Aktibong Pinangengenotan ni Cristo an Saiyang Kongregasyon

“An Dios kan satong Kagurangnan na Jesu-Cristo . . . ginibo siang payo kan gabos na bagay sa kongregasyon.”—EFESO 1:17, 22.

 1. Ano an tibaad isimbag nin pirang miembro kan mga iglesya sa Kakristianohan sa hapot na, ‘Siisay an namomoon sa saindo?’ alagad ano man an simbag kan mga Saksi ni Jehova?

AN MGA Saksi ni Jehova mayo nin minimidbid na tawo bilang saindang namomoon. An organisasyonal na estruktura ninda mayo nin kapareho kan papa kan Iglesya Katolika Romana, mga patriarka kan mga Eastern Orthodox Church, o mga namomoon sa ibang iglesya asin sekta nin Kakristianohan. An kaimbodan ninda ki Jesu-Cristo, an Payo kan Kristianong kongregasyon, na nagsabi: “An saindong Poon saro, an Cristo.”—Mateo 23:10.

 2. Taano ta minimidbid nin mga Saksi ni Jehova si Cristo bilang an Payo kan Kristianong kongregasyon, alagad ano an mga puwedeng ihapot?

² Kan Pentecostes si apostol Pedro nagpatotoo: “Si David dai nagsakat sa kalangitan, kundi sia mismo nagsabi, ‘Si Jehova nagsabi sa sakong Kagurangnan: “Tumukaw ka sa sakong too, sagkod na ibugtak ko an saimong mga kaiwal bilang babatayan kan saimong mga bitis.”’ Kaya maaraman logod kan bilog na harong ni Israel na may kasiertohan na ginibo sia nin Dios na magin Kagurangnan asin Cristo, an Jesus na ini na saindong ipinako.” (Gibo 2:34-36) Alagad minsan ngani minimidbid niato na kan 33 C.E. si Jesus ginibong Kagurangnan asin Payo kan kongregasyon, kita daw may tendensia na isipon na sia daing hiro-hirong nagtukaw sa too ni Jehova, na hinahalat an pagtukaw nia sa trono kan 1914? Lubos daw niatong naaaraman na poon sa pagkapinoon si Cristo aktibong pinangenotan an saiyang kongregasyon?

Banal na Paagi sa Aktibong Pagpalakaw

 3. Ano an ipinanuga ni Jesus na isusugo sa saiyang mga disipulo, asin paano niato naaaraman na bakong sarong persona an boot niang sabihon?

³ Kan banggi bago sia magadan, sinabihan ni Jesus an saiyang maimbod na mga apostol: “Para sa saindong kapakinabangan na ako mahale. Huli ta kun dai ako maghale, an paratabang dai madigdi sa saindo; alagad kun ako paduman, isusugo ko sia sa saindo.” (Juan 16:7) An isusugo nia bakong sarong persona kundi puwersa aktiba. Liniwanag nia ini bago sia nagsakat sa langit, na sinasabi sa saiyang tiripon na disipulo: “Ipadadara ko sa saindo an ipinanuga kan sakong Ama. Alagad kamo mag-erok sa siudad sagkod na kamo magubingan nin kapangyarihan hale sa itaas.”—Lucas 24:49.

 4. Paano ginamit an banal na espiritu poon kan Pentecostes padagos?

⁴ An maimbod na mga disipulo ni Jesus nagdanay sa Jerusalem sagkod kan Pentecostes. Kan aldaw na idto sinda “nagkaparano nin banal na espiritu,” siring sa ipinanuga. Si Pedro nagpatotoo: “Huling sia [si Jesus] ilinangkaw sa too nin Dios asin nag-ako kan ipinanugang banal na espiritu hale sa Ama, ibinubo nia ini na saindong naheheling asin nadadangog.” (Gibo 2:4, 33) Paagi kaini pinaniaki ni Jehova an enot na mga Kristianong ini bilang saiyang espirituwal na mga aki. (Galacia 4:6) Siring man, inako ni Jesus sa saiyang Ama an espiritu bilang paagi nin aktibong pagpalakaw sa saiyang kongregasyon digdi sa daga gikan sa saiyang langitnon na kamugtakan sa too nin Dios.

