Madali Na an Mamuraway na Katalingkasan Para sa mga Aki nin Dios

“An mga linalang ipinasakop sa kasayangan . . . basado sa paglaom na an mga linalang mismo bubutasan man hale sa kaoripnan sa kalapaan asin magkakaigwa kan mamuraway na katalingkasan kan mga aki nin Dios.”—ROMA 8:20, 21.

 1. Paano ipinanganino kaidtong Aldaw nin Pagtubos an atang ni Jesus?

ITINAO ni Jehova an saiyang bugtong na Aki bilang pantubos na atang na nagbukas kan dalan pasiring sa langitnon na buhay para sa 144,000 na tawo asin daing sagkod na mga oportunidad sa daga para sa iba pang tawo. (1 Juan 2:​1, 2) Siring sa sinabi sa sinundan na artikulo, an atang ni Jesus para sa pinaniaki sa espiritung mga Kristiano ipinanganino kan an halangkaw na saserdote kan Israel mag-atang nin baka bilang dolot manongod sa kasalan para sa saiyang sadiri, sa saiyang kairiba sa harong, asin sa tribo ni Levi sa taonan na Aldaw nin Pagtubos. Sa aldaw man sanang iyan, sia nag-aatang nin sarong kanding bilang dolot manongod sa kasalan para sa gabos na iba pang Israelita, kun paanong an atang ni Cristo pakikinabangon an katawohan sa pankagabsan. Sarong buhay na kanding an nagdadara parayo sa simbolikong paagi kan daramay na kasalan kan banwaan kan nakaaging taon, na nawawara sa kaawagan.a​—Levitico 16:​7-​15, 20-​22, 26.

2, 3. Ano an boot sabihon kan pahayag ni Pablo na nakarekord sa Roma 8:​20, 21?

² Pakatapos na sumaryohon an paglaom kan mga tawo na magigin langitnon na “mga aki nin Dios,” si apostol Pablo nagsabi: “An odok na paglaom kan mga linalang naghahalat sa paghahayag kan mga aki nin Dios. Huli ta an mga linalang ipinasakop sa kasayangan, bakong sa sadiring boot kaiyan kundi paagi sa saiya na nagpasakop kaiyan, basado sa paglaom na an mga linalang mismo bubutasan man hale sa kaoripnan sa kalapaan asin magkakaigwa kan mamuraway na katalingkasan kan mga aki nin Dios.” (Roma 8:​14, 17, 19-21) Ano an kahulogan kan pahayag na ini?

³ Kan an satong apoon na si Adan lalangon bilang sangkap na tawo, sia sarong “aki nin Dios.” (Lucas 3:38) Huli sa pagkakasala, sia ‘napaoripon sa kalapaan’ asin ipinamana an kamugtakan na ini sa rasa nin tawo. (Roma 5:12) An Dios nagtogot na mamundag an mga tawo na napaaatubang sa “kasayangan” huli sa saindang minanang pagkabakong sangkap, alagad sia nagtao nin paglaom paagi sa “banhi,” si Jesu-Cristo. (Genesis 3:​15; 22:​18; Galacia 3:16) An Kapahayagan 21:​1-4 nagsasabi dapit sa panahon na an ‘kagadanan, pagmondo, pagtangis, asin kolog mawawara na.’ Mantang ini sarong panuga sa “katawohan,” sinisierto sa sato kaiyan na may sarong bagong sosyedad nin mga tawo sa daga na namumuhay na sakop kan pamamahala kan Kahadean na makaeeksperyensia nin pagpaomay sa isip asin hawak sa sangkap na salud asin buhay na daing katapusan bilang daganon na “mga aki nin Dios.” Durante kan Sangribong Taon na Paghade ni Cristo, an makinuyog na katawohan “bubutasan . . . hale sa kaoripnan sa kalapaan.” Pakatapos na magmaimbod ki Jehova durante nin pangultimong pagbalo, sinda magigin talingkas na sagkod lamang sa minanang kasalan asin kagadanan. (Kapahayagan 20:​7-10) Dangan idtong mga nasa daga “magkakaigwa kan mamuraway na katalingkasan kan mga aki nin Dios.”

Sinda Nagsasarabing “Madia!”

