Iinangkla nin Paglaom, Itinutulod nin Pagkamoot

“Nagdadanay an pagtubod, paglaom, pagkamoot, an tolong ini; alagad an nakalalabi sa gabos kaini iyo an pagkamoot.”—1 CORINTO 13:13.

1. Anong patanid an itinatao sa sato ni apostol Pablo?

PINATATANIDAN kita ni apostol Pablo na, kapareho nin sarong barko, an satong pagtubod puedeng mabagbag. Sia nagtataram manongod sa ‘pangangapot sa pagtubod asin marahay na konsensia, na isinikwal nin nagkapira asin nag-agi nin pagkabagbag may labot sa saindang pagtubod.’ (1 Timoteo 1:19) Kan enot na siglo C.E., an mga sasakyan sa dagat gibo sa kahoy. An saindang pagigin masarig sa dagat depende sa kalidad kan kahoy asin sa ekspertong paggibo nin barko.

2. Taano ta dapat na magin masarig an barko kan satong pagtubod, asin ano an hinahagad kaini sa sato?

² An maaapod na barko kan satong pagtubod dapat na magdanay na lataw sa tahaw kan maalon na kadagatan nin katawohan. (Isaias 57:20; Kapahayagan 17:15) Kaya dapat na iyan masarig, asin ini depende sa sato. Kan an “kadagatan” kan Judio asin Romanong mga kinaban nagigin nang maalon para sa enot na mga Kristiano, si Judas nagsurat: “Mga namomotan, paagi sa pagpakosog sa saindo man sana sa saindong kabanalbanaleng pagtubod, asin pamimibi na igwa kan banal na espiritu, magdanay kamo sa pagkamoot nin Dios, mantang kamo naghahalat sa pagkaherak kan satong Kagurangnan na si Jesu-Cristo na nasa isip an buhay na daing katapusan.” (Judas 20, 21) Mantang si Judas nagtaram man manongod sa pakikilaban para sa “pagtubod na itinao sa mga banal,” an fraseng “kabanalbanaleng pagtubod” puedeng manongod sa gabos na katokdoan na Kristiano, kaiba an maogmang bareta nin kaligtasan. (Judas 3) Si Cristo an pundasyon kan pagtubod na iyan. Kaipuhan an makosog na pagtubod tangani kitang makapangapot sa tunay na Kristianong pagtubod.

Pagsagupa sa Bagyong “Pagkatakot sa Sekta”

3. Paano ginagamit nin nagkapira an “pagkatakot sa sekta”?

³ Sa nakaagi pa sanang mga taon, nagkaigwa nin nagkapirang makatatakot na kaso nin lagdoan na paghugot, tinutuyong paggadan, asin mga pagsalakay nin mga terorista na may koneksion sa sadit sanang grupong mga sekta. Siempre, dakol na indibiduwal, pati an sinserong mga namomoon sa politika, an nagpaheling nin interes na protehiran an mga inosente, partikularmente an mga menor de edad, sa siring na peligrosong mga sekta. Sa siring, an “dios kan palakaw na ini nin mga bagay,” na daing duwa-duwa na iyo an nasa likod kan makababaldeng mga krimen na ini, nakagibo nin inaapod nin nagkapira na pagkatakot sa sekta, asin ginagamit nia ini tumang sa banwaan ni Jehova. (2 Corinto 4:4; Kapahayagan 12:12) An nagkapira inaprobetsaran an situwasyon na ini tanganing mapukaw an oposisyon sa satong gibohon. Sa nagkapirang nasyon, naglansar sinda nin kampanya na garo baga an katuyohan protehiran an mga tawo sa “peligrosong mga sekta” alagad salang nangangaranan an Mga Saksi ni Jehova asin sa siring na paagi inaakusar kita paagi sa patutsada. Ini nagpagin depisil sa paghuhulit sa harong-harong sa nagkapirang nasyon sa Europa asin nagin dahelan na an nagkapira na nakikipag-adal sa sato kan Biblia nagpondo sa saindang pag-adal. Ini nagkaigwa man nin negatibong epekto sa nagkapira niatong tugang.

