Si Jehova, Dios na “Andam na Magpatawad”

“Ika, O Jehova, marahay asin andam na magpatawad.”​—SALMO 86:5.

 1. Anong magabat na pagabat an pinasan ni Hadeng David, asin paano sia nakanompong nin karangahan para sa saiyang purisaw na puso?

ARAM ni Hadeng David kan suanoy na Israel kun gurano kagabat kan pagabat nin nagkasalang konsensia. Sia nagsurat: “An sadiri kong mga sala nakalampas na sa sakong payo; siring sa magabat na pasan an mga iyan magabaton na para sa sako. Ako namagol asin naronot nin makuri; nagkurahaw ako huli sa agrangay kan sakong puso.” (Salmo 38:​4, 8) Minsan siring, si David nakanompong nin karangahan para sa saiyang purisaw na puso. Aram nia na minsan ngani naoongis si Jehova sa kasalan, dai sia naoongis sa nagkasala​—kun an sarong iyan tunay na nagsosolsol asin isinisikwal an saiyang makasalan na dalan. (Salmo 32:5; 103:3) May lubos na pagtubod sa pagigin gusto ni Jehova na kaherakan an mga nagsosolsol, si David nagsabi: “Ika, O Jehova, marahay asin andam na magpatawad.”​—Salmo 86:5.

2, 3. (a) Kun kita magkasala, anong pagabat an tibaad pasanon niato bilang resulta, asin taano ini ta nakararahay? (b) Ano an peligro kun kita “madaog” kan pakamate nin kasalan? (c) Anong kasiertohan an itinatao sa sato kan Biblia manongod sa pagigin gustong magpatawad ni Jehova?

² Kun kita magkasala, tibaad pasanon ta man an magabaton na pagabat nin nakokolgan na konsensia bilang resulta. Normal an pakamateng ini nin pagbasol, nakararahay pa ngani. Puedeng pahiroon kita kaiyan na gumibo nin positibong mga paagi na itanos an satong mga sala. Pero an nagkapirang Kristiano nadaog nin pakamate nin kasalan. An saindang puso na nagkokondenar sa sadiri tibaad mag-insister na an Dios dai sinda lubos na patatawadon, gurano man an pagsolsol ninda. “Maraoton an pagmate kun iniisip mo na dai ka na namomotan ni Jehova,” an sabi nin sarong tugang na babae, na pinepensar an sala na nagibo nia. Maski pakatapos na sia magsolsol asin umako nin nakatatabang na hatol gikan sa kamagurangan sa kongregasyon, padagos siang nakamate na sia bako nang maninigo sa pagpatawad nin Dios. Sia nagpapaliwanag: “Daing aldaw na minaagi na dai ako naghahagad nin tawad ki Jehova.” Kun kita “madaog” kan pakamate nin kasalan, tibaad hingoahon ni Satanas na kita mapasuko, na maghona na kita bakong maninigo na maglingkod ki Jehova.​—2 Corinto 2:​5-7, 11.

³ Alagad ta bako nanggad na siring kaiyan an pagheling ni Jehova sa mga bagay! Sinisierto sa sato kan saiyang Tataramon na kun kita nagpapaheling nin tunay na odok sa pusong pagsolsol, si Jehova gusto, iyo andam, na magpatawad. (Talinhaga 28:13) Kaya kun an kapatawadan nin Dios garo baga sa pagmate nindo dai mapapasaindo, tibaad an kaipuhan mas malinaw na pakasabot sa kun taano asin paano sia nagpapatawad.

Taano ta “Andam na Magpatawad” si Jehova?

 4. Ano an ginigirumdom ni Jehova manongod sa satong naturalesa, asin ano an epekto kaini sa paagi nin pagtratar nia sa sato?