 4. Ano an kahulogan kan ‘pagkua kan tubig nin buhay na daing bayad’?

⁴ Makangangalas nanggad na paglaom an iinaatubang sa katawohan! Bakong makangangalas na an pinaniaki sa espiritung mga Kristiano na yaon pa digdi sa daga maigot na nangengenot sa pagsabi sa iba manongod dian! Bilang an magigin kabtang kan “nobya” kan pinamuraway na Kordero, si Jesu-Cristo, an linahidan na natatada kalabot sa kaotoban kan makahulang mga tataramon na ini: “An espiritu asin an nobya padagos na nagsasabi: ‘Madia!’ Asin an siisay man na makadangog magsabi: ‘Madia!’ Asin an siisay man na napapaha dumolok; an siisay man na boot kumua kan tubig nin buhay na daing bayad.” (Kapahayagan 21:​2, 9; 22:​1, 2, 17) Dai, an mga pakinabang sa pantubos na atang ni Jesus bakong limitado sa 144,000 na linahidan. An espiritu nin Dios padagos na nagpupunsionar sa mga natatada kan grupong nobya digdi sa daga sa pagsabi nin “Madia.” An siisay man na nakadadangog na napapaha para sa katanosan inaagdang magsabing “Madia,” na pinakikinabang an saiyang sadiri sa abundang probisyon ni Jehova para sa kaligtasan.

 5. Sairisay an ikinaoogmang makaibahan kan Mga Saksi ni Jehova?

⁵ An Mga Saksi ni Jehova igwa nin pagtubod sa probisyon nin Dios para sa buhay paagi ki Jesu-Cristo. (Gibo 4:12) Sinda naoogma na makaibahan ninda an mga sadiosan an puso na nagmamawot na manodan an mga katuyohan nin Dios asin gibohon an saiyang kabotan. An saindang mga Kingdom Hall bukas sa gabos na nagmamawot na ‘dumolok asin kumua kan tubig nin buhay na daing bayad’ sa “panahon [na ini] kan katapusan.”​—Daniel 12:4.

Mga Pagbabago sa Paglihis nin Panahon

 6. Paano nagpunsionar an espiritu nin Dios sa mga lingkod ni Jehova sa manlaenlaen na peryodo nin panahon?

⁶ An Dios may panahon na gibohon an saiyang mga katuyohan, asin ini nakaaapektar sa saiyang tratamiento sa mga tawo. (Eclesiastes 3:1; Gibo 1:7) Minsan ngani an espiritu nin Dios napasa mga lingkod nia kan mga panahon bago kan mga Kristiano, sinda dai pinaniaki bilang saiyang espirituwal na mga aki. Minsan siring, poon ki Jesus, uminabot an panahon ni Jehova na gamiton an banal na espiritu tanganing ipaniaki an dusay na mga lalaki asin babae pasiring sa langitnon na pamana. Asin kumusta man sa satong kaaldawan? An iyo man sanang espiritu nagpupunsionar sa “ibang karnero” ni Jesus, alagad dai kaiyan pinupukaw sa sainda an paglaom asin kamawotan para sa langitnon na buhay. (Juan 10:16) Igwa kan paglaom na itinao nin Dios na buhay na daing sagkod sa sarong paraisong daga, sinda magayagayang nagsusuportar sa linahidan na natatada sa pagtao nin patotoo durante kan peryodong ini nin pagliliwat hale sa daan na kinaban pasiring sa matanos na bagong kinaban nin Dios.​—2 Pedro 3:​5-13.

