Irinerekomendar sa Sato nin Dios an Saiyang Pagkamoot

“An dai na kutana maninigong kabootan [mamamahala] bilang hade paagi sa katanosan na may hinahalat na buhay na daing katapusan.”—ROMA 5:21.

1, 2. Anong duwang balaog an puedeng ibilang na mahalaga, alagad arin an nangongorog?

“AN PINAKADAKULANG . . . pamana kan mga Romano sa mga sunod sa sainda iyo an saindang ley asin an saindang paniniwala na maninigong mamuhay kaoyon nin ley.” (Dr. David J. Williams kan University of Melbourne, Australia) Gurano man iyan katotoo, may pamana o balaog na mas dakula nanggad an halaga. An balaog na ini sarong paagi nin Dios tanganing an mga tawo magkaigwa nin inooyonan asin matanos na kamugtakan sa atubangan nia asin kan paglaom na makaligtas asin mabuhay nin daing katapusan.

² Masasabing may legal na mga aspekto sa kun paano ginibong posible nin Dios na magkaigwa kan balaog na ini. Sa Roma kapitulo 5, an mga aspektong ini dai iprinesentar ni apostol Pablo paagi sa sarong surat na mayong kabuhaybuhay asin sobra an atension sa mga detalye sa ley. Imbes, nagpoon sia sa nakakapukaw sa boot na pag-asegurar na ini: “Ikinapahayag na kitang matanos huli sa pagtubod, [kaya] makipagkatoninongan na kita sa Dios paagi sa satong Kagurangnan na Jesu-Cristo.” An mga nag-aako kan balaog nin Dios napapahiro na mamotan man sia. Saro dian si Pablo. Sia nagsurat: “An pagkamoot nin Dios pinabolos na sa satong puso paagi sa banal na espiritu.”—Roma 5:1, 5.

 3. Anong mga hapot an rasonableng minabangon?

³ Pero, taano ta kaipuhan an mamomoton na balaog na ini? Paano iyan ikakatao nin Dios sa paagi na makatanosan asin makikinabang an gabos? Asin ano an dapat gibohon kan kada saro tanganing magin kualipikadong mag-ako kaiyan? Aramon niato an nakakakontentong mga simbag asin helingon kun paano kaiyan idinodoon an pagkamoot nin Dios.

An Pagkamoot nin Dios Asin an Kasalan

4, 5. (a) Sa anong pambihirang paagi ipinahayag ni Jehova an pagkamoot nia? (b) Anong impormasyon an makakatabang sa sato na masabotan an Roma 5:12?

⁴ Sa pagpaheling nin dakulang pagkamoot, isinugo ni Jehova an saiyang bugtong na Aki tanganing tabangan an mga tawo. Ipinahayag iyan ni Pablo sa paaging ini: “Irinerekomendar sa sato nin Dios an saiya mismong pagkamoot sa paagi na, mantang kita mga parakasala pa, si Cristo nagadan para sa sato.” (Roma 5:8) Isip-isipa an sarong katunayan na nasambit dian: “Kita mga parakasala pa.” Kaipuhan na maaraman kan gabos kun paano nagin siring.

⁵ Ipinaliwanag ni Pablo an bagay na iyan asin nagpoon sia sa puntong ini: “Paagi sa sarong tawo an kasalan naglaog sa kinaban asin an kagadanan huli sa kasalan, asin sa siring an kagadanan nakalakop sa gabos na tawo huli ta sinda gabos nagkasala.” (Roma 5:12) Masasabotan niato ini huling ipinasurat nin Dios an dapit sa pagpoon kan buhay nin tawo. Linalang ni Jehova an duwang tawo, si Adan asin Eva. Perpekto an Kaglalang, asin iyo man an enot na mga tawong idto na satong ginikanan. Sinda tinawan nin Dios nin saro sanang pagbabawal asin sinabihan na an dai pagsunod sa ley na iyan may sentensiang kagadanan. (Gen. 2:17) Minsan siring, pinili nindang gumawe nin kapahapahamak paagi sa pagbalga sa rasonableng pagboot nin Dios, na sa siring isinikwal ninda sia bilang Paratao nin Ley asin Soberano.—Deut. 32:4, 5.

