Magdanay sa “Siudad na Pailihan” Asin Mabuhay!

“Sia kaipuhan na mag-erok sa saiyang siudad na pailihan sagkod na magadan an halangkaw na saserdote.”​—BILANG 35:28.

1. Siisay an Parasingil nin dugo, asin anong paghiro an gigibohon nia sa dai na mahahaloy?

AN Parasingil nin dugo ni Jehova, si Jesu-Cristo, mahiro na. Kaiba an saiyang mga hukbo nin mga anghel, an Parasingil na ini mahiro sa dai na mahahaloy tumang sa gabos na nagkasala sa dugo na dai nagsosolsol. Iyo, si Jesus magseserbing Parakastigo nin Dios durante kan marikas na nagdadangadang na “dakulang kahorasaan.” (Mateo 24:​21, 22; Isaias 26:21) Sa panahon na iyan paninimbagan kan katawohan an saindang pagkakasala sa dugo.

2. Ano an solamenteng tunay na lugar na pailihan, asin anong mga hapot an nangangaipo nin simbag?

² An paagi na makaligtas iyo an pagduman sa dalan na pasiring sa antitipikong siudad na pailihan asin dumalagan tanganing ikaligtas an buhay! Kun pinalaog sa siudad, an sarong dulag dapat na magdanay dian, huli ta iyan an solamenteng tunay na lugar na pailihan. Alagad tibaad isip-isipon nindo, ‘Mantang an kadaklan sa sato dai pa noarin man nakagadan, kita daw talagang may kasalan sa dugo? Taano ta si Jesus an Parasingil nin dugo? Ano an siudad na pailihan sa modernong aldaw? Puede daw na an siisay man ligtas na humale dian?’

Kita daw Talagang May Kasalan sa Dugo?

3. Anong tampok na kabtang kan Mosaikong Pagboot an matabang sa sato na maheling na an binilyon sa daga daramay sa kasalan sa dugo?

³ An sarong tampok na kabtang kan Mosaikong Pagboot matabang sa sato na maheling na an binilyon sa daga daramay sa kasalan sa dugo. Itinao nin Dios sa mga Israelita an daramay na paninimbagan sa pagpabolos nin dugo. Kun may manompongan na ginadan asin dai midbid an guminadan sa saiya, sosokolon kan mga hokom an distansia pasiring sa nakapalibot na mga siudad tanganing madeterminaran an pinakaharaning siudad. Tanganing mahale an kasalan, an kamagurangan sa siudad na ipinamumugtak na may kasalan sa dugo kaipuhan na barion an liog nin sarong ogbon, ternerang baka sa dai pa nakukultibar na kasapaan. Ginigibo ini sa atubangan kan mga saserdoteng Levita ‘huli ta sinda an pinili ni Jehova na maghusay sa diriskutiran dapit sa madahas na mga gibo.’ An kamagurangan sa siudad naghahanaw kan saindang kamot sa tangod kan baka asin nagsasabi: “An samong mga kamot dai nagpabolos kan dugong ini, ni naheling man kan samong mga mata an pagpabolos kaiyan. Dai mo iyan pagsingilon sa saimong banwaan na Israel, na saimong binalukat, O Jehova, asin dai mo ibugtak an kasalan sa dugong daing sala sa tahaw kan saimong banwaan na Israel.” (Deuteronomio 21:​1-9) Habo ni Jehova Dios na an daga nin Israel maatian nin dugo o na an mga tagaduman daramay na magkasala sa dugo.

4. An Dakulang Babilonya igwa nin anong rekord nin pagkakasala sa dugo?

⁴ Iyo, igwa nin inaapod na daramay, o pambilog na komunidad, na kasalan sa dugo. Horophoropa an grabeng kasalan sa dugo kan Dakulang Babilonya, an pankinaban na imperyo nin falsong relihion. Tara, sia burat sa dugo kan mga lingkod ni Jehova! (Kapahayagan 17:​5, 6; 18:24) An mga relihion nin Kakristianohan naghihingakong nagsusunod sa Prinsipe nin Katoninongan, alagad sia may kasalan sa dugo sa atubangan nin Dios huli sa mga guerra, relihiosong mga inkisisyon, asin nakagagadan na mga krusada. (Isaias 9:6; Jeremias 2:34) Sa katunayan, sia an may pangenot na kasalan sa pagkagadan nin minilyon sa duwang guerra mundial sa siglong ini. Kun siring, an mga nagsusunod sa falsong relihion pati na an mga nagsusuportar asin nagpapartisipar sa ralaban nin tawo may kasalan sa dugo sa atubangan nin Dios.

