Siisay an “Makaliligtas”?

“An lambang nag-aapod sa ngaran ni Jehova maliligtas.”—GIBO 2:21.

 1. Taano an Pentecostes 33 C.E. ta sarong aldaw nin dakulang pagbago sa kasaysayan nin kinaban?

AN Pentecostes 33 C.E. sarong aldaw nin dakulang pagbago sa kasaysayan nin kinaban. Taano? Huli ta kan aldaw na iyan sarong bagong nasyon an namundag. Kan primero, bako idtong dakulaon na nasyon​—120 sanang disipulo ni Jesus na tiripon sa sarong kuarto sa itaas sa Jerusalem. Alagad ngonyan, na nalingawan na an kadaklan na nasyon na nag-eksister kan panahon na idto, an nasyon na namundag sa itaas na kuartong idto yaon pa. An katunayan na ini pinakamahalaga para sa sato gabos, huling ini an nasyon na ninombrahan nin Dios na magin saiyang saksi sa atubangan nin katawohan.

 2. Ano an milagrosong mga nangyari sa pagkamundag kan bagong nasyon?

² Kan magpoon na mag-eksister an bagong nasyon na iyan, may mahalagang mga nangyari na nakaotob sa makahulang mga tataramon ni Joel. Mababasa ta an mga pangyayaring ini sa Gibo 2:​2-4: “Sa panale nagdatong hale sa langit an ribok na siring sa hagobohob nin makosog na doros, asin iyan nakapano sa bilog na harong na saindang tinutukawan. Asin an mga dila na garo kalayo naheling ninda asin nakawaras, asin may saro na nagtogdon sa lambang saro sa sainda, asin sinda gabos nagkaparano nin banal na espiritu asin nagpoon na magtaram nin manlaenlaen na tataramon, siring sa ipinataram sa sainda kan espiritu.” Sa paaging ini an 120 fiel na lalaki asin babaeng idto nagin sarong espirituwal na nasyon, an enot na mga miembro kan sa huri inapod ni apostol Pablo na an “Israel nin Dios.”​—Galacia 6:16.

 3. Anong hula ni Joel an naotob kan Pentecostes 33 C.E.?

³ Nagtiripon an mga kadaklan tanganing siyasaton an “hagobohob nin makosog na doros,” asin ipinaliwanag sa sainda ni apostol Pedro na naootob an saro sa mga hula ni Joel. Arin na hula? Bueno, hinanyoga an sinabi nia: “‘Sa huring mga aldaw,’ an sabi nin Dios, ‘ibububo ko an iba sa sakong espiritu sa gabos na klase nin laman, asin an saindong mga aking lalaki asin mga aking babae maghuhurula asin an saindong hoben na mga lalaki makakaheling nin mga bisyon asin an saindong gurang na mga lalaki mangangatorogan nin mga pangatorogan; asin pati sa sakong mga oripon na lalaki asin sa sakong mga oripon na babae ibububo ko an iba sa sakong espiritu sa mga aldaw na iyan, asin sinda maghuhurula. Asin magpapaheling ako nin mga ngangalasan sa langit sa itaas asin nin mga tanda sa daga sa ibaba, dugo asin kalayo asin alisngaw nin aso; an aldaw magigin kadikloman asin an bulan magigin dugo bago dumatong an dakula asin mamuraway na aldaw ni Jehova. Asin an lambang nag-aapod sa ngaran ni Jehova maliligtas.’” (Gibo 2:​17-21) An mga tataramon na kinotar ni Pedro manonompongan sa Joel 2:​28-32, asin an pagkaotob kaiyan nangahulogan na nauubos na an panahon para sa Judiong nasyon. Harani na “an dakula asin mamuraway na aldaw ni Jehova,” sarong panahon nin pakipagkuenta sa bakong fiel na Israel. Alagad siisay an maliligtas, o makaliligtas? Asin ano an ipinanganino kaini?

Duwang Kaotoban kan Hula

4, 5. Huli sa nagdadangadang na mga pangyayari, anong hatol an itinao ni Pedro, asin taano an hatol na iyan ta angay pakalihis kan saiyang kaaldawan?