4. Taano ta dai maninigong makapadesganar sa sato an oposisyon?

⁴ Minsan siring, imbes na magpadesganar sa sato, an oposisyon maninigong magpakosog sa satong panarig na an ginigibo niato tunay na Kristianismo. (Mateo 5:11, 12) An enot na mga Kristiano inakusar na sarong sedisyosong sekta, asin sinda “pinaglilibak” sa gabos na lugar. (Gibo 24:5; 28:22) Alagad pinakosog liwat ni apostol Pedro an boot kan saiyang mga kapagtubod, na nagsurat: “Mga namomotan, dai kamo magngalas sa naglalaad dian sa saindo, na nangyayari sa saindo bilang pagbalo, na garo baga pambihirang bagay an nangyayari sa saindo. Al kontraryo, padagos kamong maggayagaya mantang kamo mga kadamay sa mga pagdusa kan Cristo, tanganing kamo makapaggayagaya asin magin man labi-labi an kagayagayahan sa panahon kan pagkahayag kan saiyang kamurawayan.” (1 Pedro 4:12, 13) Siring man, an sarong miembro kan namamahalang grupo kan enot na siglo nagsurat: “Ibilang nindong bilog na kagayagayahan, mga tugang, kun kamo napapaatubang sa manlaenlaen na pagbalo, sa pakaaram na ining nabalong kualidad kan saindong pagtubod nagbubunga nin pakatagal. Alagad togotan nindo na malubos kan pakatagal an gibo kaiyan, tanganing kamo magin lubos asin marigon sa gabos na bagay, na dai nagkukulang nin ano man.” (Santiago 1:2-4) Kun paanong an doros na arog kakosog nin bagyo binabalo an pagigin masarig sa dagat nin sarong sakayan, an mga bagyo nin oposisyon maghahayag kan ano man na mga kaluyahan sa satong barko nin pagtubod.

An Kahorasaan Nagbubunga nin Pakatagal

5. Paano niato maseseguro na an satong pagtubod masarig sa irarom nin kahorasaan?

⁵ An mga Kristiano makaseseguro sana sa saindang pakatagal asin sa sarig kan saindang pagtubod pakasagupa sa mga bagyo nin kahorasaan. An satong pakatagal ‘malulubos sana an gibo kaiyan’ sa mabagyong kadagatan kun kita “lubos asin marigon sa gabos na bagay, na dai nagkukulang nin ano man,” kaiba an makosog na pagtubod. Isinurat ni Pablo: “Sa lambang paagi irinerekomendar niamo an samong sadiri bilang mga ministro nin Dios, sa pagtagal nin dakol, sa mga kahorasaan, sa mga pangangaipo, sa mga kasakitan.”—2 Corinto 6:4.

6. Taano ta maninigong “mag-ogma kita mantang nasa mga kahorasaan,” asin paano pinakokosog kaini an satong paglaom?

⁶ An doros nin kahorasaan na arog kakosog nin bagyo na kun beses tibaad naeeksperyensiahan niato maninigong ibilang na mga oportunidad na patunayan na an satong barko nin pagtubod marigon asin masarig. Sa mga Kristiano sa Roma, nagsurat si Pablo: “Mag-ogma kita mantang nasa mga kahorasaan, mantang aram niato na an kahorasaan nagbubunga nin pakatagal; dangan, an pakatagal, nin pagkainooyonan; dangan, an pagkainooyonan, nin paglaom, asin an paglaom dai nagdadara nin kamondoan.” (Roma 5:3-5) An karigonan sa irarom nin mga pagbalo nagbubunga kan pag-oyon ni Jehova sa sato. Ini man nagpapakosog kan satong paglaom.

Kun Taano ta Nababagbag an Nagkapira

7. (a) Arog kan ipinaheheling kan mga tataramon ni Pablo, paano nabagbag sa espirituwal an nagkapira? (b) Paano suminuway sa katotoohan an nagkapira ngonyan?