 6. (a) Taano ta nagagadan an mga naggikan ki Adan bago asin pagkatapos itao nin Dios an Ley ni Moises? (b) Ano an puedeng iilustrar paagi sa helang na arog nin hemophilia?

⁶ Makasalan na si Adan kan magkaaki sia, kaya an kasalan asin an mga epekto kaiyan namana kan gabos na naggikan sa saiya. Siempre, dai ninda binalga an ley nin Dios arog kan ginibo ni Adan, kaya dai sinda pinapanimbag sa kasalan na iyan; ni tinawan na sinda kaidto nin ano man na kodigo nin ley. (Gen. 2:17) Pero, an mga gikan ki Adan nagmana nin kasalan. Kaya, an kasalan asin an kagadanan namamahala na bago pa tawan nin Dios an mga Israelita nin kodigo nin ley, na malinaw na nagpaheling na sinda makasalan. (Basahon an Roma 5:13, 14.) An epekto nin namanang kasalan puedeng iilustrar paagi sa nagkapirang namamanang helang o depekto, arog nin Mediterranean anemia o hemophilia. Tibaad nabasa na nindo na si Alexis, an aki kan Rusong si Czar Nicholas II asin ni Alexandra, nagmana nin hemophilia, na abnormal na pagdudugo. Totoo, dawa sa siring na pamilya, an nagkapirang aki dai nagsasakit huli sa mga helang na arog kaiyan, alagad puede pa man giraray nindang ikapasa iyan. Bakong arog kaiyan kun dapit sa kasalan. Dai malilikayan an depekto na resulta kan kasalan hale ki Adan. An gabos nagsasakit huli kaiyan. Pirmeng nakakagadan iyan. Asin ikinakapasa iyan sa gabos na aki. Puede daw na makatalingkas sa siring na masakit na kamugtakan?

An Probisyon nin Dios Paagi ki Jesu-Cristo

7, 8. Paano nagin magkalaen an resulta kan ginibo kan duwang perpektong tawo?

⁷ Si Jehova mamomoton na nagtao nin probisyon sa mga tawo tanganing makatalingkas sa minanang pagkamakasalan. Ipinaliwanag ni Pablo na posible ini paagi sa saro pang perpektong tawo—na garo man sana ikaduwang Adan. (1 Cor. 15:45) Alagad magkalaen na marhay an nagin resulta kan ginibo kan duwang perpektong lalaking ini. Paano man?—Basahon an Roma 5:15, 16.

⁸ “An sa balaog bakong arog kan sa paglapas,” an isinurat ni Pablo. Nagibo ni Adan an paglapas na iyan, asin makatanosan na sinentensiahan sia nin kagadanan. Pero, bako sana sia an magagadan. Mababasa niato: ‘Paagi sa paglapas kan sarong tawong iyan dakol an nagadan.’ Segun sa pamantayan nin hustisya nin Dios, an gabos na bakong perpektong gikan ki Adan, kaiba na kita, maninigo man sa nagin sentensia sa saiya. Pero, nakakarangang maaraman na paagi sa perpektong tawo, si Jesus, kabaliktaran an mangyayari. Ano an resulta? Maheheling niato an simbag sa mga tataramon ni Pablo na “pagpahayag sa [gabos na klase nin tawo] na matanos para sa buhay.”—Roma 5:18.

 9. Ano an ginigibo nin Dios sa pagpahayag sa mga tawo na matanos, arog kan nasambit sa Roma 5:16, 18?

⁹ Ano an ipinaparisa kan Griegong pananaram para sa “pagpahayag nin katanosan” asin “pagpahayag sa sainda na matanos”? An sarong paratradusir nin Biblia nagsurat dapit dian: “Iyan pagkokomparar sa mga bagay na konektado sa ley asin may legal na aspekto iyan. Sinasabi kaiyan an pagbabago sa kamugtakan nin saro sa atubangan nin Dios, bakong an panglaog na pagbabago sa saro . . . Sa pagkokomparar na iyan, an Dios ilinaladawan bilang an hokom na nagdesisyon pabor sa akusado, na garo man sana iinatubang sa korte nin Dios huli sa akusasyon na pagkabakong matanos. Alagad inabsuelto nin Dios an akusado.”