5, 6. (a) Ano pa an sarong paagi na itinao ki Cristo tanganing mapamahalaan nia an saiyang kongregasyon sa daga? (b) Tumao nin espisipikong mga halimbawa kun paano ginamit ni Jesus an paaging ini para sa saiyang mga disipulo asin sa pagsuportar sa gibong paghuhulit.

⁵ Dugang pa, si apostol Pedro nagsurat manongod ki Jesus: “Sia nasa too nin Dios, huli ta sia nagduman sa langit; asin an mga anghel asin mga autoridad patin mga kapangyarihan ipinasakop na sa saiya.” (1 Pedro 3:22) Kun siring, an mga anghel saro pang paagi na itinao ni Jehova ki Cristo sa aktibong pangengenot sa Kristianong kongregasyon.

⁶ Kaya, kun nababasa niato sa librong Mga Gibo na “an anghel ni Jehova” o “an sarong anghel nin Dios” naghiro sa pagsuportar sa paghuhulit nin mga Kristiano o nakiaram para sa mga miembro kan Kristianong kongregasyon, yaon an gabos na dahelan na tumubod na an mga anghel na iyan naghiro sa pamamahala ni Cristo Jesus. (Gibo 5:19; 8:26; 10:3-7, 22; 12:7-11; 27:23, 24) Bilang si “Miguel na arkanghel,” si Cristo may sakop na mga anghel, asin ginamit nia sinda sa aktibong pangengenot sa Kristianong kongregasyon kan enot na siglo C.E.—Judas 9; 1 Tesalonica 4:16.

Sarong Naheheling na Namamahalang Grupo

 7. Ano pang ibang paagi an ginamit ni Cristo sa pagdirehir sa saiyang kongregasyon, asin anong mga teksto an nagtataram manongod sa “katongdan na mangataman” na ini?

⁷ Ipinaririsa man kan Kasuratan na si Jesu-Cristo naggamit nin sarong grupo nin mga lalaki bilang namamahalang grupo tanganing maggiya sa saiyang kongregasyon sa daga. Bilang kapinonan, an namamahalang grupong ini minalataw na kompuwesto sana kan 11 apostol. Kan inaaram an kabotan ni Jehova sa pagsalida ki Judas Iscariote, kinotar ni Pedro an Salmo 109:8, na nagsasabi: “Kuanon logod nin iba an saiyang katongdan na mangataman.” Dangan, sa saindang pamibi ki Jehova, si Pedro asin an saiyang kairiba nag-arang sa Dios na isabi kun siisay an dapat na “sumalihid sa ministeryong ini asin sa pagkaapostol, na dian suminuhay si Judas.” Si Matias ninombrahan na maglingkod “kaiba kan kagsarong apostol.”—Gibo 1:20, 24-26.

 8. Anong duwang enot na mga halimbawa an nagpapaheling kun paano ginamit ni Cristo an mga miembro kan naheheling na namamahalang grupo?

⁸ An enot na nasusurat na okasyon nin paghiro kan 12 apostol sa “katongdan na mangataman” na ini bilang namamahalang grupo kaidtong nombrahan ninda an kuwalipikado sa espirituwal na mga lalaki na maglingkod sa saindang mga tugang sa laog kan enot na kongregasyon. (Gibo 6:1-6) An ikaduwang kaso iyo kan si Felipe magpoon na ihulit si Cristo sa mga Samaritano. Bilang resulta kaini, an “mga apostol sa Jerusalem . . . isinugo . . . sainda si Pedro asin Juan.” Kaidto sanang ikadoon kan representanteng mga miembrong ini kan namamahalang grupo an saindang kamot sa mga Samaritano na sinda ‘nagpoon na umako kan banal na espiritu.’—Gibo 8:5, 14-17.