⁷ Kan si Pablo magpatanid manongod sa “pagkabagbag,” nasa isip nia an nagkapira na “isinikwal” an saindang marahay na konsensia asin nawaran kan saindang pagtubod. (1 Timoteo 1:19) Kabilang sa sainda si Himeneo asin Alejandro na naholog sa apostasiya, na suminuway sa katotoohan asin nagtaram nin mapanlibak. (1 Timoteo 1:20, nota sa ibaba; 2 Timoteo 2:17, 18) Ngonyan, an mga apostata, na suminuway sa katotoohan, berbal na binubugbog “an fiel asin madonong na oripon,” na garo man sana kinakagat an kamot na nagpapakakan sa sainda sa espirituwal. An nagkapira kapareho kan “maraot na oripon,” na intendidong nagsasabi, “Nag-aatraso an sakuyang kagurangnan.” (Mateo 24:44-49; 2 Timoteo 4:14, 15) Nagdedehar sinda na harani na an katapusan kan maraot na palakaw na ini nin mga bagay asin tinatatsaran ninda an listo sa espirituwal na grupong oripon sa pagpapadanay nin pagkaapurado sa tahaw kan banwaan ni Jehova. (Isaias 1:3) An siring na mga apostata ‘nalalaglag an pagtubod nin nagkapira,’ na nagpapangyari nin espirituwal na pagkabagbag.—2 Timoteo 2:18.

8. Ano an dahelan na an iba binagbag o linunod an barko kan saindang pagtubod?

⁸ An ibang nagdusay na Kristiano nabagbag an barko kan saindang pagtubod paagi sa pagsikwal sa saindang konsensia asin pagpadara sa daing prenong paghanap nin kasingawan kan kinaban na ini asin sa seksuwal na inmoralidad kaiyan. (2 Pedro 2:20-22) An iba man linulunod an saindang barko nin pagtubod ta sa paghona ninda an duongan na bagong palakaw nin mga bagay garo baga dai pa natatanaw. Huling dai nakakalkulo an panahon may labot sa kaotoban nin nagkapirang hula, asin idinidigson sa saindang isip “an aldaw ni Jehova,” saindang binabayaan an tunay na pagsamba. (2 Pedro 3:10-13; 1 Pedro 1:9) Dai nahahaloy yaon na naman sinda sa malibog, purisaw na katubigan kan presenteng palakaw nin mga bagay. (Isaias 17:12, 13; 57:20) An nagkapira na puminondo sa pakikiasosyar sa Kristianong kongregasyon naniniwala pa man giraray na iyan an naggigibo kan tunay na relihion. Minsan siring, malinaw na mayo sinda kan kinakaipuhan na pasensia asin pakatagal na halaton an bagong kinaban na ipinanuga ni Jehova Dios. An buhay sa Paraiso atrasado para sa sainda.

9. Ano an ginigibo nin pirang nagdusay na Kristiano, asin an aktuwal na mga pangyayaring ini maninigong magmotibar sa sato na pensaron an ano?

⁹ An pirang nagdusay na Kristiano sa nagkapirang parte kan kinaban garo baga linulon an layag kan saindang barko nin pagtubod. Lataw pa sa tubig an barko, alagad imbes na umabante nin sige-sige na bilog an pagtubod, sinda garo na namamasyar an rikas. Nadagka kan paglaom na “madali na an Paraiso,” an nagkapira andam na gibohon an gabos na paghihingoa tanganing makamtan iyan—maigot sa paghuhulit asin regular sa pag-atender sa gabos na pagtiripon, asamblea, asin kombension. Ngonyan sa paghona na an pagkaotob kan saindang mga paglaom mas haloy pa kisa saindang inantisipar, ininaan ninda an paghihingoa na andam sindang gibohon. Risang-risa ini sa mas kadikit na aktibidad sa paghuhulit, pagkairegular sa mga pagtiripon, asin pagigin andam na mapaltahan an mga kabtang nin mga programa sa asamblea o kombension. An iba nagtatao nin mas dakol na panahon sa pag-aling-aling asin sa pagkamit nin materyal na mga kaginhawahan. An aktuwal na mga pangyayaring ini nagmomotibar sa sato na pensaron kun ano an maninigong magin puersang nagmomotibar sa satong buhay kaoyon kan satong pagdusay ki Jehova. Maninigo daw na an satong kaigotan sa paglilingkod sa saiya magdepende sa paglaom na “madali na an Paraiso”?

