Huli sa Daing Kapantay na Kabuutan Kaya Kamo Napatalingkas

1, 2. Taano ta interesado an mga Saksi ni Jehova sa Roma 5:12?

IPAMUGTAK na gusto mong ilista an mga teksto sa Bibliya na kabisado asin parating gamiton kan mga Saksi ni Jehova. Kaiba daw sa ililista mo an Roma 5:12? Girumduma kun gurano mo kaparating gamiton an mga tataramon na: “Kun paanong paagi sa sarong tawo an kasalan luminaog sa kinaban asin an kagadanan paagi sa kasalan, asin sa siring an kagadanan luminakop sa gabos na tawo huling sinda gabos nagkasala.” (NW)

² Pauruutrong ginamit an tekstong iyan sa librong Ano Man Nanggad an Itinotokdo kan Biblia? Kan ipakipag-adal mo an librong ini sa saimong mga aki o sa iba, posibleng nabasa mo an Roma 5:12 kan tinutukar nindo an katuyuhan nin Diyos para sa daga, an pantubos, asin an kamugtakan kan mga gadan—yaon iyan sa mga kapitulo 3, 5, asin 6. Pero gurano mo kaparating hurop-hurupon an Roma 5:12 kun dapit sa kamugtakan mo sa atubangan ni Jehova, sa saimong mga ginigibo, asin sa saimong paglaom sa maabot na panahon?

 3. Anong katotoohan an dapat niyatong akuon kun dapit sa kasalan?

³ Siyempre, gabos kita dapat na akuon an katotoohan na kita mga makasalan. Aroaldaw kitang nasasala. Pero, sinisiyerto sa sato na ginigirumdom nin Diyos na kita gibo sa kabo-kabo, asin andam siyang magpahiling nin pagkahirak sa sato. (Sal. 103:13, 14) Iiniba ni Jesus sa modelong pamibi an pakiulay na ini sa Diyos: ‘Patawadon mo kami sa samuyang mga kasalan.’ (Luc. 11:2-4) Kaya, mayo kitang dahilan na pagparaisipon pa an mga kasalan niyato na pinatawad na nin Diyos. Pero, makikinabang kita kun iisipon niyato kun paano niya kita napapatawad.

4, 5. (a) Ano an makakatabang sa sato para masabutan an kahulugan kan Roma 5:12? (b) Ano an “daing kapantay na kabuutan” na sinambit sa Roma 3:24?

⁴ May makukua kitang mahalagang impormasyon sa mga kapitulong nakapalibot sa sinabi ni apostol Pablo sa Roma 5:12, lalo na sa kapitulo 6. Makakatabang ini sa sato na masabutan kun paano kita napapatawad ni Jehova. Sa kapitulo 3, mababasa ta: “An gabos nagkasala . . . , asin dapat na ibilang na sarong regalong daing bayad an siring na pagpahayag sa sainda na matanos, na saiyang itinatao dahil sa saiyang daing kapantay na kabuutan paagi sa nagpapatalingkas na pantubos na ibinayad ni Cristo Jesus.” (Roma 3:23, 24, NW) Ano an buot sabihon ni Pablo sa sinabi niyang “daing kapantay na kabuutan”? Naggamit siya nin sarong Griegong termino na, uyon sa sarong reperensiya, may kahulugan na “sarong pabor na gikan sa buot na ginibo, na mayong hinahagad o linalauman na balos.” Itinatao iyan sa saro bakong huli ta pinagpagalan niya iyan o maninigo siyang mag-ako kaiyan.

⁵ Sinabi kan iskolar na si John Parkhurst: “Kun ginagamit sa Diyos o ki Cristo, parating nanunungod ini [an Griegong termino] lalo na sa saindang daing bayad asin daing kapantay na pabor o kabuutan sa pagbalukat asin pagligtas sa tawo.” Kaya angay an pagkatradusir kaiyan kan New World Translation bilang “daing kapantay na kabuutan.” Pero paano ipinahiling nin Diyos an daing kapantay na kabuutan na ini? Asin ano an koneksiyon kaini sa saimong paglaom asin sa relasyon mo sa saiya? Hilingon niyato.