10. Ano an ginibo ni Jesus na nagin basehan tanganing an mga tawo ipahayag na matanos?

¹⁰ Sa anong basehan aabsueltohon kan matanos na “Hokom kan bilog na daga” an bakong matanos na tawo? (Gen. 18:25) Bilang enot na mahalagang lakdang, mamomoton na isinugo nin Dios sa daga an saiyang bugtong na Aki. Lubos na ginibo ni Jesus an kabotan kan saiyang Ama, sa ibong nin mga pagtentar, grabeng pag-olog-olog, asin pag-abuso. Pinagdanay nia an saiyang integridad sagkod pa ngani na magadan sia sa hariging pasakitan. (Heb. 2:10) Sa pagsakripisyo kan saiyang perpektong buhay bilang tawo, nagtao si Jesus nin pantubos na paagi kaiyan an mga gikan ki Adan makakatalingkas, o mababalukat, sa kasalan asin kagadanan.—Mat. 20:28; Roma 5:6-8.

11. Katimbang nin ano an pantubos?

¹¹ Sa ibang teksto, inapod ini ni Pablo na “katimbang na pantubos.” (1 Tim. 2:6) Katimbang nin ano? Si Adan nagdara kan pagkabakong perpekto asin kagadanan sa binilyon, sa mga naggikan sa saiya. Totoo na bilang perpektong tawo, puede kutanang paggikanan si Jesus nin binilyon na perpektong tawo.a Huli kaini, an pakasabot niato kaidto iyo na an buhay ni Jesus pati na kan gabos na perpektong magikan kutana sa saiya iyo an atang na katumbas kan ki Adan asin kan sa bakong perpektong mga naggikan sa saiya. Minsan siring, dai sinasabi kan Biblia na an siisay man na puedeng maggikan ki Jesus kabtang kan pantubos. Ipinapaheling kan Roma 5:15-19 na an katalingkasan nagin posible paagi sa kagadanan kan “sarong tawo” sana. Iyo, an perpektong buhay ni Jesus katimbang kan ki Adan. Ki Jesu-Cristo sana an pokus, asin iyan an maninigo. Nagin posible para sa gabos na klase nin tawo na mag-ako kan daing bayad na balaog asin buhay huli sa “sarong gibo nin pagtataong katanosan” ni Jesus, an saiyang pagkamakinuyog asin integridad sagkod pa ngani sa kagadanan. (2 Cor. 5:14, 15; 1 Ped. 3:18) Paano nangyari iyan?

Pag-absuelto Basado sa Pantubos

12, 13. Taano an mga ipinahayag na matanos ta nangangaipo kan pagkaherak asin pagkamoot nin Dios?

¹² Inako ni Jehova Dios an atang na pantubos na itinao kan saiyang Aki. (Heb. 9:24; 10:10, 12) Pero, bako pa man giraray perpekto an mga disipulo ni Jesus digdi sa daga, kaiba na an maimbod niang mga apostol. Minsan ngani nagmaigot sinda na dai makagibo nin sala, dai sinda pirmeng mapanggana. Taano? Huling nagmana sinda nin kasalan. (Roma 7:18-20) Alagad may magigibo an Dios dapit dian asin ginibo nia iyan. Inako nia an “katimbang na pantubos” asin andam siang iaplikar iyan para sa mga tawong lingkod nia.

¹³ Bakong obligasyon nin Dios sa mga apostol asin sa iba pa na iaplikar an pantubos huli sa marahay nindang mga ginibo. Imbes, an pantubos iinaplikar nin Dios para sa sainda huli sa saiyang pagkaherak asin dakulang pagkamoot. An mga apostol asin an iba pa inabsuelto nia sa sentensia sa sainda, na minamansay sinda na absuelto na sa minanang kasalan. Lininaw iyan ni Pablo: “Sa katunayan, paagi sa dai na kutana maninigong kabootan na ini, kamo ilinigtas paagi sa pagtubod; asin ini bakong huli sa saindo, iyan balaog nin Dios.”—Efe. 2:8.