⁴ Satong mababasa: “Kun gurano kaharayo kan subangan sa solnopan, siring man kaiyan kaharayo sa sato na saiyang ibinugtak an satong mga paglapas. Kun paanong an ama nagpapaheling nin pagkaherak sa saiyang mga aki, si Jehova nagpapaheling man nin pagkaherak sa mga natatakot sa saiya.” Taano ta boot ni Jehova na magpaheling nin pagkaherak? An sunod na bersikulo minasimbag: “Huli ta sia mismo nakaaaram na gayo kan pagkaporma sa sato, na ginigirumdom na kita kabokabo.” (Salmo 103:​12-14) Iyo, dai linilingawan ni Jehova na kita mga linalang na gibo sa kabokabo, na may mga sala, o kaluyahan, na bunga nin pagkabakong sangkap. An pananaram na aram nia an “pagkaporma sa sato” nagpapagirumdom sa sato na an Biblia iinaagid si Jehova sa sarong paragibo nin koron asin kita sa mga lalagan na pinoporma nia.a (Jeremias 18:​2-6) An paragibo nin koron marigon pero maingat an pagkapot sa saiyang mga lalagan na dalipay, na perming iniisip an karakteristiko kaiyan. Si Jehova man, an Dakulang Paragibo nin Koron, ibinabagay an saiyang mga pagtratar sa sato sa pagigin maluya kan satong makasalan na naturalesa.​—Ikomparar an 2 Corinto 4:7.

 5. Paano ilinaladawan kan libro nin Roma an makosog na pamomogol nin kasalan sa satong makasalan na laman?

⁵ Nasasabotan ni Jehova kun gurano kamapuersa kan kasalan. An kasalan ilinaladawan kan Kasuratan bilang sarong makosog na puersa na nasa nakagagadan na pamomogol kaiyan an tawo. Gurano man nanggad kakosog kan pagkakapot nin kasalan? Sa libro nin Roma, ipinaliliwanag ini kan pinasabngan na si apostol Pablo sa klarong mga termino: Kita “nasa irarom nin kasalan,” kun paanong an mga soldados nasa irarom kan saindang komandante (Roma 3:9); iyan “namahala” sa katawohan siring sa hade (Roma 5:​21); iyan “nag-eerok” sa sato (Roma 7:​17, 20); an “ley” kaiyan padagos na nagkakaepekto sa sato, na garo baga nagmamaigot na kontrolon kita. (Roma 7:​23, 25) Kanigoan kasakit kan pakikilaban niato tanganing tumangon an mapuersang pagkakurapot kan kasalan sa satong makasalan na laman!​—Roma 7:​21, 24.

 6. Ano an pagheling ni Jehova sa mga naghahagad kan saiyang pagkaherak na may nagbabasol na puso?

⁶ Huli kaini, aram kan satong maheherakon na Dios na bakong posible para sa sato an sangkap na pagkuyog, gurano man kakosog kan tibaad pagmawot kan satong puso na itao iyan sa saiya. (1 Hade 8:​46) Mamomoton na sinisierto nia sa sato na kun hinahagad ta an saiyang sa ama na pagkaherak na may nagbabasol na puso, sia matao nin kapatawadan. Si salmista David nagsabi: “An mga atang sa Dios nanluluyang espiritu; an pusong laglag asin ronot, O Dios, dai mo duduhagion.” (Salmo 51:17) Nungkang isisikwal, o sasayumahan, ni Jehova an puso na laglag asin ronot huli sa pagabat kan pakamate nin kasalan. Kanigoan kagayon kan paglaladawan kaiyan sa pagigin andam na magpatawad ni Jehova!

 7. Taano ta dai niato puedeng ipamugtak na segurado na an pagkaherak nin Dios?

⁷ Pero boot daw sabihon kaini na puede niatong ipamugtak na segurado na an pagkaherak nin Dios, na ginagamit an satong makasalan na naturalesa bilang sarahotan na magkasala? Dai nanggad! Si Jehova dai ginigiyahan nin basta sana sentimiento. An saiyang pagkaherak may mga limitasyon. Sa ano man na paagi dai nia patatawadon an mga may katagasan an puso na ginigibong kaugalean an may maraot na intension, tuyong pagkakasala na dai nagsosolsol. (Hebreo 10:​26-​31) Sa ibong na lado, kun naheheling nia an puso na “laglag asin ronot,” sia “andam na magpatawad.” (Talinhaga 17:3) Estudyaran niato an nagkapira sa makahulogan na pananaram na ginamit sa Biblia tanganing iladawan an pagigin lubos kan pagpatawad nin Dios.