5. Paano an ibang tawo nagin arog kan dai tinutuyong paragadan sa Israel?

⁵ May mga nakagadan nin tawo na tinuyo o huli sa kadaihan nin pag-iingat. An iba nakikabtang sa lagduan na pangadan, na posibleng nakombensir nin mga namomoon sa relihion na ini kabotan nin Dios. An iba man pinaglamag asin ginadan an mga lingkod nin Dios. Minsan siring, dawa kun dai niato ginibo an siring na bagay, kadamay kita sa pambilog na komunidad na paninimbagan sa pagkawara nin buhay nin tawo huli ta dai niato aram an pagboot asin kabotan nin Dios. Kapareho kita kan dai tinutuyong paragadan ‘na nakagadan nin kapwa na dai nia naaraman iyan asin dai sia naongis sa saiya kaidto.’ (Deuteronomio 19:4) An siring na mga indibiduwal kaipuhan na umarang sa Dios nin pagkaherak asin maninigong dumalagan pasiring sa antitipikong siudad na pailihan. Ta kun dai gagadanon sinda kun manompongan kan Parasingil nin dugo.

An Mahalagang mga Katongdan ni Jesus

6. Taano ta masasabi na si Jesus an pinakaharaning paryente nin katawohan?

⁶ Sa Israel an parasingil nin dugo iyo an pinakaharaning lalaking kadugo kan biktima. Tanganing ipamalos an gabos na ginadan sa daga asin nangorogna an ginadan na mga lingkod ni Jehova, an Parasingil nin dugo sa presenteng aldaw dapat na sarong lalaking kadugo kan bilog na katawohan. An katongdan na iyan inotob ni Jesu-Cristo. Sia namundag na sangkap na tawo. Itinao ni Jesus an saiyang daing kasalan na buhay paagi sa kagadanan bilang pantubos na atang, asin pagkabuhay nia liwat sa langit, iinatubang nia sa Dios an halaga kaiyan para sa magagadanon na mga gikan kan makasalan na si Adan. Sa siring si Cristo an nagin Parabalukat sa katawohan, an satong pinakaharaning paryente​—an may katanosan na Parasingil nin dugo. (Roma 5:12; 6:23; Hebreo 10:12) Si Jesus ipinamidbid bilang tugang kan saiyang linahidan na mga parasunod. (Mateo 25:​40, 45; Hebreo 2:​11-17) Bilang langitnon na Hade sia na an “Amang Daing Sagkod” kan mga makikinabang sa saiyang atang bilang saiyang daganon na mga sakop. An mga ini mabubuhay sagkod lamang. (Isaias 9:​6, 7) Kaya angay na ninombrahan ni Jehova an Lalaking Kadugo na ini nin katawohan bilang Parasingil nin dugo.

7. Bilang an dakulang Halangkaw na Saserdote, ano an ginigibo ni Jesus para sa mga tawo?

⁷ Si Jesus saro man na daing kasalan, nabalo, madinamayon na Halangkaw na Saserdote. (Hebreo 4:15) Sa katongdan na iyan iinaaplikar nia sa katawohan an merito kan saiyang atang na nakatutubos nin kasalan. An mga siudad na pailihan tinindog “para sa mga aki ni Israel asin sa nakihihimanwa patin sa nakiiistar sa tahaw ninda.” (Bilang 35:15) Kaya enot na iinaplikar kan dakulang Halangkaw na Saserdote an merito kan saiyang atang sa saiyang linahidan na mga parasunod, “an mga aki ni Israel.” Ngonyan iinaaplikar iyan sa ‘mga nakihihimanwa’ asin ‘mga nakiiistar’ sa antitipikong siudad na pailihan. An “ibang karnerong” ini kan Kagurangnan na Jesu-Cristo naglalaom na mabuhay sagkod lamang digdi sa daga.​—Juan 10:16; Salmo 37:​29, 34.