 6. Sagkod sain puwedeng makinabang sa daing kapantay na kabuutan nin Diyos an mga tawo?

⁶ Si Adan an “sarong tawo” na paagi sa saiya “luminaog sa kinaban” an kasalan asin kagadanan. Kaya, “dahil sa pagkakasala kan sarong tawo an kagadanan naghadi.” Sinabi pa ni Pablo na “paagi sa sarong tawo—si Jesu-Cristo” naipahiling nin Diyos an Saiyang “daing kapantay na kabuutan.” (Roma 5:12, 15, 17, NW) Asin nakinabang an bilog na katawuhan sa daing kapantay na kabuutan na iyan. ‘Huli sa pagsunod kan saro [si Jesus], dakul an magigin matanos.’ Sa katunayan, huli sa daing kapantay na kabuutan nin Diyos, may oportunidad an gabos na tawo na magkaigwa nin “buhay na dai nin katapusan huli ki Jesu-Cristo.”—Roma 5:19, 21.

 7. Taano ta daing kapantay asin sarong kabuutan an pagtao nin Diyos kan pantubos?

⁷ Dai obligado si Jehova na isugo sa daga an saiyang Aki tanganing ikatao an pantubos. Dugang pa, dai angay o bakong maninigo an bakong perpekto saka makasalan na katawuhan na mag-ako kan ginibong paagi nin Diyos asin ni Jesus para maitao an pantubos na nagpagin posible sa kapatawadan kan kasalan. Kaya, an pagpatawad asin pagtao sa sato kan paglaom na mabuhay nin daing sagkod saro nanggad na daing kapantay na kabuutan. Dapat niyatong pahalagahan na marhay an regalo nin Diyos na daing kapantay na kabuutan asin tugutan iyan na magkaigwa nin epekto sa satong buhay sa aroaldaw.

 8. Anong salang kaisipan an tibaad igwa an iba mapadapit sa saindang mga kasalan?

⁸ Bilang bakong perpektong mga gikan ni Adan, may tendensiya kitang mapasala, gumibo nin maraot, o magkasala. Pero, sarong magabat na kasalan an pag-abuso sa daing kapantay na kabuutan nin Diyos, arog kan kaisipan na: ‘Dawa kun makagibo ako nin sala, o nin sarong bagay na ibinibilang nin Diyos na kasalan, mayo akong dapat ikahadit. Papatawadon ako ni Jehova.’ Makamumundo, dawa buhay pa kaidto an nagkapirang apostol, may mga Kristiyano na arog na kaiyan an kaisipan. (Basahon an Judas 4.) Tibaad dai man kita nagtataram nin arog kaiyan; pero, tibaad an kaisipan na iyan yaon na sa sato o puwedeng maitanom sa sato asin luway-luway na magtubo.

9, 10. Paano napatalingkas sa kasalan asin kagadanan si Pablo saka an iba pa?

⁹ Idinuon ni Pablo na dapat niyatong determinadong isikwal an kaisipan na: ‘Masasabutan ako nin Diyos. Papalampason niya an mga kasalan ko.’ Taano? Huling, arog kan isinurat ni Pablo, ‘nagadan na an mga Kristiyano may koneksiyon sa kasalan.’ (Basahon an Roma 6:1, 2.a) Paano masasabi na ‘nagadan na sinda may koneksiyon sa kasalan’ mantang buhay pa man sinda kaidto sa daga?

¹⁰ Iinaplikar nin Diyos ki Pablo an pantubos, asin sa iba pa kan panahon niya. Kaya, pinatawad ni Jehova an saindang mga kasalan, linahidan sinda nin banal na espiritu, asin inapod para magin Saiyang espirituwal na mga aki. Dangan nagkaigwa sinda kan paglaom na mabuhay sa langit. Kun magdadanay sindang maimbod, mabubuhay sinda asin mamamahala kaiba ni Cristo sa langit. Pero dawa buhay pa sinda sa daga asin naglilingkod sa Diyos, masasabi ni Pablo dapit sa sainda na ‘nagadan na sinda may koneksiyon sa kasalan.’ Ginamit niya an nangyari ki Jesus na nagadan bilang tawo, dangan binuhay liwat bilang sarong imortal na espiritu pasiring sa langit. Mayo nang kapangyarihan ki Jesus an kagadanan. Arog man kaiyan an linahidan na mga Kristiyano, na puwedeng ibilang an saindang sadiri na “gadan may koneksiyon sa kasalan alagad nabubuhay may koneksiyon sa paggibo kan kabutan nin Diyos paagi ki Cristo Jesus.” (Roma 6:9, 11, NW) Bako nang arog kan dati an saindang paagi nin pamumuhay. Dai na sinda nagsusunod sa idinidikta o sa natural na tendensiya kan saindang makasalan na mga pagmawot. Nagadan na sinda may koneksiyon sa dati nindang pamumuhay.