An Paglaom Ikinokomparar sa Angkla

10, 11. Sa ano iinagid ni Pablo an satong paglaom, asin taano ta angay an komparasyon na ini?

¹⁰ Sinabi ni Pablo na si Jehova nanuga nin mga bendisyon na maabot paagi ki Abraham. Dangan ipinaliwanag kan apostol: “An Dios . . . nanumpa, tanganing, paagi sa duwang dai nagliliwat na bagay [an saiyang tataramon asin an saiyang panunumpa] na dian dai mangyayaring magputik an Dios, kita na nagdulag pasiring sa pailihan magkaigwa nin makosog na pagparigon sa boot na mangapot sa paglaom na ibinugtak sa atubangan niato. An paglaom na ini yaon sa sato bilang angkla para sa kalag, sierto sagkod marigon.” (Hebreo 6:17-19; Genesis 22:16-18) An paglaom na iinaatubang sa linahidan na mga Kristiano iyo an inmortal na buhay sa langit. Ngonyan, an dakulang mayoriya sa mga lingkod ni Jehova igwa kan marahayon na paglaom na buhay na daing katapusan sa sarong paraisong daga. (Lucas 23:43) Kun mayo kan siring na paglaom, an saro dai puedeng magkaigwa nin pagtubod.

¹¹ An angkla epektibong marhay na aparato sa pagigin ligtas sa peligro, na kaipuhan nanggad sa pagtindi sa sarong barko asin pag-ebitar na iyan ikaanod. Mayo nin marinero na mangangahas na maghale na mayo nin angkla. Mantang nagkapirang beses nang nabagbag an sinasakyan na barko ni Pablo, aram nia basado sa inagihan nia na an buhay nin mga paradagat parateng depende sa mga angkla kan saindang barko. (Gibo 27:29, 39, 40; 2 Corinto 11:25) Kan enot na siglo, an barko mayo nin makina tanganing pangyarihon an kapitan na magmaniobra sono sa gusto nia. Apuera sa mga bapor de guerra na sinasagwanan, an mga sasakyan sa pangenot nagdedepende sa doros tanganing makahiro. Kun an saiyang barko namemeligrong sumadsad sa kagagapoan, an solamenteng remedyo nin sarong kapitan ibaba an angkla asin tagalan an bagyo, na nagtitiwala na an angkla dai matatangkas sa irarom kan dagat. Kun siring, ikinomparar ni Pablo an paglaom nin sarong Kristiano sa “angkla para sa kalag, sierto sagkod marigon.” (Hebreo 6:19) Kun kita sinasalakay nin mga bagyo nin oposisyon o nag-aagi nin iba pang mga pagbalo, an satong makangangalas na paglaom garo angkla na nagpapasarig sa sato bilang buhay na kalag, tangani na an satong barko nin pagtubod dai ikaanod pasiring sa peligrosong mga bahora nin pagduda o sa kapahapahamak na mga gapo nin apostasiya.—Hebreo 2:1; Judas 8-13.

12. Paano niato malilikayan an “pagbaya” ki Jehova?

¹² Pinatanidan ni Pablo an mga Kristianong Hebreo: “Mag-ingat kamo, mga tugang, ta tibaad tumubo sa siisay man sa saindo an maraot na puso na daing pagtubod paagi sa pagbaya sa nabubuhay na Dios.” (Hebreo 3:12) Sa tekstong Griego, an “pagbaya” sa literal nangangahulogan “rumayo,” an boot sabihon, mag-apostatar. Alagad malilikayan niato an siring na lubos na pagkabagbag. An pagtubod asin paglaom mapangyari sa sato na magdanay ki Jehova dawa sa panahon kan pinakagrabeng mga bagyo nin pagbalo. (Deuteronomio 4:4; 30:19, 20) An satong pagtubod dai magigin siring sa barko na inaanod nin mga doros nin apostatang katokdoan. (Efeso 4:13, 14) Asin mantang yaon an paglaom bilang satong angkla, masasagupa niato an mga bagyo sa buhay bilang mga lingkod ni Jehova.