An Personal na Pangengenot ni Cristo

 9. Si Cristo daw perming naghihiro paagi sa mga anghel o sa namamahalang grupo? Tumao nin halimbawa.

⁹ Kaya, poon sa kapinonan kan Kristianong kongregasyon, si Cristo igwa na kan banal na espiritu, mga anghel, asin naheheling na namamahalang grupo na magagamit tanganing aktibong mapangenotan nia an saiyang mga disipulo digdi sa daga. Kun beses sia minahiro ngani nin personal. Halimbawa, personal na kinombertir ni Cristo si Saulo na taga-Tarso. (Gibo 9:3-6) Pakalihis nin tolong aldaw direktang kinaolay ni Jesus an “sarong disipulo” na an ngaran Ananias. Sa pagpahayag sa saiya kan tolong misyon na nasa isip nia para ki Saulo, si Jesus nagsabi: “An tawong ini pinili kong kasangkapan na magdara kan sakong ngaran sa mga nasyon patin sa mga hade saka sa mga aki ni Israel.” (Gibo 9:10-15) Inapod ni Cristo si Saulo para sa sarong partikular na gibohon. Kaya si Saulo nagin sarong apostol, o sarong isinugo, na orog na midbid bilang si apostol Pablo.

10. Paano personal na pinamahalaan ni Cristo an paghuhulit?

¹⁰ Personal na pinamahalaan ni Cristo an paghuhulit. Paagi sa banal na espiritu na inako sa saiyang Amang si Jehova, sia an nagpapoon sa mga biyahe sa pagmimisyonero ni Pablo asin nagpaheling nin personal na interes dian. Mababasa niato: “An banal na espiritu nagsabi: ‘Sa gabos na tawo laena nindo para sa sako si Bernabe asin si Saulo para sa gibo na inapodan ko sa sainda.’ . . . Kaya an mga lalaking ini, na isinugo kan banal na espiritu, nagduman sa Seleucia, asin paghale duman nagsakay sinda sa barko” sa enot na biyahe sa pagmimisyonero. (Gibo 13:2-4) Siyempre, an banal na espiritu, an puwersa aktiba ni Jehova, dai ‘makapagsasabi’ ni ‘makapagsusugo’ sa saiya sana. An naggagamit sa espiritu sa pagdirehir sa mga bagay malinaw na si Cristo, an Payo kan kongregasyon.

11. Ano an nangyari sa ikaduwang biyahe sa pagmimisyonero ni Pablo, asin paano ipinaheheling kaini nin malinaw na ginamit ni Jesus an espiritu sa pagdirehir sa paghuhulit?

¹¹ An paggamit na ini ni Jesus sa espiritu mantang aktibo niang pinangengenotan an enot na mga Kristiano malinaw na ipinaheheling sa kasaysayan kan ikaduwang biyahe sa pagmimisyonero ni Pablo. Pakasongkoa sa mga kongregasyon sa Licaonia (sarong rehiyon sa Asia Minor) na naorganisar kan enot na biyahe sa pagmimisyonero, malinaw na intension ni Pablo asin kan kairiba nia sa pagbiyahe na pumasolnopan sa Romanong probinsia nin Asia. Taano ta dai ninda idinagos an saindang plano? “Huli ta sinda pinangaladan kan banal na espiritu na ihulit an tataramon sa distrito nin Asia.” (Gibo 15:36, 40, 41; 16:1-6) Alagad siisay an naggagamit sa banal na espiritu ni Jehova na gumiya sa sainda? An minasunod na bersikulo minasimbag. Ipinaheheling kaiyan na kan sinda pumaamihanan, na an intension maghulit sa Bitinia, “dai sinda tinogotan kan espiritu ni Jesus.” (Gibo 16:7) Iyo, ginagamit ni Jesu-Cristo an espiritu na inako nia sa saiyang Ama sa aktibong pagdirehir sa gibong paghuhulit. Boot nia asin kan saiyang Ama na si Jehova na an maogmang bareta makalakop sa Europa, kaya si Pablo nag-ako nin bisyon manongod dian.—Gibo 16:9, 10.