Gurano Kalubos na Nagpapatawad si Jehova?

 8. Ano an garo man sana ginigibo ni Jehova kun sia nagtataong indulto para sa satong mga kasalan, asin ano maninigong magin epekto kaini sa sato?

⁸ An nagsosolsol na si Hadeng David nagsabi: “Sa katapustapusi itinuga ko an sakuyang kasalan sa saimo, asin dai ko tinahoban an sakuyang kaliwagan. An sabi ko: ‘Itutuga ko an sakuyang mga kalapasan ki Jehova.’ Asin ika mismo nagtaong indulto sa kaliwagan kan sakuyang mga kasalan.” (Salmo 32:5) An pananaram na “nagtaong indulto” traduksion nin sarong termino sa Hebreo na sa pundamental nangangahulogan “alsahon,” “pasanon, darahon.” An paggamit kaiyan digdi nangangahulogan na ‘haleon an pakamate nin kasalan, karatan, kalapasan.’ Kaya inalsa ni Jehova an mga kasalan ni David asin garo man sana dinara iyan parayo. (Ikomparar an Levitico 16:​20-​22.) Daing duwa-duwa na pinagian kaini an mga pakamate nin kasalan na dara ni David. (Ikomparar an Salmo 32:3.) Kita lubos man na makakokompiar sa Dios na nagtataong indulto sa mga kasalan kan mga naghahagad sa saiya nin tawad basado sa saindang pagtubod sa pantubos na atang ni Jesu-Cristo. (Mateo 20:28; ikomparar an Isaias 53:12.) Idtong an mga kasalan inaalsa asin dinadara ni Jehova parayo sa siring na paagi dai na kaipuhan pang padagos na magdara kan pagabat nin mga pakamate nin kasalan na mga nakaagi na.

 9. Ano an boot sabihon kan mga tataramon ni Jesus na: “Ipatawad mo samo an samong mga utang”?

⁹ Ginamit ni Jesus an relasyon nin mga nagpautang asin nag-utang tanganing iilustrar kun paano nagpapatawad si Jehova. Halimbawa, sinadol kita ni Jesus na mamibi: “Ipatawad mo samo an samong mga utang.” (Mateo 6:12) Sa siring iinaagid ni Jesus an “mga kasalan” sa “mga utang.” (Lucas 11:4) Kun kita magkasala, kita nagigin “may utang” ki Jehova. An berbo sa Griego na trinadusir na “ipatawad” puedeng mangahulogan na “pabayaan, butasan, an utang, paagi sa dai paghagad kaiyan.” Sa sarong sentido, kun si Jehova nagpapatawad, kinakanselar nia an utang na sisingilon kutana sa sato. Sa siring puedeng maranga an nagsosolsol na mga nagkasala. Nungkang sisingilon ni Jehova an utang na saiyang kinanselar!​—Salmo 32:​1, 2; ikomparar an Mateo 18:​23-​35.

10, 11. (a) Ano an ideyang ipinahahayag kan terminong “mapara,” na yaon sa Gibo 3:19? (b) Paano iiniilustrar an pagigin lubos kan pagpatawad ni Jehova?

¹⁰ Sa Gibo 3:​19, an Biblia naggagamit nin saro pang buhay na marhay na talinhaga sa pagladawan kan pagpatawad nin Dios: “Magsorolsol kamo, kun siring, asin magbakle tanganing an saindong mga kasalan mapara.” An terminong “mapara” traduksion nin sarong berbo sa Griego na, kun ginagamit sa piguratibong pagtaram, puedeng mangahulogan na “pohoon, radason, kanselaron o laglagon.” Sono sa pirang intelektuwal, an ideyang ipinahahayag iyo an pagpara sa surat-kamot. Paano ini posible? An tinta na parateng ginagamit kan suanoy na mga panahon gibo sa meskla na may kaibang karbon, pulot, asin tubig. Dai mahaloy pakatapos na ipansurat an siring na tinta, an saro puedeng kumua nin basang espongha asin paraon an isinurat.

