa nin pagsasanay. An mga dai pa naghuhulit sa harong-harong sinanay na dumolok sa mga tawo sa saindang harong, mangatanosan sa sainda basado sa Biblia, asin simbagon an saindang mga hapot.

⁹ Pambihira an mga resulta kan programang ini nin pagsasanay. Sa laog nin sarong dekada, naglangkaw sa bilog na kinaban nin 100 porsiento an bilang nin parahayag, nin 126 porsiento an bilang nin pagdalaw liwat, asin nin 150 porsiento an bilang nin pag-adal sa Biblia. Ngonyan, haros pitong milyon na parahayag kan Kahadean an naghuhulit kan maogmang bareta sa bilog na kinaban. An pambihirang pag-oswag na ini sarong ebidensia kan bendisyon ni Jehova sa mga paghihingoa kan saiyang banwaan sa ministeryo sa harong-harong.—Isa. 60:22.

Pagbugtak nin Tanda sa mga Tawo Para sa Kaligtasan

10, 11. (a) Anong bisyon an itinao ki Ezequiel, na nakasurat sa Ezequiel kapitulo 9? (b) Paano an bisyon na iyan naootob sa satong panahon?

¹⁰ An kahalagahan kan ministeryo sa harong-harong maheheling sa sarong bisyon na itinao ki propeta Ezequiel. Sa bisyon na iyan, naheheling ni Ezequiel an anom na lalaki na may mga armas sa saindang kamot saka an ikapitong lalaki na nagugubingan nin lino na sa saiyang habayan may tintero nin sekretaryo. An ikapitong lalaki sinabihan na ‘umagi sa tahaw kan siudad’ asin ‘bugtakan nin tanda an angog kan mga tawo na nag-aaragagha asin nag-aaragrangay huli sa gabos na makauuyam nin makuring bagay na ginigibo sa tahaw kaiyan.’ Kasunod kan pagbugtak na iyan kan tanda, an anom na lalaki na may mga armas na panggadan pinagbotan na gadanon an gabos na mayo kan tanda.—Basahon an Ezequiel 9:1-6.

¹¹ Nasasabotan niato na sa kaotoban kan hulang ini, an lalaki na “nagugubingan nin lino” nagrerepresentar sa natatada kan linahidan nin espiritung mga Kristiano. Paagi sa paghuhulit asin paggibo nin disipulo, an grupong linahidan nagbubugtak nin simbolikong tanda sa mga nagigin kabtang kan “ibang mga karnero” ni Cristo. (Juan 10:16) Ano an tandang iyan? Ebidensia iyan, na garo baga naheheling iyan sa saindang angog na daing tahob, na an siring na mga karnero nagdusay asin bautisadong mga disipulo ni Jesu-Cristo patin na isinulog ninda an bagong personalidad na arog-Cristo. (Efe. 4:20-24) An mga arog-karnerong ini nagigin sarong aripompon kaiba kan linahidan na mga Kristiano asin tinatabangan ninda an mga linahidan sa mahalagang marhay na gibohon kaini na pagbugtak nin tanda sa iba pa.—Kap. 22:17.

12. Paano itinatampok kan bisyon ni Ezequiel, manongod sa pagbugtak nin tanda sa mga angog, an kahalagahan kan satong padagos na paghanap nin mga arog-karnero?

¹² Itinatampok kan bisyon ni Ezequiel an sarong dahelan kun taano ta kaipuhan na marhay an nagpapadagos na paghanap niato sa mga tawong “nag-aaragagha asin nag-aaragrangay.” Buhay an kalabot dian. Dai mahahaloy, lalaglagon na kan langitnon na mga hukbong manggagadan ni Jehova, na irinerepresentar kan anom na lalaki na may mga armas, an mga mayo kan simbolikong tanda. Mapadapit sa nagdadangadang na paghokom na iyan, isinurat ni apostol Pablo na an Kagurangnan na Jesus, kaiba kan “saiyang makapangyarihan na mga anghel,” ‘mamamalos sa mga dai nakakamidbid sa Dios asin sa mga dai nagkukuyog kan maogmang bareta manongod sa satong Kagurangnan na Jesus.’ (2 Tes. 1:7, 8) Mangnohon na an mga tawo hohokoman basado sa saindang reaksion sa maogmang bareta. Huli kaini, an pagbalangibog kan mensahe nin Dios dapat na magpadagos na daing ontok sagkod sa katapusan. (Kap. 14:6, 7) Nagtatao ini nin magabat na paninimbagan sa gabos na nagdusay na lingkod ni Jehova.—Basahon an Ezequiel 3:17-19.

13. (a) Anong paninimbagan an namatean ni apostol Pablo, asin taano? (b) Anong paninimbagan sa mga tawo sa saindong teritoryo an namamatean nindo?

¹³ Namatean ni apostol Pablo an personal na paninimbagan na sabihon sa iba an maogmang bareta. Sia nagsurat: “Ako may utang sa mga Griego sagkod sa mga Barbaro, sa mga madonong sagkod sa mga daing isip: kaya ako galagang ipahayag man an maogmang bareta sa saindo dian sa Roma.” (Roma 1:14, 15) Huli sa pagpasalamat sa pagkaherak na ipinaheling sa saiya, napahiro si Pablo na magmaigot na tabangan an iba na makinabang sa dai na kutana maninigong kabootan nin Dios kun paanong sia nakinabang man dian. (1 Tim. 1:12-16) Garo man sana sia may utang sa lambang tawo na nanonompongan nia, sarong utang na mababayadan sana paagi sa pagsabi sa tawong iyan kan dapit sa maogmang bareta. Namamatean man daw nindo na kamo garo man sana may utang sa mga tawo sa saindong teritoryo?—Basahon an Gibo 20:26, 27.