Sinuportaran ni Cristo an mga Miembro kan Namamahalang Grupo

12, 13. Kaidtong enot na pagsongko ni Pablo sa Jerusalem bilang Kristiano, ano an nangyari na nagpaheling kun paano sinusuportaran ni Cristo an mga desisyon kan responsableng mga tugang sa siudad na iyan?

¹² Kan panahon na enot na umatubang si apostol Pablo sa mga disipulo sa Jerusalem, natural sana na sinda nag-aalangan na kaolayon sia. “Kaya tinabangan sia ni Bernabe asin dinara sia sa mga apostol.” (Gibo 9:26, 27) Si Pablo 15 aldaw na nakiibaiba ki apostol Pedro. Nakamidbid man nia an tugang sa ina ni Jesus na si Santiago, na kaidto saro na sa kamagurangan kan kongregasyon sa Jerusalem. (Galacia 1:18, 19) An suminunod na mga teksto sa Mga Gibo nagpapaheling na an kamagurangan sa Jerusalem nagin kabtang kan namamahalang grupo sa enot na Kristianong kongregasyon, kaiba an 12 apostol.—Gibo 15:2; 21:18.

¹³ Sa duwang semana niang pag-istar sa Jerusalem, si Pablo nagpatotoo sa mga Judiong nagtataram nin Griego, pero “an mga ini nagprobar na gadanon sia.” Idinugang ni Lucas na “kan marisa ini kan mga tugang, dinara sia ninda sa Cesarea asin isinubol sia sa Tarso.” (Gibo 9:28-30) Alagad ta siisay an nasa likod kan madonong na desisyon na ini? Pakalihis nin mga taon, kan isinasaysay an iyo man sanang pangyayaring iyan sa saiyang buhay, sinabi ni Pablo na nagpaheling sa saiya si Jesus asin sinabihan sia na humale tolos sa Jerusalem. Kan magsayuma si Pablo, idinugang ni Jesus: “Lakaw, huli ta susugoon taka sa mga nasyon na harayo.” (Gibo 22:17-21) Sinusundan ni Cristo an mga nangyayari hale duman sa itaas asin naghiro pareho paagi sa responsableng mga tugang sa Jerusalem asin nin direkta paagi sa pagtaram ki Pablo.

14. Anong pagkokomparar sa mga tala kan Mga Gibo asin Galacia an nagpapaheling na si Cristo an nagdidirehir sa mga bagay mapadapit sa miting kan namamahalang grupo manongod sa pagtuturi?

¹⁴ Siring man, an atentong pagbasa sa Kasuratan malinaw na nagpapaheling na si Cristo nasa likod kan mahalagang miting kan namamahalang grupo na ginibo tanganing husayon an isyu kun baga an Hentil na mga Kristiano maninigong pumasakop sa pagturi asin sa Pagboot ni Moises o dai. Sinasabi kan librong Mga Gibo na kan lumataw an isyu, “iinareglo ninda [daing duwa-duwa an responsableng mga miembro, o kamagurangan, kan kongregasyon sa Antioquia] na si Pablo asin si Bernabe patin an nagkapira sa sainda paduman sa mga apostol asin kamagurangan na lalaki sa Jerusalem manongod sa pasuruhay na ini.” (Gibo 15:1, 2) Alagad sa pagsaysay ni Pablo sa mga pangyayari na nagbunga kan saiyang pagduman sa Jerusalem tanganing ipahusay an isyu sa pagtuturi, sia nagsasabi: “Ako napaduman huli sa sarong kapahayagan.” (Galacia 2:1-3; ikomparar an 1:12.) Bilang an aktibong Payo kan kongregasyon, boot ni Cristo na an mahalagang isyung ini sa doktrina husayon kan bilog na naheheling na namamahalang grupo. Paagi sa banal na espiritu, giniyahan nia an isip kan debotadong mga lalaking ini sa saindang pagdedesisyon.—Gibo 15:28, 29.