14, 15. Anong balos an itatao nin Dios sa mga ipinahayag niang matanos, alagad ano pa an kaipuhan nindang gibohon?

¹⁴ Isip-isipa na sana kun gurano kadakulang balaog na patawadon kan Makakamhan sa Gabos an kasalan na minana nin saro saka an mga nagibo niang sala! Dai nindo mabibilang an kasalan na nagibo kan kada saro bago nagin Kristiano; pero, basado sa pantubos, mapapatawad nin Dios an mga iyan. Si Pablo nagsurat: “An balaog huli sa dakol na paglapas nagresulta sa pagpahayag nin katanosan.” (Roma 5:16) An mga apostol asin an iba pa na nag-aako kan mamomoton na balaog na ini (an ipahayag na matanos) kaipuhan na padagos na may pagtubod na sumamba sa tunay na Dios. Asin ano an magigin balos? “An mga nag-ako kan abundang dai na kutana maninigong kabootan asin daing bayad na balaog na katanosan mamamahala bilang mga hade sa buhay paagi sa sarong tawo, si Jesu-Cristo.” Iyo, kabaliktaran an epekto kan balaog na katanosan. Buhay an resulta kan balaog na iyan.—Roma 5:17; basahon an Lucas 22:28-30.

¹⁵ An mga nag-aako kan balaog na iyan, an ipahayag na matanos, nagigin espirituwal na mga aki nin Dios. Bilang mga paramana kaiba ni Cristo, may paglaom sindang buhayon liwat sa langit bilang tunay na espiritung mga aki na “mamamahala bilang mga hade” kaiba ni Jesu-Cristo.—Basahon an Roma 8:15-17, 23.

An Pagkamoot nin Dios sa Iba Pa

16. Anong balaog an puedeng akoon dawa ngonyan kan mga may daganon na paglaom?

¹⁶ Bakong gabos na nagtutubod asin naglilingkod sa Dios bilang maimbod na mga Kristiano naglalaom na ‘mamahala bilang mga hade’ kaiba ni Cristo sa langit. Dakol an may basado sa Biblia na paglaom na arog kan sa mga lingkod nin Dios kan panahon bago kan mga Kristiano. Naglalaom sinda na mabuhay sagkod lamang sa paraisong daga. Puede daw sindang mag-ako dawa ngonyan nin mamomoton na balaog hale sa Dios asin ibilang na matanos, na may paglaom na mabuhay digdi sa daga? Basado sa isinurat ni Pablo sa mga taga Roma, an nakakapakosog sa boot na simbag iyo!

17, 18. (a) Huli sa pagtubod ni Abraham, paano sia minansay nin Dios? (b) Taano si Abraham ta puedeng ibilang ni Jehova na matanos?

¹⁷ Tinokar ni Pablo an sarong pangenot na halimbawa, si Abraham, na sarong tawong may pagtubod na nabuhay bago magtao si Jehova nin kodigo nin ley sa Israel asin haloy pa bago binuksan ni Cristo an dalan pasiring sa langitnon na buhay. (Heb. 10:19, 20) Mababasa niato: “Bakong paagi sa ley na si Abraham o an saiyang banhi pinanugaan na sia magigin paramana nin sarong kinaban, kundi paagi sa katanosan huli sa pagtubod.” (Roma 4:13; Sant. 2:23, 24) Kaya, an maimbod na si Abraham ibinilang nin Dios na matanos.—Basahon an Roma 4:20-22.

¹⁸ Dai iyan puedeng mangahulogan na dai man lamang nagkasala si Abraham mantang naglilingkod ki Jehova sa laog nin dakol na dekada. An pagigin matanos nia bako nanggad sa paaging iyan. (Roma 3:10, 23) Minsan siring, huli sa daing limiteng kadonongan ni Jehova, naheling nia an pambihirang pagtubod ni Abraham asin an mga ginibo kaini huli sa pagtubod na iyan. Partikularmente, nagtubod si Abraham sa ipinanugang “banhi” na magikan sa saiya. An Banhing iyan iyo an Mesiyas, o Cristo. (Gen. 15:6; 22:15-18) Huli kaiyan, basado sa “pantubos na ibinayad ni Cristo Jesus,” mapapatawad kan banal na Hokom an mga kasalan kaidto. Kaya, si Abraham asin an iba pang maimbod kan panahon bago kan mga Kristiano may paglaom na buhayon liwat.—Basahon an Roma 3:24, 25; Sal. 32:1, 2.