Siudad na Pailihan Ngonyan

8. Ano an antitipikong siudad na pailihan?

⁸ Ano an antitipikong siudad na pailihan? Bako iyan na sarong geograpikong lugar na arog kan Hebron, na saro sa anom na pailihan na siudad nin mga Levita asin erokan kan halangkaw na saserdote sa Israel. An siudad na pailihan ngonyan iyo an probisyon nin Dios para sa pagprotehir sa sato sa kagadanan huli sa paglapas sa saiyang togon manongod sa kabanalan nin dugo. (Genesis 9:6) Baga man tuyo o dai tinutuyo, an lambang paralapas sa togon na iyan dapat na humagad kan kapatawadan nin Dios asin kan paghale sa saiyang kasalan paagi sa pagtubod sa dugo kan Halangkaw na Saserdote, si Jesu-Cristo. An linahidan na mga Kristiano na may langitnon na mga paglaom asin an “dakulang kadaklan” na may daganon na mga paglaom nag-ako kan mga pakinabang sa nakatutubos nin kasalan na atang ni Jesus asin nasa antitipikong siudad na pailihan.​—Kapahayagan 7:​9, 14; 1 Juan 1:7; 2:​1, 2.

9. Paano linapas ni Saulo nin Tarso an togon nin Dios manongod sa dugo, alagad paano sia nagpaheling nin pagbabago nin kaisipan?

⁹ Bago sia nagin Kristiano, linapas ni apostol Pablo an togon manongod sa dugo. Bilang si Saulo nin Tarso, pinaglamag nia an mga parasunod ni Jesus asin inoyonan pa ngani an paggadan sa sainda. “Minsan siring,” sabi ni Pablo, “ako naherakan, huli ta ako daing pakaaram asin naghiro sa kakulangan nin pagtubod.” (1 Timoteo 1:13; Gibo 9:​1-19) Si Saulo igwa nin nagsosolsol na kaisipan, na kan huri pinatunayan nin dakol na gibo nin pagtubod. Alagad bako sanang pagtubod sa pantubos an hinahagad tanganing makalaog sa antitipikong siudad na pailihan.

10. Paano puedeng magkamit nin marahay na konsensia, asin ano an dapat na gibohon tanganing mapagdanay iyan?

¹⁰ An dai tinutuyong paragadan puede sanang magdanay sa saro sa mga siudad na pailihan sa Israel kun mapatutunayan nia na marahay an saiyang konsensia sa Dios kun mapadapit sa pagpabolos nin dugo. Tanganing magkamit nin marahay na konsensia, dapat kitang maggibo nin pagtubod sa atang ni Jesus, magsolsol sa satong mga kasalan, asin magbakle. Kaipuhan kitang humagad nin marahay na konsensia paagi sa mapagngayongayong pagdusay sa Dios paagi ki Cristo, na sinisimbolisaran ini paagi sa bautismo sa tubig. (1 Pedro 3:​20, 21) Tinotogotan kita kan marahay na konsensiang ini na magkamit nin malinig na relasyon ki Jehova. An solamenteng paagi na makapadanay nin marahay na konsensia iyo an pagsunod sa mga kahagadan nin Dios asin paggibo kan trabahong iinasignar sa sato sa antitipikong siudad na pailihan, kun paanong an mga dulag sa suanoy na pailihan na mga siudad kinaipuhan na kumuyog sa Pagboot asin otobon an saindang mga asignasyon. An pangenot na trabaho para sa banwaan ni Jehova ngonyan iyo an pagbalangibog kan mensahe nin Kahadean. (Mateo 24:14; 28:​19, 20) An paggibo kan trabahong iyan matabang sa sato na magin kapakipakinabang na mga nag-eerok sa siudad na pailihan sa presenteng aldaw.