⁴ Kan mga taon pakalihis kan 33 C.E., nag-oswag an espirituwal na Israel nin Dios, alagad an nasyon nin Israel sa laman dai. Kan 66 C.E., an Israel sa laman nakikilaban sa Roma. Kan 70 C.E., an Israel haros nawara na asin an Jerusalem saka an templo kaiyan biyong sinolo. Kan Pentecostes 33 C.E., si Pedro nagtao nin marahay na hatol huli sa nagdadangadang na trahedyang idto. Sa giraray, kinokotar si Joel, sia nagsabi: “An lambang nag-aapod sa ngaran ni Jehova maliligtas.” An kada indibiduwal na Judio kinaipuhan na gumibo nin personal na desisyon na mag-apod sa ngaran ni Jehova. Kabale digdi an pagkuyog sa dugang pang mga instruksion ni Pedro: “Magsorolsol kamo, asin an lambang saro logod sa saindo mabautismohan sa ngaran ni Jesu-Cristo para sa kapatawadan kan saindong mga kasalan.” (Gibo 2:38) Si Jesus kaipuhan na akoon kan mga nagdadangog ki Pedro bilang an Mesiyas, na isinikwal kan Israel bilang nasyon.

⁵ An makahulang mga tataramon na idto ni Joel dakula an epekto sa mga mahoyo kaidtong enot na siglo. Minsan siring, mas dakula pa ngani an epekto kaiyan ngonyan huli ta, siring sa ipinaheheling kan mga pangyayari sa ika-20 siglo, nagkaigwa nin ikaduwang kaotoban an hula ni Joel. Helingon ta kun paano.

 6. Paano nagpoon na magin malinaw kun siisay an Israel nin Dios mantang nagdadangadang kaidto an 1914?

⁶ Pagkagadan kan mga apostol, an Israel nin Dios natahoban kan mga doot nin falsong Kristianismo. Minsan siring, durante kan panahon kan katapusan, na nagpoon kan 1914, nagin malinaw giraray kun siisay an espirituwal na nasyon na ini. An gabos na ini kaotoban kan parabola ni Jesus dapit sa mga trigo asin doot. (Mateo 13:​24-​30, 36-​43) Mantang nagdadangadang kaidto an 1914, an linahidan na mga Kristiano nagpoon na sumiblag sa bakong fiel na Kakristianohan, na mapusong isinikwal an falsong mga doktrina kaiyan asin ihinulit an maabot na katapusan kan “itinalaan na mga panahon kan mga nasyon.” (Lucas 21:24) Alagad an enot na guerra mundial, na puminutok kan 1914, nagpalataw nin mga isyu na dai ninda napag-andaman. Luminuway an dakol huli sa makosogon na pan-iimpluwensia, asin nakikompromiso an nagkapira. Kan 1918 haros napondo an saindang paghuhulit.

7. (a) Ano an nangyari kan 1919 na kaagid kan Pentecostes 33 C.E.? (b) Poon kan 1919, ano an nagin epekto kan pagbubo kan espiritu nin Dios sa mga lingkod ni Jehova?

⁷ Pero, dai iyan naghaloy. Poon kan 1919, pinonan na ibubo ni Jehova an saiyang espiritu sa saiyang banwaan sa paagi na nagpagirumdom kan Pentecostes 33 C.E. Siempre, kan 1919 mayo nin pagtaram sa manlaenlaen na tataramon asin mayo nin hagobohob nin makosog na doros. Nasasabotan ta sa mga tataramon ni Pablo sa 1 Corinto 13:8 na an panahon para sa mga milagro haloy nang natapos. Minsan siring, risang marhay na yaon an espiritu nin Dios kan 1919 kan, sa sarong kombension sa Cedar Point, Ohio, E.U.A., an fiel na mga Kristiano pinakosog liwat asin pinonan giraray ninda an paghuhulit kan maogmang bareta kan Kahadean. Kan 1922 nagbalik sinda sa Cedar Point asin napahiro kan pangapodan na “Ipaisi, ipaisi, ipaisi an Hade asin an saiyang kahadean.” Siring sa nangyari kan enot na siglo, an kinaban napiritan na mangnohon an mga epekto kan pagbubo kan espiritu nin Dios. An gabos na dusay na Kristiano​—lalaki asin babae, gurang asin hoben—​nagpoon na ‘maghurula,’ an boot sabihon, magpahayag kan “makangangalas na mga bagay nin Dios.” (Gibo 2:11) Arog ki Pedro, nagsadol sinda sa mga mahoyo: “Paligtas kamo hale sa bikong kapag-arakian na ini.” (Gibo 2:40) Paano daw iyan magigibo kan mga naghihimate? Paagi sa pagkuyog sa mga tataramon ni Joel na yaon sa Joel 2:32: “An gabos na mag-apod sa ngaran ni Jehova makaliligtas.”