¹¹ Yaon dian an magayon na paglaladawan kan pagigin lubos kan pagpatawad ni Jehova. Kun pinatatawad nia an satong mga kasalan, garo man sana minakua sia nin espongha asin pinapara nia iyan. Dai kita kaipuhan na matakot na gagamiton an mga kasalan na iyan tumang sa sato sa ngapit, huli ta an Biblia may iba pang ihinahayag manongod sa pagkaherak ni Jehova na talagang pambihira: Kun sia nagpapatawad, iyan saiyang linilingawan!

“An Saindang Kasalan Dai Ko Na Gigirumdomon”

12. Kun sinasabi kan Biblia na linilingawan ni Jehova an satong mga kasalan, boot daw sabihon kaini na dai na nia iyan natatandaan, asin taano ta iyan an simbag nindo?

¹² Paagi ki propeta Jeremias, si Jehova nanuga mapadapit sa mga yaon sa bagong tipan: “Ipatatawad ko an saindang sala, asin an saindang kasalan dai ko na gigirumdomon.” (Jeremias 31:34) Boot daw sabihon kaini na kun si Jehova magpatawad dai na nia natatandaan an mga kasalan? Imposibleng magin siring kaiyan. An Biblia nagsasaysay sa sato kan dapit sa mga kasalan nin dakol na indibiduwal na pinatawad ni Jehova, kabale si David. (2 Samuel 11:​1-​17; 12:​1-​13) Malinaw na aram pa man giraray ni Jehova an mga sala na nakomiter ninda, asin maninigo na kita iyo man. An rekord kan saindang mga kasalan, pati kan saindang pagsolsol asin kan pagpatawad nin Dios, prineserbar para sa satong pakinabang. (Roma 15:4) Ano, kun siring, an boot sabihon kan Biblia kun sinasabi kaiyan na dai na ‘ginigirumdom’ ni Jehova an mga kasalan kan mga pinatawad nia?

13. (a) Ano an kabale sa kahulogan kan berbo sa Hebreo na trinadusir na ‘gigirumdomon ko’? (b) Sa pagsabi ni Jehova na, “An saindang kasalan dai ko na gigirumdomon,” ano an sinisierto nia sa sato?

¹³ An berbo sa Hebreo na trinadusir na ‘gigirumdomon ko’ dai sana nangangahulogan na kulibaton an nakaagi. Sono sa Theological Wordbook of the Old Testament, kabale dian “an dugang pang kahulogan na paggibo nin tamang paghiro.” Kaya sa sentidong ini, kabale sa ‘paggirumdom’ sa kasalan an paghiro tumang sa mga nagkasala. Kan sabihon ni propeta Oseas mapadapit sa sumbikalan na mga Israelita, “Gigirumdomon nia [ni Jehova] an saindang kaliwagan,” boot sabihon kan propeta na si Jehova mahiro tumang sa sainda huli sa dai ninda pagsolsol. Sa siring, an natatadang kabtang kan bersikulo nagsasabi pa: “Tatawan nia nin atension an saindang mga kasalan.” (Oseas 9:9) Sa ibong na lado, sa pagsabi ni Jehova na, “An saindang kasalan dai ko na gigirumdomon,” sinisierto nia sa sato na oras na patawadon nia an sarong nagsosolsol na nagkasala, dai sia mahiro tumang sa saiya huli sa mga kasalan na iyan pag-abot nin panahon. (Ezequiel 18:​21, 22) Sa siring naglilingaw sia sa sentido na dai nia pigpaparakulibat an satong mga kasalan tanganing pagparaakusaron o pagparakastigohon kita. Paagi kaiyan si Jehova nagtatao nin marahayon na halimbawa tanganing arogon niato sa satong pagtratar sa iba. Kun lumataw an mga dai pagkakaoyon, pinakamarahay na dai pag-ungkaton an nakaaging mga kasalan na uminoyon na kamong patawadon kaidto.