11. Ano an dapat na likayan tangani kitang magdanay na ligtas sa laog kan siudad na pailihan ngonyan?

¹¹ An paghale sa siudad na pailihan ngonyan pagbalad kan satong sadiri sa kalaglagan, ta an Parasingil nin dugo mahiro sa dai na mahahaloy tumang sa gabos na may kasalan sa dugo. Bako ining panahon na maabotan na nasa luwas kan nagpoprotehir na siudad na ini o nasa peligrosong lugar na harani sa linderos kan mga sabsaban kaiyan. Mamumugtak kita sa luwas kan antitipikong siudad na pailihan kun mawaran kita nin pagtubod sa nakatutubos nin kasalan na atang kan Halangkaw na Saserdote. (Hebreo 2:1; 6:​4-6) Kita dai man magigin ligtas kun kita umayon sa kinabanon na mga dalan, mananggilid sa organisasyon ni Jehova, o sumuhay sa matanos na mga pamantayan kan satong langitnon na Ama.​—1 Corinto 4:4.

Pinatalingkas sa Siudad na Pailihan

12. Sagkod noarin dapat na magdanay sa antitipikong siudad na pailihan an mga dating nagkasala sa dugo?

¹² An dai tinutuyong paragadan sa Israel kinaipuhan na magdanay sa siudad na pailihan “sagkod na magadan an halangkaw na saserdote.” (Bilang 35:28) Kaya sagkod noarin dapat na magdanay sa antitipikong pailihan na siudad an dating mga nagkasala sa dugo? Sagkod na dai na ninda kaipuhan an paglilingkod kan Halangkaw na Saserdote, si Jesu-Cristo. “Sia man lubos na makapagliligtas duman sa mga minadolok sa Dios paagi sa saiya,” an sabi ni Pablo. (Hebreo 7:25) Sagkod na nagpapadagos an ano man na digta nin kasalan asin dating pagkakasala sa dugo, kinakaipuhan an paglilingkod kan Halangkaw na Saserdote tangani na an bakong sangkap na mga tawo magkaigwa nin tamang kamugtakan sa atubangan nin Dios.

13. Sairisay an “mga aki ni Israel” sa presenteng aldaw, asin sagkod noarin sinda dapat na magdanay sa “siudad na pailihan”?

¹³ Girumdomon na an suanoy na mga siudad na pailihan tinindog para sa “mga aki ni Israel,” sa mga nakihihimanwa, asin sa mga nakiiistar. An “mga aki ni Israel” espirituwal na mga Israelita. (Galacia 6:16) Sinda dapat na magdanay sa antitipikong siudad na pailihan sagkod na sinda nabubuhay digdi sa daga. Taano? Huli ta sinda yaon pa sa bakong sangkap na laman asin kun siring nangangaipo kan nakatutubos na merito kan saindang langitnon na Halangkaw na Saserdote. Alagad kun an linahidan na mga Kristianong ini magadan asin buhayon na liwat sa espiritung buhay sa langit, dai na ninda kaipuhan an nakatutubos na paglilingkod kan Halangkaw na Saserdote; binayaan na ninda sagkod lamang an laman asin an kasalan sa dugo na katakod kaiyan. Para sa binuhay liwat na mga linahidan na iyan, nagadan na an Halangkaw na Saserdote kun dapit sa nakatutubos, nagpoprotehir na katongdan.

14. Ano pa an naghahagad na an mga may langitnon na paglaom dapat na magdanay sa pailihan na siudad ngonyan?

¹⁴ An pagkaigwa mismo nin sa-tawong naturalesa naghahagad na an magigin langitnon na “kapwa mga paramana ni Cristo” dapat na magdanay sa antitipikong pailihan na siudad sagkod na may kaimbodan nindang matapos an saindang daganon na buhay sa kagadanan. Sa panahon na sinda magadan, isasakripisyo na ninda an sa-tawong naturalesa sagkod lamang. (Roma 8:17; Kapahayagan 2:10) An atang ni Jesus aplikado sana sa mga igwa nin sa-tawong naturalesa. Huli kaini, an Halangkaw na Saserdote nagagadan para sa mga kabilang sa espirituwal na Israel sa panahon na sinda binuhay liwat bilang espiritung mga linalang na mag-eerok na daing sagkod sa langit bilang “mga kaambit sa banal na naturalesa.”​—2 Pedro 1:4.

15. Sairisay an ‘mga nakihihimanwa’ asin “nakiiistar” sa modernong aldaw, asin ano an gigibohon para sa sainda kan dakulang Halangkaw na Saserdote?