 7. Sa anong gibohon na pag-ani interesado an Mga Estudyante sa Biblia, alagad ano an aram ninda manongod sa paraiso?

⁷ An Dios nagpoon na ‘darahon an dakol na aki sa kamurawayan’ paagi sa pagbubo kan banal na espiritu kan Pentecostes 33 C.E., asin minalataw na nagtalaan sia nin panahon tanganing kompletohon an espirituwal na “Israel nin Dios” na may total na 144,000. (Hebreo 2:​10; Galacia 6:​16; Kapahayagan 7:​1-8) Magpoon kan 1879, an gibohon na pag-ani na kalabot an linahidan na mga Kristiano parateng sinasambit sa magasin na ini. Alagad an Mga Estudyante sa Biblia (ngonyan inaapod na Mga Saksi ni Jehova) nakaaaram man na an Kasuratan nag-aalok kan paglaom na buhay na daing sagkod sa sarong paraisong daga. Halimbawa, an luwas kan Watch Tower na Hulyo 1883 nagsabi: “Kun mapatindog na ni Jesus an saiyang kahadean, magapos na an maraot, asin iba pa, an dagang ini magigin paraiso, . . . asin an gabos na nasa saindang lolobngan maistar dian. Asin paagi sa pagigin makinuyog sa mga ley kaiyan sinda puedeng mabuhay sagkod lamang dian.” Mantang naghahaloy, an pag-ani sa mga linahidan nagdikit, asin luway-luway na an mga indibiduwal na bakong langitnon an paglaom inani pasiring sa organisasyon ni Jehova. Mientras tanto, tinawan nin Dios nin risang gayong pakarorop an saiyang linahidan na mga lingkod, namundag giraray na mga Kristiano.​—Daniel 12:3; Filipos 2:​15; Kapahayagan 14:​15, 16.

 8. Paano nagkaigwa nin pakasabot manongod sa daganon na paglaom kan enot na mga taon nin 1930?

⁸ Partikularmente poon kan 1931 na nakikiasosyar sa Kristianong kongregasyon an mga may daganon na paglaom. Kan taon na idto, si Jehova nagtao nin kaliwanagan sa natatada kan pinaniaki sa espiritung mga Kristiano na masabotan na an Ezequiel kapitulo 9 nanonongod sa daganon na grupong ini, na tinatandaan para sa pagkaligtas pasiring sa bagong kinaban nin Dios. Kan 1932 ikinonklusyon na an siring na mga arog karnero sa presenteng panahon ipinanganino kan kaibaiba ni Jehu na si Jonadab. (2 Hade 10:​15-17) Kan 1934 lininaw na an “mga Jonadab” maninigong “ikonsagrar,” o idusay, an saindang sadiri sa Dios. Kan 1935 an “dakulang kaburonyogan,” o “dakulang kadaklan”​—na ipinamugtak kaidto na sarong sekondaryong espirituwal na grupo na magigin “kairiba” kan nobya kan Cristo sa langit—​namidbid bilang an ibang karnero na may daganon na paglaom. (Kapahayagan 7:​4-​15; 21:​2, 9; Salmo 45:​14, 15) Asin nangorogna poon kaidtong 1935 na an mga linahidan nangengenot sa paghanap sa tanos na mga tawo na naghihimuyawot na mabuhay sagkod lamang sa paraiso digdi sa daga.

 9. Pakalihis nin 1935, taano an nagkapirang Kristiano ta nagpondo sa pakikikabtang sa mga emblema sa Pamanggihan nin Kagurangnan?

⁹ Pakalihis nin 1935 an nagkapirang Kristiano na dating nakikikabtang sa tinapay asin arak sa Pamanggihan nin Kagurangnan nagpondo sa pakikikabtang. Taano? Huli ta sinda nakarealisar na an saindang paglaom daganon, bakong langitnon. Sabi kan sarong babae na nabautismohan kan 1930: “Dawa ngani [an pakikikabtang] ibinibilang na tamang gibohon, nangorogna para sa maigot na pambilog na panahon na mga ministro, nungka akong nakombensir na igwa ako nin langitnon na paglaom. Dangan, kan 1935, lininaw sa samo na igwa nin tinitipon na sarong dakulang kadaklan na may paglaom na mabuhay sagkod lamang digdi sa daga. An dakol sa samo naggayagayang masabotan na kami kabtang kan dakulang kadaklan na iyan, asin nagpondo kami sa pakikikabtang sa mga emblema.” Pati an Kristianong mga publikasyon nagbago an laog. Minsan ngani an mga publikasyon kaidtong nakaaging mga taon dinisenyo sa pangenot para sa pinaniaki sa espiritung mga parasunod ni Jesus, poon kan 1935 an The Watchtower asin iba pang mga literatura kan ‘fiel na oripon’ nagtao nin espirituwal na kakanon na tama sa mga pangangaipo kapwa kan linahidan asin kan saindang kairiba na may daganon na paglaom.​—Mateo 24:​45-​47.