Itinutulod nin Pagkamoot Asin Banal na Espiritu

13, 14. (a) Taano an angkla kan satong paglaom ta bakong supisyente sa saiyang sadiri? (b) Ano an maninigo na magin puersang nagmomotibar sa pagtao nin sagradong paglilingkod ki Jehova, asin taano?

¹³ An sarong Kristiano dai maoswag pasiring sa bagong palakaw kun an solamenteng motibo nia sa paglilingkod ki Jehova iyo an paglaom na mabuhay sagkod lamang sa sarong paraisong daga. Mantang pinapagdadanay an saiyang angkla nin paglaom bilang pampasarig sa saiyang buhay, kaipuhan na idagdag nia dian asin sa saiyang pagtubod an nagtutulod na puersa nin pagkamoot. Idinoon ni Pablo an bagay na ini kan sia sumurat: “Nagdadanay an pagtubod, paglaom, pagkamoot, an tolong ini; alagad an nakalalabi sa gabos kaini iyo an pagkamoot.”—1 Corinto 13:13.

¹⁴ An puersang nagmomotibar sa sato sa pagtao nin sagradong paglilingkod maninigo na odok sa pusong pagkamoot ki Jehova, bilang simbag sa saiyang daing sokol na pagkamoot sa sato. Nagsurat si apostol Juan: “An dai namomoot dai nakakamidbid sa Dios, huli ta an Dios pagkamoot. Huli kaini nahayag sa sato an pagkamoot nin Dios, huli ta sinugo nin Dios an saiyang Aking bugtong sa kinaban tanganing kita magkamit nin buhay paagi sa saiya. Kun para sa sato, kita namomoot, huli ta sia enot na namoot sa sato.” (1 Juan 4:8, 9, 19) Huli sa utang na boot ki Jehova, maninigo na an pangenot na pinagmamalasakitan niato, bakong magkamit nin personal na kaligtasan, kundi maheling an santipikasyon kan saiyang banal na ngaran asin an bindikasyon kan saiyang matanos na soberaniya.

15. Paano an satong pagkamoot ki Jehova konektado sa isyu kan saiyang soberaniya?

¹⁵ Boot ni Jehova na kita maglingkod sa saiya huli ta kita namomoot sa saiya, bako sanang sa Paraiso. An ensiklopedya sa Biblia na Insight on the Scripturesa nagsasabi: “Ipinag-oorgolyo ni Jehova an bagay na an saiyang soberaniya asin an pagsuportar dian kan saiyang mga linalang sa pangenot basado sa pagkamoot. An gusto sana nia idtong mga namomoot sa saiyang soberaniya huli sa saiyang marahay na mga kualidad asin huli ta iyan matanos, na sono an saiyang soberaniya kisa iba. (1Co 2:9) Ginugusto nindang maglingkod sakop kan saiyang soberaniya imbes na probaran na magin independiente—ini huli sa saindang kaaraman manongod sa saiya asin sa saiyang pagkamoot, hustisya, asin kadonongan, na aram nindang nakalalabing marhay kisa sainda. (Sal 84:10, 11)”—Tomo 2, pahina 275.

16. Paano an pagkamoot ki Jesus puersang nagtutulod sa satong buhay?

¹⁶ Bilang mga Kristiano, kita nagpapaheling man nin pagkamoot ki Jesus bilang simbag sa saiyang pagkamoot sa sato. Nangatanosan si Pablo: “Itinutulod kami kan pagkamoot na yaon sa Cristo, huli ta iyo ini an samuyang paghusgar, na an sarong tawo nagadan para sa gabos; kaya, kun siring, an gabos nagadan; asin sia nagadan para sa gabos tanganing idtong mga nabubuhay dai na mabuhay para sa sainda man sana, kundi para sa saiya na nagadan para sa sainda asin binuhay liwat.” (2 Corinto 5:14, 15) Si Cristo an mismong pundasyon na dian napapasikad an satong espirituwal na buhay, an satong pagtubod, asin an satong paglaom. An pagkamoot niato ki Cristo Jesus nagsusuportar sa satong paglaom asin nagpapasarig kan satong pagtubod, nangorogna sa mga panahon nin mabagyong pagbalo.—1 Corinto 3:11; Colosas 1:23; 2:6, 7.