¹⁵ Noarin “magagadan” an Halangkaw na Saserdote para sa ‘mga nakihihimanwa’ asin “nakiiistar” sa modernong aldaw, na nagtotogot sa sainda na makahale sa antitipikong siudad na pailihan? An mga miembrong ini kan dakulang kadaklan dai puedeng lumuwas sa pailihan na siudad na ini pakatapos tolos kan dakulang kahorasaan. Taano ta dai? Huli ta sinda yaon pa sa saindang bakong sangkap, makasalan na laman asin kaipuhan na magdanay sa irarom kan proteksion kan Halangkaw na Saserdote. Paagi sa pagkinabang sa saiyang nakatutubos na paglilingkod durante kan saiyang sangribong taon na paghade asin pagkasaserdote, sinda makaaabot sa pagkasangkap bilang tawo. Sa panahon na iyan sinda iaatubang ni Jesus sa Dios para sa pangultimo, nungka nang mapagdududahan na pagbalo sa saindang integridad paagi sa pagpaluwas ki Satanas asin sa saiyang mga demonyo sa halipot na panahon. Huling nakapasar sinda sa pagbalong ini na may pag-oyon nin Dios, sinda ipahahayag ni Jehova na matanos. Sa siring sinda makaaabot sa mismong kalubosan nin pagkasangkap bilang tawo.​—1 Corinto 15:28; Kapahayagan 20:​7-10.a

16. Noarin dai na kakaipuhanon pa kan mga makaliligtas sa dakulang kahorasaan an nakatutubos na paglilingkod kan Halangkaw na Saserdote?

¹⁶ Kaya, kun siring, an mga makaliligtas sa dakulang kahorasaan dapat na magpadanay nin marahay na konsensia paagi sa pagdadanay sa antitipikong pailihan na siudad sagkod sa katapusan kan Sangribong Taon na Paghade ni Cristo. Bilang mga tawo na ginibong sangkap, dai na ninda kaipuhan pa an nakatutubos na paglilingkod kan Halangkaw na Saserdote asin maluwas na sinda sa saiyang proteksion. Dangan si Jesus magagadan para sa sainda bilang Halangkaw na Saserdote, huli ta dai na sia kaipuhan pang humiro para sa sainda paagi sa nakalilinig na dugo kan saiyang atang. Sa panahon na iyan mahale sinda sa antitipikong siudad na pailihan.

17. Taano an mga bubuhayon liwat durante kan Sangribong Taon na Paghade ni Cristo ta dai na kaipuhan na lumaog sa antitipikong siudad na pailihan asin magdanay dian?

¹⁷ Dapat daw na an mga bubuhayon liwat durante kan Sangribong Taon na Paghade ni Jesus lumaog sa antitipikong siudad na pailihan asin magdanay dian sagkod na magadan an halangkaw na saserdote? Dai, huli ta paagi sa pagkagadan binayadan ninda an penalidad sa saindang pagkamakasalan. (Roma 6:7; Hebreo 9:27) Minsan siring, tatabangan sinda kan Halangkaw na Saserdote na makaabot sa pagkasangkap. Kun sinda mapangganang makapasar sa pangultimong pagbalo pagkatapos kan Milenyo, ipahahayag man sinda nin Dios na matanos na may garantiya sa buhay na daing sagkod digdi sa daga. Siempre, an dai pakasunod sa mga kahagadan nin Dios magbubunga nin nagkokondenar na paghokom asin kalaglagan sa siisay man na mga tawong dai makapapasar sa pangultimong pagbalo bilang mga nagdadanay sa integridad.

18. Mapadapit sa pagkahade asin pagkasaserdote ni Jesus, ano an magdadanay na nasa katawohan sagkod lamang?

¹⁸ An Israelitang halangkaw na mga saserdote sa katapustapusi nagadan. Alagad si Jesus “nagin halangkaw na saserdote sono sa orden ni Melquisedec sagkod lamang.” (Hebreo 6:​19, 20; 7:3) Kaya an pagkatapos kan katongdan ni Jesus bilang nangongoltanan na Halangkaw na Saserdote para sa katawohan dai minatapos sa saiyang buhay. An marahay na mga epekto kan saiyang paglilingkod bilang Hade asin Halangkaw na Saserdote magdadanay na nasa katawohan sagkod lamang, asin an mga tawo daing sagkod na magkakaigwa nin utang na boot sa saiya huli sa paglingkod nia sa mga katongdan na ini. Saro pa, sagkod sa panahon na daing katapusan pangengenotan ni Jesus an dalisay na pagsamba ki Jehova.​—Filipos 2:​5-11.