Kumusta Man an mga Epekto?

14. Taano an kapatawadan ta dai nangangahulogan na an nagsosolsol na nagkasala libre na sa gabos na epekto kan saiyang salang dalan?

¹⁴ An pagigin andam daw na magpatawad ni Jehova nangangahulogan na an nagsosolsol na nagkasala libre na sa gabos na epekto kan saiyang salang dalan? Dai man. Dai kita puedeng magkasala na libre sa penalidad. Si Pablo nagsurat: “Ano man an itinatanom nin tawo, ini man an saiyang aanihon.” (Galacia 6:7) Tibaad atubangon niato an nagkapirang epekto kan satong ginibo o mga problema, alagad pakatapos na sia magpatawad, dai pinapangyayari ni Jehova na may mangyaring kasakitan sa sato. Kun may maglataw na mga problema, an sarong Kristiano dai maninigong mag-isip, ‘Seguro kinakastigo ako ni Jehova huli sa nakaaging mga kasalan.’ (Ikomparar an Santiago 1:13.) Sa ibong na lado, dai kita pinalilibre ni Jehova sa gabos na epekto kan satong salang mga ginigibo. Diborsio, dai ginustong pagbados, helang na ikinaolakit paagi sa pagdodorog, nawarang pagtitiwala o paggalang​—an gabos na ini tibaad mamondong mga epekto nin kasalan, asin dai kita poprotehiran dian ni Jehova. Tandaan na dawa pinatawad nia si David sa saiyang mga kasalan may koneksion ki Bat-seba asin Urias, dai prinotehiran ni Jehova si David sa kapahapahamak na mga epektong kasunod.​—2 Samuel 12:​9-​14.

15, 16. Paano nakikinabang sa ley na nasusurat sa Levitico 6:​1-7 kapwa an biktima asin an nagkasala?

¹⁵ An satong mga kasalan tibaad magkaigwa man nin iba pang mga epekto. Estudyare, halimbawa, an pagkasaysay sa Levitico kapitulo 6. Digdi an Ley ni Moises tinatawan nin atension an sarong situwasyon na an saro nakakomiter nin magabat na sala sa pag-agaw sa mga rogaring nin sarong kapwa Israelita paagi sa paghabon, pangingikil, o pandadaya. Dangan an nagkasala nagnenegar na sia may sala, na nangangahas pa ngani na magsumpa nin putik. Iyan pagpasuruhay na dai nin ikinatataong prueba an man-ibong-ibong na lado. Minsan siring, kan huri an nagkasala pinurisaw kan saiyang konsensia asin nagtuga kan saiyang kasalan. Tanganing mapatawad nin Dios, tolo pa an kaipuhan niang gibohon: ibalik an saiyang kinua, bayadan an biktima nin multa na 20 porsiento, asin magdolot nin lalaking karnero bilang dolot para sa pagkakasala. Dangan, an ley nagsasabi: “An saserdote dapat na gumibo nin pagtubos para sa saiya sa atubangan ni Jehova, kaya dapat na patawadon sia.”​—Levitico 6:​1-7; ikomparar Mateo 5:​23, 24.

¹⁶ An ley na ini maheherakon na probisyon hale sa Dios. Nakinabang dian an biktima, na an rogaring iinuli asin daing duwa-duwa na naginhawahan na marhay kan sa katapustapusi akoon kan nagkasala an saiyang kasalan. Kadungan kaiyan, nakinabang man sa ley an saro na an konsensia sa katapustapusi nagpahiro sa saiya na admitiron an saiyang pagkakasala asin itanos an saiyang sala. Sa katunayan, kun habo niang gibohon iyan, mayo nin kapatawadan para sa saiya hale sa Dios.