10. Paano tibaad masalidahan an sarong bakong fiel na linahidan?

¹⁰ Ipamugtak na an sarong linahidan magin bakong fiel. Magkakaigwa daw nin kasalihid? Dakol man na ipinarisa si Pablo sa saiyang paliwanag kan simbolikong poon nin olibo. (Roma 11:​11-​32) Kun an sarong pinaniaki sa espiritu kaipuhan na salidahan, posibleng itatao nin Dios an langitnon na pag-apod sa saro na an pagtubod arogan sa pagtao nin sagradong paglilingkod sa saiya sa dakol nang taon.​—Ikomparar an Lucas 22:​28, 29; 1 Pedro 1:​6, 7.

Dakol na Dahelan Para sa Pagpasalamat

11. Ano man an satong paglaom, ano an sinisierto sa sato kan Santiago 1:17?

¹¹ Saen man na lugar kita naglilingkod ki Jehova nin fiel, paninigoan nia an satong mga pangangaipo asin tanos na mga kamawotan. (Salmo 145:16; Lucas 1:​67-​74) Baga man kita may tunay na langitnon na paglaom o an satong paglaom daganon, kita may dakol na marahay na dahelan na magpasalamat sa Dios. Pirme niang ginigibo an para sa pinakaikararahay kan mga namomoot sa saiya. Sinabi ni disipulo Santiago na “an lambang marahay na balaog asin lambang sangkap na regalo hale sa itaas, huling iyan naghahale sa Ama kan langitnon na mga liwanag,” si Jehova Dios. (Santiago 1:17) Pag-adalan niato an nagkapira sa mga balaog asin bendisyon na ini.

12. Taano ta masasabi niato na si Jehova nagtao sa lambang saro kan saiyang fiel na mga lingkod nin makangangalas na paglaom?

¹² Si Jehova nagtao nin makangangalas na paglaom sa kada saro kan saiyang fiel na mga lingkod. Inapod nia an nagkapira pasiring sa langitnon na buhay. Sa saiyang mga saksi kan mga panahon bago kan mga Kristiano, si Jehova nagtao nin marahayon na paglaom na pagkabuhay liwat pasiring sa buhay na daing katapusan digdi sa daga. Halimbawa, si Abraham nagtutubod sa pagkabuhay liwat asin hinalat “an siudad na may tunay na mga pundasyon”​—an langitnon na Kahadean na sa pamamahala kaiyan sia bubuhayon liwat pasiring sa daganon na buhay. (Hebreo 11:​10, 17-​19) Sa giraray, sa panahon na ini kan katapusan, an Dios nagtatao sa minilyon kan paglaom na buhay na daing katapusan sa sarong paraisong daga. (Lucas 23:43; Juan 17:3) Segurado nanggad, an siisay man na tinawan ni Jehova kan siring na marahayon na paglaom maninigong magkaigwa nin hararom na pagpasalamat dian.

13. Paano nagpunsionar an banal na espiritu nin Dios sa saiyang banwaan?

¹³ Si Jehova nagtatao kan saiyang banal na espiritu bilang balaog sa saiyang banwaan. An mga Kristiano na tinawan nin langitnon na paglaom linahidan nin banal na espiritu. (1 Juan 2:​20; 5:​1-4, 18) Pero, an mga lingkod nin Dios na may daganon na paglaom tinatabangan asin ginigiyahan kan espiritu. Kabale digdi si Moises, na igwa kan espiritu ni Jehova, kapareho kan 70 lalaki na ninombrahan tanganing tabangan sia. (Bilang 11:​24, 25) Sa irarom kan impluwensia kan banal na espiritu, si Bezalel naglingkod bilang ekspertong artesano may koneksion sa tabernakulo nin Israel. (Exodo 31:​1-11) An espiritu nin Dios napasa ki Gedeon, Jefte, Samson, David, Elias, Eliseo, asin iba pa. Minsan ngani an mga indibiduwal na ini kan suanoy na mga panahon nungkang dadarahon sa langitnon na kamurawayan, sinda giniyahan asin tinabangan kan banal na espiritu, kapareho kan ibang karnero ni Jesus ngonyan. Kaya, kun siring, an pagkaigwa kan espiritu nin Dios dai nangangahulogan na kita igwa na man nin langitnon na pag-apod. Pero, an espiritu ni Jehova nagtatao nin paggiya, tinatabangan kita na maghulit asin otobon an iba pang itinao nin Dios na asignasyon, nagtatao sa sato nin kapangyarihan na lihis sa ordinaryo, asin nagpapaluwas sa sato kan mga bunga kaiyan na pagkamoot, kagayagayahan, katoninongan, pakatios, kabootan, karahayan, pagtubod, kahoyoan, asin pagpopogol sa sadiri. (Juan 16:13; Gibo 1:8; 2 Corinto 4:​7-​10; Galacia 5:​22, 23) Bako daw na kita maninigong magin mapagpasalamat para sa maboot na balaog na ini nin Dios?