 8. Paano nagpadagos an mga pangyayari para sa Israel nin Dios poon kan 1919?

⁸ Poon kan enot na mga taon na idto, nag-aabante an mga aktibidad kan Israel nin Dios. Garo baga patapos na an pagtatak sa mga linahidan, asin poon kan mga taon nin 1930 an sarong dakulang kadaklan nin mga mahoyo na may daganon na paglaom luminataw. (Kapahayagan 7:​3, 9) An gabos nakamamate nin pag-apura, ta an ikaduwang kaotoban kan Joel 2:​28, 29 nagpapaheling na kita harani na sa sarong orog pa kamakangingirhat na aldaw ni Jehova, na an lakop sa kinaban na relihioso, politikal, asin komersial na palakaw nin mga bagay lalaglagon. Igwa kita nin makosog na dahelan na ‘mag-apod sa ngaran ni Jehova’ na lubos an pagtubod na kita saiyang ililigtas!

Paano Kita Nag-aapod sa Ngaran ni Jehova?

 9. Ano an pira sa mga bagay na kalabot sa pag-apod sa ngaran ni Jehova?

⁹ Ano an kalabot sa pag-apod sa ngaran ni Jehova? Tinatabangan kita kan konteksto kan Joel 2:​28, 29 na simbagon an hapot na iyan. Halimbawa, dai dinadangog ni Jehova an gabos na nag-aapod sa saiya. Paagi sa saro pang propeta, si Jehova nagsabi sa Israel: “Kun binibiklad nindo an saindong mga palad, tinatago ko an sakong mga mata sa saindo. Minsan pa mamibi kamo nin dakol, dai ako maghihinanyog.” Taano si Jehova ta habong maghinanyog sa saiyang sadiring banwaan? Sia mismo an nagpapaliwanag: “Pano nin dugo an saindong mga kamot.” (Isaias 1:​15) Dai hihinanyogon ni Jehova an siisay man na may kasalan sa dugo o naggigibo nin kasalan. Iyan an dahelan na sinabihan ni Pedro an mga Judio kan Pentecostes na magsorolsol. Sa konteksto kan Joel 2:​28, 29, maheheling ta na idinodoon man ni Joel an pagsolsol. Halimbawa, sa Joel 2:​12, 13, satong mababasa: “‘Kaya ngani ngonyan,’ an sabi ni Jehova, ‘magbalik kamo sa sakuya sa bilog nindong puso, asin may pag-ayuno asin paghibi patin pagtangis. Asin baaka nindo an saindong puso, asin bakong an saindong mga gubing; asin pangagbalik kamo ki Jehova na saindong Dios, huli ta sia maugayon asin maheherakon, maluway sa pagkaanggot asin abunda sa mamomoton na kabootan.’” Poon kan 1919, an linahidan na mga Kristiano huminiro kaoyon kan mga tataramon na ini. Pinagsolsolan ninda an saindang mga pagkukulang asin nagdesisyon na nungka na giraray na makikikompromiso o maluwayluway. Nagtao ini nin lugar tanganing ikabubo an espiritu nin Dios. An gabos na indibiduwal na boot na mag-apod sa ngaran ni Jehova asin dangogon dapat na sumunod sa iyo man sanang dalan.