11. Sa anong paagi kita, na mga may paglaom na mabuhay nin daing sagkod sa Paraiso, ‘nagadan na may koneksiyon sa kasalan’?

¹¹ Kumusta man kita? Bago kita nagin mga Kristiyano, parati kitang nagkakasala, asin tibaad dai ta narerealisar kun gurano kasala o karaot kan satong mga ginigibo sa paghiling nin Diyos. Garo kita “mga uripon nin karigsukan asin karatan.” Masasabi niyato na kita ‘mga uripon kaidto nin kasalan.’ (Roma 6:19, 20, NW) Dangan, naaraman niyato an katotoohan sa Bibliya, binago an satong buhay, idinusay an satong sadiri sa Diyos, asin nagpabawtismo. Puon kan panahon na iyan, gustong-gusto na niyatong magin “masinunod gikan sa puso” sa mga katukduan asin pamantayan nin Diyos. Kita ‘pinatalingkas sa kasalan’ asin “nagin mga uripon nin katanusan.” (Roma 6:17, 18, NW) Kaya masasabi man na ‘nagadan na kita may koneksiyon sa kasalan.’

12. Anong pagpili an kaipuhan na gibuhon kan lambang saro sa sato?

¹² Siyasaton mo ngunyan an saimong sadiri uyon sa mga sinabi ni Pablo: “Dai nindo pagtugutan an kasalan na padagos na maghadi sa saindong mortal na mga hawak asin pasunudon kamo sa mga pagmawot kaiyan.” (Roma 6:12, NW) Kun ginigibo ta an ano man na mawot kan satong bakong perpektong hawak, ‘tinutugutan tang padagos na maghadi an kasalan.’ Huling puwede niyatong ‘tugutan’ o dai tugutan na maghadi an kasalan, an hapot, Ano daw talaga an gusto kan satong puso? Haputon an sadiri: ‘Tinutugutan ko daw minsan an sakong bakong perpektong hawak o isip na itukdo ako sa salang direksiyon asin diyan ako minaduman? O gadan ako may koneksiyon sa kasalan? Namumuhay daw ako may koneksiyon sa Diyos paagi ki Cristo Jesus?’ Kun pinapahalagahan tang marhay an daing kapantay na kabuutan na ipinahiling nin Diyos paagi sa pagpatawad sa sato, gigibuhon niyato an bilog na makakaya tanganing mapaugma siya.

13. Anong patotoo an magtatao sa sato nin kumpiyansa na kaya niyatong talikdan an kasalan?

¹³ Tinalikdan kan mga lingkod ni Jehova an ‘bunga [na nahihiling sa sainda] kaidto’ kan mamidbid asin mamutan ninda an Diyos. Tibaad kaiba sa dati nindang paagi nin pamumuhay an “mga bagay na ikinakasupog na [ninda] ngunyan,” mga bagay na maninigo sa kagadanan. (Roma 6:21, An Banal na Biblia) Dangan, nagbago sinda. Totoo ini sa dakul na taga Corinto na sinuratan ni Pablo. An iba sa sainda dating parasamba sa idolo, parasambay, homoseksuwal, parahabon, paraburat, asin iba pa. Pero, ‘hinugasan na sinda [asin lininig]’ saka ‘pinabanal.’ (1 Cor. 6:9-11) Posibleng totoo man ini sa nagkapira na nasa kongregasyon sa Roma. Pinasabngan si Pablo na magsurat sa sainda: “Dai na nindo ipagpresentar an saindong mga hawak sa kasalan tanganing gamiton bilang mga kasangkapan nin karatan, kundi ipresentar nindo an saindong mga sadiri sa Diyos na siring sa mga buhay maski ngani dating mga gadan, asin ipresentar man nindo an saindong mga hawak sa Diyos bilang mga kasangkapan nin katanusan.” (Roma 6:13, NW) Sigurado si Pablo na kaya nindang magdanay na malinig sa espirituwal asin padagos na makinabang sa daing kapantay na kabuutan nin Diyos.