Mahalagang mga Leksion Para sa Sato

19. Anong leksion mapadapit sa pagkaongis asin pagkamoot an manonodan sa probisyon na mga siudad na pailihan?

¹⁹ Manlaenlaen na leksion an satong manonodan sa probisyon na mga siudad na pailihan. Halimbawa, mayong paragadan na may mapangadan na pagkaongis sa saiyang biktima na tinogotan na mag-erok sa pailihan na siudad. (Bilang 35:​20, 21) Kaya paano matotogotan nin siisay man na nasa antitipikong siudad na pailihan na tumalubo sa saiyang puso an pagkaongis sa tugang? “An lambang naoongis sa saiyang tugang paragadan,” an isinurat ni apostol Juan, “asin kamo nakaaaram na mayo nin paragadan na igwa pa dian sa saiya nin buhay na daing katapusan.” Kun siring “padagos kitang magkaminorootmootan, huli ta an pagkamoot gikan sa Dios.”​—1 Juan 3:15; 4:7.

20. Tanganing maprotehiran sa Parasingil nin dugo, ano an dapat na gibohon kan mga nasa antitipikong siudad na pailihan?

²⁰ Tanganing maprotehiran sa parasingil nin dugo, an dai tinutuyong mga paragadan kaipuhan na magdanay sa siudad na pailihan asin dai maglagawlagaw sa luwas kan mga sabsaban kaiyan. Kumusta man an mga nasa antitipikong siudad na pailihan? Tanganing makaligtas sa dakulang Parasingil nin dugo, dapat na dai sinda humale sa siudad. Iyo nanggad, kaipuhan sindang magmaan tumang sa mga pan-akit na magduman sa pagdolonan kan mga sabsaban, sabi ngani. Dapat sindang mag-ingat na dai pagtogotan na tumalubo sa saindang puso an pagkamoot sa kinaban ni Satanas. Ini puedeng mangaipo nin pamibi asin paghihingoa, alagad nasasarig dian an saindang buhay.​—1 Juan 2:​15-17; 5:19.

21. Anong nakakokontentong trabaho an ginigibo kan mga nasa siudad na pailihan sa ngonyan?

²¹ An dai tinutuyong mga paragadan sa suanoy na mga siudad na pailihan kinaipuhan na magin mabungang mga trabahador. Kaagid kaiyan, an linahidan na “mga aki ni Israel” nagtatao nin marahay na halimbawa bilang mga trabahador sa pag-ani asin parabalangibog kan Kahadean. (Mateo 9:​37, 38; Marcos 13:10) Bilang ‘mga nakihihimanwa’ asin “nakiiistar” sa pailihan na siudad ngonyan, an mga Kristiano na igwa nin daganon na mga paglaom may pribilehio na gibohon an trabahong ini na nagliligtas-buhay kaiba kan mga linahidan na yaon pa digdi sa daga. Asin kanigoan kanakakokontentong trabaho ini! An mga may kaimbodan na nagtatrabaho sa antitipikong siudad na pailihan makadudulag sa daing sagkod na kagadanan sa mga kamot kan Parasingil nin dugo. Imbes, sinda makakukua nin daing sagkod na mga pakinabang sa saiyang paglilingkod bilang dakulang Halangkaw na Saserdote nin Dios. Magdadanay daw kamo sa siudad na pailihan asin mabuhay sagkod lamang?

[Nota sa Ibaba]

Ano an Saindong Simbag?

◻ Taano ta masasabi na an binilyon sa daga may kasalan sa dugo?

◻ Anong mga katongdan an inootob ni Jesu-Cristo mapadapit sa katawohan?

◻ Ano an antitipikong siudad na pailihan, asin paano an saro minalaog dian?

◻ Noarin patatalingkason an mga tawo sa antitipikong pailihan na siudad?

◻ Anong mahalagang mga leksion an satong manonodan sa probisyon na mga siudad na pailihan?

[Retrato sa pahina 16]

Aram daw nindo kun anong mahalagang mga katongdan an inootob ni Jesu-Cristo?