17. Anong dinamikong puersa an itinatao sa sato ni Jehova, asin paano ipinaheheling an halaga kaiyan sa Gibo 1:8 asin Efeso 3:16?

¹⁷ Minsan ngani an satong pagkamoot sa Dios asin sa saiyang Aki iyo an pangenot na puersang nagtutulod sa satong buhay bilang mga Kristiano, si Jehova may iba pang itinatao na nagtutulod sa sato, nagpapabagsik sa sato, asin nagtatao sa sato nin kosog na umabante sa paglilingkod sa saiya. Iyan an saiyang puersa aktiba, o banal na espiritu. An mga termino sa Hebreo asin Griego na trinadusir na “espiritu” sa pundamental nanonongod sa dinamikong paghiro kan aire, arog baga kan doros. An naglalayag na mga barko na arog kan mga sinakyan ni Pablo nagsasarig sa dai naheheling na puersa kan doros tanganing makaabot sa saindang padudumanan. Kaagid kaiyan, kaipuhan niato an pagkamoot asin an paghiro kan dai naheheling na puersa aktiba nin Dios tangani na an satong barko nin pagtubod iabante kita sa paglilingkod ki Jehova.—Gibo 1:8; Efeso 3:16.

Abante Pasiring sa Satong Padudumanan!

18. Ano an magpapangyari sa sato na tagalan an ano man na mga pagbalo sa satong pagtubod sa ngapit?

¹⁸ Tibaad mabalo nin grabe an satong pagtubod asin pagkamoot bago niato maabot an bagong palakaw nin mga bagay. Alagad tinawan kita ni Jehova nin angkla na “sierto sagkod marigon”—an satong makangangalas na paglaom. (Hebreo 6:19; Roma 15:4, 13) Kun kita rogado sa oposisyon o iba pang mga pagbalo, kita makatatagal kun kita nakaangkla nin segurado paagi sa satong paglaom. Paghupa nin sarong bagyo alagad bago biglang magpoon an saro pa, magin kitang determinado na pasarigon an satong paglaom asin pakosogon an satong pagtubod.

19. Paano niato mapagdadanay na nasa tamang direksion an barko kan satong pagtubod asin kita makaaabot sa duongan na bagong kinaban nin Dios?

¹⁹ Bago nasambitan an “angkla para sa kalag,” sinabi ni Pablo: “Minamawot niamo na an lambang saro sa saindo magpaheling kan kaparehong kahigosan [“rumikas,” nota sa ibaba] tanganing magkaigwa kan biyong kasiertohan kan paglaom sagkod sa katapusan, tanganing dai kamo magin mga hugakon, kundi magin mga paraarog kan mga nagmamana sa mga panuga paagi sa pagtubod asin pasensia.” (Hebreo 6:11, 12) Itinutulod nin pagkamoot ki Jehova saka sa saiyang Aki asin tinatawan nin poder kan banal na espiritu, papagdanayon niatong nasa tamang direksion an barko kan satong pagtubod sagkod na makaabot kita sa duongan na ipinanugang bagong kinaban nin Dios.

[Nota sa Ibaba]

Bilang Repaso

◻ Mapadapit sa satong pagtubod, anong patanid an itinao sa sato ni Pablo?

◻ Paano nabagbag sa espirituwal an nagkapira, asin paano nagluluya an iba?

◻ Anong diosnon na mga kualidad an kaipuhan na ipadis sa satong pagtubod?

◻ Ano an magpapangyari sa sato na maabot an duongan na ipinanugang bagong kinaban nin Dios?

[Retrato sa pahina 16]

An barko kan satong pagtubod dapat na masarig tangani na makaaguanta sa mga bagyo sa buhay

[Retrato sa pahina 17]

An satong pagtubod puedeng mabagbag

[Retrato sa pahina 18]

An paglaom angkla para sa satong buhay bilang mga Kristiano