10. (a) Ano an tunay na pagsolsol? (b) Paano sinisimbag ni Jehova an tunay na pagsolsol?

¹⁰ Girumdomon, an tunay na pagsolsol bako sanang pagsabi nin, “Patawada ako.” Ginigisi kaidto kan mga Israelita an saindang pan-ibabaw na mga gubing tanganing ipaheling kun gurano kakosog kan saindang mga namamatean. Alagad si Jehova nagsasabi: “Baaka nindo an saindong puso, asin bakong an saindong mga gubing.” An tunay na pagsolsol naggigikan sa puso, sa kairairaromi niato. Kabale dian an pagtalikod niato sa paggibo nin sala, arog kan satong mababasa sa Isaias 55:7: “An maraot magbaya na sa saiyang dalan, asin an maliwag na tawo sa saiyang mga kaisipan; asin magbalik sia ki Jehova.” Kaiba dian an pagkaongis sa kasalan, siring kan ginibo ni Jesus. (Hebreo 1:9) Dangan, nagtitiwala kita ki Jehova na patatawadon nia kita basado sa pantubos na atang huli ta si Jehova “maugayon asin maheherakon, maluway sa pagkaanggot asin abunda sa mamomoton na kabootan.” Aakoon nia an satong pagsamba, an satong espirituwal na dolot na tipasi asin dolot na inomon. Maghihinanyog sia kun kita mag-apod sa saiyang ngaran.​—Joel 2:14.

11. Ano an maninigong magin lugar kan tunay na pagsamba sa satong buhay?

¹¹ Sa Sermon sa Bukid, may saro pang bagay na sinabi si Jesus na dapat niatong girumdomon, kan sia magsabi: “Kun siring, padagos na hanapon nguna an kahadean asin an saiyang katanosan.” (Mateo 6:33) Dai kita dapat na magin indiperente sa satong pagsamba, na minamansay iyan na sarong bagay na ginigibo niato sa paramas sanang paagi bilang pampakalma sa satong konsensia. An paglilingkod sa Dios maninigo sa enot na lugar sa satong buhay. Sa siring, paagi ki Joel, si Jehova nagsasabi pa: “Huyopa an amodyong sa Sion . . . Tiripona an banwaan. Santipikara an sarong kongregasyon. Tiripona an kamagurangan na lalaki. Tiripona an mga aki asin an mga nagsususo. An nobyo lumuwas sa saiyang panlaog na kuarto, asin an nobya sa saiyang kuarto sa kasal.” (Joel 2:​15, 16) Natural sana na an mga bagong kasal maparayo an isip sa ibang bagay, na an naheheling sana an kada saro. Alagad maski pa sa sainda, an paglilingkod ki Jehova an dapat na maenot. Mayo nang maorog pa sa satong pagkatiripon sa satong Dios, na nag-aapod sa saiyang ngaran.

12. Anong potensial para sa pag-oswag an naheheling sa report kan Memorial kan nakaaging taon?

¹² Nasa isip ini, horophoropon niato an sarong estadistika na ipinaheling kan Report kan 1997 Taon nin Paglilingkod kan Mga Saksi ni Jehova. Kan nakaaging taon igwa kita nin pinakahalangkaw na kabilangan na 5,599,931 parahayag kan Kahadean​—tunay nanggad na sarong dakulang kadaklan nin mga paraomaw! An nag-atender sa Memorial 14,322,226​—mga walo may kabangang milyon an kalabihan sa kabilangan nin mga parahayag. An kabilangan na iyan nagpapaheling nin marahayon na potensial para sa pag-oswag. An dakol sa walo may kabangang milyon na iyan nag-aadal na sa Biblia kaiba kan Mga Saksi ni Jehova bilang interesadong mga tawo o mga aki nin bautisadong mga magurang. An dakol primero pa sanang nakaatender sa sarong pagtiripon. An pagigin presente ninda nagtao sa Mga Saksi ni Jehova nin marahay na oportunidad na orog pang makamidbid sinda asin mag-opresir na tabangan sinda na orog pang umoswag. Dangan, yaon man an mga nag-aatender sa Memorial kada taon asin tibaad nag-aatender sa pirang pagtiripon, alagad dai nag-ooswag. Siempre, an mga siring maogmang marhay na inaako na umatender sa mga pagtiripon. Alagad sinasadol ta sinda na maingat na horophoropon an makahulang mga tataramon ni Joel asin isip-isipon kun ano pang mga aksion an dapat nindang gibohon tanganing makaseguro na magdadangog si Jehova kun sinda mag-apod sa saiyang ngaran.