17. Kun may iba na nadanyaran kan satong mga kasalan, ano an linalaoman ni Jehova na gigibohon niato?

¹⁷ Minsan ngani bako na kitang sakop kan Ley ni Moises, tinatawan kita kaiyan nin mahalagang marhay na pakarorop sa kaisipan ni Jehova, kabale an saiyang punto de vista dapit sa kapatawadan. (Colosas 2:​13, 14) Kun may ibang nadanyaran o nabiktima kan satong mga kasalan, naoogma si Jehova kun ginigibo ta an satong makakaya na ‘itanos an sala.’ (2 Corinto 7:11) Kalabot digdi an pag-ako sa satong kasalan, pag-admitir sa satong pagkakasala, asin paghagad pa ngani nin dispensasyon sa biktima. Dangan puede na kitang makiolay ki Jehova basado sa atang ni Jesus asin mamatean an kaginhawahan sa malinig na konsensia asin an kasegurohan na kita pinatawad na nin Dios.​—Hebreo 10:​21, 22.

18. Anong disiplina an tibaad kaiba kan pagpatawad ni Jehova?

¹⁸ Arog nin siisay man na mamomoton na magurang, si Jehova tibaad magtao nin kapatawadan na may kaibang disiplina. (Talinhaga 3:​11, 12) Tibaad kaipuhan na butasan kan nagsosolsol na Kristiano an saiyang pribilehio na maglingkod bilang magurang sa kongregasyon, ministeryal na lingkod, o payunir. Tibaad makolog para sa saiya na mawara sa laog nin sarong peryodo nin panahon an mga pribilehio na minahal niang marhay. Minsan siring, an siring na disiplina dai nangangahulogan na nawara sa saiya an pabor ni Jehova o na nagsayuma si Jehova na magpatawad. Dugang pa, dapat tang girumdomon na an disiplina hale ki Jehova prueba kan saiyang pagkamoot sa sato. An pag-ako asin pag-aplikar kaiyan para sa satong pinakaikararahay asin puedeng gumiya sa buhay na daing katapusan.​—Hebreo 12:​5-​11.

19, 20. (a) Kun kamo nakakomiter nin mga sala, taano ta dai kamo maninigong mag-isip na dai na kamo maaabot kan pagkaherak ni Jehova? (b) Ano an ipaliliwanag sa sunod na artikulo?

¹⁹ Kanigoan kanakagiginhawa na maaraman na kita naglilingkod sa Dios na “andam na magpatawad”! An hineheling ni Jehova bako sanang an satong mga kasalan asin sala. (Salmo 130:​3, 4) Aram nia an nasa satong puso. Kun sa pagmate nindo an saindong puso laglag asin ronot huli sa nakaaging mga sala, dai kamo magkonklusyon na dai na kamo maaabot kan pagkaherak ni Jehova. Ano man na mga sala an tibaad nagibo nindo, kun kamo tunay na nagsolsol, naggibo nin mga paagi na itanos an sala, asin odok na namibi para sa kapatawadan ni Jehova basado sa pinabolos na dugo ni Jesus, lubos kamong makakokompiar na an mga tataramon sa 1 Juan 1:9 aplikado sa saindo: “Kun ituga niato an satong mga kasalan, sia fiel asin matanos tanganing ipatawad sa sato an satong mga kasalan asin linigan kita sa gabos na kabikoan.”

²⁰ Ineenkaminar kita kan Biblia na arogon an pagpatawad ni Jehova sa satong mga tratamiento sa lambang saro. Minsan siring, sagkod saen kita puedeng laoman na magpatawad asin maglingaw kun an iba magkasala tumang sa sato? Ipaliliwanag ini sa minasunod na artikulo.

[Nota sa Ibaba]

Ano an Isisimbag Nindo?

◻ Taano si Jehova ta “andam na magpatawad”?

◻ Paano ilinaladawan kan Biblia an pagigin lubos kan pagpatawad ni Jehova?

◻ Kun si Jehova nagpapatawad, sa anong sentido na sia naglilingaw?

◻ Ano an linalaoman ni Jehova na gigibohon niato kun may iba na nadanyaran kan satong mga kasalan?

[Retrato sa pahina 12]

Kun may iba na nadanyaran kan satong mga kasalan, linalaoman ni Jehova na kita magbayad para sa danyos