Sarong Pambihirang Desisyon

15, 16. (a) Ano an ipinagibo ki Pablo kan namamahalang grupo pagkabuwelta nia hale sa saiyang ikatolong biyahe sa pagmimisyonero? (b) Taano ta tibaad garo baga pambihira an instruksion na ini, asin taano ta kinuyog iyan ni Pablo? (c) Anong hapot an minalataw?

¹⁵ An saro pang interesanteng halimbawa kan aktibong pagdirehir ni Cristo sa mga bagay gikan sa langit iyo an nangyari pakalihis kan ikatolong biyahe sa pagmimisyonero ni Pablo. Isinasaysay ni Lucas na pakabuwelta sa Jerusalem, si Pablo nagtao nin bilog na report sa mga miembro kan namamahalang grupo na yaon. Si Lucas nagsurat: “Si Pablo nag-iba sa samo sa pagduman ki Santiago; asin yaon an gabos na kamagurangan na lalaki. Asin tinaratara nia sinda asin pinonan na itao sainda nin saro-saro an pagsaysay kan mga ginibo nin Dios sa tahaw kan mga nasyon paagi sa saiyang ministeryo.” (Gibo 21:17-19) Pagkadangog ki Pablo, tinawan sia kan tiripon na grupo nin malinaw na instruksion, na an sabi: “Giboha ining sinasabi mi sa saimo.” Pinagbotan sia ninda na paduman sa templo asin ipaheling sa publiko na sia dai “nagtotokdo sa gabos na Judio sa tahaw kan mga nasyon nin apostasiya ki Moises, na sinasabihan sinda na dai na magturi sa saindang mga aki ni sumunod man sa mga kaugalean.”—Gibo 21:20-24.

¹⁶ Tibaad pagdudahan nin saro an kadonongan kan instruksion na ini. Arog kan naaraman na niato, kaidtong mga taon bago kaini si Pablo isinobol ni Santiago, asin tibaad nin iba pang kamagurangan na presente sa duwang okasyon na ini, na humale sa Jerusalem huli ta an saiyang buhay namemeligro sa “mga Judiong nagtataram nin Griego.” (Gibo 9:29) Sa ibong kaini, kinuyog ni Pablo an pagboot, kaoyon sa isinabi na nia sa 1 Corinto 9:20. Alagad an kaparehong causa nagbubunga nin kaparehong epekto. “An mga Judio na hale sa [Romanong probinsia nin] Asia” nagpundar nin pagkariribok asin pinagmaigotan na gadanon si Pablo. An listo sanang paghiro kan mga soldados na Romano an nagligtas sa saiya sa paggadan na daing birubista. (Gibo 21:26-32) Mantang si Cristo an aktibong Payo kan kongregasyon, taano ta pinapangyari nia an namamahalang grupo na pagbotan si Pablo na paduman sa templo?