13. Kun kita nag-aapod na sa ngaran ni Jehova, ano an paninimbagan niato sa iba?

¹³ Idinoon ni apostol Pablo an saro pang aspekto nin pag-apod sa ngaran nin Dios. Sa saiyang surat sa mga taga-Roma, kinotar nia an makahulang mga tataramon ni Joel: “An gabos na nag-aapod sa ngaran ni Jehova maliligtas.” Dangan sia nangatanosan: “Paano sinda mag-aapod sa saiya na dai ninda tinutubod? Paano man sinda matubod sa saiya na dai ninda nadangog? Paano man sinda makadadangog kun mayo nin parahulit?” (Roma 10:​13, 14) Iyo, an dakol pang iba na sagkod ngonyan dai pa nakamimidbid ki Jehova kaipuhan na mag-apod sa saiyang ngaran. An mga nakamimidbid na ki Jehova igwa nin paninimbagan na bako sanang maghulit kundi dumuman asin itao man sa sainda an tabang na iyan.

Sarong Espirituwal na Paraiso

14, 15. Anong paraisong mga bendisyon an nakakamtan kan banwaan ni Jehova huli ta sinda nag-aapod sa saiyang ngaran sa paagi na nakasosono sa saiya?

¹⁴ Siring kaiyan an pagmansay kapwa kan mga linahidan asin kan ibang karnero, asin bilang resulta, binebendisyonan sinda ni Jehova. “Si Jehova magigin maigot para sa saiyang daga asin mapaheling nin pakikidamay sa saiyang banwaan.” (Joel 2:18) Kan 1919, si Jehova nagpaheling nin kaigotan asin pagdamay sa saiyang banwaan kan ibalik nia sinda asin darahon sinda sa saiyang rona nin espirituwal na aktibidad. Tunay nanggad na ini sarong espirituwal na paraiso, na marahayon na ilinaladawan ni Joel sa mga tataramon na ini: “Dai ka matakot, O daga. Magin kang magayagaya asin maggayagaya ka; huli ta si Jehova aktuwal na magibo nin dakulang bagay sa Saiyang ginigibo. Dai kamo matakot, kamong mga hayop sa langtad, huli ta an mga sabsaban sa kaawagan tunay na magigin berde. Huli ta an kahoy aktuwal na matao kan bunga kaiyan. An higuerra asin an ubas dapat na tumao kan saindang kakosogan. Asin, kamo mga aki nin Sion, magin magayagaya asin maggayagaya ki Jehova na saindong Dios; huli ta itatao nia sa saindo an oran sa tigrakdag sa tamang sokol, asin papaaboton nia sa saindo an makosog na oran, oran sa tigrakdag asin oran sa tigsoli, arog kan enot. Asin an mga ginikan dapat na mapano nin nalinigan nang tipasi, asin an mga tangke kan pugaan dapat na maglipwas sa bagong arak asin lana.”​—Joel 2:​21-24.

¹⁵ Kanigoan kaogmang paglaladawan! Abundang probisyon nin tolong mayor na kaipuhan sa buhay sa Israel​—tipasi, lana nin oliba, asin arak—​pati an kadakol na karnero. Sa satong kaaldawan an makahulang mga tataramon na iyan talagang naootob sa espirituwal na paagi. Itinatao sa sato ni Jehova an gabos na espirituwal na pagkakan na kaipuhan niato. Dai daw kita naoogma sa siring na abundansiang itinatao nin Dios? Tunay nanggad, arog kan ihinula ni Malaquias, an satong Dios ‘binuksan an mga gaha kan kalangitan asin inulaan kita nin bendisyon sagkod na mayo na nin kulang.’​—Malaquias 3:​10.