14. Paano kita nakikinabang sa balaog nin Dios na kaaraman asin kadonongan?

¹⁴ An kaaraman asin kadonongan mga balaog nin Dios na maninigo niatong pasalamatan, baga man an satong paglaom langitnon o daganon. An tamang kaaraman manongod ki Jehova nakatatabang sa sato na “makasierto sa orog na mahalagang mga bagay” asin “maglakaw na angay ki Jehova sa katuyohan na lubos na makapaogma sa saiya.” (Filipos 1:​9-​11; Colosas 1:​9, 10) An diosnon na kadonongan nagseserbing proteksion asin giya sa buhay. (Talinhaga 4:​5-7; Eclesiastes 7:​12) An tunay na kaaraman asin kadonongan basado sa Tataramon nin Dios, asin an kadikit na natatadang linahidan nangorognang naaakit sa sinasabi kaiyan manongod sa saindang langitnon na paglaom. Minsan siring, an pagkamoot sa Tataramon nin Dios asin marahay na pakasabot dian bakong iyo an paagi nin Dios tanganing iparisa na kita inapod sa langitnon na buhay. An mga tawong arog ni Moises asin Daniel nagsurat pa ngani nin mga kabtang kan Biblia, alagad sinda bubuhayon liwat digdi sa daga. Baga man an satong paglaom langitnon o daganon, kita gabos nag-aako nin espirituwal na kakanon paagi sa inooyonan na “fiel asin madonong na oripon” ni Jehova. (Mateo 24:​45-​47) Kanigoan an pagpasalamat niato gabos sa kaaraman na nakamtan sa siring na paagi!

15. Ano an saro kan pinakadakulang mga balaog nin Dios, asin paano nindo iyan minamansay?

¹⁵ An saro sa pinakadakulang mga balaog nin Dios iyo an mamomoton na probisyon na pantubos na atang ni Jesus, na nagtatao sa sato nin pakinabang baga man kita may langitnon o daganon na paglaom. An Dios namoot “na gayo [sa kinaban nin katawohan] na itinao nia an saiyang Aking bugtong, tanganing an lambang maggibo nin pagtubod sa saiya dai mapahamak kundi magkaigwa nin buhay na daing katapusan.” (Juan 3:16) Asin an pagkamoot ni Jesus nagmotibar sa saiya na “magtao kan saiyang kalag bilang pantubos na karibay nin dakol.” (Mateo 20:28) Siring kan paliwanag ni apostol Juan, si Jesu-Cristo “sarong pampagian nin boot na atang para sa satong mga kasalan [kaidtong mga linahidan], alagad bako sanang kan sa sato kundi siring man kan sa bilog na kinaban.” (1 Juan 2:​1, 2) Huli kaini, kita gabos maninigong magkaigwa nin hararom na pagpasalamat huli sa mamomoton na probisyon na ini para sa kaligtasan pasiring sa daing sagkod na buhay.b

Magigin Presente daw Kamo?

16. Anong bantog na pangyayari an gigirumdomon pagkasolnop nin aldaw sa Abril 11, 1998, asin sairisay an maninigong magin presente?