17. Paano napatunayan na madonong an pambihirang desisyon na ini, asin ano an ipinaririsa kaini?

¹⁷ An simbag maririsa sa nangyari kan ikaduwang banggi pagkadakopa ki Pablo. Nakatao sia nin marahay na patotoo sa nagsusururog na naghihingoang gumadan sa saiya asin, kan sumunod na aldaw, sa Sanhedrin. (Gibo 22:1-21; 23:1-6) Sa ikaduwang okasyon madali siang magadan na daing birubista. Pero kan bangging idto, si Jesus nagpaheling sa saiya asin nagsabi: “Magmapuso ka! Huli ta kun paanong ika nagtao nin lubos na patotoo sa mga bagay manongod sa sako sa Jerusalem, ika kaipuhan man na magpatotoo sa Roma.” (Gibo 23:11) Girumdoma an tolong misyon na ihinula ni Cristo para ki Pablo. (Gibo 9:15) Dinara na ni Pablo an ngaran ni Cristo sa “mga nasyon” asin sa “mga aki ni Israel,” pero nag-abot na an panahon na sia magpatotoo “sa mga hade.” Huli sa desisyon na iyan kan namamahalang grupo, si Pablo nakapagpatotoo sa Romanong mga prokurador na si Felix asin Festo, ki Hadeng Herodes Agripa II, asin, ultimo, ki Emperador Nero nin Roma. (Gibo, kapitulo 24-26; 27:24) Siisay an magdududa na si Cristo nasa likod kan gabos na ini?

Si Cristo Aktibong Pinangengenotan an Saiyang Kongregasyon Sagkod Ngonyan

18. Ano an isinabi ni Jesu-Cristo bago sia nagsakat sa langit?

¹⁸ Bago bayaan an saiyang mga disipulo asin sumakat sa too kan saiyang Ama, si Jesu-Cristo nagsabi: “An gabos na kapangyarihan sa langit asin sa daga itinao na sa sako. Kaya paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo. Asin, uya! ako danay na nasa saindo sagkod sa pagtatapos kan palakaw nin mga bagay.”—Mateo 28:18-20.

19. Paano ginamit ni Cristo an saiyang kapangyarihan na itinao nin Dios kan enot na siglo, asin ano an pag-oolayan sa minasunod na artikulo?

¹⁹ An librong Mga Gibo, na nagsasaysay kan kasaysayan kan enot na mga taon nin Kristianismo, ipinaheheling nin daing duda na ginamit ni Cristo an saiyang kapangyarihan paagi sa aktibong paggiya sa saiyang kongregasyon sa daga. Ginibo nia ini paagi sa banal na espiritu, mga anghel, asin namamahalang grupo na kompuwesto kan 12 apostol asin kan kamagurangan sa kongregasyon sa Jerusalem. Sinabi ni Jesus na sia masasa kaibanan kan saiyang mga disipulo sagkod sa pagtatapos kan palakaw nin mga bagay, na namumugtakan niato ngonyan. Sa minasunod na artikulo, maheheling niato kun paano na sagkod ngonyan sia an aktibong Payo kan Kristianong kongregasyon asin kun paano nia ginigiyahan an saiyang mga “karnero” ngonyan.

Mga Puntong Dapat na Girumdomon

◻ Taano an mga Saksi ni Jehova ta mayo nin minimidbid na tawo bilang saindang namomoon?

◻ Paano ginamit ni Cristo an banal na espiritu sa pangengenot sa enot na Kristianong kongregasyon?

◻ Paano ginamit ni Cristo an mga anghel sa pangengenot sa mga Kristiano kan enot na siglo?

◻ Paano ginamit ni Cristo an naheheling na namamahalang grupo sa pagdirehir sa saiyang kongregasyon digdi sa daga?

◻ Paano may beses na personal na ginigiyahan ni Cristo an mga bagay?

[Mapa para sa pahina 9]

(Para sa kabilogan, helingon an publikasyon)

An Ikaduwang Biyahe sa Pagmimisyonero ni Pablo

MACEDONIA

BITINIA ASIN PONTO

Filipos

Tesalonica

Troas

GALACIA

CAPADOCIA

ASIA

Antioquia

Iconio

Listra

CILICIA

Derbe

LICIA

Tarso

PANFILIA

Seleucia

Antioquia

[Retrato para sa pahina 7]

Pinangenotan man ni Cristo an saiyang kongregasyon paagi sa sarong naheheling na namamahalang grupo