14, 15. Ano an dapat niyatong ihapot sa sadiri kun dapit sa pagigin “masinunod gikan sa puso”?

¹⁴ Siring man kaiyan ngunyan. May mga kapagtubod kita na tibaad namuhay kaidto arog kan mga taga Corinto. Pero nagbago man sinda. Binayaan ninda an saindang makasalan na paagi nin pamumuhay asin ‘nahugasan [asin lininig].’ Kun sa ano man na paagi nagin totoo man ini sa saimo, kumusta na ngunyan an kamugtakan mo sa atubangan nin Diyos? Ngunyan na nakinabang ka na sa daing kapantay na kabuutan nin Diyos asin sa resulta kaiyan na pagpapatawad, determinado ka daw na dai na ‘ipresentar an saimong hawak sa kasalan’? Imbes, ‘ipepresentar mo daw an sadiri mo sa Diyos na siring sa buhay maski ngani dating gadan’?

¹⁵ Tanganing magibo iyan, dapat nanggad niyatong likayan na makakomiter kan magabat na mga kasalan na nagibo kaidto kan nagkapira sa Corinto. Kaipuhan na marhay iyan tanganing masabi niyato na inako ta na an daing kapantay na kabuutan nin Diyos asin na bako na kitang ‘dominado nin kasalan.’ Pero, determinado man daw kita na magin “masinunod gikan sa puso” paagi sa paggibo kan satong pinakamakakaya na likayan an mga kasalan na ibinibilang kan iba na bako gayong magabat?—Roma 6:14, 17, NW.

16. Paano ta naaraman na kaiba sa pagigin Kristiyano an pagbaya bako sana sa magabat na mga kasalan?

¹⁶ Isipa si apostol Pablo. Sigurado kita na dai niya ginigibo an magabat na mga kasalan na sinambit sa 1 Corinto 6:9-11. Pero, inadmitir niyang nagkakasala siya. Siya nagsurat: ‘Ako laman, ipinabakal sa kauripnan nin kasalan. Huli ta an ginigibo ko dai ko naaaraman. Huli ta bakong an [gusto] ko an ginigibo ko, kundi an [habo] ko, iyo an ginigibo ko.’ (Roma 7:14, 15) Ipinapahiling kaini na may iba pang bagay an ibinibilang ni Pablo na mga kasalan, asin pinaglalabanan man niya an mga iyan. (Basahon an Roma 7:21-23.) Lugod na iyan man an gibuhon niyato mantang hinihinguwa tang magin “masinunod gikan sa puso.”

17. Taano ta gusto mong magin onesto?

¹⁷ Halimbawa, pag-isipan an dapit sa pagkaonesto. Kahagadan para sa mga Kristiyano an pagigin onesto. (Basahon an Talinhaga 14:5; Efeso 4:25.) Si Satanas an “ama nin kaputikan.” Asin si Ananias asin an saiyang agom nagadan huli sa pagputik. Habo niyatong arugon sinda kaya linilikayan niyatong magputik. (Juan 8:44, An Marahay na Bareta Biblia; Gui. 5:1-11) Pero, iyan sana daw an dahilan kaya gusto niyatong magin onesto? An totoo, an satong pagpapahalagang marhay sa daing kapantay na kabuutan nin Diyos an dapat na magpahiro sa sato na magin onesto.

18, 19. Taano ta urog pa kisa sa dai pagsabi sana nin putik an kalabot sa pagigin onesto?

¹⁸ An pagputik iyo an pagsabi nin sarong bagay na bakong totoo. Pero, urog pa kisa sa dai pagsabi sana nin putik an gusto ni Jehova na gibuhon kan saiyang mga lingkod. Sinadol niya an suanoy na mga Israelita: ‘[Dapat na] magin banal kamo, huli ta ako banal, ako si Jehova na saindong Diyos.’ Dangan, sinabi niya an nagkapirang paagi na sinda magigin banal. An Diyos nagsabi: ‘Dai kamo maghabon, asin dai kamo mandaya, dai man kamo magputik nin ano man sa saindong kapwa.’ (Lev. 19:2, 11) Makamumundo, puwedeng determinado an saro na dai magtaram nin putik, pero tibaad minagamit siya nin pandadaya o pinapaniwala niya an iba sa sarong bagay na bako man totoo.