14. Ano an pangenot na dahelan niato sa paghuhulit sa publiko asin sa harong-harong?

¹⁴ Minsan ngani mahalaga an pagliligtas sa buhay nin tawo, igwa nin mas mahalagang marhay na dahelan sa paghuhulit sa harong-harong. Sa hula na nakasurat sa Malaquias 1:11, sinabi ni Jehova: “Poon sa subangan kan saldang sagkod sa solnopan kaiyan magigin dakula an sakong ngaran sa tahaw kan mga nasyon, asin . . . may idodolot sa sakong ngaran, malinig nganing regalo; huli ta magigin dakula an sakong ngaran sa tahaw kan mga nasyon.” Bilang kaotoban kan hulang ini, an nagdusay na mga lingkod ni Jehova hayagan na inoomaw an saiyang ngaran sa bilog na daga mantang mapakumbaba nindang ginigibo an saindang ministeryo. (Sal. 109:30; Mat. 24:14) An pagtao “nin atang nin pag-omaw” ki Jehova iyo an pangenot na dahelan niato sa paghuhulit sa publiko asin sa harong-harong.—Heb. 13:15.

Mahalagang Marhay na mga Pangyayari sa Ngapit

15. (a) Paano dinagdagan kan mga Israelita an saindang aktibidad mantang nagmamartsa sinda sa palibot kan Jerico sa ikapitong aldaw? (b) Ano an ipinaparisa kaini manongod sa paghuhulit?

¹⁵ Anong mga pangyayari an nakatagama pa para sa paghuhulit? Nagtatao nin ilustrasyon an pagsalikop sa Jerico, na nakasurat sa libro nin Josue. Girumdomon na kan madali nang laglagon nin Dios an Jerico, pinagbotan an mga Israelita na magmartsa sa palibot kan siudad sarong beses sa kada aldaw sa laog nin anom na aldaw. Minsan siring, sa ikapitong aldaw, magkakaigwa nin risang dagdag sa saindang aktibidad. Sinabi ni Jehova ki Josue: “Malibot kamo sa siudad nin pitong beses asin papatanogon kan mga saserdote an mga amodyong. Asin mangyari na kun patanogon na ninda an sungay kan karnero, . . . an bilog na banwaan maninigong kumurahaw nin makosog na kurahaw sa guerra; asin an lanob kan siudad matutumpag.” (Jos. 6:2-5) Posible na magkakaigwa nin kaagid na dagdag sa satong paghuhulit. Daing duda na sa panahon kan paglaglag sa presenteng sistema nin mga bagay, maheheling niato sa kasaysayan kan kinaban na ini an pinakadakulang patotoo sa ngaran nin Dios asin sa Kahadean.

16, 17. (a) Ano an mahahaman bago matapos an “dakulang kahorasaan”? (b) Ano an pag-oolayan niato sa sunod na artikulo?

¹⁶ Tibaad mag-abot nanggad an panahon na an mensahe na ipinapahayag niato magigin siring sa “makosog na kurahaw sa guerra.” Sa libro nin Kapahayagan, an mapuersang mga mensahe nin paghokom ilinaladawan na siring sa ‘makosog na oran nin graniso na an lambang gapo mga sarong talento an gabat.’b Asin an Kapahayagan 16:21 nagsasabi: “Pambihira nanggad kakosog an damat na iyan.” Dai pa niato aram kun ano talaga an magigin papel kan ministeryo sa harong-harong sa pagbalangibog kan pangultimong mga mensahe nin paghokom. Alagad makakasierto kita na bago matapos an “dakulang kahorasaan,” an ngaran ni Jehova ikinapamidbid na nin lubos na dai pa noarin man nangyari sa kasaysayan nin tawo.—Kap. 7:14; Ezeq. 38:23.

¹⁷ Mantang hinahalat niato an mahalagang marhay na mga mangyayari sa ngapit, padagos logod niatong maigot na ipahayag an maogmang bareta kan Kahadean. Sa paggibo kan asignasyon na iyan, anong mga kadepisilan an inaatubang niato sa ministeryo sa harong-harong, asin paano niato maaatubang an mga kadepisilan na iyan? An mga hapot na ini pag-oolayan sa sunod na artikulo.

[Mga Nota sa Ibaba]

Ano an Isisimbag Nindo?

• Ano an basehan sa Kasuratan sa paghuhulit sa harong-harong?

• Paano tinawan nin pagdodoon sa presenteng mga panahon an ministeryo sa harong-harong?

• Taano ta an nagdusay na mga lingkod ni Jehova igwa nin paninimbagan na maghulit?

• Ano an mahalagang marhay na mga mangyayari sa ngapit?

[Mga Ritrato sa pahina 4]

Arog ni apostol Pablo, nakakamate daw kamo nin paninimbagan na maghulit sa iba?

[Ritrato sa pahina 5]

Si Tugang na Knorr, 1953