An Katapusan nin Sarong Palakaw nin mga Bagay

16. (a) Ano an kahulogan kan pagbubo kan espiritu ni Jehova para sa satong panahon? (b) Ano an natatagama sa ngapit?

¹⁶ Pakatapos na sabihon nin patienot an paraisong kamugtakan kan banwaan nin Dios na si Joel naghula manongod sa pagbubo kan espiritu ni Jehova. Kan kotaron ni Pedro an hulang ini kan Pentecostes, sinabi nia na iyan naotob sa “huring mga aldaw.” (Gibo 2:17) An pagbubo kan espiritu nin Dios kan panahon na idto nangahulogan na nagpoon na an huring mga aldaw para sa Judiong palakaw nin mga bagay. An pagbubo kan espiritu nin Dios sa Israel nin Dios sa ika-20 siglo nangangahulogan na kita nabubuhay na sa huring mga aldaw kan pambilog na kinaban na palakaw nin mga bagay. Huli kaini, ano an natatagama sa ngapit? An hula ni Joel padagos na nagsasabi sa sato: “Matao ako nin mga ngangalasan sa kalangitan asin sa daga, dugo asin kalayo patin mga hariging aso. An aldaw magigin kadikloman, asin an bulan magigin dugo, bago an pagdatong kan dakula asin makangingirhat na aldaw ni Jehova.”​—Joel 2:30, 31.

17, 18. (a) Anong makangingirhat na aldaw ni Jehova an duminatong sa Jerusalem? (b) An pagigin segurado kan maabot na makangingirhat na aldaw ni Jehova nagpapahiro sa sato na gibohon an ano?

¹⁷ Kan 66 C.E., an makahulang mga tataramon na ini nagpoon na magkatotoo sa Judea mantang an mga pangyayari dai mapogolan sa pag-abante pasiring sa kulminasyon kan makangingirhat na aldaw ni Jehova kan 70 C.E. Kanigoan kamakatatakot sa panahon na idto na mapabilang sa mga dai nagpapamuraway sa ngaran ni Jehova! Ngonyan, harani na an siring kamakatatakot na mga pangyayari, na an palakaw nin mga bagay kan bilog na kinaban na ini lalaglagon ni Jehova. Pero, posible an pakaligtas. An hula padagos na nagsasabi: “Mangyayari na an gabos na mag-apod sa ngaran ni Jehova makaliligtas; huli ta sa Bukid nin Sion asin sa Jerusalem magkakaigwa kan mga nakaligtas, arog kan isinabi ni Jehova, asin sa tahaw kan nagkatarada, na inapod ni Jehova.” (Joel 2:32) Tunay na nagpapasalamat an Mga Saksi ni Jehova na maaraman an ngaran ni Jehova, asin lubos an saindang pagtitiwala na ililigtas nia sinda kun sinda mag-apod sa saiya.

¹⁸ Pero, ano an mangyayari kun an dakula asin mamuraway na aldaw ni Jehova biglang dumatong sa kinaban na ini na may lubos na kabangisan? Ipaliliwanag iyan sa ultimong artikulong pag-aadalan.

Nagigirumdoman daw Nindo?

◻ Kasuarin enot na ibinubo ni Jehova an saiyang espiritu sa saiyang banwaan?

◻ Ano an pira sa mga bagay na kalabot sa pag-apod sa ngaran ni Jehova?

◻ Kasuarin nagdatong sa Israel sa laman an dakula asin mamuraway na aldaw ni Jehova?

◻ Paano binebendisyonan ni Jehova an mga nag-aapod sa saiyang ngaran ngonyan?

[Retrato sa pahina 15]

Sarong bagong nasyon an namundag kan Pentecostes 33 C.E.

[Retrato sa pahina 16, 17]

Sa pagpopoon kan siglong ini, ibinubo liwat ni Jehova an saiyang espiritu sa saiyang banwaan bilang kaotoban kan Joel 2:28, 29

[Retrato sa pahina 18]

An mga tawo dapat na tabangan na mag-apod sa ngaran ni Jehova