Magkaigwa nin Matanos na Kamugtakan Ngonyan

19. Taano an pagmansay nin Dios ki Abraham ta maninigong makapakosog sa boot kan dakol ngonyan?

¹⁹ An katunayan na si Abraham ibinilang na matanos kan Dios nin pagkamoot maninigong makapakosog sa boot kan tunay na mga Kristiano ngonyan. An pagpahayag ni Jehova sa saiya bilang matanos bakong arog kan sa mga linahidan Nia nin espiritu na magin “kaibang mga paramana ni Cristo.” An grupong iyan, na limitado an bilang, “inapod na magin mga banal” asin inako bilang “mga aki nin Dios.” (Roma 1:7; 8:14, 17, 33) Kun dapit ki Abraham, sia nagin “katood ni Jehova”—asin nangyari iyan bago itao an atang na pantubos. (Sant. 2:23; Isa. 41:8) Kun siring, kumusta man an tunay na mga Kristiano na naglalaom na mabuhay sa ibabalik na Paraiso digdi sa daga?

20. Ano an inaasahan nin Dios sa mga ibinibilang nia ngonyan na matanos arog ni Abraham?

²⁰ An mga ini dai nag-ako “kan daing bayad na balaog na katanosan” na may paglaom na langitnon na buhay “paagi sa pagkabutas huli sa pantubos na ibinayad ni Cristo Jesus.” (Roma 3:24; 5:15, 17) Minsan siring, may hararom sindang pagtubod sa Dios asin sa mga probisyon nia, asin ipinapaheling ninda iyan paagi sa marahay na mga gibo. Saro na dian an ‘paghuhulit kan kahadean nin Dios asin pagtotokdo kan mga bagay mapadapit sa Kagurangnan na Jesu-Cristo.’ (Gibo 28:31) Kaya, puede sindang ibilang ni Jehova na matanos arog ni Abraham. An balaog na inaako ninda—an pakikikatood sa Dios—laen man sa “daing bayad na balaog” na inaako kan mga linahidan. Iyo, sarong balaog nanggad iyan na inaako ninda na may dakulang pagpasalamat.

21. Paano kita nakikinabang sa pagkamoot asin hustisya ni Jehova?

²¹ Kun naglalaom kang magkaigwa nin buhay na daing katapusan digdi sa daga, maninigong marealisar mo na an oportunidad na ini nagin posible bakong huli sa dai tinutuyong resulta nin pagmamaigot nin mga tawong namamahala. Imbes, nababanaag dian an madonong na katuyohan kan Unibersal na Soberano. Progresibong naghihiro si Jehova tanganing otobon an saiyang katuyohan. An saiyang mga ginigibo kaoyon kan tunay na hustisya. Orog pa dian, ipinapabanaag kan mga iyan an dakulang pagkamoot nin Dios. Angay na sinabi ni Pablo: “Irinerekomendar sa sato nin Dios an saiya mismong pagkamoot sa paagi na, mantang kita mga parakasala pa, si Cristo nagadan para sa sato.”—Roma 5:8.

[Nota sa Ibaba]

Nagigirumdoman daw Nindo?

• Ano an minana kan mga naggikan ki Adan, asin ano an resulta?

• Paano itinao an katimbang na pantubos, asin taano ta masasabing katimbang iyan?

• Ano an nagin paglaom mo huli sa balaog na ipahayag na matanos?

[Ritrato sa pahina 13]

Nagkasala an perpektong tawong si Adan. Itinao kan perpektong tawong si Jesus an “katimbang na pantubos”

[Ritrato sa pahina 15]

Maogmang bareta nanggad—puede kitang ipahayag na matanos paagi ki Jesus!