¹⁹ Halimbawa, sarong lalaki an nagpaaram sa saiyang amo o mga katrabaho na dai siya makakalaog kinaagahan o na dapat siyang magpuli nin amay huling kaipuhan niyang “magpaospital.” Pero an totoo, an “pagpaospital” niya, pagbakal man sana nin bulong sa botika kan ospital o halipot man sanang pagduman sa klinika kan doktor para magbayad. An totoong rason kan dai niya paglaog sa trabaho iyo na huling mabiyahe siya tulos para sa saiyang bakasyon o huling makarigos sinda sa dagat kaiba kan saiyang pamilya. Iyo, totoo man na “nagpaospital” siya, pero talaga daw na nagin onesto siya? O nagin siyang mapandaya? Tibaad may aram ka pang ibang halimbawa nin arog kaiyan na tuyong pandadaya. Ginigibo ninda iyan tibaad tanganing makalikay sa padusa o makadilensiya sa iba. Mayo man sindang sinabing putik, pero nasusunod daw ninda an pagbuot nin Diyos na: ‘Dai kamo mandaya’? Saro pa, pag-isipan an sinasabi kan Roma 6:19: “Ipresentar nindo . . . an mga kabtang [kan saindong hawak] bilang mga uripon nin katanusan na minagiya pasiring sa kabanalan.” (NW)

20, 21. Sagkod sain kita dapat na mapahiro kan daing kapantay na kabuutan nin Diyos?

²⁰ An punto iyo ini: Urog pa an kalabot sa satong pagpapahalaga sa daing kapantay na kabuutan nin Diyos. Bako lang iyan basta paglikay sana sa pagsambay, pagburat, o sa iba pang kasalan na ginibo kan nagkapira sa Corinto kaidto. An pag-ako sa daing kapantay na kabuutan nin Diyos nangangahulugan nin bako sanang paglikay sa imoralidad kundi nin pakipaglaban sa ano man na tendensiya na purbaran an malaswang mga libangan. An pagpresentar niyato kan mga kabtang kan satong hawak bilang mga uripon nin katanusan mapahiro sa sato na bako sanang dai magburat, kundi dai mag-inom sagkod sa punto na haros maburat na. Kakaipuhanon niyato an durudakulang paghihinguwa tanganing malabanan an arog kaiyan na salang mga gibo; pero sarong laban iyan na kaya niyatong mapangganahan.

²¹ Dapat na an magin pasuhan niyato iyo na likayan bako sana an magagabat na kasalan kundi pati man an mga bakong gayong magabat na mga kasalan. Dai niyato magigibong likayan an gabos na kasalan. Pero dapat niyatong hinguwahon na gibuhon iyan, arog kan ginibo ni Pablo. Sinadol niya an saiyang mga kapagtubod: “Dai nindo pagtugutan an kasalan na padagos na maghadi sa saindong mortal na mga hawak asin pasunudon kamo sa mga pagmawot kaiyan.” (Roma 6:12; 7:18-20, NW) Kun linalabanan niyato an gabos na klase nin kasalan, ipinapahiling niyato na tunay tang pinapahalagahan an daing kapantay na kabuutan nin Diyos paagi ki Cristo.

22. Ano an naghahalat sa mga nagpapahalaga sa daing kapantay na kabuutan nin Diyos?

²² Paagi sa daing kapantay na kabuutan nin Diyos, napatawad an satong mga kasalan asin padagos na napapatawad. Bilang pagpapahalaga diyan, lugod na hinguwahon niyatong mapangganahan an ano man na tendensiya na magpadara sa mga ibinibilang kan iba na saradit na kasalan. Sinabi ni Pablo kun anong balos an naghahalat sa sato: “Ngunyan na pinatalingkas na kamo sa kasalan asin nagin nang mga uripon nin Diyos, kabanalan an bungang nahihiling sa saindo, asin an resulta buhay na daing katapusan.”—Roma 6:22, NW.