¹⁶ An pagpasalamat para sa pantubos na itinao nin Dios paagi sa saiyang Aki maninigong magpahiro sa sato na magin presente sa mga Kingdom Hall o iba pang lugar na pagtitiriponan kan Mga Saksi ni Jehova pagsolnop kan aldaw sa Abril 11, 1998, tanganing girumdomon an kagadanan ni Cristo. Kan ponan nia an selebrasyon na ini kaiba kan saiyang fiel na mga apostol kan huring banggi kan saiyang daganon na buhay, si Jesus nagsabi: “Padagos na gibohon nindo ini sa paggirumdom sa sako.” (Lucas 22:​19, 20; Mateo 26:​26-​30) An kadikit na natatadang linahidan makikikabtang sa daing lebadurang tinapay, na nagrerepresentar sa daing kasalan na hawak na tawo ni Jesus, asin sa daing kasalak na mapulang arak, na nangangahulogan kan saiyang dugo na pinabolos bilang atang. An pinaniaki sa espiritung mga Kristiano sana an maninigong makikabtang huli ta sinda sana an kaiba sa bagong tipan asin sa tipan sa Kahadean patin igwa kan dai madedeharan na patotoo kan banal na espiritu nin Dios na an saindang paglaom langitnon. Minilyon na iba pa an magigin presente bilang may paggalang na mga paramasid na nagpapasalamat sa pagkamoot na ipinaheling nin Dios asin ni Cristo may koneksion sa atang ni Jesus na nagpagin posible sa buhay na daing sagkod.​—Roma 6:23.

17. Ano an maninigo niatong girumdomon mapadapit sa pagpaniaki sa espiritu?

¹⁷ An dating relihiosong mga paniniwala, makosog na mga emosyon huli sa pagkagadan nin sarong namomotan, mga kasakitan ngonyan na konektado sa buhay digdi sa daga, o an pakamateng nag-ako nin sarong espesyal na bendisyon hale ki Jehova tibaad maggiya sa nagkapira na masala sa paghona na para sa sainda an langitnon na buhay. Alagad maninigo na girumdomon niato gabos na dai kita pinagbobotan kan Kasuratan na makikabtang sa mga emblema sa Memorial tanganing ipaheling an satong pagpasalamat sa pantubos na atang ni Cristo. Dugang pa, an pagpaniaki sa espiritu “depende, bakong sa saro na nagmamawot ni sa saro na nagdadalagan, kundi sa Dios,” an Saro na nagpaniaki ki Jesus bilang espirituwal na Aki asin an nagdadara sa solamente 144,000 na iba pang aki sa kamurawayan.​—Roma 9:​16; Isaias 64:8.

18. Para sa kadaklan kan mga naglilingkod ki Jehova ngonyan, anong mga bendisyon an naghahalat sa ngapit?

¹⁸ An buhay na daing katapusan sa sarong paraisong daga an paglaom na itinao nin Dios sa dakulang mayoriya nin mga tawo na naglilingkod ki Jehova sa huring mga aldaw na ini. (2 Timoteo 3:​1-5) Dai mahahaloy, makakamtan ninda an makangangalas na paraisong ini. Mga prinsipe an mag-aadministrar sa panahon na iyan sa mga aktibidad digdi sa daga na sakop kan langitnon na pamamahala. (Salmo 45:16) An matoninong na mga kamugtakan maeksister mantang an mga nag-eerok sa daga sinusunod an mga ley nin Dios asin orog pang nakakanood manongod sa mga dalan ni Jehova. (Isaias 9:​6, 7; Kapahayagan 20:12) Magkakaigwa nin dakol na gibohon, pagtogdok nin mga harong asin pagsakop kan daga. (Isaias 65:​17-​25) Asin isip-isipon nindo an maogmang pagherelingan liwat nin mga miembro nin pamilya mantang an mga gadan minabalik sa buhay! (Juan 5:​28, 29) Pagkatapos nin pangultimong pagbalo, an gabos na karatan mawawara na. (Kapahayagan 20:​7-​10) Sagkod lamang pagkatapos kaiyan, an daga mapapano nin sangkap na mga tawo na ‘nabutasan hale sa kaoripnan sa kalapaan asin igwa kan mamuraway na katalingkasan kan mga aki nin Dios.’

[Nota sa ibaba]

Ano an Isisimbag Nindo?

◻ Ano an kahulogan kan ‘pagkua kan tubig nin buhay na daing bayad’?

◻ Baga man an satong paglaom langitnon o daganon, ano an mga dahelan niato na magpasalamat sa Dios?

◻ Anong taonan na selebrasyon an maninigong atenderan niato gabos?

◻ Para sa kadaklan sa banwaan ni Jehova, ano an natatagama sa ngapit?

[Retrato sa pahina 18]

3Minilyon an nagpoon na ‘kumua kan tubig nin buhay na daing bayad.’ Saro daw kamo sa sainda?